រៀន—ម៉ោងជាអតិបរមា ៖ ៤៥ នាទី

ការពិភាក្សាសម្រាប់ថ្ងៃនេះ ៖

២ ការការពារគ្រួសាររបស់អ្នកឲ្យរួចផុតពីការលំបាក

គំនូររូបផ្ទះ — ផែនទីស្ដីពីភាពជោគជ័យនៃការគ្រប់គ្រងហិរញ្ញវត្ថុ

១. ការពារគ្រួសាររបស់អ្នកឲ្យរួចផុតពីការលំបាក

អាន ៖ការត្រៀមខ្លួនគឺជាគោលការណ៍មួយនៃដំណឹងល្អដ៏មានអនុភាព ។ ព្រះអម្ចាស់សន្យាថា « បើសិនជាអ្នករាល់គ្នាបានប្រុងប្រៀបទុកជាស្រេច នោះអ្នករាល់គ្នានឹងមិនត្រូវខ្លាចឡើយ » ( គ. និង ស. ៣៨:៣០ ) ។

បន្ទាប់ពីកាតព្វកិច្ចរបស់យើងដើម្បីថ្វាយចំពោះព្រះអម្ចាស់មុនគេបង្អស់តាមរយៈដង្វាយមួយភាគក្នុងដប់ និងដង្វាយផ្សេងៗ កាតព្វកិច្ចទីពីររបស់យើងគឺត្រូវធ្វើការដើម្បីការពារក្រុមគ្រួសាររបស់យើងពីការលំបាក ។ យើងអាចធ្វើកិច្ចការនេះបាន ដរាបណាយើងអភិវឌ្ឍទស្សនវិស័យរយៈពេលវែងប៉ុណ្ណោះ ។ នៅក្នុងជំពូកនេះយើងនឹងរៀនអំពីជំហានចំនួនពីរដើម្បីការពារក្រុមគ្រួសាររបស់យើងពីការលំបាកផ្នែកហិរញ្ញវត្ថុ ៖

បង្កើតមូលនិធិសម្រាប់ភាពអាសន្នរយៈពេលមួយខែ
ទទួលបានការធានារ៉ាប់រងគ្រប់គ្រាន់

ពិភាក្សា ៖សូមចំណាយពេលពីរបីនាទីដើម្បីមើលផែនទីស្ដីពីភាពជោគជ័យនៃការគ្រប់គ្រងហិរញ្ញវត្ថុ ។ ហេតុអ្វីអ្នកគិតថាការពារគ្រួសាររបស់អ្នកពីការលំបាកគឺជាអាទិភាពទីពីរបន្ទាប់ពីការបង់ដង្វាយមួយភាគក្នុងដប់ និងដង្វាយផ្សេងៗ ?

២. បង្កើតមូលនិធិសម្រាប់ភាពអាសន្នរយៈពេលមួយខែ ។

អាន ៖តាមរយៈការតាមដានការចំណាយរបស់អ្នកយ៉ាងហោចណាស់បួនសប្ដាហ៍ នោះអ្នកគួរស្គាល់ហើយនៅពេលនេះអំពីចំនួនទឹកប្រាក់ដែលតម្រូវឲ្យមានសម្រាប់ថ្លៃចំណាយសម្រាប់ការរស់នៅក្នុងមួយខែ ។ មូលនិធិសម្រាប់ភាពអាសន្នរយៈពេលមួយខែរបស់អ្នកគួរស្មើនឹងចំនួននេះ ។

សម្រាប់មូលនិធិសម្រាប់ភាពអាសន្នរយៈពេលមួយខែរបស់អ្នក អ្នកគួរសន្សំប្រាក់ទុកនៅក្នុងកន្លែងដ៏មានសុវត្ថិភាព ហើយអាចយកប្រើប្រាស់បាន ដូចជាគណនីធនាគារជាដើម ។ សូមកុំប្រើប្រាក់នេះសម្រាប់អ្វីមួយដែលពុំមែនសម្រាប់ភាពអាសន្នឡើយ ។ ប្រសិនបើអ្នកមានអាសន្នមួយ ហើយត្រូវប្រើប្រាក់មកពីមូលនិធិសម្រាប់ភាពអាសន្នរយៈពេលមួយខែ សូមចាប់ផ្ដើមដាក់ប្រាក់ចូលក្នុងមូលនិធិនេះរហូតដល់វាមានចំនួនដូចដើម ។ ក្រោយមកទៀត បន្ទាប់ពីអ្នកបានបង់សងរាល់បំណុលអតិថិជនរបស់អ្នកអស់ហើយ នោះអ្នកនឹងចាប់ផ្ដើមសន្សំប្រាក់ល្មមគ្រប់គ្រាន់ដើម្បីបង់ថ្លៃការចំណាយរបស់អ្នកសម្រាប់រយៈពេលបីខែទៅប្រាំមួយខែ ( យើងនឹងពិភាក្សាអំពីជំហាននេះនៅក្នុងជំពូកទី ៩ ) ។

អ្នកគួរធ្វើការដើម្បីបង្កើតមូលនិធិសម្រាប់ភាពអាសន្នរយៈពេលមួយខែឲ្យបានកាន់តែឆាប់កាន់តែល្អ ។ សូមដាក់ប្រាក់បន្ថែមនានាដែលអ្នកមានទៅក្នុងមូលនិធិសម្រាប់ភាពអាសន្នរហូតដល់វាមានចំនួនពេញលេញ ។ សូម្បីតែ អ្នកមានបំណុលក្ដី សូមធ្វើការបង់បំណុលអប្បបរមាដែលបានតម្រូវឲ្យធ្វើបានហើយ រហូតអ្នកបង្កើតបានមូលនិធិសម្រាប់ភាពអាសន្នរយៈពេលមួយខែសិន ។ ដើម្បីជួយពន្លឿនដល់ដំណើរការនេះ អ្នកគួរស្វែងរកការងារបន្ថែម ឬល្អជាង លក់វត្ថុដែលអ្នកពុំត្រូវការ ឬលុបបំបាត់ការចំណាយពុំចាំបាច់មួយចំនួនចោល ។

ពិភាក្សា ៖តើពរជ័យអ្វីខ្លះអាចកើតមានដល់គ្រួសាររបស់អ្នកដោយសារមានមូលនិធិសម្រាប់ភាពអាសន្នរយៈពេលមួយខែ ? ហេតុអ្វីអ្នកគួរបង្កើតមូលនិធិមួយសម្រាប់ភាពអាសន្នពីមុនការបង់សងបំណុល ?

៣. ទទួលបានការធានារ៉ាប់រងគ្រប់គ្រាន់

អាន ៖តើវានឹងជះឥទ្ធិពលដល់អ្នក ឬគ្រួសាររបស់អ្នកខាងហិរញ្ញវត្ថុតាមរបៀបណា ប្រសិនបើនរណាម្នាក់មានជំងឺធ្ងន់ ឬពិការ ឬប្រហែលជាស្លាប់នោះ ? តើអ្វីទៅដែលជាផលប៉ះពាល់ខាងហិរញ្ញវត្ថុនៃអ្វីមួយដូចជា ភ្លើងឆេះផ្ទះ ឬគ្រោះថ្នាក់រថយន្តធ្ងន់ធ្ងរមួយ ? ការលំបាកបែបនេះកើតឡើង ហើយប្រសិនបើយើងពុំបានត្រៀមខ្លួនទេ នោះវាអាចបង្កឲ្យមានបញ្ហាហិរញ្ញវត្ថុដ៏ធំ ។ ប្រភពការពារដ៏ល្អមួយចំពោះការលំបាកដែលអាចមានគឺការធានារ៉ាប់រង ។ធានារ៉ាប់រងគឺជាការរៀបចំមួយដែលអង្គភាពមួយ ( ជាធម្មតា ភ្នាក់ងារធានារ៉ាប់រង ) អះអាងទូទាត់សងបុគ្គលម្នាក់សម្រាប់ការលំបាកជាក់លាក់ជាការផ្លាស់ប្ដូរសម្រាប់ការបង់ថេរមួយ ។

ប្រធាន អិន អេលឌិន ថែនណឺ បានបង្រៀនថា « គ្មានអ្វីមួយជាក់លាក់នៅក្នុងជីវិតរបស់យើងឡើយ ដោយសារមានរឿងដែលពុំអាចរំពឹងទុកជាមុន ។ ជាមួយនឹងការកើនឡើងនៃ ថ្លៃចំណាយផ្នែកវេជ្ជសាស្ត្រ នោះការធានារ៉ាបរងផ្នែកសុខភាពគឺជាវិធីតែមួយគត់ដែលក្រុមគ្រួសារភាគច្រើនអាចបង់ថ្លៃសម្រាប់គ្រោះថ្នាក់ធ្ងន់ធ្ងរ ជំងឺ ឬមាតុភាពបាន ។… ការធានារ៉ាប់រងអាយុជីវិតផ្ដល់ប្រាក់ចំណូលជាបន្តបន្ទាប់នៅពេលអ្នកទិញសេវាកម្មធានារ៉ាប់រងអាយុជីវិត ។ គ្រួសារទាំងអស់គួរតែមានធានារ៉ាប់រងផ្នែកសុខភាព និងអាយុជីវិត » ( Constancy amid Change » Ensign ខែ វិច្ឆិកា ឆ្នាំ១៩៧៩ ទំព័រ ៨២ ) ។

ពិភាក្សា ៖ហេតុអ្វីការធានារ៉ាប់រងគឺជារឿងដ៏សំខាន់ ? តើពរជ័យអ្វីខ្លះអាចកើតចេញពីការមានការធានារ៉ាប់រងគ្រប់គ្រាន់ ?

អត្ថប្រយោជន៍នៃការធានារ៉ាប់រង

អាន ៖ការធានារ៉ាប់រងអាចជួយការពារអ្នកពីការបំផ្លិចបំផ្លាញផ្នែកហិរញ្ញវត្ថុដែលគ្រោះថ្នាក់ ឬការលំបាកផ្សេងទៀតអាចនាំឲ្យកើតមាន ។

សកម្មភាព ( ៥ នាទី )

សូមពិនិត្យឡើងវិញជាក្រុមនូវសាច់រឿងពីរខាងក្រោមនេះ ។ បន្ទាប់មកពិភាក្សាអំពីរបៀបដែលធានារ៉ាប់រងមានអត្ថប្រយោជន៍នៅក្នុងស្ថានភាពទាំងនេះ ។

សាច់រឿងទី ១ ៖ អ្នកបានជួបគ្រោះថ្នាក់រថយន្តមួយ ហើយវាគឺជាកំហុសរបស់អ្នក ។ រថយន្តរបស់អ្នកមានការខូចខាតយ៉ាងខ្លាំង រីឯរថយន្តរបស់ភាគីម្ខាងទៀតក៏ដូចគ្នាដែរ ។ អ្នកទាំងពីរនាក់ និងអ្នកបើកបរផ្សេងទៀតបានរងរបួសខ្លះ ហើយត្រូវទទួលការមើលថែផ្នែកវេជ្ជសាស្ត្រ ។ ថ្លៃសរុបដើម្បីជួសជុលរថយន្តទាំងពីរ និងដើម្បីបង់ថ្លៃផ្នែកវេជ្ជសាស្ត្រឡើងដល់ជាង ១៥,០០០ ។

	ដោយគ្មានការធានារ៉ាប់រង	ដោយមានការធានារ៉ាប់រង
ថ្លៃសរុប	១៥,០០០	១៥,០០០
ថ្លៃដែលក្រុមហ៊ុនធានារ៉ាប់រងចេញ	០	១២,០០០
ថ្លៃដែលអ្នកត្រូវចេញ	១៥,០០០	៣,០០០

សាច់រឿងទី ២ ៖ មានឪពុកម្នាក់វ័យ៤៥ ឆ្នាំ ជាជាងអគ្គីសនី ហើយរកប្រាក់បាន ៣,៥០០ ក្នុងមួយខែ ។ គាត់គឺជាអ្នកផ្គត់ផ្គង់ទាំងស្រុងដល់ភរិយារបស់គាត់ និងកូនបីនាក់ ។ គាត់មានរបួសខ្នង ហើយពុំអាចធ្វើការជាជាងអគ្គីសនីបានទៀតឡើយ ។ គាត់ពុំអាចរកប្រាក់បានទៀតឡើយរហូតគាត់អាចរកបានការងារថ្មី ដែលវាតម្រូវឲ្យទៅរៀននៅឯសាលា ឬការបំពាក់បំប៉នផ្សេងទៀត ។

	ដោយគ្មានការធានារ៉ាប់រង	ដោយមានការធានារ៉ាប់រង
ប្រាក់ចំណូលប្រចាំខែមកពីការងារ	០	០
ប្រាក់ចំណូលប្រចាំខែមកពីការធានារ៉ាប់រង	០	៣,០០០
ប្រាក់ចំណូលសរុបប្រចាំខែ	០	៣,០០០

ប្រភេទនៃការធានារ៉ាប់រង

អាន ៖អ្នកពុំចាំបាច់ត្រូវមើលខុសត្រូវអ្វីទាំងអស់ទេ—នោះគឺជាហេតុផលដែលអ្នកនឹងបង្កើតមូលនិធិមួយសម្រាប់ភាពអាសន្ន និងប្រាក់សន្សំផ្សេងទៀត ។ ប៉ុន្តែវាគឺជារឿងដ៏សំខាន់ថាអ្នកការពារខ្លួនឯងពីការលំបាកដែលអាចមានបញ្ហាស្មុគស្មាញផ្នែកហិរញ្ញវត្ថុ ។ ប្រធាន ម៉ារ៉ុន ជី រ៉មនី បានបង្រៀនថា « យើងត្រូវបាន … ប្រឹក្សា[ឲ្យ] មានប្រាក់បម្រុងទុកមួយសម្រាប់ភាពអាសន្ន ហើយមានការធានារ៉ាប់រងគ្រប់គ្រាន់សម្រាប់សុខភាព ផ្ទះ និងអាយុជីវិត » ( « Principles of Temporal Salvation » Ensign ខែ មេសា ឆ្នាំ១៩៨១ ទំព័រ ៦ ) ។

មានការធានារ៉ាប់រងច្រើនប្រភេទ ប៉ុន្តែភាគច្រើនបំផុតគឺ ៖

ការធានារ៉ាប់រងអចលនទ្រព្យ ៖ ការធានារ៉ាប់រងអចលនទ្រព្យ ដូចជាការធានារ៉ាប់រងលើម្ចាស់ផ្ទះ អ្នកជួល និងរថយន្តអាចជួយទូទាត់ថ្លៃប្ដូរ ឬជួសជុលអចលនទ្រព្យនៅក្នុងហេតុការណ៍មានការខូចខាតធ្ងន់ធ្ងរ ចោរកម្ម ឬការបំផ្លិចបំផ្លាញ ។
ការធានារ៉ាប់រងសុខភាព ៖ ការធានារ៉ាប់រងសុខភាពអាចជួយទូទាត់ថ្លៃមើលថែខាងសុខភាព ចាប់តាំងពីថ្លៃថែទាំខាងសុខភាព និងការព្យាបាលជំងឺរហូតដល់ការបង់ថ្លៃសម្រាប់គ្រាដែលមានជំងឺធ្ងន់ធ្ងរ ។ អាស្រ័យទៅលើទីតាំងរស់នៅរបស់អ្នក នោះការថែទាំសុខភាពប្រហែលជាមានជាសេវាកម្មរបស់រដ្ឋ ហើយសេចក្ដីត្រូវការរបស់អ្នកសម្រាប់ការធានារ៉ាប់រងសុខភាពអាចនឹងមានតិច ។
ការធានារ៉ាប់រងអាយុជីវិត ៖ ការធានារ៉ាប់រងអាយុជីវិតផ្ដល់ដល់គ្រួសារមួយនូវទឹកប្រាក់សរុបមួយ ប្រសិនបើសមាជិកគ្រួសារម្នាក់ដែលបានទិញការធានារ៉ាប់រងបានស្លាប់ ។
ការធានារ៉ាប់រងចំពោះពិការភាព ៖ ការធានារ៉ាប់រង់ចំពោះពិការភាពអះអាងថា ប្រាក់ចំណូលមួយផ្នែករបស់បុគ្គលដែលបានទិញការធានារ៉ាប់រងនឹងត្រូវបានបង់ឲ្យ ប្រសិនបើគាត់ពិការ ហើយពុំអាចធ្វើការក្នុងរយៈពេលយូរ ។

សកម្មភាព ( ៣ នាទី )

សូមចាប់ដៃគូជាមួយនឹងស្វាមី ឬភរិយា ឬដៃគូសកម្មភាព ហើយចែកចាយការយល់ដឹងរបស់អ្នកអំពីការធានារ៉ាប់រងអចលនទ្រព្យ សុខភាព អាយុជីវិត និងពិការភាព ។ សូមពិភាក្សាថា តើប្រភេទនៃទំហំការធានារ៉ាប់រងអ្វីទៅដែលនឹងសំខាន់ដើម្បីមាននៅក្នុងកាលៈទេសៈរបស់អ្នក ។

ថ្លៃការធានារ៉ាប់រង

អាន ៖ឥឡូវនេះដោយសារយើងមានការយល់ដឹងអំពី មូលដ្ឋានគ្រឹះនៃការធានារ៉ាប់រង និងអត្ថប្រយោជន៍វិជ្ជមានមួយចំនួនរបស់វារួចហើយ ចូរយើងពិភាក្សាតម្លៃមួយចំនួន ។ តម្លៃ ឬការចំណាយចម្បងពីរប្រភេទសម្រាប់ការធានារ៉ាប់រងគឺបុព្វលាភ និងការកាត់កង ។

បុព្វលាភ ៖ តំណាងឲ្យថ្លៃការធានារ៉ាប់រង—ឬប្រាក់ដែលអ្នកបង់ដោយផ្ទាល់ ( ជារឿយៗគឺប្រចាំខែ ឬប្រចាំឆ្នាំ ) ដល់ក្រុមហ៊ុនធានារ៉ាប់រងដើម្បីទទួលបានទំហំនៃការធានារ៉ាប់រងនោះ ។

ការកាត់កងតំណាងឲ្យចំនួនទឹកប្រាក់ដែលអ្នកបង់សម្រាប់ការចំណាយរបស់អ្នក ( ដូចជាការចំណាយវេជ្ជសាស្ត្រ ឬ ថ្លៃជួសជុលរថយន្ត ) ពីមុនក្រុមហ៊ុនធានារ៉ាប់រងនឹងចេញថ្លៃដែលនៅសល់ ។

ការវិភាគថ្លៃអត្ថប្រយោជន៍

អាន ៖នៅពេលប្រៀបធៀបគម្រោងការធានារ៉ាប់រង អ្នកកំពុងព្យាយាមយ៉ាងខ្លាំងដើម្បីប្រៀបធៀបថ្លៃដែលអ្នកនឹងចំណាយសម្រាប់គម្រោងនោះ និងអ្វីដែលវានឹងផ្ដល់ឲ្យជាការទូទាត់សង ។ វាប្រហែលជាការល្អដើម្បីប្រៀបធៀបសាច់រឿងសម្រាប់ករណីល្អបំផុត និងករណីអាក្រក់បំផុត ។

ថ្លៃអប្បរមាប្រចាំឆ្នាំ ( សាច់រឿងករណីល្អបំផុត )

ដើម្បីគណនាថ្លៃអប្បរមាប្រចាំឆ្នាំ គ្រាន់តែគុណបុព្វលាភប្រចាំខែរបស់អ្នកនឹង១២ ( ១២ x បុព្វលាភប្រចាំខែ ) ឬមើលបុព្វលាភប្រចាំឆ្នាំ ប្រសិនបើអ្នកបង់ប្រាក់ម្ដងមួយឆ្នាំ ។ សាច់រឿងនេះសន្មតថាអ្នកគ្មានព្រឹត្តិការណ៍ធានារ៉ាប់រងមួយនៅក្នុងឆ្នាំនេះទេ ។

ថ្លៃអតិបរមាប្រចាំឆ្នាំ ( សាច់រឿងករណីអាក្រក់បំផុត )

ដើម្បីគណនាថ្លៃអតិបរមាប្រចាំឆ្នាំ សូមបូកថ្លៃអប្បរមាប្រចាំឆ្នាំរបស់អ្នកនិងការកាត់កងប្រចាំឆ្នាំ( [ ១២xបុព្វលាភប្រចាំខែ ] + ការកាត់កង ) ។ សាច់រឿងនេះសន្មតថា ការចំណាយនៃព្រឹត្តិការណ៍ធានារ៉ាប់រងលើសពីការកាត់កងប្រចាំឆ្នាំរបស់អ្នក ។

ដោយមានព័ត៌មាននេះឥឡូវអ្នកអាចប្រៀបធៀបកម្រិតការចំណាយនៃគម្រោងផ្សេងៗគ្នា ។ គំរូខាងក្រោមនេះបង្ហាញអំពីវិធីមួយដែលអ្នកអាចប្រៀបធៀបគម្រោងនានា ។

លំហាត់គណនា

ជំហានទី ១ ៖ បំបែកគ្នាជាក្រុមតូចៗដែលមានមនុស្សពីរទៅបួននាក់ ។

ជំហានទី ២ ៖ អានសាច់រឿងខាងក្រោមទាំងស្រុងជាក្រុមតូចមួយ ។ បុគ្គលម្នាក់ៗនៅក្នុងក្រុមគួរប្រើម៉ាស៊ីនគិតលេខដូចបានណែនាំ ។ សូមជួយគ្នាប្រសិនបើចាំបាច់ ហើយធ្វើឲ្យប្រាកដថា មនុស្សគ្រប់គ្នាអាចទទួលបានចម្លើយដ៏ត្រឹមត្រូវ ។

កំណត់ចំណាំ ៖ សូមមើលវគ្គ « ធនធាន » នៅចុងបញ្ចប់នៃជំពូកនោះសម្រាប់ចម្លើយ ។

អាន ៖សូមស្រមៃថា អ្នកកំពុងប្រៀបធៀបគម្រោងធានារ៉ាប់រងអ្នកជួលពីរ ៖ ជាគម្រោងមួយដោយមានការកាត់កងខ្ពស់ ២,០០០ ដែលបង់ថ្លៃ ១០ រាល់ខែ និងគម្រោងមួយដោយមានការកាត់កងទាប ៥០០ ដែលបង់ថ្លៃ ៤០ រាល់ខែ ។

គណនា ៖បុគ្គលម្នាក់ៗនៅក្នុងក្រុមគួរគណនាថ្លៃអប្បរមា និង អតិបរមាប្រចាំឆ្នាំសម្រាប់គម្រោងនីមួយៗ ។ ចូរសរសេរចម្លើយរបស់អ្នកនៅខាងក្រោម ។

	ថ្លៃអប្បរមាប្រចាំឆ្នាំ	ថ្លៃអតិបរមាប្រចាំឆ្នាំ
គម្រោងកាត់កងខ្ពស់
គម្រោងកាត់កងទាប

គណនា ៖តើប្រាក់ចំនួនប៉ុន្មានដែលគម្រោងកាត់កងខ្ពស់ជួយសន្សំសំចៃឲ្យអ្នកនៅក្នុងស្ថានភាពល្អបំផុត( ឧបមាថាអ្នកបង់ថ្លៃអប្បរមាប្រចាំឆ្នាំតែប៉ុណ្ណោះ ) ? សូមសរសេរចម្លើយរបស់អ្នកនៅខាងក្រោម ។

ចម្លើយ ៖

តម្រុយ ៖( ថ្លៃអប្បរមាប្រចាំឆ្នាំសម្រាប់គម្រោងការកាត់កងទាប ) – ( ថ្លៃអតិបរមាប្រចាំឆ្នាំសម្រាប់គម្រោងការកាត់កងខ្ពស់ )

អាន ៖សូមកត់ចំណាំថា នៅក្នុងសាច់រឿងករណីល្អបំផុត គម្រោងដែលមានការកាត់កងខ្ពស់នឹងធ្វើឲ្យអ្នកសន្សំបាន ៣៦០ ។ នេះមានន័យថា សូម្បីតែអ្នកត្រូវបង់ ៣៦០ នៅក្នុងការចំណាយទាក់ទងនឹងអចលនទ្រព្យដែលជួលចេញពីហោប៉ៅរបស់អ្នកផ្ទាល់ក៏ដោយក៏វានៅតែជាការចំណាយតិចតួចដើម្បីធ្វើជាមួយនឹងគម្រោងការកាត់កងខ្ពស់ សម្រាប់ស្ថានភាពនេះ ។ ប៉ុន្តែ រឿងនេះពុំត្រឹមត្រូវនោះទេនៅក្នុងសាច់រឿងករណីអាក្រក់បំផុតនោះទេ ។

គណនា ៖តើប្រាក់ចំនួនប៉ុន្មានដែលគម្រោងការកាត់កងទាបជួយសន្សំសំចៃឲ្យអ្នកនៅក្នុងស្ថានភាពអាក្រក់បំផុត ( ឧបមាថាអ្នកត្រូវបង់ថ្លៃអតិបរមាប្រចាំឆ្នាំតែប៉ុណ្ណោះ ) ? សូមសរសេរចម្លើយរបស់អ្នកនៅខាងក្រោម ។

ចម្លើយ ៖

តម្រុយ ៖( ថ្លៃអតិបរមាប្រចាំឆ្នាំសម្រាប់គម្រោងការកាត់កងខ្ពស់ ) – ( ថ្លៃអប្បរមាប្រចាំឆ្នាំសម្រាប់គម្រោងការកាត់កងទាប )

អាន ៖នៅក្នុងសាច់រឿងករណីអាក្រក់បំផុត ដែលអ្នកត្រូវបង់ថ្លៃអតិបរមាប្រចាំឆ្នាំ នោះអ្នកនឹងសន្សំបានស្ទើរតែពីរដង ( ជាង ១,០០០ ) ដោយជ្រើសគម្រោងការកាត់កងទាប ។ នៅពេលអ្នកព្យាយាមសម្រេចចិត្តរវាងគម្រោងធានារ៉ាប់រង និងជម្រើសនានា សូមពិចារណាស្ថានភាពរបស់អ្នក ឬគ្រួសាររបស់អ្នក ដើម្បីជ្រើសគម្រោងដែលល្អបំផុតសម្រាប់សេចក្ដីត្រូវការរបស់អ្នក ។

ការពិចារណាអំពីអត្ថប្រយោជន៍ផ្សេងទៀត

អាន ៖នៅក្នុងសកម្មភាពដែលយើងទើបបានបញ្ចប់ យើងបានវាយតម្លៃគម្រោងធានារ៉ាប់រងមួយប្រភេទ( ការធានារ៉ាប់រងអ្នកជួល ) ។ យើងអាចប្រើដំណើរការដូចគ្នានេះនៅពេលយើងប្រៀបធៀបប្រភេទនៃការធានារ៉ាប់រងពីរផ្សេងទៀត ។ ប៉ុន្តែ ជារឿយៗមាននូវកត្តាផ្សេងទៀតដើម្បីពិចារណា លើសពីថ្លៃអតិបរមា និងអប្បរមាទៅទៀត ។ នេះគឺជាសំណួរមួយចំនួនបន្ថែមទៀតដើម្បីសួរ នៅពេលធ្វើការវាយតម្លៃគម្រោងធានារ៉ាប់រងផ្សេងៗទៀត ៖

តើសេវាកម្ម ឬព្រឹត្តិការណ៍អ្វីខ្លះដែលត្រូវបានបង់សង ?
តើប្រភេទ និងដែនកំណត់នៃការបង់សងមានអ្វីខ្លះ ?
តើកេរ្ដិ៍ឈ្មោះរបស់ក្រុមហ៊ុនធានារ៉ាប់រងនោះយ៉ាងណាដែរ ?
តើមានការបញ្ចុះតម្លៃដែលអ្នកអាចទទួលបានដែរឬទេ ?
តើអ្នកទំនងជានឹងបង់ជិតស្មើនឹងការចំណាយអតិបរមាចេញពីហោប៉ៅរបស់អ្នកតាមរបៀបណា ?
តើអ្នកទំនងជានឹងបង់ជិតស្មើនឹងការចំណាយអប្បរមាចេញពីហោប៉ៅរបស់អ្នកតាមរបៀបណា ?

សូមពិភាក្សាអំពីមូលនិធីសម្រាប់ភាពអាសន្ន និងធានារ៉ាប់រងនៅក្នុងក្រុមប្រឹក្សាគ្រួសាររបស់អ្នក

អាន ៖នៅក្នុងក្រុមប្រឹក្សាគ្រួសាររបស់អ្នកនាសប្ដាហ៍នេះ សូមពិភាក្សាអំពីរបៀបបង្កើតមូលនិធិសម្រាប់ភាពអាសន្នរយៈពេលមួយខែរបស់អ្នក ។ សូមកំណត់ផងដែរថា តើគម្រោងធានារ៉ាប់រងមួយណាដែលសំខាន់សម្រាប់គ្រួសាររបស់អ្នក ហើយធ្វើការស្រាវជ្រាវអំពីគោលនយោបាយនានារបស់ក្រុមហ៊ុនការធានារ៉ាប់រងនោះ ។ អ្នកអាចចង់ប្រើគម្រោងមេរៀន « គំរូការពិភាក្សាក្រុមប្រឹក្សាគ្រួសារ » ដូចខាងក្រោម ។

គំរូការពិភាក្សាក្រុមប្រឹក្សាគ្រួសារ

សូមធ្វើឲ្យប្រាកដថា ត្រូវចាប់ផ្ដើម ហើយបញ្ចប់ដោយការអធិស្ឋានដើម្បីយាងព្រះវិញ្ញាណ ។

ផ្នែកទី ១ ៖ រំឭកឡើងវិញ

តើអ្នកកំពុងធ្វើតាមថវិការបស់អ្នកបានយ៉ាងណាដែរ ?
តើអ្នកមានធានារ៉ាប់រងគ្រប់គ្រាន់ដែរឬទេ ? តើគោលនយោបាយធានារ៉ាប់រងអ្វីខ្លះដែលអ្នកត្រូវការនៅក្នុងកាលៈទេសៈរបស់អ្នក ?

ផ្នែកទី ២ ៖ ដាក់ផែនការ

ប្រសិនបើអ្នកពុំមានធានារ៉ាប់រងគ្រប់គ្រាន់ទេ តើការបង់សងនៃធានារ៉ាប់រងណាមួយដែលអ្នកគួរមាន ? សូមធ្វើការវិភាគថ្លៃអត្ថប្រយោជន៍នៃគម្រោងដែលមាន ( សូមមើល ទំព័រ ៩៧–៩៨ ) ។
តើអ្នកអាចធ្វើអ្វីខ្លះដើម្បីបង្កើតមូលនិធិសម្រាប់ភាពអាសន្នរយៈពេលមួយខែបានលឿន ?

ការត្រួតពិនិត្យប្រចាំឆ្នាំ

ខ្ញុំធ្លាប់លក់ធានារ៉ាបរង ហើយខ្ញុំដឹងថា មានអត្រាកើនឡើងពីមួយគ្រាទៅមួយគ្រា ។ ខ្ញុំពុំលក់ធានារ៉ាប់រងទៀតទេ ប៉ុន្តែខ្ញុំប្រៀបធៀបអាត្រានៃគម្រោងធានារ៉ាប់រងទាំងអស់រាល់ឆ្នាំដើម្បីធ្វើឲ្យប្រាកដថា ខ្ញុំកំពុងទទួលបានតម្លៃល្អបំផុត ។ ជារៀងរាល់ខែវិច្ឆិកា ខ្ញុំពិនិត្យមើលគម្រោងទាំងឡាយរបស់ខ្ញុំឡើងវិញ ហើយសុំការប៉ានស្មានតម្លៃពីក្រុមហ៊ុនផ្សេងទៀត ។ ការណ៍នេះធ្វើឲ្យខ្ញុំរក្សាការបង់ថ្លៃរបស់ខ្ញុំនៅទាបតាមដែលអាចធ្វើទៅបាន ។