Wase 1

Na Vulici kei na Vakavulici ni Kosipeli

Ena qai rawa me yaga na vakavulici ni kosipeli kevaka e soli ka ciqomi ena veivakauqeti ni Yalo Tabu.

Na Bula nei Heber J. Grant

E a tukuna o Peresitedi Heber J. Grant: “E sega tale ni dua na ka au kila me kauta mai na marau ki na yalo ni tamata me vaka na noda cakacakataka na vakabulai ni yalo ena noda vanua se mai vanua tani. E sega tale na ka au kila e solia vei keda na marau levu ena veika vinaka kece, me vaka na vakavulici ni Kosipeli i Jisu Karisito.”¹

Me ikuri ni dua na qasenivuli gugumatua ni kosipeli, e dau nanamaki o Peresitedi Grant me dau vuli mai na nodra ivakadinadina na tani. E a tukuna mai na ka e a raica rawa: “Au dau taleitaka na veigauna kece au dau sotavi ira kina na Yalododonu Edaidai ena nodra soqoni. E sega ni dua na soqoni ni neitou tabanalevu se iteki se ena koniferedi raraba, meu na sega ni vakalougatataki kina, vakasalataki ka vakauqeti ena noqu vakabauta na Kosipeli; meu sega ni rogoca kina e dua na ka me na vakamamautaki au vakaidina ena madrai ni bula.”²

Ni se cauravou voli o Heber J. Grant, e a sotava e dua na ka ka vukei koya sara vakalevu me raica na bibi ni veivakavulici kei na vuli ena Yalo Tabu. E a qai nanuma lesu e muri:

“E vuqa na ka vakasakiti sara a yaco ena noqu bula niu se cauravou, na veivakauqeti talei kei na kaukauwa ena vukudra na turaga era vunautaka na kosipeli ena yalo ni ivakadinadina kei na masumasu. Au via tukuna me kilai e dua na ka vakaoqo e a yaco niu a se cauravou voli, au se qai yabaki tinikavitu se tinikawalu. Au a rogoca ni a vunau tiko o Bisopi Millen Atwood ena i ka Tinikatolu ni Tabanalevu. Au se vuli vosa tiko kina ena gauna ko ya, ka vakayacora o koya e so na cala ena nona vosa.

“Au a vola sara na imatai ni nona yatuvosa, au dredre lo ga, ka kaya: ‘Au na rawata eke ena bogi nikua, ena loma ni tolusagavulu na miniti e vosa tiko kina o Baraca Atwood, na veika me na rauti au ena loma taucoko ni vula i batabata au na tauri kalasi tiko kina ni vuli vosa.’ Keimami dau kauta tiko yani ki na kalasi e yarua na iyatuvosa, se ya va ena veimacawa, na iyatuvosa era dau cavuti cala, kei na kena keimami sa vakadodonutaka.

“Au a tovolea meu vola na kena dodonu ka vakarorogo vei Bisopi Atwood ena dua vata ga na gauna. Ia a sega tale ni dua na ka au qai vola rawa ni oti na imatai ni iyatuvosa o ya. —sega mada ga ni dua na vosa; ia ni sa oti na vunau nei Millen Atwood, sa drodro sobu mai na wai ni mata e baluqu, na wai ni mata ni vakavinavinaka sa tonawanawa e mataqu, ena vuku ni ivakadinadina talei ka cavuta mai na tamata ko ya ena kena vakalou na inaki nei Josefa Simici, na parofita ni Kalou, kei na talei ni veivakauqeti e salavata kei na parofita ena itavi kece e qarava.

“E dina ni sa sivia oqo e onosagavulu kalima na yabaki ena noqu a vakarorogo ki na ivunau ko ya, e se matata vinaka tikoga nikua, kei na yalo au vakila vei au e sa tu vata ga kei au me vaka ena siga ga au rogoca kina. O kila beka, niu a sega ni bau vakasamataka meu vakayagataka na veiyatuvosa e a vakayagataka o koya meu na tucake kina ena kalasi ka veiwalitaka na yaca ni Kalou. Na ivakadinadina oqori e titobu sara na kena tara na lomaqu me baleta na nona inaki vakalou na parofita. E vuqa na ivakadinadina au sa rogoca ka talei vei au ka tara na yaloqu, ia oqo na imatai ni ivakadinadina me waicala kina na lomaqu ka tonawanawa kina na mataqu ena vuku ni veivakauqeti ni Yalo Tabu ni Kalou ki vua na tamata o ya.

“E na veiyabaki kece sa sivi yani mai na gauna ko ya, au sega tale ni qai kidroataka se rarawataka na cala ni iyatuvosa se cavuti cala ni vosa mai vua e vunautaka tiko mai na kosipeli. Au sa qai kila rawa ni ka au cakava e vaka au vakalewa tiko e dua ena isulu e daramaka tiko, me vakalewai kina e dua na yalo ena nona vakaisulutaka nona vosa. Mai na siga ko ya me yacova edaidai e dua ga na ka e sa tarai au sara vakalevu ko ya na Yalo Tabu, na veivakauqeti ni Kalou bula kivua e dua na tamata ni vunautaka mai na kosipeli, ka sega ni ivosavosa. … Au a vulica kina ni Yalo Tabu ga e solia na bula kei na kila ka, ka sega ni mata ni ivola.” [raica na 2 Korinica 3:6.]³

iVakavuvuli nei Heber J. Grant

Ni da vakavulica na kosipeli, e dodonu me da vakanamata ki na ivakavuvuli rawarawa kei na ivunau

E sega ni kakana eda raica ka nanuma ni sa totoka me na yaga vei keda, ia me vaka ga na veika eda kania ka tiloma. Ka sega talega ni soqo levu ni kana magiti ka kuria e vuqa na noda kaukauwa ka vakacegui keda ka vukei keda me da qarava vinaka na ivalu ni bula oqo, ia ena so na gauna na kakana rawarawa duadua ena solia na veika yaga ka veitauri vakabalavu vei ira era vakayagataka. E vakatale ga kina ena veigauna ni sega ni kana magiti era vakarautaka na daunivuku me kuria noda kaukauwa me da qarava kina vakatagane na noda itavi ena ivalu ni bula, ia ena vuqa na gauna na ivakavuvuli mai vei ira era yalomalua ena kunea na kena isau e lomada kei na yaloda ka vakaikuritaki kina noda kaukauwa me da toso ki liu ka qarava noda itavi ena veisiga me da toso ki liu.⁴

Na veimatasoqososoqo ena lotu, e dodonu me tiki ni nodra inaki na taraicake ni ivakadinadina tudei ena nodra vakasama kei na lomadra na Yalododonu, vakabibi vei ira na itabagone, —na ivakadinadina ni a Vakalesui mai na Kosipeli, ni sa Mesaia na noda Turaga ko Jisu Karisito, kei na inaki vakalou ni parofita o Josefa Simici, ni sa Vakalou na itekivu ni Lotu oqo ka tauyavutaka na Kalou kei na Luvena mai vua na Parofita, kei na dina ni sa iKoya oqo na Lotu i Jisu Karisito ena gauna oqo kei na veigauna kecega, me yacova sara na ivakataotioti me na tikoga na ivakadinadina oqo vei ira na Yalododonu ka me ra na bula ka muria na ivunau ni Turaga, ka me na torocake kina na noda kila na Dina me rawa kina ni ra vakabulai, ka rawata na marau tawamudu ena Matanitu Silesitieli, ka kena itinitini mera na tuberi ira yani na lewe ivuravura ki na kila ka kei na ivakadinadina ni Dina oqo ena kena ivunau kei na kena ivakaraitaki, ka me solia talega vei ira na veivakalougatataki.⁵

Au vakabauta ni o koya na qasenivuli ka tu vua na nona lomana na Kalou ka kilai Koya, e lomani Jisu Karisito ka vakadinadinataka ni sa vakalou ko Koya, e tu vua na ivakadinadina ni sa vakalou na inaki ni Parofita o Josefa Simici; ka teivaka na veika oqo ki lomadra kei na yalodra na gone e vakavulici ira tiko, sa ikoya oqo na qasenivuli e vakaitavitaki koya ena dua na itavi dokai ka cecere me vakaitavitaki kina e dua na tamata.⁶

Vakavulica ka bulataka na imatai ni ivakavuvuli ni kosipeli, ka laiva na veika vakalomalagi me waraka na nomu yaco yani ki lomalagi.⁷

Me vaka ni lagati e veigauna ni noda sere.…, ena sega ni rawa ni da cavuta tiko vakawasoma e veigauna na ivunau ni Turaga vei ira na tamata, ka vakamasuti ira na Yalododonu me ra bulataka.⁸

Sa vuqa sara na gauna era dau tukuna vei au na tamata, “Au sa voraki na rogoca tiko e dua tikoga na ka ena veigauna. E sega ni gadrevi me tokaruataki tiko.” E vuqa na tamata ena kunea na cala ena ivunau era rogoca baleta ni sa tukuni vakawasoma vei ira. … E rairai sa vakila na Turaga ni gadrevi me vakaruataki e dua na itukutuku e via solia me rawa ni kasa kina ena nodra vakasama na tamata. Ena nona ivakavuvuli, na noda iVakabula ena tokaruataka tiko ena veigauna na vakasama vata ga ena dui vosavosa e so, ka kena inaki me kasa sara ki na vakasama kei na lomadra o ira era rogoca.⁹

E dodonu me da veituberi ena kaukauwa ni Yalo Tabu, ke da via rawa ka vaka qasenivuli ni kosipeli

Ena imatai ni noqu ilakolako balavu ni oti na noqu kacivi meu lewena na Matabose ni Le Tinikarua, keirau a salavata tiko kei Elder Brigham Young, Jr., [e lewe talega ni Matabose ni Le Tinikarua, ] au nanuma niu a sa vakadeitaka niu sa na sega tale vakadua, ena ilakolako oqo, —ka taura ni rauta e va na vula—ni vosa tale ena iulutaga eda kila tu me “Na Vosa ni Vuku, ”… Au sa nanuma ena soqoni ka tarava meu na vosa ena dua tani tale na iulutaga. Au a tovolea meu vosa ena dua tale na iulutaga me 20 na miniti, kau a sega ni rawata. Au a vosa tale me 20 na miniti ka taladrodro vakavinaka sara, na iulutaga ni Vosa ni Vuku; au a qai kila e muri ni kevaka era gadreva na tamata e dua na ka, ena koro lailai a sikova tiko oqo, ko ya me ra vakavulici ena Vosa ni Vuku. … Ni oti na veika au sotava oqori au sa qai lewa ni veigauna kece au nanuma kina meu vosa ena dua na iulutaga, kau sa gadreva sara ga vakalevu, e dina niu sa vunautaka wasoma tiko mai na iulutaga ko ya, e dodonu meu na vunautaka tale…

Ena noqu veiqaravi ena kedra maliwa na tamata e talei sara vei au ni rawa meu vakadinadinataka ni gauna eda yalomalumalumu kina ka masumasu vakalevu ka gadreva me da vakavulici ira na tamata, ena vakauqeti keda dina na Turaga.¹⁰

E dau tiko e dua na yalo rere kei na taqaya ena veigauna kece eda tu cake kina ena matadra na tamata me da vunautaka vei ira na inaki ni bula kei na veivakabulai. Au vakabauta ni matata sara vei keda na ivakarau oqo, baleta ni da vakila na noda malumalumu yadua, kei na noda guce me da veivakasalataki kevaka e sega na veivakauqeti ni Yalo Tabu. … Au vakavinavinaka vakalevu ni tiko vei au na yalo ni rere oqo ena veigauna au vosa kina e matana levu vei ira na Yalododonu Edaidai, baleta niu sega ni vinakata meu yacova na ivakatagedegede meu na sega kina ni vakila ni sa tiko vata kei au na rarama kei na veivakauqeti ni Kalou meu vosa kina vei ira na tamata. Au kila niu na sega ni kila rawa na veika ena vinaka vei ira na tamata, ia na domo lailai ga ni veivakauqeti.¹¹

Sa dau noqu gagadre tu niu dau vosa vei ira na Yalododonu Edaidai, me na vakararamataki na yaloqu ena veivakauqeti ni Yalo Tabu. Au vakila, ni na nodra vakavulici na tamata ena dredre me da tukuna e dua na ka yaga se kilikili vei ira na Yalododonu vakavo ke vakauqeti tiko mai vua na tamada Vakalomalagi o koya e vosa tiko.¹²

E sega ni dua ena rawa ni vakavulica na Kosipeli i Jisu Karisito ena nona veivakauqeti na Kalou bula kei na kaukauwa mai cake vakavo kevaka e bulataka tiko.¹³

Oqo na noda itavi… me da biuti keda ena dua na itutu ena gauna eda veivakavulici kina, me rawa ni da veivakavulici ena veivakauqeti ni Yalo ni Kalou me vaka ni sa dau tiko kei keda; ia kevaka eda sa sega ni muria na ivunau ni Kalou, eda na sega ni rawata ena noda kaukauwa kei na noda igu me da sureti ira na tamata e so me ra muria na ivunau eda sega tiko ni rawa ni muria o keda.¹⁴

Me yaga vei keda na soqoni ni Lotu kei na kalasi e dodonu me da ciqoma ka lomasoli me da vakayacora na ka eda vulica.

Veitalia ga se mani vakacava na kaukauwa ni ivakadinadina se vakacava na kena veivakauqeti, kevaka e sega ni rawa ni ciqoma o koya e vakarorogo tiko ena sega wale na betena. Sa dua dina na sasaga yaga me vaka na teivaka na sore ni qereni ena qele ni vanua dravuisiga.¹⁵

Na waloloi e vakavuna na taleitaki ni kakana. Na waloloi ena Kosipeli i Jisu Karisito e vakavuna me da marautaka na [noda] koniferedi.¹⁶

E so na tamata era dau tiko ena soqoni ena veiyabaki ka vakarorogo vua na italai ni Turaga ni vakavulici ira me ra yalorawarawa ka yalomalua ki na itavi sa lesi vei ira, ka ra lako yani ka sega ni ra vakayacora na ka era rogoca; ia era sa okata tiko me dua na itavi levu na nodra lakova tiko na soqoni. Ia oqo, kemuni noqu itokani, kevaka o ni dau lako yani ki na teveli ni vakayakavi, o ni dabe sobu ka sarava na totoka ni kakana, ka sega ni vakayagataka ena sega ni dede o sa na mate ena viakana. E so na Yalododonu Edaidai era lako tiko ena soqoni, ia era sa mate ena viakana vakayalo baleta ni ra a sega ni ciqoma ka tiloma na kakana vakayalo e wasei tiko mai kea. Me da kakua ni rogoca walega na vosa, ia me da vakayacora sara talega [raica na Jemesa 1:22].¹⁷

Ni da sa tiko ena dua na soqoni me da vakaivotavota ena yalo ni soqoni ko ya. Ia ni da sega ni tiko kina ka qai dua e talanoataka vei keda na kena talei vakayalo na tiko kina kei na veika e rawati me ra vakaivotavota kina, eda na sega ni rawa ni vakavinavinakataka na veika oqori. Ena tautauvata sara ga kei na tamata sa viakana ka dua tale e talanoataka vua e dua na ivakayakavi o ya. E dodonu me da na kania sara ga o keda, e dodonu me da na bulataka sara ga o keda, e dodonu me da na yacova na ivakatagedegeede ni noda itavi me rawa kina ni da vakaivotavota ena Yalo Tabu ni Turaga, ka me na laurai na Yalo Tabu ni Turaga.

… E a lako mai o Francis M. Lyman [mai na Kuoramu ni Apositolo Le Tinikarua] mai Tooele ena bogi ka dua ni se bera na neitou soqoni ka mai bogi dua tiko[e Salt Lake City] me rawa kina ni mai tiko ena bose ni Mataveiliutaki kei ira na iApositolo ka rauta ni rua se tolu na auwa na kena dede, ia e a sega ni calata e dua vei ira.

Au a tukuna vua ena dua na siga: “E talei dina vei au ni ko yaco mai ena kena gauna ka mai tiko ena nodatou bose kece sara.”

E a tukuna o koya: “Au sega ni vinakata meu na calata e dua na veivakauqeti mai vua na Turaga; au sega ni vinakata me dua tale e vakadewataka vei au na Yalo ni Turaga. Au na vakaivotavota kina, ka meu vakila ka vakasamataka ka kila sara ga vakataki au.”¹⁸

Ena masu ni vakabauta erau sa vakaduavatataki ka vakaukauwataki kina na qasenivuli kei ira na gone vuli.

Au sa gadreva, me vaka na noqu gagadre e veigauna niu dau vosa vei ira na Yalododonu, me rawa niu dau vukei mai na nomu vakabauta kei na masu ka me na tiko na Yalo vinaka ena keda maliwa, ka me da na vakaduavatataki ka vakaukauwataki kina ena noda vakabauta ena vuku ni noda mai soqoni vata oqo. … e so vei ira na tamata au kila, era nanuma ni sa dodonu vei ira era dau vosa mai me ra kerea na vakabauta kei na nodra masu na Yalododonu, ia au gadreva meu tukuna na noqu nanuma ni sa rui levu na vakasavuliga vei ira na tamata me ra vakatakekere vua na Turaga me vakalougatataka ka vakauqeti koya ena mai vosa vei keda. Ena veigauna vakaoqo eda na beitaki kina ena veigauna, ni sega ni vakanamata na yaloda kei na noda vakanananu ki vua e mai vosa ka da sa gadreva sara vakagumatua ka masulaka me vakalougatataki koya na Turaga. Au kila niu na beitaki talega kina o au niu dau guilecava ena so na gauna, ena gauna e vosa tiko kina e dua na taciqu meu masulaka vua na Turaga me vakalougatataki koya na Nona Yalo Tabu.

Au kila mai na veika au sotava mai ni sega ni dua na Elder ena tucake me vosa vei ira na Yalododonu, kevaka e tu vua na gagadre dina me ra ciqoma, ka sega ni gadreva vakagumatua na nodra vakabauta kei na masumasu na tamata. …me isau ni nodra masu na ivavakoso Yalododonu, au kila ni na vakalougatataki au na Kalou kei ira tale e so era na tucake e matamuni e veigauna me ra vunautaka vei kemuni na itavi kei na ilesilesi e dodonu mo ni colata ena vukuna na Dauveibuli.¹⁹

Ni da gole ki na soqoni, e dodonu me da salavata yani kei na yalo ni masumasu ni na veivakauqeti vei ira era mai vosa na Turaga ena nona Yalo Tabu, ia ni ra sa vosa oti ena veivakauqeti ni nona Yalo Tabu, e dodonu me da na suka yani, kei na gagadre ni lomada ka masulaka me da na vulica na lesoni eda sa qai rogoca, ka vakayacora sara ena noda bula.²⁰

E sega vakadua ni se tara na noqu bula e dua na marau, se na reki, se na vakacegu me tautauvata na marau na reki na vakacegu au sotava ni ra lako mai vei au o ira na tamata era rogoca niu vunautaka na kosipeli i Jisu Karisito ka kaya ni ra sa vakadinadinataka ni sa vakalou na cakacaka oqo; ni veivosa era lutu mai na tebenigusuqu e kauta yani ki yalodra na kila ka ni a vakalesui tale mai ki vuravura na ituvatuva ni bula kei na noda vakabulai. Au vakabauta ni sega tale ni dua na ka e vuravura me na tautauvata kei na marau e vakila e dua na tamata ena gauna e kila kina o koya ni sa vakayagataki koya me iyaya ni cakacaka ena liga ni Kalou bula me tara yani kina e so na yalo dau dina, ka vakauqeti ira me ra lomana na Kalou ka gadreva sara me ra qaravi Koya.²¹

Vakatutu ni Vuli kei na Veivosaki

Na cava e gadrevi kina me vakavulici na yavu matailalai ni ivakavuvuli ni kosipeli “vakawasoma ena veigauna”? Sa yaga vakacava vei iko na vulici wasoma ni ivakavuvuli ni kosipeli?
A cava soti na gauna donu vei keda me da vakavulica kina na kosipeli? A cava na vuna e bibi kina me vakaraitaki vua na Turaga na noda malumalumu, ni da sa vakavakarau me da veivakavulici.
A cava na ibalebale ni veivakavulici e na veivakauqeti ni Yalo Tabu? (Raica talega na 2 Nifai 33:1; V&V 50:13–22; 100:5–8.) A cava eda rawa ni cakava me da veivakavulici ena veituberi ni Yalo Tabu? (Raica talega na Alama 17:2–3; V&V 11:18–21; 42:14.)
A cava na noda itavi ni da vakarorogo tiko vei ira e so ni ra vakatavulica na kosipeli? Na sala cava beka e tara kina na veika eda sotava na ka eda ciqoma mai ena kalasi ni lotu? Na sala cava ena tarai qasenivuli kei ira na lewe ni kalasi e so na veika eda ciqoma ena kalasi?
A cava e rawa ni cakava o qasenivuli me vakayaloqaqataki ira na lewe ni kalasi me ra vakaitavi ena lesoni?
Na sala cava o sa vukei kina mai na soqoni ni Lotu mo tubucake vakayalo? A cava na vuna e noda itavi kina me da masulaki ira era veivakavulici ena soqoni ni Lotu?
Ni da raica yani na veika e vulici ena ivakavuvuli nei Peresitedi Grant, na cava eda rawa ni cakava me da vakayacora kina na ka eda sa vulica ena wase ni ivola oqo?

sister teaching — “E sega tale na ka au kila e solia vei keda na marau levu ena veika vinaka kece, me vaka na vakavulici ni Kosipeli i Jisu Karisito.”