Wase 20

Na Domo Lailai, ka Vinaka ni iVakatakila

Ni da bulataka na kosipeli, eda ciqoma na rarama, na veivakauqeti, kei na veituberi ni Yalo Tabu.

Na Bula nei Heber J. Grant

Ekaya o Peresitedi Heber J. Grant, “E sega tale ni dua na ka me uasivia na kena tuberi au na yalo ni Kalou.”¹ E cavuta tiko na veimalanivosa oqo ni sa voleka tiko ni mai cava e dua na bula balavu ka vakalougatataki voli mai kina ena veitokani ni Yalo Tabu. “Au kila me vaka ga na noqu kila niu bula tiko, ” e a kaya ena dua na gauna, ni sa dau dusimaki au na [Kalou] mai na gauna sara au se gonetagane lailai kina, ni sa dau rogoca ka sauma na noqu masu, niu sa dau rawata na ivakatakila … mai vua na Turaga, kau sa dau segata meu vakayacora sara.”²

Me ikuri ni nona dau ciqoma na ivakatakila me baleta ga na nona bula vakataki koya, sa dau ciqoma talega o Peresitedi Grant na ivakatakila me vaka ni Peresitedi ni Lotu me liutaka kina na Lotu. E dua na ivakatakila vakaoqori a yaco mai ena gauna ga e se qai tabaki oti kina me Peresitedi ni Lotu, ena nona vakasaqara na loma ni Turaga ena nona lesi e dua na lewe vou ni Kuoramu ni Apositolo Le Tinikarua. Ni vakananuma voli vakabibi na itavi oqo, e vagolei vakavica na nona vakanananu vua na nona itokani ni bula taucoko o Richard W. Young, e dua na Yalododonu Edaidai yalodina ka sa vakadinadinataki talega ni dua na iliuliu vinaka. E a veivosaki vata kei rau na nona daunivakasala me baleta na tikina oqo, ka rau mani tokona na nona lewa. Ni sa dei mai na yalona ena vuku ni itavi oqo, a vola na yacai nona itokani ena dua na tikinipepa ka kauta yani ki na bose vakamacawa ni Mataveiliutaki Taumada, kei na Kuoramu ni Le Tinikarua ena valetabu. Ia, ena gauna e sa vakarau me vakaraitaka kina na yaca me ra veivakadonui mai kina na nona iTokani, sa sega ni rawa me vakakina. E a sega ni mani vakaraitaka na yacai Richard W. Young, ka vakaraitaka yani na yacai Melvin J. Ballard, e dua ka sega sara ga ni kila vakavinaka.³ E a qai tukuna e muri o Peresitedi Grant na kena tarai koya na veika ka sotava oqo:

“Au sa dau vakila na veivakauqeti ni Kalou bula ni dau dusimaki au voli ena noqu cakacaka. Mai na siga au a digia kina e dua ka keirau sega sara ga ni veikilai me iapositolo, ka sega ni digia na noqu itokani vinaka duadua ena noqu bula taucoko, au sa kila tu mai kina me vaka ga na noqu kila niu bula tiko, ni tu na noqu dodonu ki na rarama kei na veivakauqeti kei na veituberi ni Kalou ena kena liutaki na Nona cakacaka ena vuravura oqo.”⁴

iVakavuvuli nei Heber J. Grant

Ni da maroroya na ivunau ka qarava na Turaga, ena dau noda itokani ka noda idusidusi e veigauna na Yalo Tabu.

Sa dau solia na Turaga ki na vuqa vei keda na domo lailai, ka vinaka ni ivakatakila. E dau yaco mai vakamatata ka vakaukauwa me vaka sara ga e dua na rorogo levu. E dau yaco mai ki na tamata yadua me vaka na veika e gadreva kei na nona yalodina, me dusimaki kina ena veika me baleta na nona bula.

Me baleta na Lotu raraba e dau yaco mai vei ira era sa tabaki me ra dau vosa ena vuku ni Lotu raraba. Na kila tudei oqo ka tu vei keda ni na dau vakilai na veituberi ni Turaga ena veiyasa ni bula kece sara, me vaka na noda gagadre kei na noda yalodina, e dua vei ira na veivakalougatataki cecere ka solia na Kalou vua na tamata.⁵

Au marau … ni o ira kece na Yalododonu Edaidai, o ira vakayadua na luvena tagane kei na luvena yalewa yalomalumalumu na Kalou ka ra sa mai ciqoma na kosipeli ka yaco me lewe ni Lotu i Jisu Karisito ni Yalododonu Edaidai, era sa rawata na ivakadinadina ni Yalo Tabu; ni isolisoli ni duivosavosa, na isolisoli ni parofisai, ni veivakabulai, kei na isolisoli kei na veivakalougatataki tale e so, ka ra kunei ena Lotu, ka sega ni yalani walega vei ira na tamata ka ra taura tu na itutu vakaveiliutaki ena Lotu. Au sa dau vakarorogo vei ira na dauvunau yalodina ka maqosa ka vakakina ki na so na ivunau totoka duadua au qai rogoca ena noqu bula mai vei ira na tamata ka sega ni dua na itutu bibi ena Lotu era tu kina. …

E sega ni itutu, e sega ni vuli vinaka e dau solia na yalo ni Kalou; ia na maroroi ga ni ivakaro ni Kalou Kaukauwa kei na yalo malumalumu kei na gadreva e vakataucokotaka na ivakaro ni Kalou ena noda bula e veisiga kei na noda veivosaki.⁶

Au vakamasuti kemuni na noqu itokani, au vakamasuti kemuni na taciqu kei na ganequ, vei kemuni vakayadua sara, mo ni bula ena kena ivalavala me rawa ni nomuni itokani tudei kina na rarama ni Yalo Tabu ni Kalou, ni sa dau vakatakila ki lomamu ka vakavukui iko, ka vakauqeta ki na nomu gagadre me cakacaka ena kaukauwa taucoko, kei na maqosa taucoko sa solia vei iko na Kalou me rawa kina vakavinaka na Nona naki.⁷

Vakasaqara na Turaga ka na qai tiko vata kei iko ko Koya. Kevaka eda sega ni vakasaqara na Turaga sa na sega na ivakadei vua e dua vei keda. E sega ni dua na tagane se dua na yalewa me vakasaqara na yalo ni Kalou ka muria na kena veivakauqeti me na druka.⁸

E dau nodra ivakarau e lewevuqa vei keda me da dau vakayacora ga na veika e vinaka ki lomada; ia na veika e vinakati ena kosipeli e vaka me sega ni vakatarai kina vei keda me da muria ga na lomada; ni gadrevi vei keda me da kakua ni dau muria na lomada, me da vakadruka ka vaqeyavutaka na veigagadre oqo. Ni da vakadikeva na veika e gadrevi, me vaka na Vosa ni Vuku, eda na raica ni ena noda muria oqo eda sa na tubu kina ena kaukauwa ni vakasama kei na kaukauwa ni yago ka ra na yaco kina na yagoda me itikotiko kilikili ni Yalo Tabu ni Kalou. Eda na tubu ka ucuya vinaka cake na Kalou ena noda vaqeyavutaka ka vakadruka na veigagadre oqo ka ni ra veisaqasaqa kei na nona vakasama kei na lomana na Tamada Vakalomalagi.⁹

Kevaka e dua na tamata sa sega vua na Yalo ni Kalou, me lako ka vakatorocaketaka na matanitu ni Kalou, ena qai tiko vata kei koya na Yalo ni Kalou.¹⁰

Na ivakarau ga ni noda cakacakataka ka maroroya na ivakaro ni Kalou, sa na vakarautaki kina na noda vakalougatataki mai na rarama kei na veivakauqeti ni yalona na Kalou kaukauwa.¹¹

Au sa raica rawa ni ena gauna era qaravi koya kina ka muria na Nona ivakaro na Tamata, ena dau tubu cake na nodra kila ka me baleta na dina, ni ra na tubu cake me kaukauwa ka kila ka vakalevu mai na veiuqeti ni Nona Yalo Tabu.¹²

Kevaka eda sa vakaweleweletaka na noda itavi, sa na lako tani mai vei keda na Yalo Tabu, veitalia sara na levu ni noda a dau vakalougatataki tu ena gauna e liu.

Me vaka ga na kena dina ni ena noda sega ni kana ena vakavuna na kena malai mai na yagoda ka mate yani, sa vaka sara talega kina na kena dina ni vakaweleweletaki na veika e gadrevi ena kaukauwa vakayalo ena vakavuna na kena mate yani.¹³

Ni ra sa tekivu vakawelewele na tamata, ka yaco me ra dau vakaduiduile, ni ra sa voroka na Vosa ni Vuku, ni ra sa vakaweleweletaka na nodra soqoni, ni ra sa sega ni dau vakavulica vei ira na luvedra na ivakavuvuli kei na ivakaraitaki ni kosipeli ni Turaga o Jisu Karisito, era sa gole tani kina mai na vakabauta, sa kau tani mai vei ira na Yalo ni Kalou, ka ra sa biu tu ena butobuto.¹⁴

Me vaka ni da Yalododonu Edaidai, ka da sa ciqoma na ivakadinadina ni kosipeli, sa noda itavi kina me da cokonaka cake na ivakadinadina ena noda muria na ivakaro ni Kalou; au via kaya vei kemuni ni tamata e tubu e veisiga yadua sa ikoya na tamata e qarava vakavinaka na itavi e nuitaki vua. E sega ni ivakadinadina ka da a taukena tu e liu, e sega ni levu ni ivakatakila a dau yaco mai vei keda. Baleta na cava, na tamata mai vei ira na tamata kecega e a vakalougatataki vakalevu sara ena nona raica na agilosi, ena nona raica sara mada ga na noda Turaga ka iVakabula o Jisu Karisito, me vakataki rau o Sidney Rigdon kei Oliver Cowdery— oi rau oqo a sega ni vakadeitaki rau ena Lotu na veivakalougatataki kei na ivakaraitaki cecere oqo. Ia o ira na tamata era a muria na ivakaro ni Kalou, o ira na tamata era a yalodina ena nodra masu, o ira era a tokona ka tutaka na matabete ni Kalou ena veigauna kecega kei na veidraki ni bula kecega, o ira era a vakarokorokotaka na Vosa ni Vuku, o ira era dau sauma na nodra ikatini, o ira era dau dina ka yalodina tikoga, a sega ni yali mai vei ira na Yalo ni Kalou. Ia, o ira era a biuti ira ena dua na vanua dredre, dauveidusi, mateni, dau vakasaqara na lasa vakavuravura ka ra dau soqoni vakailawalawa ena nodra bosebose lo, ka ra nanuma ni ra sega ni dau kawaitaki ka sega ni rokovi—o ira na iwase ni tamata oqo e dau yali mai vei ira na Yalo Tabu.¹⁵

E sega tale ni dua na ilawalawa iTalatala qase me ra dau vosa vinaka ena veisoqoni kau dau vakarorogo kina ka marautaka, e sega tale e dua me dau vakatakata na yaloqu me vakataki ira era dau lesu mai ena kaulotu. Era dau lako mai ki vale ni ra vakasinaiti tu ena yalo ni kaulotu, ka vakasinaiti talega ena Yalo ni Kalou kei na loloma me baleti ira na wekadra. … Ia e kena irairai ni ena levu na gauna, ni oti vakalailai na nodra lesu mai ki vale, sa dau yali na yalo oqori ka ra sa mai vakaogai voli ena veika ni nodra bula, ka ra sa vagolea vakalevu na nodra igu ki na veika ga e baleti ira.

Sa matata vinaka tu na kena dodonu vei iko vata kei au, kevaka e daru namaka tiko me daru tauca na vua ni veiqaravi ena yalodina, me daru cakacaka vagumatua ena noda vanua se e veivanua tani ena noda vunautaka tiko na ivakavuvuli ni Kosipeli. E sega ni rawa ni dua na tamata me namaka me waribariba ka kaukauwa na yagona kevaka e sega ni dau vakaukauwa yago; na ivakavuvuli vata oqori e yaga talega ena bula ni noda cokonaki keda vakayalo. Na tamata e lako ki koronivuli me vuli loya, e sega walega ni na vinakati vua me cakacaka vakukauwa ena nona tiko mai kea me rawata kina na ivola ni cakacaka e digitaka, ia sa dodonu vua me na dau vakayagataki koya tiko ni sa taura oti mai na nona ivola, de na qai sega ni dua na betena ena buturara ni cakacaka vakaloya. Sa vakakina vei koya e gole yani me vunautaka na Kosipeli ka me dua kina na daukaulotu vinaka; kevaka ena sega ni tomana tiko na nona vaqaqacotaki koya ka kawaitaka tiko na nodra tiko vinaka vakayalo na wekana ni sa lesu mai ki vale, ena yali dina mai vua na yalo ka a dau taukena tu mai na buturara ni kaulotu.¹⁶

Na noqu raica na kedra lewe levu era sa vakalougatataki vakalevu mai vua na Turaga ka ra qai lutu yani ki na yasa ni sala, sa vakasinaiti au dina ena yalomalua. E vakasinaiti au ena yalo ni vakarokoroko kei na gagadre vuabale meu segata meu kila na nona vakanananu kei na lomana na Kalou ka meu muria na Nona ivakaro ka kakua ni muria na lomaqu ga.¹⁷

Ni da sa kila na loma ni Kalou mai na veivakauqeti ni Yalo Tabu, sa koto kina na noda itavi me da vakayacora ena noda bula.

Na kena maroroi na ivakaro ni Kalou ena kauta mai vei keda na rarama kei na veivakauqeti ni Yalona. Ena yaco kina me gagadre ni yaloda me da kila na vakanananu kei na yalona na Turaga, ka da na qai masuta na kaukauwa kei na maqosa me da vakayacora kina, o koya eda sa muria tiko kina na noda Turaga ka iVakavuvuli o Jisu Karisito.¹⁸

Au raica ni dui tu na noda dui malumalumu, ka da dau tukuna ka cakava e vuqa na ka e sega ni marautaka na Tamada Vakalomalagi; ia kevaka eda gadreva vakalevu duadua mai na veika kece sara e vuravura me da kila na nona vakanananu kei na lomana na Kalou, kevaka eda gadreva me da vakaukauwataki, ni sa oti na noda kila na nona vakanananu kei na lomana na Tamada Vakalomalagi, me da vakayacora kina ki na noda bula, au kila ni na vukei keda kina na Kalou, ia me vaka ni da sa tubu ena veiyabaki ena noda kila ka ka vakakina ena noda yalomatua eda na tubu talega ena kaukauwa kei na maqosa me da rawata vakavinaka na lomana.¹⁹

Kevaka e sega na rarama kei na veituberi ni Yalo ni Kalou ena sega ni qaqa rawa na cakacaka ni Kalou e vuravura; ena kasura ka vurumemea. Ia sa koto e yalodra na tamata na kila ka tudei ka na vakaduavatataki ira ka dregati ira vata. Ni ra rogoca na domona na ivakatawa dina, era na kila, ka ra sa na tu vakarau me ra muria.²⁰

E sega tale ni dua na ka ena kauta mai na marau vata oqo vua e dua na tamata me vaka na nona cakava na veika ka sa yaco oqo me nona itavi ka ra ka marautaki ena mata ni Kalou. Eda lako mai ki vuravura oqo me da cakava na nona vakanananu kei na lomana na Turaga, ka sa dodonu kina vei keda kece sara me da bula kilikili me rawa kina ni yaco mai vei keda na ivakatakila ni Yalona, ia ena gauna e sa yaco mai kina me sa tu talega vei keda na yalo kei na gagadre me da vakayacora sara.²¹

Sa dodonu vei keda kece sara na Yalododonu Edaidai me da vakasaqara na rarama kei na veivakauqeti ni Yalo ni Kalou, ia ni ra sa ciqoma, me vakayagataka na maqosa kece sara e tu vua me cakacakataka kina na kena tosoi ki liu na cakacaka ni Kalou. Mo kakua sara ni kunei ena kedra maliwa o ira era dau via raica na lailai ni ka e rawa ni cakava; ia mo dau kunei ga ena kedra maliwa o ira era dau raica na levu ni ka e rawa ni ra cakava. Me tikoga e cake na nomu takete.²²

Me noda itokani tudei na rarama kei na veivakauqeti ni Kalou. Me da tubu ka levu cake ena Yalo ni Kalou ka vakakina ena ivakadinadina ni kosipeli, kei na kaukauwa kei na maqosa me da rawata vakavinaka kina na nona inaki na Tamada Vakalomalagi e vuravura oqo; me da tubu ena gagadre me da vakayacora kina, sa noqu masu ka noqu gagadre.²³

Vakatutu ni Vuli kei na Veivosaki

Na cava na vuna e bibi kina me da kila ni ivakatakila e dau yaco mai vei keda na tamata me vaka na noda gagadre? Na sala cava e rawa ni dusimaki ira kina na itubutubu, qasenivuli, kei ira na iliuliu ni Lotu ena nodra dui itavi na ivakatakila? Na cava e rawa ni yaco kevaka era tukuna na tamata ni ra ciqoma na ivakatakila ka sega ni baleta na vanua era vakaitavi kina?
Na cava na vuna e gadrevi kina na talairawarawa ki na ivakaro me rawa ni da qai marautaka kina na veivakauqeti ni Yalo Tabu? Na cava na vuna eda na rawata kina na veivakauqeti ni Yalo Tabu ni da “lako ka vakatorocaketaka na matanitu ni Kalou”?
Na sala cava e rawa ni da kila kina na “domo lailai ka vinaka ni ivakatakila” ka vakaduiduitaka mai na veivakauqeti tale eso? (Raica V&V 6:15, 22–23; 8:2–3; 11:13–14.)
Na cava soti eso na veika o sa sotava ka rawa ni o wasea, me vakaraitaki kina na nomu a muria na veivakauqeti ni Yalo Tabu? Na sala cava e sa basika kina ki na nomu bula vakataki iko na vakacegu kei na yalodei ena nomu muria na veivakauqeti ni Yalo Tabu? Ena bula ni nomu matavuvale? Ena nomu ilesilesi vakalotu? Ena nomu cakacaka?

couple praying — “E sega ni dua na tagane se dua na yalewa me vakasaqara na yalo ni Kalou ka muria na kena veivakauqeti me na qai druka”