“Si Jacob kag si Esau,” Mga Sugilanon sa Daan nga Katipan (2022)
“Si Jacob kag si Esau,” Mga Sugilanon sa Daan nga Katipan
Genesis 25–27
Si Jacob kag si Esau
Duha ka mag-utod kag isa ka pagkapanganay
Sanday Isaac kag Rebeca nagbata sang kapid nga lalaki, sanday Jacob kag Esau. Si Esau batid nga mangangayam. Si Jacob nangabuhi sang simple kag nagsunod sa Ginuo.
Una nga natawo si Esau. Sa masami ang una nga bata amo ang nagabaton sang bendisyon sang pagkapanganay sa iya amay. Ang pagkapanganay nagakahulugan nga pangunahan niya ang pamilya kag makabaton sang mas madamo nga kadutaan kag kasapatan para magbulig sa pag-atipan sang pamilya. Pero mas palangga ni Esau ang iya kaugalingon sangsa sa iya pamilya, kag wala niya ginasunod ang iya mga ginikanan kag ang Ginuo.
Isa ka adlaw nagpauli si Esau halin sa pagpangayam. Gutom sia kaayo kag nagpakitluoy nga pakan-on sia ni Jacob. Gusto sang Ginuo nga makuha ni Jacob ang bendisyon sang pagkapanganay tungod indi nagakaangay si Esau diri. Ginpangayo ni Jacob kay Esau nga ibaylo sa iya ang pagkapanganay para sa pagkaon. Nagpasugot si Esau kag ginbaylo ang iya pagkapanganay kay Jacob.
Genesis 25:23, 29–34; Mga Hebreo 11:20
Gusto ni Rebeca kag Isaac ang pinakamaayo para sa ila mga kabataan. Nasuboan sila nga padayon si Esau nga nagahimo sang iya lang gusto kag indi ang gusto sang Ginuo.
Nagtigulang si Isaac kag nabulag. Antes sia mapatay, ginpangabay niya si Esau nga mangayam kag magluto sang sapat para kaunon niya kag malipay.
Nahibaloan ni Rebeca nga tion na para ihatag ni Isaac ang bendisyon sang pagkapanganay.
Ginsugo ni Rebeca si Jacob nga magkuha sang duha ka sapat para iya lutuon antes magbalik si Esau. Dayon si Jacob ang makabaton sang bendisyon.
Nagbiste si Jacob nga daw si Esau kag gindala ang pagkaon sa iya amay. Ginhatag ni Isaac kay Jacob ang bendisyon sang pagkapanganay. Sang magbalik si Esau, naakig sia kaayo kay Jacob. Pero ang bendisyon nagkadto kay Jacob tungod nagtuman sia sang mga kasuguan sang Ginuo kag si Esau ya wala.