![]()
រូបភាពlearn icon
ការពិភាក្សាសម្រាប់ថ្ងៃនេះ ៖
ថវិកា
-
អាន ៖សូមអបអរសាទរចំពោះការបង្កើតថវិកាមួយ ! ថវិកាមួយអាចជាឧបករណ៍ដ៏មានអនុភាពសម្រាប់ការគ្រប់គ្រងស្ថានភាពហិរញ្ញវត្ថុរបស់អ្នក និងការកាត់បន្ថយការថប់បារម្ភនៅក្នុងជីវិតរបស់អ្នក ។ នៅក្នុងបទគម្ពីរ យើងរៀនថា « សេចក្ដីពិតគឺជាការចេះដឹងអំពីការណ៍ទាំងឡាយដែលមាននៅពេលនេះ និង ការណ៍ទាំងឡាយដែលមានមកហើយ ហើយនឹងការណ៍ទាំងឡាយដែលនឹងមានខាងមុខ »( គ. និង ស. ៩៣:២៤ ) ។
-
ពិភាក្សា ៖តើខគម្ពីរនេះដែលដកស្រង់មកពីគោលលទ្ធិ និងសេចក្ដីសញ្ញាអាចអនុវត្តចំពោះហិរញ្ញវត្ថុរបស់អ្នក និងការប្រើថវិកាមួយយ៉ាងដូចម្ដេច ?
-
អាន ៖ការដឹងថាហិរញ្ញវត្ថុគ្រួសាររបស់អ្នកស្ថិតនៅត្រង់ចំណុចណាឲ្យពិតប្រាកដ គឺជារឿងដ៏ចាំបាច់សម្រាប់ការចាត់ចែងហិរញ្ញវត្ថុដ៏ជោគជ័យ ។ អែលឌើរ យ៉ូសែប ប៊ី. វ៉ឺតលីន បានបង្រៀនថា « អស់អ្នកដែលរស់នៅដោយសុវត្ថិភាពនៅក្នុងប្រាក់ចំណូលរបស់ខ្លួនដឹងថារាល់ខែប្រាក់ចូលចំនួនប៉ុន្មាន ហើយទោះជាវាពិបាកក្ដី ក៏ពួកគេលុតដំខ្លួនឲ្យចំណាយតិចជាងចំនួននោះដែរ » ( « Earthly Debts, Heavenly Debts » Ensign ឬ Liahona ខែ ឧសភា ឆ្នាំ២០០៤ ទំព័រ ៤២ ) ។
ការធ្វើតាមថវិកាអាចជារឿងដ៏លំបាក ។ វាតម្រូវឲ្យមានការតាំងចិត្ត ការលុតដំខ្លួន និងការខិតខំជាបន្តបន្ទាប់—វាប្រហែលជាត្រូវសាកល្បងជាច្រើនដងដើម្បីធ្វើឲ្យបានត្រឹមត្រូវ ! នៅពេលអ្នកខិតខំផ្លាស់ប្ដូរឥរិយាបថចំណាយរបស់អ្នក សូមចងចាំថា ត្រូវប្រឹក្សានឹងព្រះអម្ចាស់ ព្រមទាំងស្វាមី ឬភរិយារបស់អ្នក ឬដៃគូទទួលខុសត្រូវម្នាក់ ។ ដោយមានការខិតខំគាំទ្រដោយសេចក្ដីស្រឡាញ់ នោះអ្នកអាចក្លាយកាន់តែដូចជាកុមារដែលបានរង់ចាំនៅក្នុងការដកពិសោធន៍ស្ករម៉ាសមេលឡូនោះដែរ ( បានពិភាក្សានៅក្នុងជំពូកមុន ) ។
-
ពិភាក្សា ៖តើព្រះអម្ចាស់អាចជួយយើងឲ្យអភិវឌ្ឍលក្ខណៈដូចជាព្រះគ្រីស្ទ រួមបញ្ចូលទាំងការលុតដំខ្លួន និងភាពឧស្សាហ៍តាមរបៀបណា ?
-
អាន ៖នៅថ្ងៃនេះ យើងនឹងពិភាក្សាអំពីគោលការណ៍បួនយ៉ាងសម្រាប់ការធ្វើតាមថវិកាមួយ ៖
-
ដាក់គោលដៅខាងហិរញ្ញវត្ថុដែលជាក់លាក់ ហើយមានការលើកទឹកចិត្ត ។
-
ស្វែងរក ហើយប្រើប្រព័ន្ធរៀបចំថវិកាមួយ ។
-
មានការទទួលខុសត្រូវ ។
-
ស្វែងរកជំនួយរបស់ព្រះអម្ចាស់ ហើយបន្តព្យាយាម !
-
១. ដាក់គោលដៅខាងហិរញ្ញវត្ថុដែលពិត ហើយមានការលើកទឹកចិត្ត
-
អាន ៖ការដាក់គោលដៅគឺជាឧបករណ៍មួយដ៏មានអនុភាពដែលជួយយើងអភិវឌ្ឍ ហើយថែរក្សាទស្សនវិស័យរយៈពេលវែងមួយ ។
អែលឌើរ អិម រ័សុល បាឡឺដ បានបង្រៀនថា « ខ្ញុំសូមប្រាប់បងប្អូននូវរឿងមួយអំពីការដាក់គោលដៅ ។ ខ្ញុំមានការជឿជាក់យ៉ាងខ្លាំងថា ប្រសិនបើយើងពុំដាក់គោលដៅនៅក្នុងជីវិតរបស់យើង ហើយរៀនពីរបៀបគ្រប់គ្រងបច្ចេកទេសនៃការរស់នៅដើម្បីសម្រេចបានគោលដៅទាំងឡាយរបស់យើងនោះទេ លុះពេលយើងឈានចូលវ័យចំណាស់ ហើយក្រឡេកមកមើលជីវិតរបស់យើងវិញនូវអ្វីដែលយើងសម្រេចបាន នោះឃើញតែមួយផ្នែកតូចនៃសក្ដានុពលពេញលេញរបស់យើងប៉ុណ្ណោះ ។ នៅពេលមនុស្សម្នាក់រៀនគ្រប់គ្រងគោលការណ៍នៃការដាក់គោលដៅមួយ នោះគាត់នឹងមានលទ្ធភាពធ្វើឲ្យមានភាពខុសប្លែកដ៏ធំមួយ ជាលទ្ធផលគាត់សម្រេចគោលដៅនៅក្នុងជីវិតនេះ » ( « Do Things That Make a Difference » Ensign ខែ មិថុនា ឆ្នាំ១៩៨៣ ទំព័រ ៦៩–៧០ ) ។
-
- ពិភាក្សា ៖
-
តើគោលដៅទាំងឡាយពីអតីតកាលបានជួយអ្នកឲ្យរីកចម្រើនរបៀបណា ?
-
តើការដាក់គោលដៅគឺជាសកម្មភាពនៃសេចក្ដីជំនឿយ៉ាងដូចម្ដេច ?
-
-
អាន ៖វាគឺជារឿងដ៏សំខាន់ដើម្បីដាក់គោលដៅខាងហិរញ្ញវត្ថុដែលពិត និងប្រកបដោយការលើកទឹកចិត្ត ។ នៅពីរបីជំពូកក្រោយទៀត យើងនឹងរៀនអំពីគោលដៅ និងអាទិភាពខាងហិរញ្ញវត្ថុជាច្រើន រួមបញ្ចូលទាំងការបង្កើតមូលនិធិសម្រាប់ភាពបណ្ដោះអាសន្នរយៈពេលមួយខែ ការរួចផុតពីបំណុល ការបង្កើតមូលនិធិសម្រាប់ភាពអាសន្នរយៈពេលវែង ការវិនិយោគសម្រាប់ការចូលនិវត្តន៍ និងការសន្សំប្រាក់សម្រាប់ការចំណាយស័ក្ដិសមផ្សេងទៀត ។ សកម្មភាពខាងក្រោមនេះនឹងជួយអ្នកឲ្យស្គាល់ថាតើចំណុចមួយណាគួរជាអាទិភាពផ្នែកហិរញ្ញវត្ថុបច្ចុប្បន្នរបស់អ្នក ។
-
អាន ៖អ្នកអាចជ្រើសរើសខិតខំដើម្បីសម្រេចបានគោលដៅរយៈពេលវែងផ្សេងទៀត បន្ថែមពីលើអាទិភាពផ្នែកហិរញ្ញវត្ថុបច្ចុប្បន្នរបស់អ្នក ដែលអាចរួមបញ្ចូលនូវការសន្សំប្រាក់សម្រាប់ការអប់រំ បេសកកម្ម រថយន្ត ផ្ទះ ឬដំណើរកម្សាន្តជាគ្រួសារ ឬការចំណាយសម្រាប់ការកម្សាន្តផ្សេងទៀត ។ វានឹងមានការល្បួងជាច្រើនឲ្យជ្រើសយកទស្សនវិស័យរយៈពេលខ្លីជាជាងទស្សនវិស័យរយៈពេលវែង ។ គោលដៅអាចផ្ដល់ហេតុផលមួយឲ្យយើងនិយាយថាទេនៅពេលនេះ ដោយផ្ដល់អ្វីមួយដល់អ្នកដើម្បីមើលឆ្ពោះទៅពេលអនាគត ។
-
ពិភាក្សា ៖តើអ្វីទៅដែលលើកទឹកចិត្តអ្នកដោយផ្ទាល់ឲ្យចង់ធ្វើតាមផែនការថវិការបស់អ្នក ?
២. ស្វែងរក ហើយប្រើប្រព័ន្ធគ្រប់គ្រងថវិកាមួយ
-
អាន ៖មានឧបករណ៍ និងប្រព័ន្ធជាច្រើនដើម្បីជួយអ្នកគ្រប់គ្រងថវិការបស់អ្នក ហើយតាមដានការចំណាយរបស់អ្នក ។ ប្រព័ន្ធគ្រប់គ្រងថវិការដ៏មានប្រសិទ្ធភាពចាប់តាំងពីប្រព័ន្ធប្រើប៉ិច និងក្រដាសរហូតដល់កម្មវិធីទូរសព្ទចល័ត និងកុំព្យូទ័រ ។
មានវិធីចម្បងពីរដើម្បីបង់ថ្លៃសម្រាប់ទំនិញ និងសេវាគឺ ៖ សាច់ប្រាក់ ឬការបង់តាមអេឡិចត្រូនិក ។ វិធីសាស្ត្រទូទៅ ទាំងនេះនីមួយៗមានចំណុចវិជ្ជមាន និងអវិជ្ជមាន ហើយវានឹងជះឥទ្ធិពលដល់វិធីដែលអ្នកគ្រប់គ្រងថវិការបស់អ្នក ហើយតាមដានការចំណាយរបស់អ្នក ។ នៅពីរបីវគ្គក្រោយទៀត យើងនឹងពិភាក្សាអំពីប្រព័ន្ធថវិការរួមចំនួនពីរ ។ ការតាំងចិត្តរបស់អ្នកនៅសប្ដាហ៍នេះគឺជាការស្វែងរកប្រព័ន្ធត្រឹមត្រូវសម្រាប់អ្នក ។
-
សូមមើល ៖« ប្រព័ន្ធស្រោមសំបុត្រ » មាននៅលើ srs.lds.org/videos ។ ( គ្មានវីដេអូឬ ? សូមអាន ទំព័រ ៨៣ ) ។
-
សូមមើល ៖« ប្រព័ន្ធឌីជីថល » មាននៅលើ srs.lds.org/videos ។ ( គ្មានវីដេអូឬ ? សូមអាន ទំព័រ ៨៤ ) ។
-
អាន ៖ជាមួយនឹងវិធីសាស្ត្រណាមួយ សូមប្រាកដថាអ្នក ៖
-
កុំបន្លំដោយប្ដូរចំនួនដែលអ្នកបានដាក់ ឬខ្ចីពីផ្នែកផ្សេងទៀត ។ ប្រឹក្សាជាមួយនឹងស្វាមី ឬភរិយារបស់អ្នក ឬដៃគូទទួលខុសត្រូវ ប្រសិនបើត្រូវការការកែសម្រួល ។
-
តាមដានរាល់ការចំណាយឲ្យបានដិតដល់ ហើយកែសម្រួលប្រភេទថវិការបស់អ្នកនៅខែក្រោយ ប្រសិនបើចាំបាច់ ។
-
៣. មានការទទួលខុសត្រូវ
-
អាន ៖អ្នកអាចជោគជ័យនៅក្នុងការធ្វើតាមផែនការថវិកាបានតែតាមរយៈការមានការទទួលខុសត្រូវប៉ុណ្ណោះ ។ ការប្រជុំក្រុមប្រឹក្សាគ្រួសាររៀងរាល់សប្ដាហ៍អាចជាវិធីមួយដើម្បីពិនិត្យមើលគោលដៅ និងថវិការបស់អ្នកឡើងវិញ ហើយធ្វើការកែសម្រួល ប្រសិនបើចាំបាច់ ។ ប្រសិនបើអ្នកពិបាកក្នុងការទទួលខុសត្រូវ វាប្រហែលជារឿងដ៏ឈ្លាសវៃដើម្បីរាយការណ៍ការរីកចម្រើនរបស់អ្នកទៅកាន់មនុស្សម្នាក់ផ្សេងទៀត—ជាមិត្តភក្ដិ ដៃគូសកម្មភាព អ្នកណែនាំ ឬអ្នកប្រឹក្សាយោបល់ផ្នែកហិរញ្ញវត្ថុ ។ រឿងដ៏សំខាន់គឺថា អ្នកចំណាយពេលដើម្បីវាយតម្លៃជាទៀងទាត់ពីការរីកចម្រើនរបស់អ្នក ហើយថាអ្នកធ្វើការផ្លាស់ប្ដូរ ប្រសិនបើចាំបាច់ ។
-
ពិភាក្សា ៖ហេតុអ្វីវាគឺជារឿងដ៏សំខាន់ដើម្បីមានការទទួលខុសត្រូវ ? តើអ្នកនឹងមានការទទួលខុសត្រូវចំពោះថវិការបស់អ្នកតាមរបៀបណា ?
៤. ស្វែងរកជំនួយរបស់ព្រះអម្ចាស់ ហើយបន្តព្យាយាម
-
អាន ៖សូមចងចាំថា ការចាត់ចែងហិរញ្ញវត្ថុដ៏ស្មោះត្រង់ប្រហែលជាតម្រូវឲ្យអ្នកផ្លាស់ប្ដូរទស្សនវិស័យ ទម្លាប់ និងឥរិយាបថ ។ សេចក្ដីជំនឿលើព្រះយេស៊ូវគ្រីស្ទ និងដង្វាយធួនរបស់ទ្រង់នឹងជួយអ្នកឲ្យឆ្លងកាត់ការផ្លាស់ប្ដូរនេះ ។ ដោយសារការផ្លាស់ប្ដូរទាំងនេះប្រហែលជាទម្លាប់ដែលចាក់ឫសយ៉ាងជ្រៅ និងដោយសារការធ្វើផែនការថវិកាគឺជាដំណើរការរៀនសូត្រមួយ នោះប្រហែលជាពេលខ្លះអ្នកបរាជ័យដើម្បីធ្វើតាមផែនការថវិការបស់អ្នក ។
លើសពីនេះទៀត អ្នកប្រហែលជាមានកំហុស ហើយធ្វើការទិញដែលពុំបានគិត ឬជួបវិបត្តិហិរញ្ញវត្ថុដូចជាបាត់បង់ការងារ ភាពអាសន្នផ្នែកវេជ្ជសាស្ត្រ ឬថ្លៃថែទាំនានាដែលពុំអាចដឹងទុកមុន ។ អ្នកនឹងរៀនអំពីការបង្កើតមូលនិធិសម្រាប់ភាពអាសន្នមួយ និងការដោះស្រាយវិបត្តិហិរញ្ញវត្ថុនៅជំពូកក្រោយៗទៀត ប៉ុន្តែឥឡូវនេះ វាគឺជារឿងដ៏សំខាន់ដើម្បីចងចាំថា ផែនការថវិកាមួយគឺអាចផ្លាស់ប្ដូរបាន ហើយថាការធ្វើតាមផែនការថវិកាមួយតម្រូវឲ្យមានការខិតខំជាបន្តបន្ទាប់ ។
នៅពេលអ្នកជួបភាពបរាជ័យចំពោះថវិការបស់អ្នក សូមពិភាក្សាបញ្ហានេះនៅក្នុងក្រុមប្រឹក្សាគ្រួសាររបស់អ្នក ហើយពិនិត្យមើលផ្នែកនានាក្នុងផែនការថវិការបស់អ្នកដែលអាចនឹងត្រូវការការកែសម្រួល ។ កាលអ្នកប្រហែលជាមានការបាក់ទឹកចិត្ត ហើយងាកទៅរកការបោះបង់ការធ្វើតាមថវិកា សូមចងចាំថា អ្នកអាចបន្តព្យាយាមបាន ហើយតាមរយៈការប្រឹក្សាជាមួយនឹងព្រះអម្ចាស់ និងការស្វែងរកជំនួយរបស់ទ្រង់ នោះអ្នកនឹងទទួលបានអនុភាព និងលទ្ធភាពដើម្បីស៊ូទ្រាំនៅក្នុងការខិតខំរបស់អ្នក ។
-
ពិភាក្សា ៖តើអ្នកនឹងធ្វើអ្វីខ្លះនៅពេលជួបភាពបរាជ័យចំពោះថវិការបស់អ្នក ?
ពិភាក្សាអំពីការធ្វើតាមថវិកានៅក្នុងក្រុមប្រឹក្សាគ្រួសារ
-
អាន ៖ការធ្វើតាមថវិកាតម្រូវឲ្យមានសាមគ្គីភាពជាមួយនឹងស្វាមី ឬភរិយា និងជាមួយគ្រួសាររបស់អ្នក ។ នៅសប្ដាហ៍នេះ សូមពិភាក្សាអំពីប្រព័ន្ធថវិកាដែលអាចមានដើម្បីអ្នកអាចយកមកប្រើ និងវិធីដែលអ្នកកែសម្រួលថវិការបស់អ្នក ប្រសិនបើអ្នកជួបបញ្ហាប្រឈមនានា ។ លើសពីនេះទៀត សូមពិភាក្សាពីអាទិភាពផ្នែកហិរញ្ញវត្ថុបច្ចុប្បន្នរបស់អ្នក និងគោលដៅរយៈពេលវែងផ្សេងទៀត ព្រមទាំងផែនការដើម្បីសម្រេចវាបាន ។ អ្នកអាចប្រើគម្រោងមេរៀន « គំរូការពិភាក្សាក្រុមប្រឹក្សាគ្រួសារ » ខាងក្រោម ។ សូមចងចាំថា ប្រសិនបើអ្នកមិនទាន់រៀបការទេ ក្រុមប្រឹក្សាគ្រួសាររបស់អ្នកអាចរួមបញ្ចូលនូវមិត្តរួមបន្ទប់ មិត្តភក្ដិ សមាជិកគ្រួសារ ឬអ្នកណែនាំ ។
គំរូការពិភាក្សាក្រុមប្រឹក្សាគ្រួសារ
សូមធ្វើឲ្យប្រាកដថា ត្រូវចាប់ផ្ដើម ហើយបញ្ចប់ដោយការអធិស្ឋានដើម្បីយាងអញ្ជើញព្រះវិញ្ញាណ ។
ផ្នែកទី ១ ៖ ពិនិត្យឡើងវិញ
-
តើអ្នកអាចធ្វើអ្វីខ្លះដើម្បីកែលម្អថវិការបស់អ្នក ?
-
តើអ្វីទៅជាអាទិភាពផ្នែកហិរញ្ញវត្ថុបច្ចុប្បន្នរបស់អ្នក ? សូមពិភាក្សាការវាយតម្លៃនៅទំព័រ ៧៦ ។
ផ្នែកទី ២ ៖ ដាក់ផែនការ
-
តើអ្វីទៅជាអាទិភាពផ្នែកហិរញ្ញវត្ថុ និងគោលដៅរយៈពេលវែងរបស់អ្នក ?
-
តើអ្នកនឹងប្រើប្រព័ន្ធថវិកាអ្វីដើម្បីរក្សាថវិកា ហើយតាមដានការចំណាយនានា ?
-
តើអ្នកនឹងធ្វើតាមផែនការថវិការបស់អ្នកតាមរបៀបណា ហើយតើអ្នកនឹងធ្វើអ្វីខ្លះ ប្រសិនបើអ្នកចំណាយលើសថវិកា ?