“Ang Ginuo Nagahambal kay Elias,” Mga Sugilanon sa Daan nga Katipan (2022)
“Ang Ginuo Nagahambal kay Elias,” Mga Sugilanon sa Daan nga Katipan
Ang Ginuo Nagahambal kay Elias
Pagpamati sa tingug sang Ginuo
Ginhambalan ni Haring Acab si Rayna Jezebel nga ginpierde sang Ginuo ang mga pari ni Baal. Nangakig si Jezebel kag nagsiling nga patyon niya ang propeta nga si Elias.
Para mangin luwas sa katalagman, ginbayaan ni Elias ang duta sang Israel. Nagbiyahe sia sing 40 ka adlaw kag 40 ka gab-i, nga nagapuasa samtang nagalakat. Dayon nakalab-ot sia sa Bukid sang Sinai kag nakakita sang kuweba nga pwede panagoan. Ginhambalan sang Ginuo si Elias nga magkadto sa putukputokan sang bukid para masugilanon Niya si Elias.
Nag-abot ang mabaskog nga hangin kag nagkalabuka ang mga bato sa palibot sa kuweba. Pagkatapos sina, gintay-og sang linog ang duta. Dayon may nagsugod nga kalayo. Nabatian ni Elias ang makusog nga tunog sang hangin, linog, kag kalayo. Pero ang tingug sang Ginuo wala didto sa mabaskog nga mga gahod.
Dayon nakabati si Elias sang nagahutik, malinong, mahinay nga tingug. Nahibal-an niya nga amo ato ang Ginuo. Ginpamangkot sang Ginuo si Elias kon ano ang iya ginahimo didto.
Siling ni Elias nga nagapanago sia para indi mabutang sa delikado. Ang tanan nga mga propeta ginpamatay, kag ang katawhan nagsikway sa Ginuo.
Ginpaumpawan sang Ginuo si Elias kag ginhambalan sia nga madamo pa sa mga Israelnon ang nagasimba gihapon sa Ginuo. Ginhambalan sang Ginuo si Elias nga magpauli kag ihanda ang isa pa ka propeta. Ang ngalan sining bag-o nga propeta amo si Eliseo.