Wase 10

Na Kaukauwa ni iVakaraitaki

Ena noda kauta tiko na noda vakabauta ena bula ni veisiga, eda vukea na kena vakaukauwataki na yaca totoka ni Lotu ka vakauqeti ira na tani me ra bulataka na kosipeli.

Na Bula nei Heber J. Grant

Ena nona veivakacaucautaki vei Peresitedi Heber J. Grant, e a vola kina vakaoqo o Baraca John A. Widtsoe mai na Kuoramu ni iApositolo Le Tinikarua, “Na nona bula sa ikoya e dua na vuli vei keda taucoko.”¹ O Elder Samuel O. Bennion mai na Vitusagavulu e a vosa talega ena nona ivakaraitaki o Peresitedi Grant: “O koya e sa dau gumatua ena cakacaka vinaka ni Turaga e sa vakaroti ga mai vua na Kalou, ka sa ivakaraitaki dodonu kivei ira na tamata, kei na ka e qai yaco na cakacaka e sa yaco me uasivi cake ka lagilagi vakalevu.”²

Me ikuri ni nona vakaitovotaki koya ena dua na ivakaraitaki dodonu, e a vakatavulica o Peresitedi Grant na lewe ni Lotu vakayadudua e rawa ni bulataka e dua na gaunisala me na rawa ni kauta mai na vakacaucautaki kei na lagilagi ki na cakacaka ni Turaga. E kaya, “Na dauvunau cecere ka veivakurabuitaki duadua ena keda maliwa na Yalododonu Edaidai sa ikoya na turaga se marama ka bulataka na kosipeli ni Turaga o Jisu Karisito.”³

Ena nona veiqaravi tiko ena Kuoramu ni iApositolo Le Tinikarua, e a taura kina e dua na ivola o Elder Heber J. Grant mai vua e dua na nona itokani ka sega ni lewe ni Lotu. Ena nona vosa ena gauna ni koniferedi raraba, e a wilika kina o Elder Grant e dua na iwase ni ivola me vakabibitaka kina na kena gadrevi me da ivakaraitaki vinaka na Yalododonu Edaidai:

“’Heber, Noqu iTokani:

“’Mo kila, me ikuri ni nodaru veiwekani vata vakavoleka ena gauna balavu, sa dua na ka na levu ni noqu dau doka na dina kei na yalodina ni itovo ni vakabauta vakalotu ena kedra maliwa na turaga kei na marama ka tautauvata na nomuni vakabauta. Vakavuqa ka vakawasoma na noqu dau kaya, ena veitalanoa, ni o ira duadua ga na tamata vakabauta vakalotu au bau kila ni ra daubulataka na kosipeli era vakatavulica, sai ira na Momani e Utah. Ia oqo e ka dina.’”

Ni oti na nona wilika na iwase ni ivola, e kaya o Elder Grant: “Au vakavinavinaka vakalevu ni o noqu itokani e sega ni dau raica na ivola ni yacadra ka ra sega ni dau saumi ikatini, … baleta niu vakatitiqataka vakalevu me na rawa kina ni kaya ‘ni o ira duadua ga na tamata vakabauta vakalotu au bau kila ni ra bulataka na kosipeli era vakatavulica, sai ira na Momani e Utah.’ Au vakavinakataka ni o ira na Momani era veimaliwai vata kei na turaga oqo e sega walega ni ra Momani ena yaca, ia era Yalododonu Edaidai dina. E soqona na nona vakanananu me baleti ira kece na ‘Momani’ mai vei ira era veimaliwai vata kaya; kei na noqu dau tukuna vakawasoma e matana levu ni noqu rai sa ikoya ni itavi yadudua ni Yalododonu Edaidai me vakataucokotaka na nona bula ni itovo ena ivakaraitaki vei ira kecega na tamata me ra dokai koya, ka sa na vakavuna na nodra dokai na tamata taucoko. E sa ikoya ga na kena rokovi na ivakavuvuli ni noda iVakabula me caudre vakakina na nomudou rarama e matadra na tamata oqo, me ra raica na nomudou ivalavala vinaka ka vakarokorokotaka na Kalou ka me liutaka ka ciqoma me bulataka na Kosipeli i Jisu Karisito.”

Tomana tiko na ivola, e wilika o Elder Grant: “Na dina ni nomudou tamata dau bulataka na nodra vakabauta vakalotu sa ikoya na ivakaraitaki ni veidokai. … O ira na nomudou tamata era kauta tu na nodra vakabauta ena nodra bula ena veisiga, ka ra cakava me vaka era nanuma ni sa rui bibi na nodra vakabauta. …’”

Lesuva tale na ivola nei nona itokani, e kaya o Elder Grant:

“E dua na iyatuvosa oqo au gadreva meu vakadeitaka vakadua ena nomuni vakasama:

“’Kevaka me dua na ka (na noqu itokani e toqa e dua na itoqa loaloa ena “dua na ka”) ena vakabauta ni cokoti vata kei na tawamudu ni bula se bera mai, ni vakabauta vakalotu e tu kina na veika taucoko (na noqu itokani e toqa tale e dua na itoqa loaloa ena “veika taucoko.”)’

“Eda vakabauta beka na ka oqo me vaka ni da Yalododonu Edaidai? Eda taleitaka beka na kaukauwa ni ka e tukuna na noqu itokani? ‘Kevaka me dua na ka ena vakabauta ni cokoti vata kei na tawamudu ni bula mai muri, ni vakabauta vakalotu e tu kina na veika taucoko.’ E vakaraitaka beka vei keda na kena dina ni tiko na veika taucoko sara ena vakabauta oqo ni cokoti vata kei na tawamudu na bula sa bera mai? Ia koi keda, me vaka e kaya na noda itokani ni da kauta tu na noda vakabauta ena noda bula e veisiga, ka da cakava me vaka eda nanuma ni sa rui bibi na noda vakabauta?”⁴

iVakavuvuli nei Heber J. Grant

Eda colata e vatuvatu ni tabada na kena kilai na Lotu.

Ena gauna oqo, sa yaco me da kilai ena noda—yalododonu, tamata rerevaka na Kalou; ka me yaco ki na ivakatagedegede ni da bulataka na Kosipeli, na noda kila na kena dina, eda na tomana tiko me vakarusai na veivakasama ca, taracake na yalo vinaka, ka kauti ira mai na tani.

Na kena ivakarau oqo e a kau mai vei keda baleta na dina ni tu vei keda na kila ka, ka sa rui lewe levu vei keda era sa bulataka sara tu ga na kila ka e tu vei ira. Na tamata yadua eda tu vata kaya ena colata e vatuvatu ni tabana na kena kilai na nona Lotu, o kemuni kei au eda bulataka na Kosipeli i Jisu Karisito, eda kauta mai na veivakacaucautaki ena cakacaka ni Turaga ka sa tauyavutaki tale ena vuravura ena itabagauna oqo.

Au vakavinavinaka vakalevu ni vakaoqo na kena ivakarau, ka sa vuabale na lomaqu ena vakavinavinaka vua na Turaga ena veisau totoka ka sa mai yaco oqo, kau nuitaka ni turaga kei na marama vakayadudua ka ra lewena na Lotu oqo me ra vakaraitaka na lomadra me vaka na nodra igu kei na kaukauwa taucoko me ra na bulataka na Kosipeli oqo me rawa ni vunautaka na nodra bula na dina ni ka oqo.⁵

Sa mudu sara ga vakadua na vakalelewa baleta na Lotu, na itovo ca kei na lasu me baleti keda e dua na uma tamata baleta ni sa qai yaco me ra kila na tamata na gagadre ni lomada, ni sega vei keda na veicati vei ira sara mada ga era tukuna na veika ca me baleti keda. E sa vukei keda vakavuqa na Turaga me da veitokani vata kei ira era a keda meca ena dua na gauna. Era sa vulica ni Yalododonu Edaidai vakayadudua e tamata yalodina ka sa italai ni Turaga e gadreva tu me kila na cava e vinakata vua na Turaga me cakava, e dina ga ni nodra dui sasaga ena rairai duidui sara beka vakalevu mai vei ira na noda, ia era sa vulica tiko na tamata ni dua na Yalododonu Edaidai e tamata dina ka yalodina sa ikoya e dua na tamata e kilikili me vakabauti ena veika taucoko baleta e gadreva me kila na vakasama kei na lewa ni Kalou. Ena nodra vakila beka na noda cala me vaka ni da dua ga na uma tamata, era vakadeitaka na noda dau dina kei na noda dau yalodina.⁶

Lako ki na vanua o via lako kina ena kedra maliwa na Isireli, lako mai na dua na mua ni Lotu ki na dua tale, o na kunea e dua na ivakadinadina ka waqa tiko e lomadra na yalododonu Edaidai ni sa ikoya oqo na cakacaka ni Kalou Cecere ka tauyavutaka na Luvena o Jisu Karisito. O na kunea na ivakadinadina oqo, o na rogoca na kena tukuni, ia eda dau bulataka li na bula ni Yalododonu Edaidai? Eda bulataka tiko li na bula e dodonu me da bula kina, me vakasamataki na ivakadinadina uasivi ka sa soli oti vei keda? Eda rokova tiko li na Nona ivakaro me vaka ni dodonu me da cakava? Eda colata e vatuvatu ni tabada na kena kilai, eda rawa ni kaya, na Lotu, oi keda vakayadua.⁷

Me vakalougatataki ira na tamata kei Saioni na Turaga. Me da rokova na nona ivakaro ena sala kei na ivakarau ni tamata taucoko, laurai mai na noda caka vinaka, noda dau dina, noda dau yalodina, e rawa me vakavuna me da dokai kina, kevaka era vakadinata na noda vakabauta se sega.⁸

Na Yalododonu Edaidai ka ra dau caka cala e rawa me ra vakacacana na nodra kilai kei na kena kilai na inaki ni dina.

Au kila vinaka tiko ni dua na Yalododonu Edaidai e cakava e dua na cala e sega walega ni beitaki ena cala o ya, e wili vata talega kei na vakacaca e kauta mai ki na Lotu. Kevaka e mateni e dua na turaga ka lewenilotu, e rairai raici koya beka e dua ka se qai imatai ni ivakaraitaki ni dua na Momani e raica sa ikoya na tamata oqo (ka mateni tu). E sa na dusi sara ga ni Momani, na Momani taucoko sara ga era sa na vakalewai mai na ivalavala ni tamata o ya. O koya e a raica oqo ena kaya, “Kevaka sa ikoya o ya na bula vaka Momani, au sega ni taleitaka, ” ena gauna e rogoca kina e dua na ivunau ni Momani, e sa na vakayawaki koya mai kina. E sa levu na ivalavala ca e nakiti me sogota na loma ni tamata ka me saqata na Matanitu ni Kalou.⁹

Na vunau kei na vosa e lailai na kena ibalebale vakavo walega me da bulataka na bula erau salavata kei na noda ivakavuvuli.¹⁰

Ena dua na gauna e dua na turaga e a vunautaka e dua na ivunau totoka. E muri e qai kaya vua e dua na nona itokani: “O kila, sa bau dua na ivunau veivakurabuitaki o ya, totoka vakaoti, ia na nomu itovo vosa kaikaila e veibasai sara ga kei na veika o vunautaka.”¹¹

Au rogoca ni dua na turaga ka a tiko ena dua na soqo ni kana ni tukuna tiko vua e dua tale na turaga me baleta na vakabauta ni Yalododonu Edaidai. E kaya, “Na cava na vuna, o ira na ‘Momani’, ka ra bulataka na nodra vakabauta vakalotu, era sega ni gunu ti, kofi, tavako se yaqona ni valagi.” E kaya mai na turaga ka dua, “Au sega ni vakabauta e dua na vosa oqori.” E kaya tale na turaga o ya, “E ka dina.”

Oi rau na lewe rua sega ni “Momani” erau a dabe vata toka ena dua na teveli ena soqo ni kana oqo. E a qai lako mai e dua na “Momani.” E kaya na turaga ka taqomaka tiko na “Momani, ” “Sa lako mai qori e dua na Momani. E sa na mai dabe vata kei kedaru. Noqu iba ena sega ni gunu kofi.” Na iba e sa vakadonui. E a gunu kofi na “Momani!” Ena nodrau sa lesu mai tuba e kaya o koya ka druka ena iba, “Sa oti sara ga na noqu vakabauta na tamata o ya, mai vakatusa na nona vakabauta ni Kalou e solia e dua na ivakatakila vei Josefa Simici, tukuna tiko vei ira na tamata me ra kakua ni tara na veika o ya, qai lako mai ke ka mai basuka na ivakavuvuli ni nona parofita. Au a vakabauta tu na tamata o ya, ia sa oti vakadua na noqu vakabauti koya.”¹²

Ni da bulataka na noda vakabauta vakalotu, ena vakararamataki vuravura na noda ivakaraitaki vinaka.

Au via tukuna vei kemuni na Yalododonu Edaidai ni sa yaga vei keda, na noda ciqoma e dua na ivakadinadina ni cakacaka vakalou eda vakaitavitaki keda kina, ka vakarota na noda bula ni veisiga yadua ni lagilagi e kauta mai ena cakacaka ni Kalou mai na cakacaka vinaka eda vakayacora, ia me caudre vakakina na noda rarama ka vakarokorokotaka na Kalou [raica Maciu 5:16]. E sega na tamata ena dela ivuravura oqo me vakalougatataki vakalevu me vakataki ira na Yalododonu Edaidai; e sega na tamata me yacovi ira na veivakaraitaki e vuqa ni loloma kei na yalololoma kei na vosota vakadede ni Kalou ka soli vei keda, au kaya ni o keda, eda siviti ira taucoko na turaga kei na marama ena dela ivuravura e dodonu me da bulataka na bula Vakalou kei na buladodonu.¹³

Na iVakabula e kaya vei ira na Nona tamata ni o ira na masima kei vuravura, ia kevaka sa seavu mai na masima na kena tuituina, ena vakatuituinataki tale ena cava, sa qai sega ni yaga ena dua na ka, me biu ga ki tautuba me butuka sobu ko ira na tamata. E kaya talega vei ira ni oi kemudou na rarama kei vuravura. Na koro sa tara toka e ulunivanua sa sega ni tabonaki rawa. Sa sega talega ni tutuvaki na cina, ka me qai toka ena ruku ni ivakarau ni sila, ena kena itutu ga, sa qai cinavi ira kecega sa tiko e vale. E qai vunauci ira o Koya me caudre vakakina na nomudou rarama ena matadra na tamata, me ra raica na nomudou ivalavala vinaka ka vakarokorokotaka na Kalou. [Raica Maciu 5:13–16.]

Na ivunau oqo e vakayagataki sara ga vei keda. Oi keda na rarama kei vuravura. Eda sa ciqoma na ivakaraitaki ni Kalou Cecere. Eda sa ciqoma e dua na ivakadinadina ni kosipeli, ka da kila ni bula tiko na Kalou, ni o Jisu sa ikoya na Karisito, ni o Josefa Simici e a parofita ni Kalou. … Na vei Yalododonu Edaidai vakayadua ka yalodina e caudre tu e lomana na ivakadinadina oqo. Oqo, eda bulataka tiko li na ivalavala vinaka ka da vakayacora me kauta mai na veivakadonui ki na cakacaka ni Kalou? E sa kilikili tiko li na noda ivakaraitaki me ra vakamurimuria na tamata taucoko? Eda vakaraitaka tiko li na noda ivakaraitaki ni tiko na noda vakabauta ena kosipeli?¹⁴

Au vakabauta ni sa ikoya na itavi bibi vakayadudua ni lewe ni Lotu i Jisu Karisito ni Yalododonu Edaidai me qarauna na nona bula me ivakaraitaki ni kilikili ka ra vakamurimuria na tamata taucoko, ka na kauta mai na veivakadonui kei na veivakalougatataki vei koya kei na nona kawa era muri mai, vakaveitokani talega ena cakacaka ni Turaga. Oqo e sa dodonu me dua na sasaga cecere duadua ni Yalododonu Edaidai vakayadudua.¹⁵

Na Kalou na Tamada mai lomalagi e rawa ni vukei keda me da yalodina ka dina vua ka rawa ni da vakaraitaka mai na noda vakabauta, mai na noda yalodina vei ira na tamata, kei na dodonu ni noda bula ni o keda na vada vakaidina ni Kalou bula, gumatuataka tiko na vakatetei ni Kosipeli i Jisu Karisito, sa noqu masu e vuni yaloqu taucoko.¹⁶

Na noda ivakaraitaki vinaka e rawa ni kauti ira na tani me ra vaqaqa na yavu ni bula kei na veivakabulai.

Ke rawa me ra bulataka mada na kosipeli o ira vakayadua na Yalododonu Edaidai me rawa ni na vunautaka yani na kena dina mai na nona ivakaraitaki.¹⁷

Na dauvunau cecere ka veivakurabitaki cecere duadua ena keda maliwa na Yalododonu Edaidai sa ikoya na turaga se marama ka bulataka na kosipeli ni Turaga o Jisu Karisito. “Mo vakatakila mai vei au na nomu vakabauta ena nomu cakacaka” sa ikoya na ka e wili. E kaya o Jemesa ni na vakatakila na nona vakabauta ena nona cakacaka, kei na vakabauta kevaka sa sega ni tu vata kei na cakacaka sa mate ga. E tautauvata na yago ni sa takali na yalo. [Raica Jemesa 2:17–18, 26.]… Ena vuku ni noda cakacaka, na noda makutu, na noda vakabauta, na noda icegu, e rawa kina me da vunautaka na kosipeli oqo. Na tamata e vuravura era sa tekivu kidava, me ra kila kei na kena macala ena ka dina ni vuanikau ni kosipeli i Jisu Karisito, me vaka e vakatavulici mai vei ira na Yalododonu Edaidai, era vuanikau vinaka. … Na ivakatagedegede uasivi e a virikotora ena vuravura na iVakabula sa ikoya, “E dina ga, dou na kilai ira ena vuadra.” [Maciu 7:20.] Au bolea e dua ga na tamata ena vuravura me vakasaqara e so na tamata ka ra marau vakalevu ena nodra lomanivale, yalo galala, sautu, yalodina ena bisinisi, sega ni mateni ka vakamuria vakavoleka sara na lawa ni Kalou kei na tamata, me tautauvata kei ira na Yalododonu Edaidai. Au sega ni vosa tiko oqo vei ira na Momani ka ra sega ni rokova na ivakaro ni Kalou.¹⁸

Me vakalougatataki kemuni taucoko na Kalou. O keda vakayadudua ka tiko e dua na noda ivakadinadina ena cakacaka vakalou eda vakaitavitaki keda kina, me da vakarota na noda bula ni o ira era sega ni kila na dina, me ra raica na noda makutu, na noda vakabauta, na noda yalo raramusumusu, kei na noda gagadre me da qarava na Kalou, e rawa ni ra liutaki ena nodra vakasaqara na dina ka dodonu me da wasea vei ira. Sa ikoya oqo na noqu masu kei na gagadre.¹⁹

E bula tiko na Kalou; o Jisu na Karisito; o Josefa Simici sa ikoya e dua na parofita ni Kalou bula; e tu vei keda na dina; kei ira era kila, ia mo bulataka baleta ni o ira era sega ni kila e rawa me ra vakasaqara na yavu ni bula kei na veivakabulai ka rawata na bula tawamudu; oqo na isolisoli uasivi duadua ni Kalou ki vua na tamata.²⁰

Au masuta na veivakalougatataki ni Kalou Cecere me soli ka tiko vata kei kemuni kece na lewe ni Lotu oqo, kemuni vakayadudua na Yalododonu Edaidai yalo vakabauta mamakutu. Me rawa vei keda me da vunautaka na Kosipeli ni Turaga o Jisu Karisito ena yalodina, yalododonu kei na vakadinati ni noda bula. Kevaka eda cakava oqo, e sa na vakadeitaka e dua na iotioti ni qaqa.²¹

Au vakavinavinaka ni sa ulabaleta na kaukauwa kei na igu taucoko ka a solia vata vei au na Kalou meu cavuta kina e dua na kila ka ni bula tiko, ni Kalou sa ikoya na Tamada, kei Jisu Karisito sa ikoya na noda dauveivueti ka iVakabula.

Me vukei iko kei au na Turaga kei na veiyalo vakayadua ka sa tu kina na kila ka me cakacaka vata kei na igu taucoko eda taukena me da kauti ira mai na tani ki na noda kila ka, mai na noda ivakaraitaki. Io, au vakavinavinaka vua na Tamada Vakalomalagi ena nona raica ni dodonu me digitaki Josefa Simici me iyaya ni ligana ena kena tauyavutaki tale ena dela ivuravura na yavu ni bula kei na veivakabulai. Me vakalougatataki kemuni taucoko na Turaga, ka vakalougatataki ira yadua na yalodina ena dela ivuravura, ka vukei ira vakayadua na Yalododonu Edaidai me ra bulataka me rawa ni rarama na nona ivakaraitaki ka na vukea na nodra kau mai na tani ki na dua na kila ka ni dina.²²

Vakatutu ni Vuli kei na Veivosaki

Na cava na vuna e sa rui kaukauwa kina na kena veivakayarayarataki e dua na ivakaraitaki?
Na cava na kena ibalebale me da colata e vatuvatu ni tabada na irogorogo ni Lotu?
E rawa vakacava me da ivakaraitaki vinaka cake kivei ira na lewe ni noda matavuvale, lewe ni tabana se tabanalevu, kei ira eda tiko veivolekati?
O cei soti na tamata era sa vakayarayarataki iko ena nodra ivakaraitaki? Na cava na vuna era sa vakayarayarataka kina na nomu bula o ira na tamata oqori?
Na veika cava soti e yaco ka rawa kina ena cakacaka vinaka ni Yalododonu Edaidai ka ivakaraitaki vei ira na tani me ra vaqaqa na kosipeli?

lighthouse — E rawa ni vakararamataki ira na tani na nona ivakaraitaki vinaka e dua na Yalododonu Edaidai.