Wase 19

Na Masu Bibi, Dina, Ka Vu mai Loma

Eda na rawata e vuqa na veivakalougatataki ni da dau vakayacora na noda masu yadua kei na masu vakamatavuvale.

Na Bula Nei Heber J. Grant

Ni se gonetagane lailai sara e dau gade vakalevu o Heber J. Grant ki na vale nei Peresitedi Brigham Young. Kevaka ena tiko e kea o Heber me donuya na gauna ni masu, ena dau sureti me tekiduru vata kei iratou na matavuvale ena masu. Na veimasu oqori e dau dede na kena revurevu vei Heber. E nanuma lesu ena dua na gauna e muri, “Ena vuqa na gauna, mai na veivakauqeti ni Turaga vei Brigham Young ena nona vakatakekere tiko vua na Kalou me dusimaki, au dau mata cake mai ka rai yani ki na vanua e masu tiko kina o Brigham Young, meu raica de sa tiko kina na Turaga. E vaka vei au ni vosa tiko vua na Turaga me vaka ga ni vosa tiko e dua na tamata vua tale e dua.”¹

E vuqa na gauna ena bula nei Peresitedi Heber J. Grant e dau vakaraitaka kina na nona vakararavi vakatabakidua vua na Tamana Vakalomalagi kei na nona vakabauta na kaukauwa ni masu. Me vaka na gauna sa voleka kina ni mate na imatai ni watina sa rarawa ka veilecayaki sara vakalevu na luvena yalewa ka qase duadua. E a masu vagumatua sara me rawa ni ciqoma na mate nei tinana (raica na tabana 47–48 ena ivola oqo). Ena veigauna tale eso, e dau masu o Peresitedi Grant me vukea na tuakana vakacabecabe ka sa lako tani mai na Lotu (raica na tabana e 11 kei na 13) ka vakakina me vakatakekere vua na Turaga me vakabula e dua na goneyalewa lailai ka tauvi diphtheria (raica na tabana 101).

Ena nona vosa vei ira na Yalododonu, e dau wasea kina vakavuqa o Peresitedi Grant na masu ni yalona. E dau tukuna na nona vakanuinui me na dusimaki ira na iliuliu vakamatanitu ena nodra itavi na Turaga.² E vakaraitaka na nona vakamamasu “titobu ka yalodina” me na vakalougatataki ira na sotia kei na nodra matavuvale na Turaga ena gauna ni ivalu.³ E kaya talega ni dau masu e veigauna “me baleti ira kece na vakaitutu ena Lotu oqo, ena matabete se ena veimataisoqosoqo.”⁴ E vakamamasu vua na Turaga me vukei ira na Yalododonu me ra bulataka na kosipeli ka dusimaki ira na tani me ra kila na dina.⁵ Ka dau wasea talega na nona kerea me vukei ena nona tiko vinaka:” Na noqu vakamamasu bibi e veigauna … me kakua ni vakabutobutotaki na noqu vakanananu, meu kakua ni butusevata na gaunisala ni bula dodonu, ia ena noqu tubu tiko e veiyabaki me tubu talega vakakina na noqu kila ka, me caudre kina e yaloqu na rarama kei na veivakauqeti ni Yalo ni Kalou ka vakararamataka na noqu kila ka, ka me vakadeitaki au meu yalodina tiko ena noqu qaravi koya na Tamaqu Vakalomalagi.”⁶

iVakavuvuli nei Heber J. Grant

Me da dau masu ena veika kece eda vakayacora.

Dau tekiduru sobu e durumu ka masu vua na Kalou me dusimaki iko ena veika kece o vakayacora.⁷

Na gauna ga e sa mudu kina na nona vakatakekere tiko vua na Kalou e dua na tamata me baleta na yalona kei na nona veidusimaki, ena gauna vata tale ga oqori sa na tekivu kina me vulagi vua kei na nona cakacaka. Ni sa mudu na nona kerea tiko na Yalo ni Kalou e dua na tamata, era sa na nuitaka tikoga kina na nodra inaki vakataki ira, sa na yaco me yali kina mai vei ira na yalo ni Kalou, me vakataki ira ga na itokani voleka, ni ra sa sega ni veivolavolai se veisikovi, sa na yaco me ra veiyawaki. Sa dodonu me da dau masulaka me kakua ni laivi keda na Kalou ena dua na gauna me kakua ni yali vei keda na veivuke ni yalona me da vorata kina na ivalavala ca kei na veitemaki.⁸

Laivi ira na itabagone me ra dau vakacabo masu lo ka vakatakekere vua na Kalou, ena veimataka kei na veiyakavi, me baleta na veidusimaki ni nona Yalo Tabu.⁹

Ena veigauna ni vakadigagalu, ena veigauna e katakata tu kina na ivalu, kei na veika dredre ni dua na siga; ena veigauna ni veitemaki, ni rarawa, ni sautu kei na veivakalougatataki, me da dau masu tikoga, me da masu taudua, se me da masu vata kei ira na noda matavuvale ni ra vakavolivoliti keda tu, ena vakavinavinaka me baleta na noda bula, me baleta na noda kila na leqaleqa ni bula, kei na kaukauwa me rawa kina ni da vosota me yacova na ivakataotioti.

“Mo gumatua ena masu mo rawa na ka kecega; io me kakua ni rawai iko ko Setani kei ira na nona italai.” (Vunau kei na Veiyalayalati10:5.)

“Dou daumasu tikoga mo dou kakua ni malumalumu, me yacova niu sa lesu tale mai.” (Vunau kei na Veiyalayalati 88:126.)¹⁰

Au na kerea tale vei kemuni, mo ni tekiduru sobu e durumuni ka kerea vua na Kalou me liutaki kemuni ena ivalavala kecega ni bula, ia kevaka sa tiko vata kei ira na Yalo ni Kalou era na mamarau ka kunea na vakacegu ena veika era vakaitavi kina. Kakua ni cakava e dua na ka o na sega ni rawa ni kerea na Kalou me vukei iko kina. Tubucake ena rarama kei na kila ka ni kosipeli, me vaka niu dua na italai ni Kalou, au sa yalataka kina vei iko na vakacegu kei na reki kei na marau, ena yacai koya na noda Dauveisereki.¹¹

E yaga na masu ena tubu vakayalo

Eda vakadinadinataka ni Kalou bula na Kalou, … ni bula tiko ka dau lomani ira na Luvena; ni dau rogoca ka sauma na masu; ni na sega ni laivi ira na Luvena me ra lako tu ena butobuto kei na ivalavala ca ka sega na nodra cina; ni tamata taucoko e rawa ni rawata na cina oqori me dusimaki kina na yavana ena bula oqo; ia ena vuravura veiveisau oqo me rawa tikoga ni ra lako mai Vua na Luvena ka me vosa vei ira ko Koya ena sigalevu tutu se ena vakanomodi ni bogi, ena dua na ivosavosa era na kila, kevaka walega era na bula kilikili kaya tiko na Nona Yalo Tabu.¹²

Na vanua cava ga e lako kina na kosipeli i Karisito, era sa ciqoma e udolu vakaudolu na Turaga kei na marama ka ra sa rawata na kena ivakadinadina yadua ni ra sa ciqoma na ivakadinadina ni kena vakalou na cakacaka eda sa okati kina me vaka ni da Yalododonu Edaidai ena noda sa vakatakekere vua na Kalou me baleta na ivakadinadina. E sega ni yaco mai na ivakadinadina oqori mai na nodra vulica vakataki ira, ka sega talega mai na vuku ka solia vei ira na Kalou, ia mai na isau ga ni nodra vakamamasu vakabibi ena yalodina, ka tusanaki ena yacai Jisu Karisito na noda Dauveisereki, me baleta na rarama kei na kila ka me baleta na vakalou ni cakacaka oqo.¹³

Na itovo tudei vakatamata o ya me dokadoka mai ka vakalevulevui koya, me [kilai koya ga vakataki koya], me guilecava na Kalou; ia na kosipeli e gadreva me da dau masu tiko ena veisiga kece ni noda bula, e sega walega vata kei ira na noda matavuvale, ia me caka vuni talega. Na gagadre oqo sa na tarova na noda [kilai keda ga vakataki keda]; ka ni da na yaco kina me vaka na gonelailai, ena noda tekiduru sobu ka masu vua na Kalou me baleta na rarama kei na veivakauqeti ni Nona Yalo Tabu.¹⁴

Au vakabauta tudei tu ni sega ni dua na tamata ka dau cuva sobu ena yalodina e veisiga ni nona bula ka vakatakekere vua na Kalou me soli vua na rarama ni Nona Yalo Tabu me dusimaki koya me na qaciqacia ka dokadoka. Ena kena veibasai sara ka ni na vakasinaiti na yalona ena vakarokoroko, yalomalua, kei na yalorawarawa me vaka na gone.¹⁵

Au sega ni ririkotaka na gonetagane se na goneyalewa lailai, na cauravou se na goneyalewa, ka dau vu dina mai yalona na masu vakarua vua na Kalou e veisiga me kerea na veidusimaki ni Nona Yalo Tabu. Au vakabauta ni ena gauna ena yaco mai kina na veitemaki ena tu vei ira na kaukauwa me ra vakadruka ena vuku ni veivakauqeti ka na soli vei ira. Ni da vakatakekere vua na Turaga me baleta na veidusimaki ni Nona Yalo Tabu eda sa na viribaiti, ka ni kevaka eda na vakasaqara ena yalodina na veidusimaki ni Yalo ni Turaga, au rawa ni vakadeitaka vei keda ni da na rawata vakaidina.¹⁶

Na ka bibi duadua ga au gadreva me volai ena yalodra na itabagone, oya me ra dau masu vua na Turaga. Me kadre na nodra vakabauta. Kevaka e sega vei iko na kila ka, me tiko ga na vakabauta. Vakabulabulataka na vakabauta oqori ena qai basika mai na kila ka.¹⁷

E dua na ka bibi e gadrevi vei ira na Yalododonu Edaidai sai koya me ra yalodina ena nodra dau masu, na masu lo kei na masu vakavuvale. Na Nona inaki na Tamada Vakalomalagi ena nona gadreva na veika oqo o ya me da veitaratara tiko kina vata kei Koya, me rawa kina e dua na sala ni veitaratara vei keda kei na lomalagi me rawa kina ni da dreta mai vei keda na veivakalougatataki mai lagi. E sega ni dua na tamata yalomalumalumu ka dau vakamamasu vua na Kalou, ka dau vakatakekere vua e veisiga me baleta na rarama kei na veivakauqeti ni Nona Yalo Tabu, me na dokadoka ka vakalevulevui koya, se me nanuma ni vuku kei na yalomatua ka tu vua sa ikoya sara ga na veika e gadreva. Na tamata dau masu ka yalomalumalumu ena dau raica ka nanuma tiko e veigauna ni na vakararavi tikoga vua na Kalou me baleta na veivakalougatataki kece sara e marautaka tu, ka vakakina na nona masu vua na Kalou e sega walega me kerea kina na rarama kei na veivakauqeti ni Nona Yalo Tabu me dusimaki koya, ia ena nanuma me vakavinavinaka vua na Kalou me baleta na veivakalougatataki e rawata, ka kila kina ni bula, ni bulabula, ni kaukauwa, kei na vuku kece e tu vua e lako mai vua na Kalou, o Koya na nona Vu ni bula.

Kevaka eda na sega ni dolava tu na sala ni veitaratara oqo ena keda maliwa vata kei Tamada Vakalomalagi, sa na butakoci kina mai vei keda na rarama kei na veivakauqeti ni Nona Yalo Tabu, ka vakakina na yalo ni vakavinavinaka ka vakasinaita tu na lomada kei na gagadre me da vakacaucautaka na Kalou ena Nona vinaka kei na loloma cecere ena vukuda.

E sega tale ni dua na vakanananu me va-Kalou cake mai na vakanananu oya ni vakavinavinaka vua na Kalou ka dau yaco mai ena gauna eda vakila kina ni sa vakalougatataki keda na Kalou. Sa nodra ivakadinadina tu o ira kece era laki vunautaka na kosipeli ki vanua tani, kei ira sa rawa me ra veisautaka na yalodra na wekadra me baleta na vakalou ni cakacaka era vakaitavi kina, ni uasivi cake sara na reki kei na vakavinavinaka ka dau vakasinaita na yalodra ena nodra sa yaco me iyaya ni cakacaka ena ligana na Kalou ena nodra kau mai na tamata me ra kila na ituvatuva ni bula kei na veivakabulai. Sa dodonu me da vakabulabulataka na yalo o ya kei na gagadre me rawa kina ni tuvalaki na noda bula me dau tu kina vata kei keda na vakavinavinaka, kei na gagadre me vakacaucautaka na Kalou me baleta na Nona vinaka vei keda. Ena sega ni rawa ni tu vata kei keda na vakanananu oqori kevaka eda vakawaletaka na noda itavi ni masumasu vua na Tamada vakalomalagi.¹⁸

Bula savasava, maroroya na nona ivunau na Turaga, dau masu vua e veigauna me maroroi iko ena dina kei na savasava, bula me vaka na nomu masu, ia na veika kecega ena yaco vei iko sa na tiko vata kei iko na Turaga ka na sega ni dua na ka ena yaco vei iko me na sega ni vakalagilagi kina na Kalou, ka na baleta talega na nomu vakabulai kei na bula vakalou. Ena yaco mai ki vu ni yalomu ena kena bulataki na bula savasava o masuta tiko, e dua na reki ka na uasivia sara na veika e rawa ni o vakamacalataka se na veika o kila rawa. Ena dau tu ga e yasamu e veigauna kece na Turaga; ena vakacegui iko ko Koya; o na vakila na Nona volekati iko ena veigauna dredre ni veivakatovolei; Ena yadravi iko ka taqomaki iko me vaka na Nona inaki vuku.¹⁹

Au vakadinadinataka vei kemuni niu kila ni bula tiko na Kalou, ni dau rogoca ka sauma na masu.²⁰

Na masu ena cikecike kei na yalodina e yaga vakalevu cake sara vei iko mai na veika kece sara au rawa ni tukuna se vola.²¹

Na masu vakamatavuvale e rawa ni vukei ira na itubutubu kei ira na gone me ra bula ganita na Yalo ni Turaga.

Au sa vakadeitaka ni dua na ka cecere ka uasivi duadua e vuravura taucoko me rawa ni dodonu ka yalodina tikoga kina e dua na tamata ki na nona kosipeli na Turaga ko Jisu Karisito, sa ikoya na nona vakamamasu lo vua na Kalou ena yacai Jisu Karisito, me baleta na veidusimaki ni Nona Yalo Tabu. Au sa vakadeitaka ni dua vei ira na veika cecere e rawa ni dau vakayacori ena loma ni dua na vuvale me rawa ni vakavuna na nodra dau lomana na Kalou, ka lomana na kosipeli i Jisu Karisito na gonetagane kei na goneyalewa ena vuvale koya, sa ikoya na masu vakamatavuvale. Me kakua ni masu duadua ga na tama ni matavuvale, ia me ra vakayacora talega vakakina na tina kei ira na gone, me rawa kina ni ra vakaivotavota ena yalo ni masu, ka me ra duavata kina, me ra veitaratara kina kei na Yalo ni Turaga. Au vakabauta ni lewe vica wale sara era dau lako sese, ni lewe vica wale sara e dau yali na nodra vakabauta ni ra sa kila tu na kosipeli, ka ra sega ni dau vakaweleweletaka na nodra masu ena nodra dui matavuvale, kei na nodra dau vakatakekere lo vua na Kalou.²²

Sa vakarota vei keda na Kalou me da masu vata kei ira na noda matavuvale ka da dau masu lo talega, me da kakua kina ni guilecava na Kalou. Kevaka eda vakawelewele ena vuku ni ka oqo, sa na yali kina mai vei keda na veivakauqeti kei na kaukauwa mai lomalagi; sa na yaco me da dau vakaduiduile, yali na noda ivakadinadina, ka da lutu yani ki na butobuto.²³

Era dau raica na gone na nodra ivakaraitaki na itubutubu, na nodra itokani, kei ira na nodra qasenivuli. Ena dua na gauna … ni ra tiko na [dauveituberi ni vuvale] ena nona vale e dua na na turaga ka ra vakacabo masu kina, e qai kaya cake mai e dua na gonelailai: “Tata, kedatou sega ni dau masu, se vakacava, vakavo beka ga ni datou dau vakavulagi?”²⁴

Na sala me da vakavulici ira kina na luveda me ra dau masu sai koya me da dau masu sara mada ga o keda, ena masu lo kei na masu vakamatavuvale. Sa rui lewelevu na Yalododonu Edaidai era dau vakaweleweletaka sara ga na nodra veivosaki vata kei na Kalou. Au dau reki ka mamarau e veisiga ni noqu bula ena noqu veivosaki vata kei Koya ka buli au, ena yaca i Jisu Karisito na noqu Dauveisereki. Ia ko ira ka sega na nodra gaunisala ni veitaratara kei na Tamada Vakalomalagi kei na noda Dauveisereki, sa yali tiko kina vei ira na veivakauqeti ka lako mai vua na Turaga.²⁵

Vakatutu ni Vuli kei na Veivosaki

Na sala cava e rawa ni da muria me vakaibalebale kina vakalevu na noda masu yadua? Na sala cava e rawa ni vakaibalebale vakalevu cake kina na noda masu ena noda vakavinavinakataka na nona veivakalougatataki na Kalou?
Na cava beka e rawa ni da cakava me da vukea na kena yaco na masu vakamatavuvale me gauna vakayalo vei ira kece na lewe ni matavuvale? Na veivakalougatataki cava beka e sa ciqoma na nomu matavuvale ena vuku ni nodra dau masu vata?
Na veika dredre cava soti e dau sotava na nomu matavuvale ena kena vakasaqarai na gauna ni masu vakamatavuvale? Na sala cava beka o sa lako sivita kina na veidredre oqori?
Na sala cava ena vukei keda kina na masu e veisiga me da “dina ka yalodina ki na nona kosipeli na Turaga o Jisu Karisito”? Na sala cava e rawa ni vukei keda kina na masu me da “me vakasinaiti na yaloda ena vakarokoroko, yalomalua, kei na yalorawarawa me vaka na gone”?
Na cava na kena ibalebale me da “vakatakekere vua na Kalou”?
Na cava na vuna e bibi kina me da vakatakekere vua na Kalou ena veisiga kece sara me baleta na veidusimaki ni Yalo Tabu?