“Si David kag si Goliat,” Mga Sugilanon sa Daan nga Katipan (2022)
“Si David kag si Goliat,” Mga Sugilanon sa Daan nga Katipan
1 Samuel 17
Si David kag si Goliat
Hangkat para atubangon ang higante
Ginaatake sang mga Filistinhon ang mga Israelnon. Kada adlaw isa ka higante nga Filistinhon nga ginatawag Goliat ang nagapanghangkat sa bisan sin-o nga Israelnon nga makig-away sa iya. Si Goliat mas dako kag mas mataas sangsa bisan kay sin-o, kag mapintas sia. Nagasuksok sia sang mabug-at nga hinganiban kag nagabitbit sang espada, bangkaw, kag dako nga taming. Wala gid sing may nangisog magbato sa iya.
Si David isa ka lamharon nga manugpahalab sang karnero nga may pagtuo sa Ginuo. Ang iya mga magulang nga lalaki mga soldado sang hangaway sang Israel. Isa ka adlaw, nagdul-ong si David sang pagkaon sa iya mga utod. Sang mag-abot sia sa kampo sang mga hangaway, nabatian niya ang hangkat ni Goliat.
Ginpamangkot ni David ang mga soldado kon ngaa wala sang nagadepensa sa Israel. Nangakig ang iya mga utod kag ginhambalan sia nga atipanon ang mga karnero. Pero nakahibalo si David nga depensahan sang Ginuo ang Israel.
Nakahibalo si Haring Saul parte sa pagtuo ni David, gani nagpangabay sia nga makigkita kay David. Ginhambalan ni David si Saul nga wala sia mahadlok makig-away kay Goliat. Ginpaathag ni David nga isa ka bes samtang iya ginabantayan ang iya mga karnero, nakapatay sia sang leon kag sang oso. Ginprotektahan sia sang Ginuo sadto, kag nakahibalo si David nga protektahan sia sang Ginuo subong.
Ginhatag ni Saul kay David ang iya hinganiban. Pero indi ini mag-igo, gani gin-uba ini ni David. Nagdesisyon sia nga makig-away nga wala sing hinganiban.
Namudyot si David sang lima ka mahining nga bato kag ginsulod sa isa ka suludlan. Ginkuha niya ang iya labyog kag sungkod sang manugpahalab kag naglakat para atubangon si Goliat.
Sang makita ni Goliat si David, nagsinggit sia kag ginyamuhat sia. Siling niya nga indi sia mapirde sang bata nga manugpahalab. Nagsabat sang singgit si David nga nagasalig sia nga protektahan sia sang Ginuo! Nagsiling si David nga pirdehon niya si Goliat para ipakita ang kagamhanan sang Ginuo.
Nagdalagan si David pakadto kay Goliat. Madasig niya nga ginhaboy ang bato gamit ang iya labyog. Nasakam si Goliat sang bato sa agtang, kag ang higante natumba sa duta. Ginbuligan sang Ginuo si David nga mapirde si Goliat nga wala nagagamit sing espada ukon hinganiban.
Sang makita sang mga Filistinhon nga napatay si Goliat, nagdinalagan sila sa kahadlok. Nagdaog ang mga Israelnon sa inaway. Nagsalig si David sa Ginuo, kag ginprotektahan sang Ginuo ang Israel.