“Si Jose kag ang Tiggulutom,” Mga Sugilanon sa Daan nga Katipan (2022)
“Si Jose kag ang Tiggulutom,” Mga Sugilanon sa Daan nga Katipan
Si Jose kag ang Tiggulutom
Isa ka kahigayunan sang utod nga lalaki nga isahon ang iya pamilya
Gingutom ang pamilya ni Jacob tungod sang tiggulutom. Gani ginpakadto ni Jacob ang iya mga anak sa Egipto para magbakal sang pagkaon. Ginhawiran niya ang iya agot nga anak, si Benjamin, sa ila balay. Nahadlok sia nga madula man sa iya si Benjamin pareho nga nadula sa iya ang iya anak nga si Jose madamo na nga tinuig ang nagligad. Wala sia nakahibalo nga ginbaligya sang magulang niya nga mga kabataan si Jose bilang ulipon.
Sini nga tion, isa na ka bantog nga lider si Jose sa Egipto. Sia ang enkargado sa pagbaligya sang pagkaon sa tion sang tiggulutom. Nakigkita ang mag-ulutod kay Jose kag nagpangayo sa iya sang pagkaon. Wala sia nila makilala.
Nakilala sila ni Jose, pero nagpakuno-kuno sia nga wala makakilala sa ila. Ginpamangkot niya sila parte sa ila pamilya para mahibal-an kon bala ang iya amay kag utod nga si Benjamin buhi.
Ginhatagan ni Jose ang iya mga kauturan sang pagkaon. Ginhambalan niya sila nga indi magbalik para sa dugang nga pagkaon magluwas kon dala nila ang ila kamanghuran nga utod nga si Benjamin, upod sa ila.
Sang maubusan liwat sing pagkaon ang pamilya, nahibal-an ni Jacob nga kinahanglan gid niya nga paupdon si Benjamin sa iban niya nga kabataan pabalik sa Egipto. Nahadlok sa gihapon si Jacob nga palakton si Benjamin. Pero si Juda, isa sa mag-ululutod, nagpromisa nga halungan niya si Benjamin.
Sang magbalik ang mag-ulutod sa Egipto, ginpagwa ni Jose nga daw nangawat si Benjamin sang pilak nga kopita. Gusto niya makita kon nagbag-o na ang iya mga magulang. Nagpakitluoy si Juda kay Jose nga indi niya pagsilutan si Benjamin kundi nga silutan na lang si Juda.
Nalipay si Jose nga nagbag-o na ang iya mga magulang. Palangga nila si Benjamin amo nga gusto nila sia nga protektahan. Gani, sang ulihi, ginsugid na ni Jose kon sin-o sia.
Ginpatawad ni Jose ang iya mga utod sa pagbaligya sa iya para mangin ulipon. Siling ni Jose nga paagi ato sang Ginuo para mabuligan ang ila pamilya nga makalampuwas sa tiggulutom.
Nagbalik ang mga utod ni Jose sa ila amay nga si Jacob, kag ginsugid sa iya ang tanan nga nagkalatabo. Ginsaylo ni Jacob ang bilog niya nga pamilya sa Egipto.
Gin-abiabi ni Faraon ang pamilya ni Jacob. Ginhatagan niya sila sang duta kag kasapatan para madamo sila sing pagkaon. Ang pamilya ni Jacob nagpangabuhi sing malinong sa malawig nga panahon.