Wase 22

Vakavulici Ira na Gone ena iVunau kei na iVakavuvuli ni Kosipeli

Sa dodonu vei ira na itubutubu ena nodra veivuke na iliuliu ni Lotu kei na qasenivuli, me ra cakacaka sara vagumatua ka kakua ni guce ena nodra vakavulici na gone ena kosipeli.

Na Bula nei Heber J. Grant

Evuqa sara na ka sa dau tukuni me baleta na gugumatua kei na talairawarawa nei Peresitedi Heber J. Grant. Ia e dina ni sobuti koya e vuqa sara na veivakalougatataki ena nona vakabauta kei na cakacaka vakaukauwa, ia e se totolo ga na nona vakaraitaka na nona se dinau tu ga vei ira era a vakavulici koya ena kosipeli ena gauna ni nona gone.

E dau vakacaucautaki tinana ena vuqa na gauna. E kaya kina, “Au dinau tu ga vei tinaqu, baleta ni a mate o tamaqu niu se qai siga ciwa ga; sa dau vakauqeti au tu ga na ivakavuvuli uasivi, na vakabauta, kei na bula dokai nei tinaqu.”¹ Ena nona vosa me baleta na nona lewa me na vakamau ena valetabu, e kaya kina: “Au vakavinavinakataka vakalevu na veivakauqeti kei na noqu gadreva meu tekivutaka donu na noqu bula. Na cava beka na vuna e yaco mai kina vei au? E yaco mai baleta ni vakabauta o tinaqu na kosipeli, vakavuvulitaka vei au na kena yaga, vakavurea vei au na yalo e gadreva meu rawata na veika vinaka taucoko ni kena tekivutaki donu na bula ka vakayacora na cakacaka me salavata kei na ivakavuvuli ni kosipeli.”²

E vakaraitaka talega o Peresitedi Grant na nona vakavinavinaka me baleti ira na qasenivuli ni Wilivola ni Sigatabu kei ira tale eso era a tuberi koya ena nona gauna ni gone. E kaya kina, “Au na vakavinavinaka tu ga ena veitabagauna kece ni tawamudu vei ira na turaga o ya me baleta na veivakauqeti era vakayacora vei au.”³

Ena nona muria na nodra ivakaraitaki na qasenivuli dau veivakauqeti ena nona bula, a cakacaka kina vagumatua o Peresitedi Grant me vakavuvulitaka na dina vei ira na luvena. E tukuna kina na luvena yalewa o Frances Grant Bennett na sala malumu e dau muria me vukei koya kina kei iratou na tacina me ratou bulataka na kosipeli: “Ena vuku ni veika e sega soti ni bibi, e dau tu yadua sara na gauna me dau qai kaya kina na “sega” vei keitou o ta.Ia ena gauna sa tukuna kina, “Sega, ” keitou sa kila ni sa ikoya sara ga o ya. Na nona veituberi e sa vukea na neitou dau vakatulewa ena gauna e gadrevi kina me keitou dau vakatulewa. Ena dau vakamacalataka sara vakamatau na vuna e nanuma kina ni sega soti ni vinaka e dua na ivalavala oti ena qai kaya, ‘O ya na noqu nanuma; ia e dodonu mo vakatulewa ga kina vakataki iko’ E dau yaco me tautauvata ga kei na veika e nanuma na neitou lewa. E dau rawata o koya me vakauqeti keitou me keitou vinakata na cakava na veika e dodonu ka me kakua ni keitou dau vakasaurarataki me keitou cakava.“⁴

E sega vakadua ni bau vakacauoca ena nona sasaga o Peresitedi Grant me vakavulici iratou na luvena, me yacova sara mada ga na gauna eratou sa qase cake tiko mai kina. Ni sa yabaki 52, ni lewena tiko na Kuoramu ni Apositolo Le Tinikarua, a vakarorogo sara vakavinaka ki na nona vosa o Peresitedi Joseph F. Smith ena dua na koniferedi raraba ka vakauqeti ira tiko kina na lewenilotu “me ra vakaraitaka yani na nodra vakabauta, yalodina kei na loloma me baleta na ivakavuvuli ni kosipeli, ena ivalavala era na tuberi ira cake kina na luvedra ena nodra vakabauta.”⁵ E a tu ena itutu ni vunau ena siga vata o ya o Elder Grant ka kaya:

“E dua na gagadre cecere duadua na noqu bula kilikili kaya na nodrau bula na tamaqu kei na tinaqu; kei na dua tale na gagadre cecere ni noqu bula sa ikoya meu susugi iratou cake na luvequ ena veisusu ka veivakasalataki kina na kosipeli. E dua na ulutaga talei au dau vunau kina vei ira na Yalododonu Edaidai e a tauri mai na nona ivakatakila na Turaga ka tukuna kina vei keda ni sa noda gauna me da vunau kina vei ira na luveda ka vakavuvulitaka vei ira na Kosipeli i Jisu Karisito, vakauqeti ira ena vakabauta na Turaga ka iVakabula kei Vuravura, ka vakavulici ira me ra dau masu ka lako vakadodonu ena mata ni Turaga [raica V&V 68:25–28]. Au vakabauta ni sa dau vakawaleni vakalevu na ivakaro oqo, kau sa reki vakalevu sara ena nona vosa na noda Peresitedi edaidai, ka vakauqeti ira kina na Yalododonu Edaidai me ra qarava na nodra itavi ena vuku ni ka oqo. Au sa dau tovolea meu vakayacora, ia au sa yalataka talega meu na dau yalodina ena noqu vakayacora vakakina ena veigauna mai muri. Au vakabauta ni da rawa ni vakavinakataka cake oi keda kece sara, na noda itavi ena vuku ni ka oqo.”⁶

iVakavuvuli nei Heber J. Grant

Sa nodra itavi na itubutubu me ra vakavulici ira na luvedra ena ivakavuvuli ni kosipeli

Au vakabauta ni sega ni dua na kena cala kevaka au kaya ni nona gagadre bibi duadua e dua na Yalododonu Edaidai sai koya me ra tubu cake na luvena ena veikaroni kei na veivakasalataki ni kosipeli, muria na ivakaro ni Kalou, me rawa kina ni ra vakabulai ena Nona matanitu. Kevaka me a dau bucini tiko ena nona vakasama e dua na gone na veika lasu kei na ka dukadukali ena nona bula taucoko sa dua na ka lialia me da vakasamataka, ni da na tamusuka na vua ni ka dina ena gauna vata ga eda bucina kina e dua na sore ni dina. …. Eda na okata e dua na dauteitei me dua na tamata lialia kevaka ena sureti ira na tamata kecega era lako sivita na nona iteitei me ra kaburaka e so na sore ni co ca, kevaka me na yaco tiko vakakina ena loma ni ruasagavulu kadua na yabaki, ka me qai namaka me na rawa ni kaburaka na itei ni sila ka namaka me tamusuka na vuana vinaka.

Au na kila beka na fika ni vakalevutaki ka, ka na kila tale beka ga na watiqu, ia ena sega ni rawa vei au meu namaka kina me ratou na sucu mai na luvequ ka tu ena nodratou qavokavoka na fika vakalevutaki ka. Au na kila beka ni dina na kosipeli, ka na kila tale beka ga vakakina na watiqu; ia ena sega ni rawa niu raitayaloyalotaka ena dua na gauna me ratou na sucu mai na luvequ ena kila ka vata oqori. Eda na rawata na ivakadinadina ni kosipeli ena noda talairawarawa ki na lawa kei na cakacaka vakalotu e salavata kaya; ka ra na rawata talega na luveda ena salavata sara ga oqori; ka ni kevaka eda sega ni vakavulici ira, ka ra sega ni lako ena gaunisala dodonu ka qiqo ka gole ki na bula tawamudu, era na sega sara ni rawata na kila ka oqo. Au sa dau rogoca eso ni ra kaya ni ra sucu mai na luvedra ka vakaivotavota ki na yalayala ni veiyalayalati vou ka tawamudu, ni ra na tubu cake mai, ka veitalia na veika era cakava, era na kila na kosipeli. Au vinakata meu tukuna vei kemuni ni sega ni ivakavuvuli dina oqori, ka rau veisaqasaqa sara ga vakadodonu kei na ivakaro ni Tamada Vakalomalagi. Eda raica kina ni sa soli sara ga vakadodonu vei ira na Yalododonu Edaidai me nodra itavi, ka sega tale ni kerei vei ira, ia me vaka e dua na lawa ka dodonu me ra vakavulica vei ira na luvedra:

“Raica ko ira na itubutubu mai Saioni se ena dua na [iteki] sa tauyavutaki tu, me ra vakavulici ira na luvedra ni ra sa yabaki walu; io na ivakavuvuli ni veivutuni, na vakabauti Jisu Karisito na Luveni Kalou Bula, na papitaiso kei na isolisoli ni Yalo Tabu ena veitabaki ni liga; ia kevaka e sega, era na cudruvi kina.

“Raica oqo na ivakaro vei ira na lewei Saioni, se ena dua ga na nona iteki sa tauyavutaki tu;

“Ia me ra papitaiso na luvedra ni ra sa yabaki walu, me bokoci kina na nodra ivalavala ca; io era na vakalougatataki ena veitabaki ni liga,

“Ia me ra vakavulici ira talega na luvedra me ra dau masu, ka caka dodonu ena mata ni Turaga.” [V&V 68:25–28].

O ira vakayadua na tama ka ra dau lomana na kosipeli era sa na tu vakarau me ra lakosivia na veika kecega me rawa kina ni ra vunautaka, ka sa dua vei ira na ka rekitaki duadua vua e dua na tamata sai koya na nona kauta mai e dua na yalo me kila na dina. Sa dodonu me dua na ka rekitaki vakalevu cake vei keda na noda tuberi ira na luveda ena ituvatuva ni veivakabulai.⁷

E dua vei ira na nona ivunau taumada vei Atama vata kei Ivi, e kaya kina na Turaga: “Drau vakaluveni ka tubu me lewevuqa ka vakatawai vuravura.” [iVakatekivu 1:28.] Sa tokaruataka na ivakaro oqori ena noda gauna oqo. Sa vakatakila tale ena gauna oqo, na iotioti ni tabagauna, na ivakavuvuli ni tawamudu ni veiyalayalati ni vakamau. Sa vakalesuya tale mai ki vuravura na dodonu me curumi rawa kina na veiyalayalati oqori, ka sa tukuna talega ni sa ikoya duadua ga oqori na ivakarau dodonu ni nodrau semati e rua me rau veiwatini, ka sai koya duadua talega oqori na sala ena rawa kina me lako sivita na ibulubulu ka yacova yani na tawamudu na veiwekani tabu vakamatavuvale oqo. Sa tukuna talega o Koya ni veiwekani tawamudu talega oqo ena rawa ga ni tauyavutaki ena veicakacaka vakalotu ka qaravi ena valetabu ni Turaga, ka sa dodonu kina me ra vakamau duadua ga na Nona tamata ena Nona valetabu me vaka na veicakacaka vakalotu oqo.

Sa tukuna vei keda na Turaga ni sa nodra itavi na tagane kei na yalewa vakawati yadua me ra muria na ivakaro ka a soli vei Atama me tubu ka lewe vuqa ka vakatawai vuravura, me rawa kina vei ira na lewevuqa na yalo digitaki ka ra waraka tu na yagodra vakalewe me ra lako mai ki ke ka mai toso ki liu ena ruku ni nona ituvatuva cecere na Kalou me ra yaco kina me ra uasivi sara, ka ni kevaka e sega na yago oqo era na sega ni rawa ni yacova na vanua e vakarautaka tu na Kalou me baleti ira. Oqori na vuna sa dodonu kina vei ira na tagane kei na yalewa vakawati yadua me ra yaco me tama ka tina e Isireli vei ira na gone ka ra sucu ena loma ni veiyalayalati savasava ka tabu oqo.

Ena nodra vakasucumi mai ki vuravura na veiyalo digitaki oqo, era sa rorova yani kina na tama kei na tina vakayadua na yalo vakavale ka vakakina na Turaga sara ga vakataki koya ena nodra sa vakayagataka na gauna vinaka e solia tu mai o Koya, e dua na icolacola ena kena mataqali tabu sara, me baleta na veika ena sotava na yalo oqori ena tawamudu sa bera mai, na veivakalougatataki kei na itotogi ka na waraka tu mai na bula ni oti eke, ena vakatau, vakalevu cake, ena veikauwaitaki, na veituberi ka ra na solia na itubutubu ki na yalo oqori.

E sega ni dua na itubutubu me na drotaka rawa na icolacola kei na itavi oqori, ka na tarogi keda na Turaga me baleta na kena qaravi vakavinaka na itavi se na icolacola oqo. Oqo na itavi cecere duadua e rawa ni vakaitavitaki koya kina e dua na kai vuravura.

Ena vuku ni ka oqo sa yaco kina me dua na veikacivi tabu na itavi vakatina, e dua na yalodina cecere ena kena vakayacori na nona ituvatuva na Turaga, e dua na yalodina tabu ena kena susugi ka karoni na yago, vakasama, kei na yalodra o ira era a yalodina ena bula taumada ka ra sa lako mai ki vuravura me ra mai bula ena bula oqo ka raica kevaka “se era na muria na veika kece sa vakarota vei ira na Turaga na nodra Kalou se sega.” [Eparaama 3:25.] Me mai rawa na bula oqo sa itavi vakatina, ka ni “ko ira sa yalodina ena bula oqo, era na rawata na lagilagi e vakaikuritaki me tawamudu ka tawamudu.” [Eparaama 3:26.] …

Na bula vakatina sa voleka sara ki na bula vakalou. Sai koya oqo na veiqaravi cecere ka savasava duadua e rawa ni vakayacora na tamata. Ena biuti ira era rokova na kena kaci me ra taravi ira sara ga yani na agilosi. Kivei kemuni na tina e Isireli keimami kaya ga me vakalougatataki kemuni ka taqomaki kemuni na Kalou, ka me solia vei kemuni na kaukauwa kei na yaloqaqa, na vakabauta kei na kila ka, na loloma savasava kei na veivakatabui ki na itavi, ka na rawa kina vei iko mo rawata vakavinaka ki na kena ivakatagedegede cecere duadua na itavi tabu e nomu. Kivei kemuni na tina kei kemuni sa vakavakarau tiko mo ni tina keimami kaya: Mo ni savasava tikoga, ni bula dodonu, me ra vosavakalougatataki iko kina na nomu kawa.⁸

Au sa dau rogoci ira na turaga kei na marama era dau kaya ni ra na laiva me ra sa matua na luvedra ka ra qai vakavulici ira ena ivakavuvuli ni kosipeli, me ra kakua mada ni usumaka yani vei ira na kosipeli ena nodra gauna ni gone, ni se bera ni rawa ni ra kila. Niu rogoci ira na turaga kei na marama ni ra kaya vaqo, au vakabauta ni se lailai ga na nodra vakabauta na ivakavuvuli ni kosipeli ka ra sega soti ni kila vinaka na kosipeli me vaka na kena ivakarau e dodonu vei ira. Sa kaya na Turaga ni sa noda itavi me da vakavulici ira na luveda ena nodra gauna ni gone, ka vinaka cake vei au meu vakabauta kina na Nona vosa, mai na nodra vosa o ira era sega tiko ni muria na Nona ivakaro. Sa ka lialia sara kevaka me da nanuma ni ra na tubu cake na luveda ka kila na kosipeli ni ra sega ni vakavulici kina. Eso na turaga kei na marama era dau veibataka, “O au, au Yalododonu Edaidai, keirau a vakamau ena valetabu, keirau a vauci ena icabocabo ni soro mai vua e dua ka tu vua na Matabete ni Kalou me vaka na veiyalayalati vou ka tawamudu, sa dodonu kina me ra na tubu cake na luvei keirau me ra Yalododonu Edaidai vinaka; era na sega ni rawa ni cakava kina e dua na ka, ni a sucu mai vata kei ira.”… Au vinakata meu tukuna vei kemuni ni ra na sega ni kila na luveda ni dina na kosipeli, vakavo kevaka era vulica ka rawata vakataki ira e dua na kena ivakadinadina. Era sa lasutaki ira tikoga na itubutubu kevaka era nanuma tiko ni ra na sucu mai na luvedra vata kei na kila ka vakosipeli. E dina sara ni na cecere cake na veika e rawa ni nodra me vaka ni ra sucu mai ena loma ni veiyalayalati vou ka tawamudu, ka na sega ni ka vou vei ira na nodra susugi cake ka qarava na nodra itavi; ia sa kila tu na tevoro na veika oqo, oqori na vuna sa na qai kaukauwa cake ga kina na nona sasaga me kauti ira tani na luveda mai na dina.⁹

Au masuta me na solia na Turaga vei ira na nodra itubutubu na itabagone me ra kila ka dau kauwaitaka na veika rerevaki kei na veitemaki ena tadravi ira tu na luvedra, me rawa kina ni ra vakauqeti me ra dau vakayaloqaqataki ira na luvedra, me ra dusimaki ira, me ra vakavulici ira me ra bula ena kena ivakarau e gadreva na Turaga.¹⁰

Na cava beka eda cakacakataka tiko? Na iyau? Kevaka eda sa ciqoma na kosipeli i Jisu Karisito, ia eda cakacakataka tiko na bula tawamudu. Eda sa cakacaka tiko me da vakabula na yaloda. Ia ni da sa vakabula rawa na yaloda eda sa cakacaka tiko me da vakabula na yalodra na luveda … au via tukuna ni isolisoli vinaka duadua e rawa ni o biuta tu mai vei ira na luvemu sa ikoya e dua na ivakadinadina tudei me baleta na matanitu ni Kalou.¹¹

Era na dau vukei ira na itubutubu ena nodra vakavulici na luvedra o ira na iliuliu ni Lotu kei ira na qasenivuli.

Era sa veivuke tiko na nodra qasenivuli na luveda vei ira na ituubutubu ena kena tarai cake na nodra bula na luvedra. Sa ka cecere sara na nodra itavi, ka vakatalega kina na veika era na tarogi kina, me baleta na veika kece sara era na vakavuvulitaka.¹²

E sega tale ni vakabekataki ni veika e dau volai ki na nodra vakasama savasava na gonelalai kei ira na gonetagane kei na goneyalewa e dau mana sara vakalevu ki na nodra bula ena veigauna mai muri na kena yaga me vakatauvatani ki na veika era dau kila ena dua tale na gauna ni nodra bula. Na kena ivakatautauvata e vaka na volavola ena dua na draunipepa vulavula vinaka ka sega ni dua na ka me tabonaka se me vakaseseya na veika o vola.

E vuqa talega era tu ka ra dau cakava na veika cecere ena nodra bula, e dina ga ni ra a dau cakava na veika ka sega ni vinaka ena matana na Tamada Vakalomalagi, se me baleta na nodra vinaka vakataki ira ena nodra gauna ni gone; ia ena vinaka cake sara kevaka ena rawa vei keda me da tekivutaki ira na gone ena ilakolako dredre ni bula, ka me savasava vinaka tu na veidraunipepa ni nodra veiyabaki, ka me kune ga kina na veicakacaka vinaka kei na veivakanananu ka na tara cake na vakabauta. Me vaka e dua na ivosavosa ka kaya “Ni se gone ga na kau se rawa ni loveci” Oi kemuni o ni vakavulici ira na luveda o ni sa okati ena cakacaka ni kena loveci na kau. …

E sega ni dua na tubu e rawa ni rawata e dua na tamata mai na dua na sea, se ena dua tale na ka me baleta na iyau vakavuravura, ka rawa ni vakatauvatani kei na nona kila e yalona e dua ni sa dua o koya na iyaya ni cakacaka ena ligana na Turaga ena kena tarai e dua na bula me vinaka; kau rawa ni yalataka vei ira na qasenivuli buladodonu ni itabagone ni ena kena sa toso tiko na veiyabaki era na rawata na veivakalougatataki kei na vakavinavinaka mai vei ira na gone ka ra a vakayagataki kina o ira me ra iyaya ni cakacaka ena ligana na Kalou ena kena tarai me vinaka. …

Eda na nanuma beka ni veivakauqeti eda dau cakava ena sega sara ni dede na kena mana, ia au rawa ni vakadeitaka vei kemuni ni vakakina. Au kila deivaki ni ivakadinadina e wasea e dua na qasenivuli vei ira na gonelalai, ena Nona veivakauqeti na Kalou bula, sa na ka dredre sara me ra guilecava. …

O ira vakayadua sara na noda qasenivuli sa tu vei ira na veigauna vivinaka kei na kaukauwa ena ruku ni nona veivakauqeti na Yalo ni Kalou, me ra veivakauqeti ki na yalodra kei na lomadra na gonelalai savasava kei ira na gonetagane kei na goneyalewa ka ra se qai tekivu sotava na veika dredre ni bula. Sa noqu masu mai vu ni yaloqu ni na vukei kemuni na Kalou ena nomuni cakacaka; ka rawa niu yalataka vei kemuni ni na vukei kemuni o Koya. Na ka bibi ga sai koya mo lomana na nomu cakacaka ka qarava ena veivakauqeti ni Yalo ni Kalou bula.¹³

Ena [dua] na koniferedi ni Wilivola ni Sigatabu …, keimami a tiko kina ena dua na soqoni lagilagi duadua beka meu qai tiko kina. Eratou le vica a soli vei iratou e tauya va na miniti me ratou vosa kina, ka ra sa va na miniti sara ga ni vakasama momona. Na veika era vakabibitaka o ira kece era vosa ena ulutaga, “Na Gagadre ni Noda Wilivola ni Sigatabu, ” e sega ni kena gadrevi e levu na ivakarau ni veivakavulici, me levu cake na ka oqo, na ka oya, se na veika tale eso. Ia na gagadre cecere duadua, sa ikoya me levu na Yalo ni Turaga e yalodra na qasenivuli, me rawa ni ra solia kina na yalo oqori vei ira na gone.¹⁴

Era dau vuli na gone mai na nodra ivakaraitaki na nodra itubutubu kei na qasenivuli.

E rawa beka ni da na nuitaka me ra na tubu cake na noda lalai ena ivakavuvuli ni kosipeli kevaka eda sega ni vakavulici ira ena noda ivakaraitaki? Au sega ni vakabauta ni rawa vei keda, mai na dua na malanivosa ni vakabauta, me da na vakadeitaka kina e yalodra na luveda na dina ni Kosipeli; sa dodonu me salavata na noda bula kei na veika eda vakabauta ni dina.¹⁵

Au kaya vei ira na itubutubu, vakasaqara na Yalo ni Kalou. Vakauqeta na nodra vakanananu na luvemu ena bula vakarokoroko, yalomalua ka rawarawa o bulataka tiko.¹⁶

E isolisoli ni Kalou na vakabauta. Ni da vakasaqara na vakabauta ena vakalougatataki keda na Turaga ena vakabauta oqori. Sa yaco kina me iloloma mai Vua, ka ni sa yalataki vei keda ni kevaka eda na cakava na lomai Tamana eda na kila na ivunau [raica na Joni 7:17]. Kevaka eda na cokonaka na noda bula ena noda itutu vakaitubutubu ka me ra kila kina e yalodra na luveda ni da sa Yalododonu Edaidai dina sara, ni da kila na veika eda tukuna tiko, ena yaco me ra na rawata na ivakadinadina vata oqori ena nodra vakasaqara na Turaga.¹⁷

Au sega dina ni kila e dua na ka me baleta na ivakasala vakatama baleta ni a mate na tamaqu niu se gonelailai sara, ia au a vulica na veika me baleti koya mai vei ira e so tale na tamata. Era vakadeitaka vei au na tamata ni a dua dina na tamata cecere ena Lotu oqo o Jedediah M. Grant.

Au nanuma lesu ena dua na gauna au a kerei Kavetani William H. Hooper kina me sainitaka vei au eso na ivola vakadinadina ni dinau, niu se qai yabaki ruasagavulu ka tekivuna tiko e dua na bisinisi.

E qai kaya vei au: “Au sega ni dau cakava vakaoqori; au sega ni dau cakava vakaoqori.”

E voleka ni se bera mada ga niu yaco ki noqu valenivolavola sa yaco yani e dua na daukauitukutuku mai na baqe ka kaya ni via raici au na kavetani.

Au kaya: “Au sega ni via raici koya.”

“Ia, e kaya mai meu mai kauti iko yani ki na baqe.”

Au a lesu tale, ka qai kaya mai: mai tagane solia mai na ivolavakadinadina ni dinau oqori.” Au vakayacora vakakina, ka sainitaka sara o koya. Oti sa qai kaya: Ni ko sa curu ki tuba au vuki vei Mr. Hill ka kaya, ‘Lew, o cei na cauravou oya? Sa vica mai na yabaki oqo na nona dau kidavaki au tiko e gaunisala. Au sega ni kilai koya. Au sega ni dau sainitaka na ivolavakadinadina ni dua na tamata au sega ni kila. O cei o koya? E kaya, ‘Baleta na cava oya na nona cauravou o Jeddy Grant, o Heber J. Grant.’ ‘Nona cauravou o Jeddy Grant? Kauti koya lesu mai. Au na sainitaka na ivolavakadinadina o ya kevaka sara mada ga au kila niu na sauma na dinau.’”

Au kaya tiko na [veika oqo] ena vakanuinui ni ra na kila na itubutubu ni ivakaraitaki ni bula dokai, ni yalodina, ni dinata na kosipeli, kei na ivakarau ni bula ka sega ni dau veidusi, ia me dau cakacaka vagumatua ena veigauna kecega me tosoya tiko na dina, sa dua na isolisoli vinaka me ra biuta koto mai vei ira na luvedra.¹⁸

A tukuna o [Kavetani Hooper] eso na italanoa me baleti tamaqu ka vakaraitaki kina na nona loloma na kavetani, ka vakakina na nona yalodei ena vukuna.

E vakasinaiti na yaloqu ena vakavinavinaka ena vuku ni veika e tukuna vei au na kavetani me baleti tamaqu, kau sega vakadua ni bau guilecava na veika e tukuna vei au o Kavetani Hooper. E vakauqeti au ena dua na gagadre kaukauwa meu bula ka cakacaka me rawa kina ni na yaga vei iratou na luvequ, ena gauna sara mada ga au sa na toki yani kina mai na bula oqo, na ivakarau ni bula au bula kina.¹⁹

E vinaka cake vei au meu mate ena dravudravua kau kila ni sa rawa me ratou na vakadinadinataka na noqu matavuvale, niu sa dau tovolea vakaukauwa ena kaukauwa taucoko sa vakalougatataki au kina na Kalou, meu rokova na Nona lawa ka muria na Nona ivunau, kau sa dau vunautaka na kosipeli, mai na noqu itovo, mai na rawata na iyau kecega e vuravura.²⁰

Vakatutu ni Vuli kei na Veivosaki

Na cava e rawa ni da cakava me da vakauqeta kina vei ira na gonelalai kei ira na itabagone na veika dodonu?
Na cava e rawa ni ra vakayacora na itubutubu me ra vakavulici ira kina na luvedra me ra talairawarawa ki na lawa kei na cakacaka vakalotu ni kosipeli? Na cava e rawa ni ra vakayacora na itubutubu me ra kaciva kina na veivakalougatataki ni Tamada Vakalomalagi vei ira na luvedra?
Na cava na vuna era dau lakosese ga kina na gone, e dina ni ra sasaga tiko na nodra itubutubu me ra vakavulici ira ena kosipeli? Na cava e rawa ni ra cakava na itubutubu kei ira tale eso me ra vukei ira kina na gone era dau lakosese?
E kaya o Peresitedi Grant vei ira na itubutubu, “Na isolisoli vinaka duadua e rawa ni o biuta tu mai vei ira na luvemu sa i koya e dua na ivakadinadina tudei me baleta na matanitu ni Kalou.” Na cava na kena ibalebale vei iko oqo?
E rawa vakacava ni da vukei ira na gone me ra kila na veiuqeti ni Yalo Tabu?
Na veivakalougatataki cava soti e sa basika ki na nomu bula ena nomu vakatavulici ira na gone kei ira na itabagone ena Lotu.
Na cava e bibi kina vei ira na itubutubu me ra kila ni ra kacivi ga na iliuliu ni Lotu kei ira na qasenivuli me ra vukei ira ena nodra vakavulici na luvedra?