មូលដ្ឋានគ្រឹះរបស់ខ្ញុំ ៖ទទួលពិធីបរិសុទ្ធទាំងឡាយនៃព្រះវិហារបរិសុទ្ធ

រូបភាព
My Foundation icon
មូលដ្ឋានគ្រឹះរបស់ខ្ញុំ ៖ ទទួលពិធីបរិសុទ្ធទាំងឡាយនៃព្រះវិហារបរិសុទ្ធ—ម៉ោងជាអតិបរមា ៖ ២០ នាទី

ពិចារណា ៖តើអ្វីទៅជារឿងដ៏សំខាន់បំផុតមួយចំនួនសម្រាប់អ្នក ?

សូមមើល ៖« ការធ្វើអ្វីដែលសំខាន់បំផុត » មាននៅលើ srs.lds.org/videos ។ ( គ្មានវីដេអូឬ ? សូមអាន ទំព័រ ២០១ ) ។

ការធ្វើអ្វីដែលសំខាន់បំផុត

ប្រសិនបើអ្នកមិនអាចមើលវីដេអូទេ សូមអានរឿងនេះវិញ ។

អ្នកអត្ថាធិប្បាយ ៖ មានយន្តហោះមួយធ្លាក់នៅរដ្ឋហ្លូរីដា នារាត្រីដ៏ងងឹតមួយក្នុងខែធ្នូ ។ មានមនុស្សជាង ១០០ នាក់បានស្លាប់ ។ ការធ្លាក់នោះស្ថិតនៅចម្ងាយតែ ២០ ម៉ែល ពីទីសុវត្ថិភាពប៉ុណ្ណោះ ។

ប្រធាន ឌៀថើរ អេស្វ អុជដូហ្វ ៖ បន្ទាប់ពីឧប្បទ្ធវហេតុនោះ ពួកអ្នកស៊ើបអង្កេតបានព្យាយាមស្វែងរកពីបុព្វហេតុ ។ ឧបករណ៍ចុះចតនោះ តាមពិតបានទម្លាក់ចុះមកដោយត្រឹមត្រូវ ។ ម៉ាស៊ីនយន្តហោះក៏មានលក្ខណៈបច្ចេកទេសល្អឥតខ្ចោះ ។ អ្វីៗទាំងអស់ដំណើរការយ៉ាងត្រឹមត្រូវ—លើកលែងតែរឿងមួយប៉ុណ្ណោះ ៖ គឺអំពូលភ្លើងមួយបានឆេះខូច ។ អំពូលភ្លើងដ៏តូចនោះ—មានតម្លៃតែ ២០ សេនប៉ុណ្ណោះ —បានបង្កើតឲ្យមានសេរីព្រឹត្តិការណ៍ ជាលំដាប់លំដោយដែលទីបំផុតនាំទៅរកហេតុការណ៍នៃមនុស្សស្លាប់ដ៏រន្ធត់ដល់ទៅជាង១០០នាក់ ។

ពិតប្រាកដណាស់ ការខូចអំពូលមិនបានបង្កឲ្យមានបញ្ហានោះទេ វាកើតឡើងដោយសារតែក្រុមការងារលើយន្តហោះ ផ្តោតយកចិត្តទុកដាក់ទៅលើអ្វីៗដែលហាក់ដូចជាសំខាន់ក្នុងពេលនោះ ខណៈដែលភ្លេចពីអ្វី ដែលសំខាន់បំផុតនោះ ។

ទំនោរចិត្តនិងការផ្តោតអារម្មណ៍ទៅលើអ្វី ដែលមិនសូវសំខាន់នោះ គឺមិនមែនមានតែចំពោះអ្នកបើកយន្តហោះនោះទេ គឺមានចំពោះមនុស្សគ្រប់គ្នា ។ យើងទាំងអស់គ្នាមានហានិភ័យ ។ … តើគំនិត និងដួងចិត្តរបស់អ្នកបានផ្តោតតែលើរឿងដែលសំខាន់តែក្នុងរយៈខ្លីនោះ ឬនៅលើរឿងដែលសំខាន់បំផុត ?

( « We Are Doing a Great Work and Cannot Come Down » Ensign ឬ Liahona ខែ ឧសភា ឆ្នាំ២០០៩ ទំព័រ ៥៩, ៦០ )

សូមត្រឡប់ទៅ ទំព័រ ២០០ ។

ពិភាក្សា ៖តើរឿងមិនសំខាន់អ្វីខ្លះដែលអូសទាញយើងចេញពីការរីកចម្រើន ? តើពិធីបរិសុទ្ធទាំងឡាយនៃដំណឹងល្អអាចជួយយើងបានតាមរបៀបណា ?

អាន ៖គោលលទ្ធិ និង សេចក្តីសញ្ញា ៨៤:២០ និងពាក្យដកស្រង់មកពីប្រធាន ប៊យដ៍ ឃេ ផាកកឺ ( នៅខាងស្ដាំ )

« ព្រះអម្ចាស់នឹងប្រទានពរដល់យើង នៅពេលយើងធ្វើពិធីបរិសុទ្ធដ៏ពិសិដ្ឋនៃព្រះវិហារបរិសុទ្ធ ។ ពរជ័យទាំងឡាយដែលមាននៅទីនោះ គឺពុំមានដែនកំណត់ ចំពោះការបម្រើក្នុងព្រះវិហារបរិសុទ្ធរបស់យើងទេ ។ យើងនឹងទទួលបានពរជ័យចំពោះគ្រប់កិច្ចការរបស់យើងទាំងអស់ ។ យើងនឹងមានសិទ្ធិដើម្បីសូមឲ្យព្រះអម្ចាស់យកព្រះទ័យទុកដាក់លើកិច្ចការយើងទាំងខាងវិញ្ញាណ និងខាងសាច់ឈាម » ។

ប៊យ ខេ ផាកកឺ, The Holy Temple ( ឆ្នាំ ១៩៨០ ) ទំព័រ ១៨២

ពិភាក្សា ៖នៅពេលយើងស្វែងរកភាពខ្លួនទីពឹងខ្លួន ហេតុអ្វីវាគឺជារឿងដ៏សំខាន់ដើម្បីមានភាពស័ក្តិសមចូលព្រះវិហារបរិសុទ្ធ ?

សកម្មភាព

ជំហានទី ១ ៖ អានពាក្យដកស្រង់មកពីអែលឌើរ ឃ្វីនថិន អិល ឃុក ( នៅខាងស្ដាំ ) និងបទគម្ពីរខាងក្រោមជាមួយនឹងដៃគូ ។ គូសបន្ទាត់ក្រោមពរជ័យដែលបានសន្យាសម្រាប់ជនដែលថ្វាយបង្គំនៅក្នុងព្រះវិហារបរិសុទ្ធ ។

« យើងនឹងសិក្សាបានល្អនូវកណ្ឌទី ១០៩នៃគោលលទ្ធិ និង សេចក្តីសញ្ញា ហើយធ្វើតាមការដាស់តឿនរបស់ប្រធាន [ ហាវើដ ដបុលយូ ] ហឹនធើរ ‹ ដើម្បីស្ថាបនាព្រះវិហារបរិសុទ្ធរបស់ព្រះអម្ចាស់ជានិមិត្តសញ្ញាដ៏អស្ចារ្យនៃភាពជាសមាជិក [ របស់យើង ] › » ។

ឃ្វីនថិន អិល ឃុក « See Yourself in the Temple » Ensign ឬ Liahona ខែ ឧសភា ឆ្នាំ ២០១៦ ទំព័រ ៩៩ ដកស្រង់ពី Teachings of Presidents of the Church: Howard W. Hunter ( ឆ្នាំ ២០១៥ ) ទំព័រ ១៧៨

« ហេតុដូច្នោះហើយ នៅក្នុងពិធីបរិសុទ្ធទាំងឡាយនៃបព្វជិតភាពដ៏ធំជាងនេះ នោះអំណាចនៃព្រះត្រូវបានសម្ដែងឲ្យឃើញ » ( គ. និង ស. ៨៤:២០ ) ។

« ហើយសូមឲ្យពួកគេអាចបានធំឡើងក្នុងទ្រង់ ហើយទទួលនូវភាពពោរពេញនៃព្រះវិញ្ញាណបរិសុទ្ធ ហើយបានរៀបចំតាមក្រឹត្យវិន័យទាំងឡាយ ហើយបានរៀបចំដើម្បីបានអ្វីៗដែលត្រូវការគ្រប់មុខ » ( គ. និង ស. ១០៩:១៥ ) ។

« ហើយកាលណារាស្ត្ររបស់ទ្រង់ប្រព្រឹត្តរំលង គឺពួកគេណាមួយក៏ដោយ នោះសូមពួកគេឆាប់ប្រែចិត្ត ហើយវិលមករកទ្រង់វិញ ហើយសូមឲ្យបានប្រកបដោយគុណចំពោះព្រះនេត្ររបស់ទ្រង់ ហើយបានសាងឡើងវិញចំពោះព្រះពរទាំងឡាយ ដែលព្រះអង្គបានតែងតាំងឡើង ដើម្បីចាក់មកលើពួកអ្នក ដែលនឹងគោរពកោតក្រែងដល់ព្រះអង្គនៅក្នុងដំណាក់ទ្រង់ » ( គ. និង ស. ១០៩:២១ ) ។

« ហើយទូលបង្គំទាំងអស់គ្នា សូមដល់ព្រះអង្គ ឱព្រះវបិតាដ៏បរិសុទ្ធអើយ សូមឲ្យពួកអ្នកបម្រើទ្រង់អាចបានចេញពីដំណាក់នេះទៅប្រដាប់ដោយព្រះចេស្តារបស់ទ្រង់ ហើយសូមឲ្យព្រះនាមរបស់ទ្រង់អាចបាននៅក្នុងពួកគេ ហើយសូមឲ្យសិរីល្អរបស់ទ្រង់នៅជុំវិញពួកគេ ហើយពួកទេវតារបស់ទ្រង់ថែរក្សាពួកគេ » ( គ. និង ស. ១០៩:២២ ) ។

« ទូលបង្គំទាំងអស់គ្នាសូមដល់ព្រះអង្គ ឱព្រះវរបិតាដ៏បរិសុទ្ធអើយ … សូមកុំឲ្យគ្រឿងសស្ត្រាវុធបានធ្វើឡើងទាស់និងពួកគេបានលូតលាស់ឡើយ » ( គ. និង ស. ១០៩:២៤–២៥ ) ។

ជំហានទី ២ ៖ ពិចារណារៀងៗខ្លួនថា « តើខ្ញុំត្រូវផ្លាស់ប្ដូរអ្វីខ្លះនៅក្នុងជីវិតរបស់ខ្ញុំដើម្បីចូលរួមនៅក្នុងពិធីបរិសុទ្ធទាំងឡាយនៃព្រះវិហារបរិសុទ្ធឲ្យបានញឹកញាប់ ? »

តាំងចិត្ត ៖សូមតាំងចិត្តធ្វើតាមសកម្មភាពដូចខាងក្រោមក្នុងអំឡុងសប្ដាហ៍ ។ សូមគូសសញ្ញាកែងក្នុងប្រអប់ នៅពេលអ្នកបញ្ចប់ការតាំងចិត្តនីមួយៗ ។

ប្រសិនបើអ្នកមានប័ណ្ណចូលព្រះវិហារបរិសុទ្ធ សូមដាក់កាលបរិច្ឆេទទៅព្រះវិហារបរិសុទ្ធ ។
ប្រសិនបើអ្នកពុំមានប័ណ្ណចូលព្រះវិហារបរិសុទ្ធទេ សូមជួបនឹងប៊ីស្សព ឬប្រធានសាខារបស់អ្នកដើម្បីពិភាក្សាអំពីរបៀបដែលអ្នកអាចត្រៀមខ្លួនទទួលពិធីបរិសុទ្ធរបស់អ្នកនៅក្នុងព្រះវិហារបរិសុទ្ធ ។
សូមចែកចាយនូវអ្វីដែលអ្នកបានរៀនអំពីពិធីបរិសុទ្ធទាំងឡាយនៃព្រះវិហារបរិសុទ្ធជាមួយនឹងគ្រួសារ ឬមិត្តភក្ដិរបស់អ្នក ។