“Si Elias kag ang mga Pari ni Baal,” Mga Sugilanon sa Daan nga Katipan (2022)
“Si Elias kag ang mga Pari ni Baal,” Mga Sugilanon sa Daan nga Katipan
1 Mga Hari 18
Si Elias kag ang mga Pari ni Baal
Ang mga propeta sang Ginuo batok sa huwad nga mga pari
Ang ginharian sang Israel padayon nga nagaantos tungod wala sing tubig. Ginhambalan ni Haring Acab ang mga tawo nga sundon ang dios-dios nga gin-ngalanan nga si Baal.
Ginpadala sang Ginuo si Elias para makigkita kay Acab. Ginhagad ni Elias ang mga tawo nga magkadto sa ibabaw sang bukid. Gin-agda niya ang hari kag ang iya mga pari sa isa ka hangkat para mabal-an kon bala ang Ginuo ukon si Baal ang matuodtuod nga Dios.
Ginpaathag ni Elias ang hangkat. Sia kag ang mga pari magahalad sang baka sa altar, pero indi nila ini pagsindihan. Sa baylo, mangamuyo ang mga pari kay Baal para masindihan ang dabok. Dayon mangamuyo si Elias sa Ginuo nga sindihan ang dabok. Nakahibalo si Elias nga ang matuodtuod lamang nga Dios ang sarang magsindi sang kalayo.
Ang mga pari ni Baal nagpangamuyo sa ila dios-dios halin sa aga tubtob mag-udto, pero wala sing natabo. Ginlahogan sila ni Elias kag nagsiling nga basi tulog ang ila diosdios nga si Baal.
Naakig ang mga pari, naglumpat sa ibabaw sang altar, kag nagsinggit hasta maggab-i. Naglaum sila nga ang ila dios-dios magsabat, pero wala gid gihapon nagkalayo.
Dayon iya na turno ni Elias. Naghimo sia sing altar sa Ginuo, nagkutkot sang kalog-kalog sa palibot sang altar, kag ginhanda ang halad.
Ginpangabay ni Elias ang mga tawo nga pun-on sang tubig ang apat ka dram kag ibubo ini sa panggatong sa iya altar sing tatlo ka beses. Nabasa sang tubig ang panggatong kag ang altar. Nabuta ang bilog nga kalog-kalog.
Nagpangamuyo si Elias sa Ginuo nga ipakita ang matuodtuod nga gahum sang Dios. Nanaog ang kalayo sang Ginuo kag naupos ang halad, kahoy, mga bato, kag tubig. Nahibal-an sang mga tawo nga ang matuodtuod nga Dios amo ang Dios ni Elias. Nagpangamuyo si Elias nga matapos na ang tig-ilinit, kag ang Ginuo nagpadala sang ulan.