Wase 15

Cakacaka Vakaukauwa ena Vuku ni Nodra Marau na Tani

Ni da veivuke ka vakayaloqaqataki ira na tani, eda kunea na inaki dina ni marau ena noda bula.

Na Bula nei Heber J. Grant

Etutu yadua na nona dau tukuna ko Peresitedi Heber J. Grant na nona cakacaka ni veivukei, ia ena so na gauna era dau tukuna na tani na veika vinaka era raica ni dau kitaka ko koya. Ko iratou na lewe ni nona vuvale eratou ivakadinadina taumada ka ratou kila vinaka talega na nona veiqaravi. E a tukuna na luvena yalewa ko Lucy Grant Cannon na nona lomasoli kei na nona daulomani ira na luvena kei na makubuna:

“Na nona lomana na nona matavuvale ko tamaqu e vinaka vakaoti. Na nona vakavolekataki koya vei iratou kei na nodratou vale e vakaraitaki vakavuqa. E dau vukei iratou kevaka mada ga me solia na nona bula. E dau kaya vakalevu, ‘Vukea na vunikau gone, na vunikau lelevu era na qarauni ira vakaiira.’

Na nodra siganisucu yadudua na luvena kei na makubuna ena lako yani vei ira e dua na ivola kei na jeke ka soli sara ga ena duiligadra se curu mai ena meli. Na Veisiganisucu kei na Yabaki Vou ka vakavuqa ena so tale na gauna, na ivola ni wilivola kei na jeke, yaloyalo se so tale na iloloma lalai e yaco yani. Na nona loloma kei na veivakalougatataki ena dau lako vata mai na iloloma ka lako mai vei keitou me vaka na masu ena vuku i keitou.¹

E a tukuna ko Lucy na veiqaravi malumu nei tamana ena gauna e a tauvi koya tiko kina na mate ni tilotilo.

Ni sa oti mada ga e vasagavulu katolu na yabaki, niu volavola tiko, na wainimata ni vakavinavinaka kei na qoroqoro e lako mai mataqu niu vakananuma na nona lomani au ena gauna ni tauvimate. Me vaka e levu era rogoci koya ni kaya, e a tauvi au e dua na mate levu ena gauna au yabaki tinikarua kina; keitou a tiko kina mai Washington, D.C., ena gauna ko ya. Ia ena nodra veiqaravi na italai ni Kalou kei na qarai ni kaukauwa ni Kalou ena vukuqu keu sa mate. Ena vica na macawa kau a tauvimate bibi tu kina, dina ga ni rau a tiko e rua na nasi vakaivola, e tutu yadua na gauna ena siga kei na bogi me biuta na noqu rumu ko tamaqu. Ena gauna au sa vinaka tiko mai kina, e dau wili ivola vakabalavu vei au. E kauta mai vei au na iloloma kei na veika vinaka me’u kania ni sa rawa meu kania ka marautaka kei na veigaunisala taleitaki e rawa ni cakava me vaka e rawata e dua na tina vinaka.

“Au a se malumalumu meu taubale ni keitou biuti Washington. E keveti au ki na sitima ni vanua ka qaravi au ena ilakolako ki vale. Kevaka me a dua na nasi vakaivola ko koya ena kilai mai na malumu ni ligana kei na loloma ni veiqaravi. Keitou yaco ki Salt Lake donuya sara ga na gauna me vakatabui kina na valetabu. Vuqa na gauna e keveti au eloma ni valetabu taucoko. Macawa ni vakabulabula e muria na noqu yaco mai ki vale, e dina ga ni ra a via qaravi au kece na lewe ni vuvale au vinakati koya tikoga me tiko voleka ka yalododonu kina me tiko kei au. Na ka au tukuna me baleti au e yaco vakatalega kina vei iratou kece na taciqu ena gauna eratou tauvimate kina.”²

Na veiqaravi nei Peresitedi Grant e ulabaleta na nona vuvale. E vakaraitaka ko Lucy:

“Dua na gauna ni vo e vica na siga me Siganisucu au a vakarautaka tiko e so na iloloma lalai me baleta e dua na vuvale vakaloloma, e a curu mai ko tamaqu kau vakaraitaka vua, ka tukuna vua na veika e baleta na vuvale mai na italanoa ga au a rogoca mai vua na tinadratou. Au tukuna ni dodonu meu vakarautaka na noqu isulu ni valetabu; niu via solia vua na marama ko ya me dara ena mataka ka tarava. Ena siga ka tarava ni kauta lesu tale mai na noqu isulu e a tukuna vei au ni gauna e curu yani kina ena matamata ni valetabu e a wawa tu mai kina ko tamaqu. E se sega mada ni bau raica vakadua na marama ko ya, mai na kena ivakamacala ga kau a solia vua, e tarovi koya ka solia vua e dua na waqanivola ena nona vakanuinui vinaka ni Siganisucu. E tiko ena waqanivola e ruasagavulu na dola.”³

Ni oti mada ga na kena tauvi koya e vica na strokes ka vakavuna na nona malumalumu ka damele, e tosoya tikoga ko Peresitedi Grant na qara na sala me veiqaravi kina. Ni sa yalani mai na nona vakaitavitaki koya ena kaukauwa ni yago, na veika e dau vakaitavitaki koya tu kina sa ikoya na vodo wavoki ena motoka. E dau vodo wavoki voleka ni veisiga, ka dau sureti ira na lewe ni nona matavuvale kei na itokani me ra lako vata kei koya. E veigauna ni gade oqo e vakavuqa na nona dau vakalevutaka na nona loloma ena nona kele me sikova na valenibula se nodra vale na lewenivanua.⁴

Ena nona veivakacaucautaki vei Peresitedi Grant, e a vola kina ko Elder John A. Widtsoe mai na Kuoramu ni Apositolo Le Tinikarua: “Na ka e taleitaka duadua sa ikoya na kawa tamata. Na ka e vakasamataka vakalevu sa ikoya na veika baleti ira na luvena na tamada vakalomalagi. … Na loloma oqo e vakatakilai koya, e sega walega ena nona via kila raraba na ka baleta na tamata, ia ena veika me baleta na tamata yadua. Na dravudravua kei na vakaloloma era sa dau taura na nona iyau. Na totolo ni yalona vei ira era rarawa e ka ni veigauna vei ira na nona veikilai. E soli na ilavo, vakakina na nona veivuke sara ga o koya ka rawa ni solia e dua na tamata kaukauwa vua e dua ka malumalumu. Ko Peresitedi Grant e sa rui dau lomasoli e sa rui sivia tale, dau loloma ena kena levu e rawata na nona kaukauwa taucoko, ka sa ikoya gona e dina tu kina vei ira na nona itokani ka lomana vakalevu na nona vuvale. E tu ena nona itutu cecere ena loloma e yalona ki na tamata kece, veivakauqeti vei ira kece na tamata me ra kauta laivi na gagadre ni nanumi koya vakaikoya.”⁵

iVakavuvuli nei Heber J. Grant

Na noda lomana na Turaga me vakaraitaki e na veivukei Vakarisito.

E dodonu me da mataqali tagane kei na yalewa vakacava, ni da Yalododonu Edaidai, ni da vakasamataka na kila ka totoka e noda, ni bula na Kalou, sa i Jisu na Karisito, ni Parofita ni Kalou ko Josefa Simici? E dodonu me da tamata dina taudua, bula dodonu duadua, dau vakasama ena loloma cecere duadua, ka tamata vinaka duadua ena vuravura taucoko.⁶

Me da kakua ni guilecava na itavi ka tu vei keda me da talairawarawa ka veiqaravi vua na Turaga, ia na veiqaravi vinaka oqori ki vei Koya e sega ni rawa ni soli ke sega na veiqaravi vei ira na wekada.⁷

Keitou kerei kemuni vakaidina na lewe ni Lotu mo ni lomani ira na ganemuni kei na tacimuni, kei na tamata kece se ko cei se evei era tu kina; me kau laivi na yaloca mai na nodra bula, me vakasinaita na yalodra ena loloma cecere, yalo vosota, vosota vakadede, kei na dau veivosoti.⁸

Na kosipeli i Karisito e kosipeli ni loloma kei na vakacegu, ni yalo vosota kei na vosota vakadede, ni veiciqomi kei na veivosoti, ni dauloloma kei na caka vinaka, ni loloma cecere kei na veilomani vakaveitacini. Na kocokoco, gagadre ca ni rawa iyau, gagadre ca, vinakata na kaukauwa, kei na lewa tawa dodonu vei ira na tamata kecega, e sega ni rawa ni dua na nodra tikina ena yalodra na Yalododonu Edaidai se vei ira ka ra rerevaka na Kalou e veivanua kece.⁹

Na noda vakaitavi me da veiqaravi e rawa ni laveti ka vakayaloqaqataki ira na tani.

Au a rogoca na italanoa ni dua na tacida (au sa guilecava na yacana) ka tiko ena dua na bose ena gauna e liu. E a kerekere ko Peresitedi Brigham Young ena soli ka me vakau ki na Missouri River me vukei ira na Yalododonu me ra kumuni ki Saioni. E kerei ira ka rawa ni ra solia, me ra solia e dua na bulumakau tagane se yalewa se dua ga na isolisoli. E dua na baraca vinaka e a lade cake ka kaya, “Au na solia e dua na tina ni bulumakau.” E dua tale na baraca e tu cake ka kaya, “Au na solia e dua na tina ni bulumakau.” Na imatai ni baraca e rua tiko na nona bulumakau kei na dua na vuvale levu, na baraca ka dua e ono na nona bulumakau ka vuvale lailai. E a qai lako mai na yalo [ni tevoro] vua na imatai ni tagane, [ka kaya, ] “Raica, e sega ni rawa ni na qarava vinaka na nomu vuvale levu, e sega ni rawa ni ko na rawati iko ena dua ga na bulumakau. Raica, na tamata ko ya e vuvale lailai ka ono na nona bulumakau, e rawa sara ga vua me solia e rua se tolu ka na rawati koya tikoga vakavinaka.” Ena nona tekivu lesu tale ki vale, e taubaletaka e va se lima na buloko, ka sa vakila ni sa malumalumu mai. Sa qai mani nanuma, “Au nanuma meu sa kua, ” ka qai vakasamataka na duidui ni yalo e temaki koya tiko kei na kena ka vakauqeta na nona yalayala vua na Peresitedi ni Lotu ni na solia e dua na bulumakau. Oqo e dua na yalo ka tukuna tiko vua me kua ni vakayacora na nona yalayala, me kua ni dina, me kua ni kitaka na ka e a yalataka. E tu vakadua vakasauri ka kaya, “I tevoro, tiko lo sa dodonu me vaka ga na dede ni noqu bula, au na lako ki na valenivolavola nei Baraca Brigham ka solia vua na bulumakau tale ka dua.” E a sega ni temaki tale vakadua.

Ia oqo na Yalododonu Edaidai taucoko e dodonu me ra dau veilaveti ka sega ni dau vakararavi.¹⁰

Au nauma sara ni dua na gauna au a dabe tiko ena State Bank au a raica sara e dua na turaga qase ni tasivi, na yacana ko John Furster. O koya e dua vei ira na imatai ni tamata me a papitaiso mai Scandinavia. Ni lako sivita na katuba leka ni baqe, e a vakasolokakanataka mai vei au na Yalo Tabu, “Solia vua na tamata ko ya e ruasagavulu na dola.” Au a lako cake vua na kesia ni baqe, solia vua na noqu ivola ni dinau me $20, taubale sobu e gaunisala ka siviti Mr. Furster ena mata ni Z.C.M.I. sitoa. Keirau lululu kau biuta na ruasagavulu na dola e ligana. Ena vica na yabaki e muri au qai kila ni mataka ko ya e a masulaka tiko ko Baraca Furster e dua na gaunisala me rawa kina vua me lako ki Logan ka laki cakacaka vakalailai ki na valetabu mai kea. Ena gauna ko ya, e a se bera kina ni vakaoti na Salt Lake Temple. Na ruasagavulu na dola sa ikoya sara na ilavo e gadreva, ka vica na yabaki imuri e a vakavinavinakataki au ena tagi, ena kena soli vua na ilavo oqo.

Ena dua na siga niu tiko ena noqu valenivolavola e dua na vakasama e lako mai vei au meu laki raici Sisita Emily Woodmansee ka solia vakadinau vua e limasagavulu na dola. Au a kitaka vakakina, ka kunea ni gadreva vakalevu tu na veika ni bula. … E sega tale ni dua na ka au gadreva vakalevu me tautauvata na dolavi ni noqu vakasama ki na veivakanananu vakaoqo.¹¹

Na veivosa vinaka kece e tukuni e solia vei iko na vuku mo tukuna tale e dua. Na veivukei kece ko vakayaocra, ena vuku ni kila ka tu vei iko, mo vukea e dua na wekamu, e solia vei iko na vuku mo vukea tale e dua. Na cakacaka vinaka e vakavuna na kena tubu tiko e lomana e dua na tamata me kitaka tikoga. Ena so na gauna au dau nanuma ni levu na tamata, laurai mai na nodra sega ni dau loloma kei na ivakarau ni nodra vakasama me ra vukei na tani, era nanuma ga ni ra vakarusai kevaka era tukuna se kitaka e dua na nodra caka vinaka se tukuna e dua na ka vinaka mai muri. Ke tiko e dua na noqu ilololo ka sinai ena sila, ka ko solia e dua se rua na taga, e sa na vo vakalailai ena nomu lololo, ia ke ko kitaka e dua na itavi ni loloma se kuria e so na vosa ni veivakayaloqaqataki vua e dua ka rarawa tu, ka sasaga tiko ena ivalu ni bula, ena levu cake na nomu rawata mo kitaka oqo ena siga ni mataka. Kakua ni lakova na bula oqo me sogo tiko na gusumu mai na vosa ni loloma kei na veivakayaloqaqataki, se na yalomu me dregati mai na vakayacori ni cakacaka baleta e dua tale. Kitaka e dua na nona ibole ni bula: dau tovolea mo vukea e dua tale me colata na nona icolacola.¹²

Na veiqaravi sa idola dina ni marau ena bula.

E sega ni rawa ni dua e tukuna na macala ni veiqaravi dina e a soli, se me da kila na gauna ena lesu mai kina vei keda se vei ira eda veikilai vata. Na kena isau ena sega beka ni lako mai ena gauna e caka kina na veiqaravi, ia e rawa ni qai lako mai vakalevu e muri. Au vakabauta ni da na sega ni vakayalia e dua na ka ena bula ni da soli veivuke, ena noda solibula, kei na vakayacori ni ka dodonu.¹³

Na idola dina ni marau ena bula sa ikoya na cakacakataki ni nodra marau na tani. Au lomana na tamata e nanumi koya vakaikoya ka se sega ni bau vakila na marau ka lako mai vei ira era taura na vinaka kei na vakavinavinaka nodra na tamata era a vukei ena ogaoga ni bula.¹⁴

Na ka vuni dina ni marau ena bula kei na sala me da vakarautaki keda kina ena bula mai muri sa ikoya na veiqaravi.¹⁵

Au vakabauta vakaidina ni gaunisala ki na vakacegu kei na marau ena bula sa ikoya na noda veiqaravi. Na veiqaravi au vakabauta, sa ikoya na idola dina, au vakabauta, ki na marau, baleta ni da kitaka na cakacaka me vaka na caka ni kaulotu, ena vo kece ni noda bula e rawa me da railesu ena veika eda rawata ena vanua ni kaulotu. Ni da vakayacora e so na ivakaraitaki ni loloma, eda vakila na cegu ni loma kei na marau ni yaloda, e kauta laivi na marau sega na betena.¹⁶

E nona lawa na Kalou e tautauvata na veiqaravi eda solia, e tautauvata na ka eda kitaka ena Lotu oqo ka vakakina e tautuba ni Lotu—na ka eda via solibula kina ki na Lotu vei ira talega eda solia kina na noda dina ena taudaku ni itavi ni Lotu—eda na tubu ena loloma ni Kalou, ka da na tubu e na kena rawati na inaki ni noda mai biu ena vuravura oqo.¹⁷

Me tiko kei kemuni kece, na taciqu, na Turaga, ena vanua ga ko ni vakaitikotiko kina. Me tiko e yalomuni na Nona vakacegu, me vakauqeti kemuni na Nona Yalotabu ki na veika vou eda rawata ena noda veiqaravi vakaveitacini kei ira na wekada.¹⁸

Vakatutu ni Vuli kei na Veivosaki

Na cava eda kunea kina “na ki dina ni marau” ena gauna eda “cakacakataka kina na nodra marau na tani”?
Na cava eda dau lomalomarua kina ena so na gauna me da dau yavala ka qaravi ira na tani? Na cava e rawa ni da kitaka me da vakila vakalevu na marau ni da veiqaravi?
Na cava e rawa ni da cakava me da vukei ira kina na gone kei na itabagone me gadreva me ra veiqaravi?
E rawa vakacava me da vakavinakataka na noda rawa ni vakila na nodra gagadre na tani?
Na cava na kena ibalebale me “dau veilaveti ka sega ni dau vakararavi”?
Na sala cava e vukei keda kina na veiqaravi me da “vakarautaki keda ena bula mai muri”?
Na cava e so na veika matata, rawarawa e rawa ni da kitaka me da muria kina na ivakaraitaki ni veiqaravi nei Peresitedi Grant? E rawa vakacava ni da veiqaravi veitalia ga na noda ituvaki ni bula?