Wase 7

Me Vauci Keda na Noda Dui iVakadinadina

Na noda igu ni qarava na Turaga ena noda bulataka na kosipeli i Jisu Karisito, ena tubucake kina na noda kila ka ena dina.

Na Bula nei Heber J. Grant

Ena nona se gonelailai o Heber J. Grant e a sa tekivu kina na kena tubucake na nona ivakadinadina ena kena vakalesui tale mai na kosipeli. Ena nona gauna ni bula e muri, e veigauna e dau vakavinavinakataki ira na qasenivuli kei ira na iliuliu ena nodra dau vukea na kena vakalevutaki na kena tubucake ni nona ivakadinadina. E a vakavinavinaka vakalevu sara vua na tinana. “Ena noqu peresitedi ni Lotu au tucake tu kina edaidai, ” e a kaya ena dua na gauna, “e baleta na noqu vakamuria na ivakasala kei na veituberi kei na ivakadinadina katakata vakalou ni cakacaka ni Kalou, e tu vei au ka lako mai vua na tinaqu.”¹

E vakalevutaki na nona ivakadinadina, ena nona sa tubucake tiko. Ena nona a vulica tiko na iVola i Momani e a vakamacalataka na kena ivakadinadina e a ciqoma: “Ena noqu a se gonetagane yabaki tinikalima au wilika, vakavinaka ena masumasu, na iVola i Momani, e a qai basika mai lomaqu e dua na ivakadinadina tudei ka tawamudu ena kena dina vakalou. Na veivakurabuitaki ni veivakavuvuli e sa veivakacegui, veivakalougatataki, ka idusidusi vei au mai na siga o ya me yacova mai nikua.”²

E dau masulaka vakaukauwa o Peresitedi Grant me tudei tu ena vakabauta, ka me tomana tiko na nona taqomaka na nona ivakadinadina³ ena nona bula taucoko. Ena gauna e sa yabaki 80 kina e qai kaya: “E sa rui dredre dina vei au meu kunea na vosa me vakaraitaki kina na noqu vakavinavinaka ka vakatawana tu na lomaqu ena ivakadinadina tawamudu, ena vuni yaloqu e loma, na vakalou ni cakacaka oqo. Ena veiyabaki sa sivi yani, au sa kunea rawa e vuqa, na ivakadinadina kaukauwa ka qaqa, me baleta na vakalou ni cakacaka oqo, e dredre dina vei au meu kunea na vosa me vakaraitaki kina na noqu vakavinavinaka; kau sega ni kunea rawa e dua na ka me vakalailaitaka na noqu vakabauta.”⁴

iVakavuvuli nei Heber J. Grant

Na ivakadinadina e lako mai ena ivakatakila vakaikeda mai vua na Kalou ka basika mai vua na Yalo Tabu.

E a sa solia oti na Kalou vei ira na tagane kei na yalewa ena dela ivuravura taucoko, ka ra vakasaqara tiko na rarama ni Nona Yalo Tabu, me isau ni masumasu ena yalomalumalumu, e dua na ivakadinadina kei na kila ka me baleta ni Kosipeli oqo sa ikoya sara ga na kena e dodonu me vakakina—ni sa ikoya na dina, ni na tu me tawamudu, kei ira talega era bulataka era na bula vakalou tawamudu ena mata ni Tamada Vakalomalagi, kei na Luvena, na noda Dauveivueti.⁵

E drau, io, e udolu e sa laucoka na yalodra, ena ivakaraitaki ni Yalo Tabu, kei na ivakatakila ni Kalou kivei ira, era sa ciqoma e dua na kila ka ni cakacaka vakalou eda vakaitavitaki keda kina. Era sa ciqoma na ivakadinadina ni Yalo Tabu kivei ira, vakaceguya na yalodra, vakaceguya na nodra bula tiko, vakavuna me ra tagicaka ena marau na nodra kila ni bula tiko na Kalou, na nodra kila ni o Jisu sa ikoya na Karisito, na nodra kila ni o Josefa Simici sa ikoya na Parofita ni Kalou bula ka dina. E sega ni dua na tamata ena vuravura oqo e rawa ni kaya ni kila ni veika e rau tukuna e sega ni dina. Ena rairai sega beka ni vakabauta na nodrau ivakadinadina ia e sega ni rawa vua me butakoci rau ena kila ka rau taukena. Au na vunautaka beka na noqu lomana na noqu matavuvale, e dua na turaga ena kaya beka, “Au sega ni vakabauta, ” ia ena sega ni veisautaka na kila ka e tu vei au ena noqu lomana vakaidina na noqu matavuvale. Ena gauna e ciqoma kina e dua na turaga na ivakadinadina ni Yalo Tabu, ena gauna e ciqoma na kosipeli oqo, ka kila vakaidina, ka vunautaka, ena sega beka ni vakabauti koya o vuravura taucoko, ia o ya ena sega ni veisautaka na kila ka e tu vua.⁶

Na vakasolokakana ni Nona Yalo Tabu eda vakaivotavota taucoko kina na Yalododonu kau vakavinavinaka kina vua na Kalou. Au vakavinavinaka vua na Kalou ni sega ni dua vei keda e vakararavitaka vua e dua tani na nona ivakadinadina me baleta na kosipeli. Au vakavinavinakataki Koya ni tamata yadua kei na tamata taucoko e rawa me ra taukena e dua na nodra ivakadinadina.⁷

Sa ikoya na noda dui kila ka vakaikeda, na domo lailai ni ivakatakila ka lako mai ena veiyalodina yadudua, yalo ni dau masumasu, na isau ni masumasu, e solia tu na kaukauwa ki na Lotu oqo. Kevaka me a sega na ivakadinadina vakayadudua oqo, ka lako mai me vaka e vakayacora vei ira na turaga kei na marama ena vuravura taucoko ena nodra rogoca na kosipeli oqo kei na yalo raramusumusu era masuta na Kalou ena vuku ni nona YaloTabu, ke a sega beka ni vaka na noda tu edaidai—dua na uma tamata, dua na yago kei na yalo, dua vata kei na Kalou ka dua vata kei na noda iVakabula.⁸

Au vinakata meu tukuna eke ni sa ikoya na kaukauwa ni Kalou, ni sa ikoya na Yalo ni Kalou e vakadinadinataka vei ira na tamata, ni sega ni o koya na kaukauwa ni vosa, e sega ni o koya na vuli, sega ni vosa vinaka, e sega ni kena vakaiukuukutaki ni kena vosataki, ka yaco me tauyavutaki ena lomadra na luve ni tamata me vakadinadinataka vei ira na kena Dina.⁹

Na noqu ivakadinadina era taroga e lewe vuqa na tamata ka keimami sota kaya. Era tukuna, “E sega ni rawa mo kila na veika oqo, Mr. Grant.” Ia au sa tu vakarau ka nakita meu wasea na ivakadinadina niu kilai ira, kau kilai ira me vaka na noqu kila na rarama mai na butobuto, na katakata mai na liliwa. Au kila ena noqu ciqoma na isau ni noqu masumasu ni oti na noqu masuta na Turaga. O koya gona, e tu vei au na kila ka ni veika oqo, kau kilai ira vakavinaka me vaka na noqu kila niu lomana na noqu matavuvale kei ira na noqu itokani. Na kila ka oqo e lako mai vei au ena dua na kena gaunisala au sa tu vakarau kina ka nakita meu wasea na ivakadinadina ena vuravura taucoko, kau kila niu na tarogi ena ivakadinadina au wasea. Au na sega ni dina kivei au kevaka au a sega ni vakayacora, ni yaco mai na kena gauna, au wase na ivakadinadina ni veika au kila.¹⁰

Oi keda, na Yalododonu Edaidai, e vakaitamera sara na vuna eda vakavinavinakataka na veivakaraitaki e vuqa ni vinaka kei na loloma ni noda Kalou. Me da tovolea, ena kaukauwa taucoko ka tu vei keda, me da rawata vakarauta na vuku, rarama kei na kila ka mai vua na Tamada Vakalomalagi me rawa kina vei keda me da vakayacora tikoga na noda itavi. E lewe vuqa vei keda eda vakila ni da sa tudei tu ena kila ka va-Kosipeli, ka sa lailai sara na noda rerevaka na veivakatovolei ena noda bula me vukici keda tani mai na dina. Ena gauna vata talega, e dodonu me da kila vakavinaka sara ni sega ni dua na siga se auwa ni noda bula me da na rawa ni tu duadua ka taqomaka na ivakadinadina ni Kosipeli ni sega na rarama kei na ivakaraitaki ni Yalo ni Kalou.¹¹

Eda ciqoma ka vakaukauwataki na noda ivakadinadina mai na masumasu, vulici kei na talairawarawa vua na Turaga.

Na ivakadinadina uasivi duadua e rawa me da ciqoma sa ikoya na domo ni ivakatakila—na ivakaraitaki ni Yalo Tabu. E sega ni rawa vua e dua me ciqoma na ka oqo ke sega ni bulataka na talairawarawa ki na ivakaro me rawa ni kilikili kina me ciqoma.¹²

Na veika o rawata vakataki iko e sega ni rawa mo vakadewataka vei ira na tani. E sega ni rawa meu solia vua e dua na tamata e dua na ivakadinadina ni kosipeli oqo, e tautauvata sara ga ni sega ni rawa meu kana ena vukuna. E rawa niu tukuna vua me na rawata vakacava. E rawa niu tukuna vua na veivakalougatataki ni Kalou vei au. Ia na veitamata vakayadudua e dodonu me bulataka na kosipeli kevaka e namaka me rawata e dua na ivakadinadina vakaikoya ena cakacaka vakalou oqo.

Na gaunisala me da ciqoma kina e dua na ivakadinadina ena noda bulataka na kosipeli esa vakatovolei ena vuravura taucoko mai vei ira na turaga kei na marama era cati ka vosacataki ka vakacacani mai vei ira na lewe ni nodra dui matavuvale, baleta na nodra sa lewe ni Lotu oqo; ia na isau ni masumasu ena yalomalumalumu, vata kei na kena vakayacori na veika e tukuna vei ira na Kalou me ra cakava, era sa ciqoma kina na ivakavuvuli dina era sa kila tu kei na ivakadinadina me baleta na cakacaka vakalou oqo.¹³

Kemuni na taciqu kei na ganequ, kevaka eda vulica na ivolanikalou, na yavu ni bula kei na veivakabulai, taqomaki ni veivakaro ni Turaga, na yalayala taucoko era a yalataki era na vakayacori ka ra na tokara na isala vakaiukuuku. Eda sa na qai tubucake ka vakalevutaki na noda rarama, kila ka kei na vuku.¹⁴

Au yalataka vei kemuni, me vaka e dua na italai ni Kalou bula, ni ko ira vakayadua na turaga kei na marama me na talairawarawa ki na ivakaro ni Kalou ena tubucake, ni yalayala vakayadua e yalataka na Kalou ena vakayacori ka ra na tokara na isala vakaiukuuku, ka ra na tubucake ka vakalevutaki na noda yalomatua, rarama, kila ka, vuku, ka cecere duadua vei ira kece, ena ivakadinadina ni Turaga o Jisu Karisito.¹⁵

Na noda ivakadinadina e tubu ka kaukauwa cake ena noda veiwaseitaka.

E sega ni rawa vua e dua na tamata me vunautaka na kosipeli ena vuku ni ivakaraitaki kei na kaukauwa ni Yalo ni Kalou bula … ke sega na nona vakila, kila, kei na matata vinaka ni nona vakalougatataki mai vua na Turaga Cecere, ka rawa kina vua me vakadinadinataka na kaukauwa ni Kalou ni dau basika mai ena gauna eda dau vunautaka kina na kosipeli oqo ni Turaga o Jisu Karisito.¹⁶

Au a sa rogoci Peresitedi [Brigham] Young kei na so tale na turaga ena nodra dau kaya vakavuqa ni vakawasoma na nodra dau ciqoma e dua na ivakadinadina o ira na itabagone; e vu ni yalodra, na cakacaka vakalou oqo, ena nodra dau tu cake tu [me wasea na nodra ivakadinadina] mai na nodra ciqoma ena nodra dau tekiduru sobu ka masulaka na ivakadinadina o ya; ena vuku ni ivakaraitaki ni Yalo ni Turaga e sa dau basika mai vei ira, e sovaraka mai vakayauyau na Yalo o ya, me vakasinaiti na yalodra ena rarama kei na kila ka ka lako mai vua na Kalou ka basika mai vua na Yalo Tabu. E sa tu vei ira na ivakadinadina ka lako mai na vu ni yalodra ka rawa kina vei ira me ra vakadinadinataka ni ra sa vakadinata talega ni ra vakaraitaki ena yavu ni bula kei na veivakabulai; ni ra kila ka vakadinata talega ni bula tiko na Kalou, ni o Jisu sa ikoya na Karisito, ni o Josefa Simici e a dua ka sa ikoya na parofita ni Kalou bula ka dina.¹⁷

Ena noqu a veiliutaki tiko ena kaulotu mai Iurope, au a sotava e vuqa na gauna donu meu vakasalataki ira na gonetagane ka ra dau lako mai e kea me ra vunautaka na kosipeli—na gonetagane era sega sara tu ga ni bau vuli, sega vei ira na kila, e lewe levu vei ira era se qai tucake vakadua ena nodra bula taucoko ka wasea na nodra ivakadinadina ena valenivolavola ni kaulotu e Iurope ka tiko e Liverpool, Igiladi. Au a kaya vei ira me ra vulica na ivolanikalou ka masulaka na ivakaraitaki ni Yalo ni Turaga, ka yalataka vei ira kevaka walega me ra dalaga ka wasea na ivakadinadina ni o Jisu Karisito e a Dauniveivueti ni vuravura, ni o Josefa Simici e a nona parofita, na Kalou ena solia vei ira e so na ka me ra tukuna veitalia mada ga ke a lala tu na vakasama ena imatai ni gauna. E sega ni lewe vica walega era lewe levu na italatala qase era wasea nodra ivakadinadina vei au ni yalayala oqo e a vakayacori, kei na Kalou e a vakayacora dina vei ira na veivakalougatataki ena veigauna era wasea kina na nodra ivakadinadina ni ilesilesi vakalou na ilesilesi nei Josefa Simici, ka vakalesuya tale mai na Lotu i Karisito ena dela ivuravura, ena veidusimaki ni Kalou.¹⁸

Ena noqu gauna ni bula au a sa rogoca e drau ka udolu na ivakadinadina ni gonetagane kei na goneyalewa ena nodra a lako tu yani ka vunautaka na Kosipeli oqo ena nodra sa tadu lesu mai ena cakacaka vakadaukaulotu kei na nodra vakadinadinataka tiko ni sa vakalevutaki na nodra kila ka ena cakacaka vakalou oqo, ka sa vakaukauwataka sara ga na nodra ivakadinadina.¹⁹

Na lotu ni Kalou e sega kina na tucake tu vakadua; e sega ni rawa ni da bula ena ivakadinadina e a ciqomi ena vica vata na yabaki sa oti. Eda sa … rogoca na ivakadinadina ni dua na turaga yabaki vitusagavulu kaciwa, ia kevaka e sa dodonu me kua ni wasea na nona ivakadinadina e a sa ciqoma oti na yalo ni Kalou e sa na biuti koya, baleta e sega ni dua na yabaki e rawa me da tarovi kina ena cakacaka kei na kosipeli ni Kalou.²⁰

Na ivakadinadina e solia vei keda na rawa ka kei na yalodei me da kitaka na cakacaka ni Turaga.

O ira era talairawarawa ki na ivakaro ni Turaga, o ira era bulataka me vaka na veika e vinakati ena kosipeli, e tubu mai na dua na siga ki na dua tale na siga kei na dua na yabaki ki na dua tale na yabaki ena dua na ivakadinadina kei na dua na kila ka ni kosipeli, kei na vakadeitaki me vakauqeti ira na tani me ra vaqaqa na yavu ni bula kei na vakabulai.²¹

Me vaka ni o keda e dua ga na uma tamata ka da sa vakaraitaka ni itukutuku ni iVakabula e dina, o ya, kevaka e dua na tamata sa via cakava na loma i Tamada, ena kila o koya na ivakavuvuli [raica Joni 7:17], ka ni sa [tu] vei keda e dua na kila ka maucokona ka uasivi sara, ka sa ikoya na vuna eda [sa] rawa ni solibula kina ena vuku ni dina.²²

Au vakavinavinakataka vakalevu ni Yalododonu Edaidai e veiyasa ivuravura taucoko e tu na dui nodra ivakadinadina tudei vakaikoya ka vakayadudua ena cakacaka vakalou ka da vakaitavitaki keda kina. Ia kevaka me a sega na nodra ivakadinadina oqori o ira na turaga era na sega ni vakasamataka, se o ira talega na marama, ena kena caka na solibula totoka ka ra dau cakava ena nodra vanua kei na veivanua tani, ena kena tosoi tikoga ki liu na cakacaka ni Turaga. …

… Au vakavinavinakataka ena noqu vakasamataki ira na turaga ka ra a tu ena ulu ni Lotu oqo kei ira na vakailesilesi me ra veiliutaki ena Lotu, era solia na nodra gauna kei na nodra taledi, era solibula (sa ikoya, na solibulataki ni veika vakavuravura oqo), ka tu vei ira e dua na kila ka tudei ka uasivi sara ni bula tiko na Kalou, ka rogoca ka sauma mai na nodra masumasu, tu vei keda e dua na kila ka sega ni vakatitiqataki ni Kalou e a rairai vei Josefa Simici ka vakaveikilaitaka na Luvena vei koya; e tu vua e dua na kila ka uasivi sara ni Matabete i Eroni kei Melikiseteki erau a vakalesui tale mai ki vuravura mai vei ira na turaga ka ra taura tu na idola ni bula vakayago e vuravura. …

E sega ni rawa ni da na rawata na veika eda sa rawata tiko, se me da volekata mada ga yani, kevaka me na lailai sobu mai na taucoko kei na maucokona ni kila ka e sa tu oqo vei keda vakaumatamata.²³

Kevaka meu kila vakataki au na lomaqu, au vakabauta ni sa tuvai oti tu ena kena tosoi ki liu na Lotu kei na matanitu ni Kalou. Au kila ni sega tale ni dua na ka ena dela ni vuravura oqo meu marautaka sara vakalevu me vakatautauvatani kei na noqu vakaitavitaki au vata kei ira talega na noqu tamata kei na noqu vada ni Kalou ena Lotu i Jisu Karisito; kau sega ni vakabauta niu lako sivita e dua na siga meu sega ni vakavinavinakataka na Kalou ena kena vakalesui tale mai na yavu ni bula kei na veivakabulai, ka sa yaco meu vakalougatataki ena noqu vakaitavi ena yavu ni bula kei na veivakabulai. Au masuti Koya ena vu ni yaloqu taucoko me kakua ni yaco me vakabutobutotaki na noqu vakasama, ka me kakua sara ga niu lako tani mai na dina; ka meu kakua sara ga ni guilecava e dua mada ga na veiyalayalati au a yalataka, ia, ena noqu sa tubucake tiko ena veiyabaki kei na vakalevutaki ni noqu kila vinaka, ka meu na tubucake ki na dua na ivakadinadina ni kosipeli kei na kena gagadre—e sega walega ni dua na gagadre, ia meu na cakava sara ga—meu cakacakataka na kena tosoi ki liu na matanitu ni Kalou e na vuravura.²⁴

Vakatutu ni Vuli kei na Veivosaki

Na cava na vuna e ka dina kina ni sega ni rawa vua e dua me ciqoma e dua na ivakadinadina ke sega ni bulataka ka talairawarawa ki na “ivakaro me rawa ni kilikili kina me ciqoma?”
Na cava na vuna e gadreva kina me vakaukauwataki e veigauna e dua na ivakadinadina? E rawa vakacava me da tudei tu ka sega ni vakacauoca ena noda sasaga me vakalevutaki na ivakadinadina?
E vukei keda vakacava na noda ivakadinadina ena veigauna ni veivakatovolei se veivakararawataki? E vukei keda vakacava na noda ivakadinadina ena gauna ni noda vakacegu se sautu?
Na cava na vuna e vakaukauwataki kina na noda ivakadinadina ena noda veiwaseitaka? ena noda vakarogoca na nodra ivakadinadina na tani?
Ena veivanua cava so e rawa talega ni da wasea kina na noda ivakadinadina me vaka na soqoni ni ivakadinadina?
E rawa vakacava vei ira na itubutubu me ra vukei ira na luvedra me ra vakatorocaketaka na nodra dui ivakadinadina yadua me baleta na kosipeli?