ចាប់ផ្ដើម—ម៉ោងជាអតិបរមា ៖ ១៥ នាទី

សូមធ្វើការអធិស្ឋានបើក ។

សូមណែនាំខ្លួន ។ សូមឲ្យអ្នករាល់គ្នាម្នាក់ៗចំណាយពេលមួយនាទីប្រាប់ឈ្មោះ និងអ្វីមួយអំពីខ្លួនអ្នក ។

សូមស្វាគមន៍មកកាន់ក្រុមភាពខ្លួនទីពឹងខ្លួនរបស់យើង !

អាន ៖ក្រុមនេះនឹងជួយអ្នករៀន បង្កើត ហើយប្រើគម្រោងថវិកា ។ អ្នកនឹងចាប់ផ្ដើមបង្កើតមូលនិធិមួយសម្រាប់ភាពអាសន្ន បង្កើតផែនការលុបបំបាត់បំណុល រៀនសន្សំប្រាក់សម្រាប់ការចំណាយនៅពេលអនាគត និងផែនការសម្រាប់ការចូលនិវត្តន៍ ។ សំខាន់បំផុតនោះ អ្នកនឹងរៀនបន្ថែមទៀតអំពីទំនាក់ទំនងរបស់អ្នកជាមួយព្រះវរបិតាសួគ៌ ហើយត្រូវបានអញ្ជើញឲ្យគ្រប់គ្រងប្រាក់របស់អ្នកតាមវិធីដែលធ្វើឲ្យទ្រង់សព្វព្រះទ័យ ។ ការប្រជុំក្រុមនីមួយៗចំណាយពេលប្រហែលជាពីរម៉ោង ។

តើការណ៍នេះដំណើរការយ៉ាងដូចម្ដេច ?

អាន ៖ក្រុមខ្លួនទីពឹងខ្លួនដំណើរការដូចជាក្រុមប្រឹក្សាមួយ ។ វាគ្មានគ្រូបង្រៀន ឬអ្នកជំនាញទេ ។ ផ្ទុយទៅវិញ អ្នកធ្វើតាមអ្វីដែលបានសរសេរនៅលើសម្ភារសិក្សាទាំងឡាយ ។ ដោយមានការដឹកនាំមកពីព្រះវិញ្ញាណ អ្នកនឹងជួយគ្នាដូចតទៅនេះ ៖

ចូលរួមដោយស្មើភាពក្នុងការពិភាក្សា និងសកម្មភាពនានា ។ ពុំគួរមាននរណាម្នាក់និយាយតែម្នាក់ឯងឡើយ ជាពិសេសអ្នកសម្របសម្រួល ។
ស្រឡាញ់ ហើយគាំទ្រគ្នា ។ បង្ហាញការចាប់អារម្មណ៍ សួរសំណួរ ហើយរៀនពីគ្នាទៅវិញទៅមក ។
ចែកចាយមតិយោបល់វិជ្ជមាន ហើយដែលពាក់ព័ន្ធ ។
ធ្វើ ហើយរក្សាសេចក្ដីសញ្ញាទាំងឡាយ ។

អែលឌើរ អិម រ័សុល បាឡឺដ បានបង្រៀនថា « គ្មានបញ្ហាណាមួយនៅក្នុងគ្រួសារ វួដ ឬស្តេកដែលមិនអាចដោះស្រាយបានឡើយ ប្រសិនបើយើងស្វែងរកដំណោះស្រាយតាមរបៀបរបស់ព្រះអម្ចាស់ ដោយការប្រឹក្សា—ជាការប្រឹក្សាដោយពិតប្រាកដ—ជាមួយគ្នាទៅវិញទៅមកនោះ » ( Counseling with Our Councils កំណែ [ ឆ្នាំ២០១២ ] ទំព័រ ៤ ) ។

សូមមើល ៖« ក្រុមខ្លួនទីពឹងខ្លួនរបស់ខ្ញុំ » ដែលមាននៅលើ srs.lds.org/videos ។ ( គ្មានវីដេអូឬ ? សូមរំលងទៅ « ដោយគ្មានគ្រូបង្រៀនម្នាក់ តើយើងនឹងដឹងអ្វីដែលត្រូវធ្វើតាមរបៀបណា ? » នៅ ទំព័រ ៣ ) ។

ពិភាក្សា ៖តើអ្វីទៅដែលធ្វើឲ្យក្រុមនៅក្នុងវីដេអូនេះមានភាពជោគជ័យ ? តើយើងនឹងធ្វើអ្វីខ្លះជាក្រុមដើម្បីមានបទពិសោធន៍ដ៏ផ្លាស់ប្ដូរជីវិតមួយ ?

ដោយគ្មានគ្រូបង្រៀនម្នាក់ តើយើងនឹងដឹងអ្វីដែលត្រូវធ្វើតាមរបៀបណា ?

អាន ៖វាងាយទេ ។ គ្រាន់តែធ្វើតាមសម្ភារសិក្សាទាំងឡាយប៉ុណ្ណោះ ។ ជំពូកនីមួយៗនៅក្នុងសៀវភៅលំហាត់នេះមានប្រាំមួយវគ្គ ៖

រាយការណ៍ ៖ ពិភាក្សាអំពីការរីកចម្រើនដែលអ្នកបានធ្វើនៅអំឡុងសប្ដាហ៍ចំពោះការតាំងចិត្តរបស់អ្នក ។
មូលដ្ឋានគ្រឹះ ៖ រំឭកឡើងវិញអំពីគោលការណ៍មួយនៃដំណឹងល្អដែលនឹងដឹកនាំទៅរកភាពខ្លួនទីពឹងខ្លួនខាងវិញ្ញាណដ៏ធំជាង ។
រៀន ៖ រៀនជំនាញជាក់ស្ដែងដែលនឹងដឹកនាំទៅរកភាពខ្លួនទីពឹងខ្លួនខាងសាច់ឈាមដ៏អស្ចារ្យជាង ។
ពិចារណា ៖ ស្ដាប់ព្រះវិញ្ញាណបរិសុទ្ធដើម្បីទទួលបានការបំផុសគំនិត ។
តាំងចិត្ត ៖ សន្យានឹងធ្វើតាមការតាំងចិត្តទាំងឡាយអំឡុងសប្ដាហ៍នោះដែលនឹងជួយអ្នកឲ្យមានការរីកចម្រើន ។
ធ្វើសកម្មភាព ៖ អំឡុងសប្ដាហ៍ អនុវត្តអ្វីដែលអ្នកបានរៀន ។

របៀបប្រើសៀវភៅលំហាត់នេះ

នៅពេលអ្នកមើលឃើញនូវការបំផុសភ្លាមៗទាំងនេះ សូមធ្វើតាមការដឹកនាំទាំងនេះ
អាន	មើល	ពិភាក្សា	ពិចារណា	សកម្មភាព
សុំមនុស្សម្នាក់អានឲ្យឮៗសម្រាប់ក្រុមទាំងមូល ។	ក្រុមទាំងមូលមើលវីដេអូ ។	សមាជិកក្រុមចែកចាយគំនិតរយៈពេលពីពីរទៅបួននាទី ។	សូមពិចារណា ស្មឹងស្មាត ហើយសរសេរដោយស្ងៀមស្ងាត់រៀងៗខ្លួនសម្រាប់រយៈពេលពីរទៅបីនាទី ។	សមាជិកក្រុមធ្វើកិច្ចការរៀងៗខ្លួន ឬជាមួយអ្នកដទៃតាមម៉ោងដែលបានកំណត់ ។

វិញ្ញាបនបត្របញ្ចប់វគ្គសិក្សា

អាន ៖សមាជិកក្រុមដែលចូលរួមការប្រជុំ ហើយរក្សាការតាំងចិត្តទាំងឡាយរបស់ខ្លួន អាចនឹងទទួលបានវិញ្ញាបនបត្រភាពខ្លួនទីពឹងខ្លួនមកពីមហាវិទ្យាល័យពាណិជ្ជកម្មអិល.ឌី.អែស. ។ សូមមើល ទំព័រ ២០៨ ។