Wase 8

Vakamuri Ira Era Digitaki mai Vua na Kalou Me Ra Veiliutaki

Eda tokoni ira na vakaitutu ena Lotu ena noda masulaki ira, vakamuria na nodra ivakasala veivakauqeti, ka tokoni ira ena nodra veiqaravi.

Na Bula nei Heber J. Grant

Ena nona tekivu veiqaravi o Elder Heber J. Grant ena Kuoramu ni Apositolo Le Tinikarua, e a vakayacora vata kei na nona tudei ena yalodina ki vua na Peresitedi ni Lotu. Ni se qai oti toka ga na nona ciqoma na nona ilesilesi, e a volavola vei tavalena o Anthony W. Ivins, “E sa rawa meu kaya vakaidina ni se bera vakadua ena noqu bula meu raica na gauna ni a sega ni lomaqu meu veisautaka na ituvatuva ni veika meu cakava ka lewai mai vua na italai ni Kalou.”¹

Me vaka e dua na lewe ni Kuoramu ni Le Tinikarua, e a vuqa sara na veika e sota kaya o Elder Grant ka vakaukauwataka na nona ivakadinadina ni Peresitedi ni Lotu me vaka ni gusunivosa ni Turaga e vuravura. E muri, ena nona sa qai Peresitedi ni Lotu, e qai tukuna kina e dua na ka e a yaco, ena nona a raica na veivakauqeti ni Turaga kivei Peresitedi Wilford Woodruff. Ena yabaki 1890 e a kacivaka kina o Peresitedi Woodruff ni sa nona lewa na Turaga me ra tauyavutaka na Yalododonu e dua na bisinisi ni qaqi suka e Utah. E a vakaitavi o Elder Grant ena komiti ka a vakaduri me vaqaqa kevaka e ganita se sega me qaqi na suka. Ni oti na kena dikevi vakavinaka sara, e a qai vakatura na komiti ki na Lotu me sa biu laivi na vakasama.

Ia e kaya o Peresitedi Grant, “E sega ni vakacegu na yalo i Peresitedi Woodruff. Digitaki tale e dua na komiti. Au a lewena na imatai ni komiti kau digitaki tale ena ikarua ni komiti. Au kerea na noqu vagalalataki baleta niu a sa solia oti na noqu vakasama, au a sa saini talega ena dua na ivolatukutuku, ia e a sega sara ga ni ra rogoca na noqu kerekere meu vagalalataki. Keitou se baci lakova tale vakavinaka sara ka vakamatata na veika oqo, na ikarua ni komiti e a qai solia e dua na ivolatukutuku ni sega ni vakasama vinaka. E a kaya o Peresitedi Woodruff: “Veitalia na ivolatukutuku. Na ka e vakatakilai vei au sa ikoya me tauyavutaki na cakacaka ni suka.”

Ena nona yalodina ki na ivakaro ni parofita ni Turaga, o Peresitedi Grant kei na so tale era a qai cakava na ituvatuva me tara e dua na iqaqi ka me qaqi kina na suka. Ia, e a dredre na kumuni ilavo me rauta na kena tara na iqaqi ka ni sota kaya tiko na dredre vakailavo ni vanua raraba ena yabaki 1891. E dua tale na ilawalawa daunibisinisi vinaka era vakatura ni sega ni vakasama vuku ena ituvatuva ni Lotu me tomana na kena tara e dua na iqaqi. E nanuma lesu o Peresitedi Grant na kena saumi ni ka vakaturi o ya mai vua na nona iliuliu.

Ena gauna e soli kina na vakatutu, e a vakaoqo na kena isau mai vei Wilford Woodruff: “Mai na siga au a ciqoma kina na kila ka vakalou ni kosipeli i Jisu Karisito ka vakatakilai mai vua na Parofita o Josefa Simici, me tekivu mai na siga o ya au a sa lako yani me vaka e dua na bete yalomalumalumu ka vunautaka na kosipeli o ya, e dina niu vakila de lakolako au na mate, kevaka e gadreva na kosipeli vei au meu butuka yani na gaunisala ni veiqaravi e kacivi au kina meu sota kaya na mate, au se sega vakadua ni bau vuki ki na imatau se ki na imawi; ia oqo na veivakauqeti ni Turaga vei au sa ikoya me tara na iqaqi oqo. Ena veigauna taucoko ena noqu dau vakasamataka me sa biu laivi, e dau lako mai na butobuto, kei na veigauna taucoko ena noqu vakasamataka me sa tara ga, e dau lako mai na rarama. Keitou na tara ga na iqaqi kevaka mada ga ena vakacacani kina vakailavo na Lotu.”

“Keitou a qai tara, ” e qai kaya e muri o Persitedi Grant, “ka sega ni vakacacani kina vakailavo na Lotu.” Na ka dina, ni Lotu e a qai tara tale e so na iqaqi, tauyavutaka na kena cakacaka ka tubu vakailavo kina na Lotu raraba ka vakakina o ira vakayadudua na Yalododonu Edaidai.²

Ena veiyabaki e muri, e a soli ivunau o Peresitedi Heber J. Grant me dusimaka na nodra bula na Yalododonu Edaidai: “Au sega ni kila tale e dua na ka meu vakila ni sa rui cecere sara na kena yaga ena noda bula me vaka na noda talairawarawa ki na ivakavuvuli kei na ivakasala ni Turaga, kei na talairawarawa ki na ivakavuvuli kei na ivakasala ni italai ni Turaga ena noda gauna oqo.”³

iVakavuvuli nei Heber J. Grant

Na Turaga e lesia na Nona parofita ka dusimaki ira ena veivakauqeti.

Au gadreva ena tiki ni gauna oqo, kei na veigauna taucoko sara, meu vakadinadinataka ena yalodina kei na yalo raramusumusu na ilesilesi vakalou ni Parofita o Josefa Simici, kei na ilesilesi vakalou kivei ira vakayadudua na turaga era a digitaki me ra sosomitaki koya.⁴

Kemuni na taciqu kei na ganequ, e sega ni dodonu mo ni taqaya, e dua na turaga ena sega ni rawa me tucake me liutaka na Lotu i Jisu Karisito vakavo walega ni vinakata na Tamada Vakalomalagi me tu e kea.⁵

E rawa vei au meu kaya ni veivakalougatataki ni Turaga e a sovaraki mai vakayauyau kivei ira vakayadudua na turaga era a tu ka liutaka na Lotu oqo, baleta ni ra a vakasaqara ena yalosavasava na veivakauqeti ni Yalo ni Kalou me liutaki ira taucoko ena veika era sa ciqoma me ra vakaitavitaki ira kina.⁶

E yaco me keirau veitau vinaka kei Brigham Young ena noqu a se gonelailai yabaki ono. …au rawa ni vakadinadinataka na nona yalovinaka, na nona lomani au, na nona lomana na Kalou kei na ivakaraitaki ni Turaga ka a lako mai vua ena nona a tucake ena itutu ni vunau oqo me vosa, e dua na gauna donu vei au meu dua vei ira ka a vakarorogo ena nona vosa veivakauqeti.

Mai na dua na ivakatakila ni Turaga vei Peresitedi John Taylor au a kacivi kina ena Matabose ni Apositolo Le Tinikarua, ni oti ga e yabaki rua na nona Peresitedi ni Lotu o John Taylor, ena veimacawa, keirau dau sota, me yacova sara ga na siga e mate kina. … au kila ni o koya na italai ni Kalou; au kila ni veivakauqeti ni Turaga e a lako mai vua; kau kila ena veigauna taucoko, ena nona dau kaya: “Sa ikoya oqo na ka e gadreva na Turaga, ” kei ira na nona itokani ena matabose ni apositolo era tokona na ka e kaya ni ka e gadreva na Turaga, ni veigauna e dau veivakauqeti vua ni sa dodonu kei na veivakauqeti ni Turaga vua e vakaraitaka ni nona vuku mai na kaukauwa ni Kalou, e uasivi cake sara mai na nodra vuku o ira na tani.

Ena so na gauna au dau lako ki na bose …, au kila tu ni dua na ka e dodonu me veivosakitaki kei na noqu vakasama e vakanamata vakatabakidua ki na dua na kena itutu me vaka ni rawa sara ga vua e dua na tamata me vakatabakidua kina na nona vakasama. … Niu dau gole tu ki na bose … au vakadeitaka na noqu duavata ena kena ivakarau tudei, au dau digitaka ena galala ni yaloqu taucoko na kena veibasai sara ga ni ivakarau tudei o ya, e baleta na ivakaraitaki ni Turaga ka lako kivei John Taylor. Ena veigauna kece vaka ko ya na italai ni Turaga, Peresitedi Taylor, e dau dodonu, kei na nona vakatulewa uasivi sara, mai na ivakaraitaki ni Turaga, e vakatakilai na dina ni veika oqori ka me uasivi na kena vinaka vei ira na tamata.

E rawa niu tukuna ni sa vica vata na gauna ena nodra dau talai yani na iapositolo me ra laki vakayacora na itavi mai na ivakaraitaki ni Turaga vei John Taylor, era dau nanuma ni na sega ni rawa me ra vakayacora na itavi. Era sa suka mai ka rawa me ra wasea na nodra ivakadinadina ena kena vakayacori rawa na itavi ka vakacolata vei ira o Peresitedi Taylor, na parofita ni Turaga, era qaravi rawa ena veivuke ni Turaga. …

E rawa niu wasea na noqu ivakadinadina ni o Wilford Woodruff e italai dina mai vua na Kalou bula ka Parofita ni Kalou. O Wilford Woodruff, e turaga yalomalua, ena loma ni vica ga na vula e drau vakadrau na tamata era saumaki ka papitaisotaki ira mai Herefordshire, Igiladi. … Au vakabauta ni sega ni dua tale na tamata e bula ena vuravura me uasivi cake mai vei Wilford Woodruff me saumakiti ira na tamata ki na Kosipeli i Jisu Karisito. Sa ikoya na turaga dau veivakurabuitaki ka uasivi na nona yalo raramusumusu; e dua na turaga e sega vakadua ni vakatavitaki koya ena veika lelevu vakabisinisi; e dua na turaga e yalodina ena teitei, e vakaogai koya ena kena tei na vuanikau kei na teivaki ni kakana, e dua na turaga yalomalua, o koya kau rogoca vei ira e lewe vuqa na tamata era kaya ni sega ni tu vua na rawa ka me veiliutaki ena Lotu i Karisito. Ia, au vinakata meu wasea vei kemuni na ivakadinadina, ena vuku ni ivakaraitaki ni Turaga, ka baleta talega na yalo raramusumusu ni turaga oqo, e baleta talega na vakalou ni nona bula ka baleta talega ni Kalou e lomani koya, e a vakalougatataki vakavica vata ena vuku ka uasivi cake sara mai na vuku kecega ni tamata ka levu cake na nodra kila vakailavo ena Lotu. …

Au kila ni o Lorenzo Snow e a Parofita ni Kalou. … E a veiliutaki ena Lotu o Lorenzo Snow ena gauna e yabaki walusagavulu kalima kina, kei na veika e a vakayacora ena loma ni tolu na yabaki ni nona bula e sa rui totoka dina ni da vakasamataka. E vueta cake na Lotu… mai na kena voleka ni leqa vakailavo. … Ena loma ni tolu na yabaki lekaleka na turaga oqo, ena nona sa rui qase me tiko vua na rawa ka me liutaka na kena levei na leqa vakailavo ni Lotu ena nodra vakanananu na tamata e vuravura, na turaga oqo e a sega mada ga ni bau vakaogai koya tu ena veika vakailavo, ena nona yalodina ena qaravi itavi ena Valetabu me vica vata na yabaki, taura na lewa vakailavo ni Lotu i Karisito, ena vuku ni veivakauqeti mai vua na Kalou bula, e a veisautaka na veika kece ena loma ni tolu na yabaki o ya, vakailavo, vakaivosavosa mai na kena veisau na itutu vakailavo mai na ca ki na vinaka. …

Au wasea vei kemuni na noqu ivakadinadina ena gauna ni noqu a se gonelailai, e se bera niu kila ka macala vinaka vei au na ivakavuvuli ni kosipeli, e sa vakadrukai na yaloqu ka ra sa drodro sobu mai na wai ni mataqu, ena vuku ni veivakauqeti ni Kalou bula, me vaka na noqu rogoci Josefa Simici ena nona vunautaka na kosipeli… E veigauna e dau vakasinaiti au vakayalo ka vueti au cake vakayalo me vaka na noqu dau rogoca ni vunautaki na kosipeli i Jisu Karisito. Au vakadinadinataka ni o koya e dua vei ira na parofita uasivi duadua ni Kalou ka bula tiko; ni Kalou e tiko vata kei koya ena veisiga ena nona a lako yani ni se gonetagane lailai yabaki tinikalima, me vunautaka yani na kosipeli nei Jisu Karisito ena Veiyanuyanu e Hawaii, me yacova sara na siga, ni oti na nona solia e onosagavulu kalima na yabaki ni nona bula ki na cakacaka ni Kalou, sa qai oti se vakacavara na nona bula ena dela ivuravura.⁷

Sa taqa vei au na icolacola, dina niu rui malumalumu, iyaya yalomalua ena liga ni Turaga meu sosomitaki ira na turaga veivakurabuitaki ka ra a veiliutaki ena Lotu oqo—na Parofita Josefa Simici, au vakabauta ni o koya e a uasivi cake sara mai vua e dua ga na turaga e a sa bula ena dela ivuravura, na ivuvu totoka, Brigham Young; na tamata qaqa ni galala, John Taylor; o koya e dua tani duadua na nona saumakiti ira na tamata ki na kosipeli i Jisu Karisito, Wilford Woodruff; Lorenzo Snow, na turaga yabaki walusagavulu kalima ka veivakurabuitaki, o koya e a laveta cake na Lotu ena loma ni tolu na yabaki … ki na itutu vinaka vakailavo; kei koya na turaga o ya, taleitaki mai vei ira kecega era kilai koya, e dua vei ira na turaga kilai tani ena vuravura taucoko, Joseph F. Smith, na dauvunau uasivi duadua ni bula dodonu au sa qai bau kila.⁸

E se sega vakadua ni mudu na noqu kurabuitaka niu matataka tiko na Turaga eke ena dela ivuravura. Mai na gauna ni gone ena noqu veimaliwai vata kei ira na turaga rawa ka vinaka sara ka veivakurabuitaki ka ra a sa liu taumada mai vei au, e voleka sara ga niu vuabale niu vakasamataka niu sa mai okati vata kei ira.

Na iotioti ni vosa e cavuta o Peresitedi Joseph F. Smith ni keirau sa lululu ena bogi e a mate kina, e vakaoqo—“E vakalougatataki iko na Turaga, noqu tagane, e vakalougatataki iko na Turaga, e dua na itavi uasivi sa tu vei iko. Mo nanuma tiko e veigauna taucoko sara ni oqo e sega ni cakacaka vakatamata e cakacaka ni Turaga. E uasivi cake sara na Turaga mai vua e dua na tamata. E kila se o cei e vinakata o Koya me liutaka na Nona Lotu, ka se sega vakadua me bau cala. E vakalougatataki iko na Turaga.”⁹

Era ciqoma na veiparofita na veivakauqeti me yaga ki na Lotu.

Au vakavinavinaka vua na Turaga ena noqu veimaliwai vakavoleka sara, mai na noqu se gonelailai, vata kei Peresitedi Brigham Young, John Taylor, Wilford Woodruff, Lorenzo Snow, vata kei Joseph F. Smith. Au vakavinavinakataka na Turaga ena noqu sega vakadua ni bau kila e dua na ka ia na veika vinaka kecega me baleti ira na turaga oqo kau veimaliwai vata kei ira ena loma ni limasagavulu na yabaki. … E se sega vakadua niu bau rogoca e dua na vosa vakararaba se vakaitaukei me ra tukuna na italai ni Kalou, era a digitaki me ra tucake ka liutaka na cakacaka oqo, vakavo wale sara ga na veika e baleta na nodra vueti cake kei na nodra vakavinakataki cake na tamata ni Kalou.¹⁰

Au vakavinavinakataka dina vakalevu na noqu kila ka sega ni dua na vakatitiqa mai na noqu veimaliwai vata me vaka e dua na iApositolo ni Turaga o Jisu Karisito ni o John Taylor, Wilford Woodruff, Lorenzo Snow, kei Joseph F. Smith era solia vakatabakidua na nodra gauna ena cakacaka me toso ki liu na Yalododonu Edaidai, ena kena vakatetei na kosipeli ena noda vanua kei na veivanua tani, kei na nodra kila ni gagadre uasivi duadua ni nodra bula sa ikoya na tosoi ki liu kei na kena vakavinakataki na kosipeli ni bula, kei na nodra vakabulai na Yalododonu Edaidai. Au sa vakavinavinakataka vakalevu na taucoko ni noqu kila ka sega niu vakatitiqataka ni … o ira na iliuliu oqo era solia vakatabakidua na nodra gauna ena nodra tiko vinaka kei na tosoi ki liu na tamata ni Kalou, kei na nodra sega ni tu vakasuka ena nodra cakacaka me ra vakavinakataki kina na tamata, na nodra vakanananu e veisiga, masumasu, kei na gagadre me ra toso ki liu na tamata. Au kila ni o ira era tokoni ira na turaga oqo vata kei na nodra vakabauta vata kei na nodra masumasu, vata kei na nodra cakacaka vinaka, era a vakalougatataki mai vua na Kalou, e sega walega ni lako vata kei na rabailevu ni vakabauta kei na nodra lomana na Kalou kei na dua na ivakadinadina ni vakalou na cakacaka ni Kosipeli ka ra vakaitavitaki ira kina, ia era a vakalougatataki ena kakana e gadrevi, ena nodra lololo, e vakalougatataki na nodra qele, kei na nodra vakalougatataki ena vuku na nodra matavuvale, me ra vakavulici ena ivunau kei na ivakavuvuli ni Turaga.¹¹

E sega vakadua ni gadreva na lomaqu meu tucake tu e matamuni na Yalododonu Edaidai me vakatautauvatani kei na kena rawa meu tukuna e dua na ka e vinaka vei ira, yaga vei ira; ka na rawa me vakarautaki vakatabakidua ena nodra vakayarayarataki, kei na kena tauyavutaki e lomadra na gagadre kei na veivakadeitaki ni kena toroicake na nodra vakabauta, toroicake na nodra gugumatua, toroicake na nodra mamakutu ena nodra vakayacora na itavi ka vakacolati vei ira ena nodra veigauna ni bula sa bera, mai vakatautauvatani kei na kena ena veigauna sa oti yani.¹²

Eda sa vakalougatataki ena noda muria ka vakarokorokotaki ira era veiliutaki vei keda.

Masulaki ira era vakaitutu ena Lotu, ka qai tokoni ira ena veicakacaka kei na veika taucoko sara era bolea me ra cakava.¹³

Mai na noqu kila vakaiau, au kila ni noda lomanivale na Yalododonu Edaidai, vakatekivu mai na nodra gauna na vei- Peresitedi Brigham Young, John Taylor, Wilford Woodruff, Lorenzo Snow kei Joseph F. Smith, me yacova mai na siga edaidai, e sa cabe cake, ena veisiga na masumasu ena yalodina ena vuni yalodra taucoko vua na Kalou, ena veivakauqeti ni Turaga me soli ira mai na turaga, o ira era tucake me ra veiliutaki ena Lotu oqo, o ira na iapositolo kei na so tale na vakaitutu raraba, me rawa ni ra, duavata kece, ena veivakauqeti mai vua na Kalou me ra rawata na veika kece oqori me na rawa ni uasivi na kena vinaka vei ira na luvena kei na kena vakatetei yani na Kosipeli i Jisu Karisito e vuravura taucoko. Au kila tu, ni oti … e vica vata na yabaki au sotava, ni o ira na turaga era tawana na itutu edaidai me ra iapositolo ni Turaga o Jisu Karisito era a sa bucini oti tu vata kei na yalo ni Kalou bula.¹⁴

Na vakabauta sa ikoya na isolisoli ni Kalou, kei na gauna e tu kina vei ira na tamata na vakabauta me ra bulataka na kosipeli, kei na nodra rogoca na ivunau mai vei ira era veiliutaki ena veitabana levu kei na iteki kei ira na Vakaitutu Raraba ni Lotu, au a sa sotava ni ra a vakalougatataki vakalevu sara mai vua na Turaga, ka ni vuqa vei ira era a lako tani mai na veidredre e vuqa me vaka na leqa vakailavo ena sala ni cakacaka mana uasivi duadua ka veivakurabuitaki.¹⁵

Me da sa tu vakarau ena yalo gu me da muri ira era vakaitutu ni veiliutaki vei keda, ka veitokoni vei ira. … O ni na dau vakalougatataki vakawasoma ka yaga vakalevu na kena vakamuri na nodra ivunau kei na ivakasala mai vei ira na digitaki ni Kalou me ra veiliutaki ena Lotu. Na nomuni rokova na turaga e sa digitaka na Kalou, ena vakalougatataki ka rokovi kemuni na Kalou; ena nomuni vakayacora vakayadudua na nomuni dui itavi, o ni na tubu cake ka vakalevutaki ena rarama kei na ivakaraitaki ni Yalo ni Kalou. Me vaka ni da sa tubu cake ka vakalevutaki vakayadudua, e sa na tubucake ka vakalevutaki talega vakakina na Lotu. … Oqo na cakacaka ni Kalou. O Josefa Simici e a parofita ni Kalou; e dodonu me da nanuma tiko o ya. E dodonu me da “vakasaqara taumada na matanitu ni Kalou, kei na Nona yalododonu, ” ia ena soli me kena ikuri vei kemudou na ka kecega oqo [raica Maciu 6:33]. Na bula me tawamudu sa ikoya na ka eda cakacakataka tiko. Kakua ni vakatara na vuku, na vutuniyau se vuli vakavuravura, se e so tale na ka, me tarovi keda mai na noda kila ni sa ikoya oqo na cakacaka ni Kalou, kei na gusunivosa ni Kalou e sa tiko e dela ivuravura; ena gauna e vosa kina, me da tu vakarau ena yalo gu, vata kei na noda gauna, noda taledi kei na veika kece e sa soli oti vei keda, me da cakacakataka ka vakayacora na gagadre ni Kalou. Au tukuna vei kemuni, na Kalou ena vakaraitaka ni dodonu na Nona parofita.¹⁶

Au nuitaka ka masulaka ni o kemuni na yalododonu o ni na bulataka na Kosipeli i Jisu Karisito. Au nuitaka ni ra na rogoca na nodra ivakavuvuli na veiperesitedi ni iteki kei na veibisopi ni veitabanalevu. Au vinakata meu kaya ni keitou namaka na peresitedi yadua ni dua na iteki kei na bisopi yadua ni dua na tabanalevu me vakatavulica na dina vei ira na tamata. Keitou vinakata me ra tukuna vei ira na tamata ena kena namaki me ra talairawarawa ki na Vosa ni Vuku, me dau sauma vakadodonu na nodra ikatini, me ra nanuma tiko na veiyalayalati era cakava ena valetabu ni Kalou, … kei na kena namaki me ra vakayacora na nodra itavi me vakataki ira na yalododonu, kei na nodra bulataka na Kosipeli era vunautaka tiko.¹⁷

Era lewe levu na tamata, kevaka era vunau vei ira na italai ni Kalou ena veiyabaki, na ka e vunautaki tiko e sega sara ga ni yaga vei ira. Ia o ira ga na tamata vata oqo, kevaka era ciqoma e so na ivakasala ni so na tamata era vuku vakavuravura, era muria ena gauna vata sara ga o ya. Au nanuma sara … noqu vunautaka tiko e dua na ivunau me baleta na Vosa ni Vuku. E muri au qai kila ni dua na ganequ vinaka e a rogoca tiko na noqu vunau e a qai tauvimate qai vakauta e dua na telikaramu vua e dua na vuniwai mai Salt Lake City, me vodo mai ena sitimanivanua, ka vakayagataka kina e vica vata na drau na dola qai mai kila vua na vuniwai oqo ni sa rui sivia na nona gunu ti, ke sega ni muduka, e sa macala deivaki tu ga ni na mate. E a ciqoma na ivakasala ka bula kina. Kevaka me a rogoca na noqu ivakasala ke a sega ni sauma e dua na ka, ke a rairai maroroya e vica vata na drau na dola, ke a rawa talega me rau a sota vata vakavinaka kei na ivakavuvuli ni Turaga, me vaka e vakaraitaki ena Vosa ni Vuku.¹⁸

Eda lagata ka da sa cakava e veigauna, “Turaga keitou vuabale, Parofita ni sa lewa.” [Serenilotu: 36.]

E lewe vuqa na tamata era … tomana ena dua na ivolalailai ka tukuna kina: “Kevaka me dusimaki keda ena vanua eda via lako kina ka sa duavata kei na noda gagadre se vakasama.”

O ira na parofita ni Kalou, mai vei Josefa Simici me yacova mai na siga nikua, era a veidusimaki ka ra a dusimaki keda vakadodonu, ena noda a rogoca na veidusimaki o ya. Na cala e a vakayacori e baleta na noda sega ni vakarorogo vua na parofita ka tu vua na dodonu sa ikoya me dusimaki ira na tamata ni Kalou. …

Au kila ni sala ki na bula ni tataqomaki vei ira na Yalododonu Edaidai sa ikoya ni sega walega ena lagasere, “Turaga keitou vuabale, Parofita ni sa lewa, ” ia me da tu vakarau ka lomada kei na noda gadreva me da dusimaki.¹⁹

Vakatutu ni Vuli kei na Veivosaki

Na cava na ibalebale ni veitokoni ka muri ira era sa kacivi me ra liutaki keda?
Na cava era rawa ni cakava na itubutubu me ra vakavulici ira kina na luvedra me ra tokoni ira na iliuliu ni Lotu?
Na veivakalougatataki cava so o ni sa ciqoma vata kei iratou na lewe ni nomuni matavuvale ena nomudou muria na nodra ivakasala na iliuliu ni Lotu? Na veigaunisala cava soti e vakalevutaka na nomuni vakabauta kei na ivakadinadina mai na veika o ni sota kaya?
Na ivakasala cava eda se qai ciqoma walega oqo mai vua na parofita bula? Na cava na matailalai ni veika e so e rawa mo ni cakava mo ni bulataka kina na ivakavuvuli ni parofita?

Church leaders — Tauri na itaba ena 1925. Tucake, mawi ki na imatau: David O. McKay. Rudger Clawson, kei Orson F. Whitney mai na Kuoramu ni Le Tinikarua; Anthony W. Ivins, iMatai ni daunivakasala ena Mataveiliutaki Taumada; Richard R. Lyman mai na Kuoramu ni Le Tinikarua; Heber J. Grant, Peresitedi ni Lotu; Reed Smoot mai na koramu ni Le Tinikarua; Charles W. Nibley, iKarua ni Daunivakasala ena Mataveiliutaki Taumada; Sylvester Q. Cannon, Bisopi Veiliutaki; George Albert Smith kei Joseph Fielding Smith mai na Kuoramu ni Le Tinikarua. Tekiduru, mawi ki na imatau: Hyrum G. Smith, Peteriaki ni Lotu; Melvin J. Ballard, Stephen L. Richards, John A. Widtsoe, kei George F. Richards ena Kuoramu ni Le Tinikarua. Sega ni taba: James E. Talmage mai na Kuoramu ni Le Tinikarua.

First Presidency in 1936 — Na Mataveiliutaki Taumada ni yabaki 1936. Mai na imawi ki na imatau, Peresitedi J. Reuben Clark, Jr., iMatai ni Daunivakasala; Peresitedi Heber J. Grant, kei David O. McKay, iKarua ni Daunivakasala.