2 Mga Hari 22; 2 Mga Cronica 34–35

Si Haring Josias

Pagtinguha nga tumanon ang mga kasuguan sang Ginuo

Walo ka tuig ang edad ni Josias sang ginhimo sia nga hari sang Juda. Isa sia ka maayo nga hari nga nagpalangga sa Ginuo. Gusto niya nga buligan ang iya katawhan, ang mga Israelnon, nga magtuman sa Ginuo kag mag-untat sa pagsimba sa mga dios-dios. Sang nagdako na sia, ginsugdan niya kag sang iya katawhan ang pagkaayo sang templo kag pagpatahum sini liwat.

2 Mga Hari 22:1–2; 2 Mga Cronica 34:3–7

Samtang nagatrabaho ang mga tawo sa templo, si Helkias nga mataas nga pari, nakakita sang libro sang layi, isa ka tulun-an nga linukot nga nagaunod sang balaan nga mga kasulatan.

2 Mga Hari 22:3–9

Isa ka suluguon ang nagbasa sang libro kay Josias. Nabatian ni Josias ang mga pulong kag nasuboan tungod wala gintuman sang iya katawhan ang Ginuo. Gingisi niya ang iya mga bayo para ipakita nga nasuboan sia.

2 Mga Hari 22:10–13, 19

Ginhambalan niya si Helkias nga pamangkuton ang Ginuo kon ano ang dapat nila himuon. Si Helkias kag ang mga suluguon sang hari nagbisita kay Hulda. Isa sia ka babayi nga propeta, isa ka matinuohon nga lider nga inspirado sang Dios. Siling niya nga nalipay ang Ginuo kay Josias tungod ginabuligan niya ang katawhan nga magtuman. Nagpromisa ang Ginuo nga si Haring Josias magapuyo sa kalinong.

2 Mga Hari 22:12–20

Gusto ni Haring Josias nga tumanon sang iya katawhan ang ila mga pangako sa Ginuo. Ginpangabay niya sila nga saulugon ang Pascua agud mabuligan sila sa pagdumdom kon paano ginhilway sang Ginuo ang mga Israelnon sang una sa Egipto.

2 Mga Cronica 35:1–19