“Si Moises sa Bukid sang Sinai,” Mga Sugilanon sa Daan nga Katipan (2022)
“Si Moises sa Bukid sang Sinai,” Mga Sugilanon sa Daan nga Katipan
Exodo 19–20; 24; 31–34; Deuteronomio 4–7
Si Moises sa Bukid sang Sinai
Pagbulig sa katawhan nga dumdumon ang Ginuo
Si Moises kag ang mga Israelnon nagpanglakaton sa kamingawan. Nakalab-ot sila sa bukid nga gintawag Bukid sang Sinai.
Nagsaka si Moises sa bukid para makigsugilanon sa Ginuo. Ginsiling sang Ginuo kay Moises nga gusto Niya nga makighambal sa mga Israelnon sing atubangay.
Nakalab-ot ang mga Israelnon sa tiilan sang Bukid sang Sinai, kag ginpapalibutan sang Ginuo ang bukid sang madamol nga panganod. Ara ang Ginuo sa panganod. Naghambal sia sa mga Israelnon kag ginhatagan sila sang mga kasuguan. Nagtay-og ang bukid samtang Sia nagahambal.
Exodo 19:16–19; 20:1–17; Deuteronomio 4:12–13, 33; 5:4–5
Nahadlukan ang mga Israelnon. Ginpangabay nila si Moises nga makighambal sa Ginuo para nga si Moises na lang ang maghambal sa ila sang kon ano ang gusto sang Ginuo.
Gindala ni Moises si Aaron kag ang 70 ka tigulang nga mga Israelnon sa bukid sa pagbaton sang dugang pa nga mga panudlo sang Ginuo. Nagpakita ang Ginuo sa ila.
Dayon ginhambalan sang Ginuo si Moises nga ibilin ang mga tigulang kag magsaka pa gid sa bukid. Nagtuman si Moises. Gingamit sang Ginuo ang Iya tudlo para isulat ang Iya layi kag mga kasuguan sa tapi-tapi nga mga bato. Sa sulod sang 40 ka adlaw, gintudloan sang Ginuo si Moises sang madamo nga mga butang.
Samtang ato si Moises sa Bukid sang Sinai, ang katawhan sang Israel gintak-an sa paghulat sa iya. Ginhambalan nila si Aaron nga maghimo sang mga istatwa nga ila simbahon pareho sang ila ginhimo sa Egipto. Gintipon ni Aaron ang tanan nila nga bulawan kag naghimo sang istatwa nga tinday.
Ginsimba sang mga Israelnon ang bulawan nga tinday kag naghatag sang mga halad. Nagsiling sila nga ang bulawan nga tinday, indi ang Ginuo, ang naghilway sa ila sa Egipto.
Nahibal-an sang Ginuo nga ang mga Israelnon nagasimba sa dios-dios kag nagakalipat na sa Iya. Ginsugo Niya si Moises nga magbalik kag hambalon ang mga tawo nga maghinulsol.
Nagpanaog si Moises halin sa Bukid sang Sinai kag nakita ang mga Israelnon nga nagasimba sa bulawan nga tinday. Grabe ang iya kaakig. Indi pa handa ang katawhan nga magtuman sang layi kag sang mga kasuguan nga ginsulat sang Ginuo. Ginbuka ni Moises ang mga tapi-tapi kag ginguba ang bulawan nga tinday. Ginbuligan niya ang mga Israelnon nga maghinulsol kag panumdumon ang ila matuod nga Dios.
Ginpangabay ni Moises ang Ginuo nga patawaron ang mga Israelnon kag maghimo liwat sang mga promisa upod sa ila. Nangako si Moises nga pangunahan kag tudloan sila.
Ginhambalan sang Ginuo si Moises nga maghimo sang bag-o nga tapi-tapi nga mga bato kag magbalik sa Bukid sang Sinai. Naghimo ang Ginuo sang bag-o nga promisa upod sa mga Israelnon kag ginhatag sa ila ang Iya Pulo ka Sugo.