Wase 16

Vosoti Ira na Tani

Ni ra vosoti na tani e kauta mai na vakacegu kei na marau ki na noda bula.

Na Bula nei Heber J. Grant

Na luvei Peresitedi Heber J. Grant ko Lucy Grant Cannon e vola: E dua na ivakarau nei tamaqu ka vaka vei au ni voleka ni tautauvata kina kei Karisito sa ikoya na nona rawata me solia na baluna kadua, me caka vinaka vei ira era sa cati koya. Vuqa na gauna e dau vukea tale ena nona rarawa na tamata ka a vakalewai koya e matanalevu ena dua na gauna e liu, o koya ka a vakacacana na yacana ka sega ni rawa ni bulataka na ivakatagedegede tudei nei tamaqu. E sinai ena loloma kei na dau vosota vei ira era vakaweleweletaka na nodra Lotu ka vukitani mai na nodra vakabauta na tamadra. E sega ni vaka me cata se lomacataka e dua. E kaukauwa na nona veivakalewai ena ivalavala ca, ia vei ira na ivalavala ca sa sinai na nona loloma.¹

E tekivutaka mai vakamalua na ivakarau oqo ko Heber J. Grant, nona vuli tiko mai na ivolanikalou, qasenivuli vakauqeti, kei na veika e yaco vei koya me yacova ni sa rawa ni kaya, “Au sega ni cudruva e dua na tamata ka bula tu oqo.”² Ena dua na vosa e a solia ena koniferedi raraba ni Okotova 1920, e a tukuna e dua na ka e a yaco ka vukei koya me tea na yalo ni veivosoti ena nona bula. E vuqa na veivakavuvuli eke e kau mai ena vosa ko ya.

iVakavuvuli nei Heber J. Grant

Na kosipeli nei Jisu Karisito e kosipeli ni veivosoti.

Me vukei keda yadudua kece sara na Kalou me da nanuma ni kosipeli i Jisu Karisito e sega walega ni kosipeli ni veisau mai, ia e kosipeli ni veivosoti. E volai tu ni kevaka e mani damudamu na ivalavala ca ni dua na tamata, kevaka e veivutuni, era na vulavula taucoko me vaka na uca cevata [raica Aisea 1:18]. Au marautaka na ivakatakila totoka ka kaya:

“Ia oi au, na Turaga, au na vosoti ira ga kau sa lewa, ia koi kemudou sa kilikili mo dou vosota na tamata kecega.” [V&V 64:10.]³

Au sa soli ivakasala vakalevu vei ira na Yalododonu Edaidai ena noqu gauna, ka dua na ivakavuvuli levu sa ikoya me kua ni da vakalewa e dua ia koi keda ga. Au vakabauta na vaqara veivakalewai ena katalau, vakasigalevu kei na vakayakavi ia vei keda yadua ga.⁴

E sega ni dua na ka me na kauta mai vakalevu vei keda na Yalo ni Kalou me vaka na …dau loloma, veinanumi, loloma cecere, vosota vakadede ka dau veivosoti. E sega ni dua na ka me na kauta mai na marau levu vei keda me vaka na ivakarau ni yalo rawarawa me vosoti na nodra ivalavala ca era sa ivalavala ca vei keimami, ka sega ni dua na ka me na kauta mai na veivakarusai levu me vaka na vakaukauwataki ni lomadra ka cudrucudru ka gadreva na sauma na ca vei ira era vakavolivoliti keda.⁵

Ena wase 64:8–13, ena Vunau kei na Veiyalayalati, eda kunea na veika oqo:

“Raica ko ira na noqu tisaipeli, ena gauna e liu, era a veibeitaki vakaiira, ka ra sega ni veivosoti vakaidina, na ka oqo era sa cala kina, a ra sa cudruvi ka kune rarawa kina:

“Raica au sa kaya vei kemudou, mo dou veivosoti vakai kemudou, ia ko koya sa sega ni vosota na wekana ena nona cala, ena cudruvi koya na Turaga, raica sa ivalavala ca vakalevu cake ko koya.

“Ia, koi au na Turaga, au na vosoti ira ga kau sa lewa, ia koi kemudou sa kilikili mo dou vosota na tamata kecega;

“Ia sa kilikili talega mo dou kaya e lomamudou, me lewa mada vei kedaru na Kalou, ka sauma vei iko na nomu ivalavala.

“Ia ko koya sa sega ni vakatusa, ka veivutunitaka na nona ivalavala ca, mo dou kauta me lewai ena Lotu, io me caka vua na ka sa vakaroti tu ena vunau, se na ka sa vakatakilai vei kemudou.

“Ia mo dou kitaka na ka oqo me vakarokorokotaki kina na Kalou, e dina ga dou sa rawa ni vosoti koya ka lomana, ia mo dou vakayacora ga na ka oqo mo dou dodonu kina ena lewa, ia me kakua kina ni cudruvi kemudou ko koya na nomudou Vunilawa.”

Ia ena wase 121:45, 46, eda wilika:

“Ia me uasivi sara na nomu loloma vei ira na tamata kecega, kei ira era sa veitokani ena vakabauta, mo qarauna me savasava tikoga na nomu vakanananu, ia ena taucoko sara kina na nomu vakabauta ena mata ni Kalou, raica ena yaco vei iko na veivakalougatataki ni ilesilesi vakabete, me vaka na tegu sa lutu mai lagi.

“Ena sala vata voli ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara, raica na nomu lewa sa lewa e sega ni mudu, ia kevaka sa sega ni taurivaki vakatani sa na tudei tu ga me tawamudu.”

E tu vei au na doka vakaidina kei na kila me baleta na veivosa e cavuti mai na Vunau kei na Veiyalayalati.

Na yalo ni marau kei na vakacegu e lako mai ena gauna eda veivosoti kina.

Ena vica na yabaki sa oti e a muduki tani kina mai na Lotu e dua na tamata kilai levu. Ni oti e vica na yabaki, e a kerea o koya me papitaiso. E a vakaraitaka ko Peresitedi John Taylor na taro ni dodonu ni nona papitaiso vei iratou na iapositolo, ka tukuna [ena dua na ivola] ni kevaka eratou duavata kece ki na nona papitaiso, sa na rawa me papitaiso, ia ke dua na digidigi e sega ni duavata, ena sega ni rawa me vakacurumi mai ki na Lotu. Ena noqu nanuma na digidigi, e lima me papitaiso ka vitu e saqata. Ni oti toka beka ga e dua na yabaki e a tarogi tale mai na taro vata ga e qai walu me papitaiso ka va e saqata. Ni oti tale baci lako cake tale mai qai tini me papitaiso ka rua e saqata. Kena iotioti era sa qai vakadonuya kece na lewe ni Matabose ni Apositolo, ka vakavo ga koi au, ena vakadonuya me papitaiso na tamata oqo ena gauna ko ya au a liu toka ga vei koya na iAopsitolo vou duadua ena kuoramu. Dede vakalailai au a lako ki na nona valenivolavola na Peresitedi ka kaya vei au ko koya:

“Heber, au kila ni tinikadua na iapositolo era sa vakadonuya na papitaiso nei Baraca o Cei mada na Yacana, ” ka tukuna na yaca ni tamata, “ia ko iko taudua ko digidigi duatani. Ena vakacava nomu vakila ni ko sa na lako yani ki yasana ka dua ka ko qai raica na tamata oqo ni a kerea na nona papitaiso ko qai raica ni ko rairai tarovi koya mai na nona curu yani kei ira era sa veivutunitaka na nodra ivalavala ca ka taura na kena isau?”

Au a kaya, “Peresitedi John Taylor, au na rawa ni raica sara ga na matana na Turaga ke taroga mai na taro oqori, ka tukuna vua niu kitaka na ka au kitaka niu nanuma na ka e vinaka ena Nona Matanitu. … Au rawa ni tukuna vua na Turaga ni [tamata ko ya] sa vakacacana vakalevu na Lotu, kau sega ni nakita meu vakatara me lesu tale mai e dua na tamata vakaoqo ki na Lotu.“

“Sa vinaka, ” e a kaya ko Peresitedi Taylor, “noqu tagane, sa vinaka sara ga oqori, taura matua na nomu vakabauta, tudei tu vata kei ira.”

Au a kaya, “Peresitedi Taylor, na nomu ivola e kaya ni ko vinakati ira yadudua na iapositolo me ra digidigi ena ivakadinadina ni yalodra. Kevaka ko gadreva vei au meu solia na ivakadinadina ni yaloqu, au na marau meu solia, au na marautaka na noqu vakadonuya me lesu tale mai na tamata oqo, ia ena gauna ni noqu bula au sega ni nanuma meu na vakadonuya, kevaka me vakatau mai na noqu lewa. Na tamata ko ya e a beitaki e matadra na iapositolo ena vica na yabaki sa oti e a tucake ka lasu ka tukuna ni dina, ia e solia vei au na Turaga e dua na ivakadinadina ni a lasu, ia au a sega ni rawa ni vakacalai koya me baleta na ka o ya. Au a tekiduru ena bogi ko ya ka masuta na Kalou me solia vei au na kaukauwa meu kua ni vakaraitaka na tamata ko ya, ni laurai ni a lasu ia ka sega na neimami ivakadinadina, vakavo ga na nona ivakadinadina na gone yalewa e a vakaukauwataka me rau cala. Kau masuta na Turaga me dua na siga me na so tale na ivakadinadina me na lako mai, era a qai lako dina mai, ka keimami mani muduki tani kina. Ia ni sa lasu e dua na tamata vei ira na iapositolo, ka rawa me vakaraitaka ni cala ena nona ivalavala ca, au nanuma ni Lotu oqo e sa vakalolomataki vakasivia ka me sa kakua ni vakalesui tale mai ki na Lotu.”

“Ia, ” e a kaya tale vakarua ko Peresitedi Taylor, “noqu tagane, kakua ni digidigi ena dede ni nomu bula, ena kena tu vei iko na veivakasama oqori, me ra tikoga kei iko.”

Au biuta na valenivolavola ni Peresitedi. Au a lako sara ki vale. … Au wilika tiko na Vunau kei na Veiyalayalati ena ikatolu se ikava ni gauna, ka tiko kina na noqu ivakatakilakila ni vanua e yala kina na wili ivola, ena noqu taura cake, e sega ni tadola ena vanua e tiko kina na ivakatakilakila, e tadola ena:

“Koi au, na Turaga, au na vosoti ira ga kau sa lewa, ia koi kemudou sa kilikili mo dou vosota na tamata kecega; ia ko koya sa sega ni vosota na wekana ena nona cala, ena cudruvi koya na Turaga.” [Raica V&V 64:9–10.]

Ena noqu sogota na ivola au a kaya: “Kevaka e kerea na tevoro me papitaiso, ka tukuna ni sa veivutuni, au na papitaisotaki koya.” Ni oti na vakasigalevu au a lesu tale ki na valenivolavola nei Peresitedi Taylor ka tukuna vua, “Peresitedi Taylor, sa veisau na yaloqu, Ena dua na auwa sa oti au a kaya, ena dede ni noqu bula, au sega ni rawa ni vakadonuya me papitaiso ko Baraca O Cei mada qo na yacana, ia au sa mai tukuna vei iko sa rawa me papitaiso me vaka na noqu nanuma.”

E dua na ivakarau nei Peresitedi Taylor, ni dau taleitaka vakalevu e dua na ka, e dau vakadodonu ka dredre me yavala kece na yagona, e a dredre ka kaya, “Noqu tagane, na veisau e sa vakasauri sara, vakasauri. Au via taroga vei iko e dua na taro. Na cava o vakila ena nomu biuta eke ena dua na auwa sa oti? O vakila ni ko via vacuka na matana na tamata ko ya ka vakadavora ki ra?”

Au a kaya, “E vaka sara ga oqori na ka au vakila.”

E a kaya, “Na cava ko vakila ena gauna oqo?”

Meu tukuna sara vakadodonu, Peresitedi Taylor, au nuitaka ni na vosota na ivalavala ca na Turaga.”

E a kaya, “Ko vakila na marau, se sega, ni vakatautauvatataki. E a tiko vei iko na yalo ni cudru, e a tiko vei iko na yalo ni veisevaki ena yalomu vua na tamata ko ya, baleta na nona ivalavala ca ka baleta talega na nona vakarogorogocataka na Lotu. Ia oqo sa tu vei iko na yalo ni veivosoti ko sa vakila ni ko marau, se sega?”

Kau a kaya yani, “Io e vakakina, au a vakila na nanumi koya ga kei na veisevaki ia oqo au sa marau.”

Ka qai kaya: “Ko kila na vuna au vola kina na ivola ko ya?”

Au a kaya, “E sega, saka.”

“Au a vola, me baleti iko kei na so na lewe ni apositolo gone ko ni na vulica na lesoni ni veivosoti e liu mai ni bera na lewa dodonu, ni tiko na veivutuni, ka tiko e yalomu na yalo ni veivosoti ka kauta laivi mai yalomu na yalo ni veicacati kei na cudru, ena kauta mai na vakacegu kei na marau, ka kauta mai na kosipeli i Jisu Karisito na yalovinaka, vakacegu kei na marau vei ira na tamata kecega ka ra bulataka ka muria na kena ivakavuvuli.”

Ka kaya tale. Au sa sega ni nanuma rawa na ka kece e a vakavuvulitaka, ia e a tomana tiko ena sala oqo, ena nona tukuna tiko vei au ni sega ni rawa ni na solia vei au na kila ka ko ya, ni sega ni rawa ni solia vei au na ivakadinadina ni kosipeli, ia meu na ciqoma sara ga vakaiau, ka me tiko vei au na yalo e dodonu me curu ki yaloqu ka meu vakila—na yalo ni veivosoti, na yalo ni vosota vakadede kei na loloma cecere—ni bera ni lako mai vei au vakaiau e dua na vinaka; ka bera niu solia vakaidina na noqu lewa e loma vua, ko vakadonuya me papitaiso na tamata oqo, keu a sega ni vulica na lesoni ni yalo ni marau kei na vakacegu e lako mai ena auwa ni veivosoti, ni sa sinai na yaloda ena loloma cecere kei na vosota vakadede ki vei ira era vakayacora na cala. Mai na siga ko ya me yacova edai au se nanuma tu ga na veivakavuvuli ko ya.

Na Parofita ni Turaga [Peresitedi Taylor] e a kaya:

“Noqu tagane, kakua ni guilecava ni gauna ko vakayacora kina vakadodonu na nomu itavi na yalomu ena sinai ena loloma kei na veivosoti, vei koya mada ga na tamata ivalavala ca sa veivutuni, ia ena gauna ko lako tani mai kina ena nomu vakayacora vakadodonu na nomu itavi ka tu vei iko na inaki dei ni veika ko nanuma e dodonu ni ka ko nanuma e lewa tautauvata vakadodonu ia na dina me yaco tikoga, ena vuqa na gauna ko na marau. Ko na rawa ni vakila na duidui ni Yalo ni Turaga kei na yalo ni veisaqasaqa, ni ko raica ni ko marau ka vakacegu, ko lomani ira na wekamu, ka leqataka na veika e baleti ira, ka rawa ni ko kaya ni sega vei iko na Yalo ko ya ni ko sa sinai ena yaloca ka vakila ni ko via tukia sobu e dua.”

Na veivosoti e dua na ivakaraitaki ni loloma cecere dina.

Au nanuma lesu e dua na wase totoka ena iVolatabu (1 Korinica 13):

“Kevaka kau sa vosataka na nodra dui vosavosa na tamata kei na vosa ni agilosi, ka sega vei au na loloma, au sa vaka walega na kaukamea sa rorogo, se na lali sa tataqiriqiri.

“Ia kevaka kau sa parofisai rawa, ka kila talega na ka kecega sa vuni, kei na vuku kecega; ia kevaka sa tu vei au na vakabauta kecega, meu kauta tani kina na veiulunivanua, ka sega vei au na loloma, au sa ka walega.

“Ia kevaka kau sa vota na noqu ka kecega meu vakani ira kina na dravudravua, ia kevaka kau sa solia na yagoqu me vakamai, ka sa sega vei au na loloma, sa sega ni yaga vei au.

“Sa dau vosota vakadede na loloma, sa yalovinaka; sa sega ni vuvu na loloma; sa sega ni vosa doudou na loloma, sa sega ni viavialevu,

“Sa sega ni cakava na ka sa sega ni kilikili kaya, sa sega ni qara na ka me nona ga, sa sega ni cudrucudru, sa sega ni daulomaca;

“Sa sega ni rekitaka na ca, ia sa rekitaka na dina:

“Sa ubia na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.

“Sa sega ni mudu na loloma; ia na parofisai, e na takali ga; na vosa tani e vuqa; ena mudu ga; na vuku, ena takali ga.

“Ni da sa kila vakatikina ga, ia eda sa parofisai vakatikina ga.

“Ia ni sa yaco na ka taucoko, ena qai takali na ka sa vakatikina ga.

“Niu a gone, au a dauvosa me vaka na gone, au a kila ka me vaka na gone, au a dauvakanananu me vaka na gone; ia niu sa yaco me tamata bula, au sa biuta tani na ka vagonegonea.

“Io, edaidai eda sa raica me vaka na titiro ena iloilo buwawa; ia mai muri, ena vaka na veirai ena matanavotu; edaidai kau sa kila vakatikina ga; ia maimuri kau na kila me vaka kau sa kila.

“Ia oqo sa tu na vakabauta, na inuinui, na loloma, a ka tolutolu oqo; sa uasivi cake vei iratou na loloma.”

E levu na tamata era nanuma ni loloma cecere sa ikoya na solia e dua na dola vua e dua; ia na loloma cecere dina sara sa ikoya na solia na loloma kei na loloma ni veikauwaitaki, ka sa ikoya oqori na loloma cecere ka vosa tiko kina na iapositolo ena wase 13 ni iMatai ni Korinica.

Au nanuma ni oti na kena soli vei au na ivakavuvuli ko ya niu se itabagone, seu gonetagane, mai na Peresitedi ni Lotu, au dau wilika na wase oqo vakadua dua na macawa ena dua na gauna balavu, oti qai vakadua dua na vula ena vica vata na vula. Au vakasamataka niu gadreva ena noqu bisinisi, me ivakaraitaki, ni dua na ka e vinakati ena noqu toso ki liu.

Me kua ni da vakacala e dua tale, me da sasagataka na noda vakavinakataki keda.

Au nanuma ena dua na yabaki sa oti, e na koniferedi, au a wilika e dua na sere totoka ka talei, na veimama ni matai ni qaqa ni sere ka vaka:

Me ra kilai ira yadua na tamata kecega, 
Me kila na veika oqori me cakacakataka.
Vakavinakataka na nona malumalumu kecega
Ka vakacalai ira kina na wekana.
[Raica “Me ra Kilai Ira Yadua na Tamata Kecega, “ Serenilotu (1948), naba 91]

…Au cavuta talega na tikina lekaleka e va mai na noda serenilotu [yacana “De ko mani nanuma mo biliga”], e dua na tikina e vakaoqo:

De ko mani nanuma mo biliga
Na cala ko raica vei ira na tani
Tarogi iko, ni bera ni ko lewa dina
De tu talega na nomu cala edai.
[Raica Serenilotu {1985), naba 235]

Au sega sara ga ni kila na gauna au a cavuta kina na veiserekali oqo, meu gadreva kina meu cavuta mai edai; ia me baleta na veicudruvi kei na yalodra, ka volekata na veisevaki, kei na cudru ka vaka me vakamatatataki mai vei ira e so na tamata ena kedra maliwa na Yalododonu Edaidai, ena gauna oqo, me baleta na bisinisi kei na veika vakapolitiki, au gadreva meu vakadeitaka, ena noqu kaukauwa kece, na iotioti ni qaqa ni sere lailai ko ya. …

Kua ni solia nomu nanuma vakailoa, 
Na leqa e yaco ni da vakariri.
Ko ira eda nanuma vaka ca
Vuqa na gauna era dau noda itokani.
[Raica Serenilotu (1985), naba 235]. …

Au gadreva meu cavuta tale na iotioti ni qaqa ni [dua] na sere totoka vakaoti, kau a vulica ena tolusagavulukalima se vasagavulu na yabaki sa oti, ena nona lagata kina ena imatani ni gauna vei au ko Francis M.Lyman [ena Kuoramu ni Apositolo Le Tinikarua]. Au vola sara ga ena bogi koya, ka vulica ena siga ka tarava. Au na kerei ira na Yalododonu Edaidai taucoko me ra vakayagataka na ivakavuvuli ni qaqa ni sere vinaka oqo ena nodra bula, ia kevaka eda kitaka ko ya au vakabauta ni da na tubu ena loloma kei na loloma cecere, ka na rawa kina vua na yalo ni vakacegu kei na marau, ka yalataka ko Peresitedi Taylor ena noqu vakabauta vakaukauwa meu tarova e dua na tamata mai na Lotu, ia na marau kei na vakacegu e lako mai vei au, ena veisau ni yalo, ena lako mai vua na Yalododonu Edaidai:

Ni ko lewai iko, ko qai kunea
Ni ka ko kitaka e levu mai na tani, 
Na vuna ni vinaka vei iko na Kalou.
Mo vinaka vei ira era lailai sobu.
iVakaraitaki vinaka e vaka na rarama
Ni siga, ka ra via kerea na tamata, 
Mo vakavinakataki iko taumada edai
Qai vakavinakataki ira na itokani ni mataka.
[Raica Serenilotu (1948), naba 91]. …

Au vakamasuti kemuni na Yalododonu Edaidai mo ni vakaukauwataka na yalo ni loloma cecere, ni vosota vakadede, kei na veilomani vakaveitacini.⁶

Vakatutu ni Vuli kei na Veivosaki

Na sala cava e kosipeli kina ni veivosoti na kosipeli i Jisu Karisito?
Na cava e gadrevi kina me da vosoti ira na tani? Na cava e so na itotogi ni sega ni via veivosoti?
Na cava e dau dredre kina ena so na gauna na veivosoti? Na cava e rawa ni da kitaka me da vorata kina na dredre oqo?
Na sala cava e rawa kina ena nona ivakarau ni veivosoti e dua me vakaukauwataki ira era vosoti?
E rawa vakacava me ivakaraitaki ni loloma cecere na veivosoti?

prodigal son — Me vaka e vakaraitaki ena droini ni gone cidroi ena nona kidavaki e vale mai vei tamana, “na yalo ni marau kei na vakacegu e yaco mai ena auwa ni veivosoti, ni sa sinai na yaloda ena loloma cecere kei na vosota vakadede vei ira era vakayacora na cala.”