iVakamacala Taumada
Eratou sa tauyavutaka na Mataveiliutaki Taumada kei na Kuoramu ni Apositolo Le Tinikarua na veivola e so ena Nodra iVakavuvuli na Parofita ni Lotu-me vukei ira na lewe ni Lotu me titobu na nodra kila ka ena ivakavuvuli ni kosipeli ka toro voleka yani vei Jisu Karisito mai na nodra ivakavuvuli na parofita ni itabagauna oqo. E lewe ni ivola oqo na ivakavuvuli nei Peresitedi Heber J. Grant, ka a veiqaravi vaka Peresitedi ni Lotu i Jisu Karisito ni Yalododonu Edaidai mai na Noveba ni 1918 ki na vula ko Me ni 1945.
Era na vakalougatataki na Yalododonu Edaidai ena nodra vakayacora ena nodra bula na ivakavuvuli nei Peresitedi Grant. E vakabibitaka o koya: “Ni sega ni dua na ivakatagedegede levu ni kila ka, na veivakauqeti kei na ivakadinadina me na yaga sara vei keda me vaka na veicakacaka va-Kalou, vakavo walega kevaka eda vakatovotovotaka na kila ka oqori ena noda bula ni veisiga. E sega ni yaga vua na tamata kei ira na nona itokani na levu ni ka era kila; ia ena yaga sara kevaka era cakacakataka na kila ka oqori.”1
Na Kena Vakayagataki na iVola Oqo
E va na iwasewase ni veiwase ni ivola yadua: (1) na itekivu ni ivakamacala e vakamacalataki kina vakamatailalai na inaki ni iwase ni ivola; (2) “Ena Bula nei Heber J. Grant, ” e vakamacalataki kina na itukutuku ena wase ni ivola ka tukuni kina e dua se vuqa na ka e yaco ena bula nei Heber J. Grant; (3) “iVakavuvuli nei Heber J. Grant, e tu kina na ivunau mai vei Peresitedi Grant kei na veika e vola kei na itukutuku ni Mataveiliutaki Taumada ena gauna e se Peresitedi kina ni Lotu; kei na (4) Vakasama me Vulici ka Veivosakitaki, ” ka tu kina na taro me vakayaloqaqataki kina na lomatarotaro ni tamata yadua, na taurivaki ni ivakavuvuli ni kosipeli, kei na veivosaki ena matavuvale kei na Lotu. Na wiliki ni taro ni vulici na vosa nei Peresitedi Grant ena vakaikuritaki kina noda raica nona ivakavuvuli.
Oqo na veivanua me vakayagataki kina na ivola:
Vulici Yadudua ka Vulici Vakamatavuvale. Eda na rawata yadudua na ivakadinadina ni dina na veika e vakatavulica ko Peresitedi Grant ena noda masulaka ka vulica vagumatua. Na ivola oqo ena kuria na nomuni kila ka ena kosipeli ka na okati talega me dua na ivurevure bibi ni ivakaro ki na matavuvale kei na vuli ena itikotiko.
Veivosaki ena Soqoni ni Sigatabu. Na ivola oqo me vakayagataki ena soqoni ni Sigatabu e na iSoqosoqo ni bete levu, kuoramu ni qaselevu, kei na iSoqosoqo ni Veivukei, oqori ena veikarua kei na ikatolu ni Sigatabu ni veivula yadua. Na soqoni ni vei Sigatabu oqori e dodonu me veivosakitaki kina na ivunau kei na ivakavuvuli ni kosipeli. Me ra vakanamata na qasenivuli ena lewe ni ivola ka vukei ira na lewenilotu me ra taurivaka na ivakavuvuli oqo ena nodra bula. Me ra tomitomi mai na qasenivuli ena veitaro e so ena mua ni veiwase yadua me vakauqeti kina na veivosaki vakalasi. Me ra cavuta nodra ivakadinadina o ira na lewenilotu ka ra wasea na veika era dui sotava ka salavata kei na lesoni. Ni ra vakasaqara na Yalo Tabu o ira na qasenivuli ena yalomalumalumu ena nodra vakavakarautaka ka veivakavulici ena lesoni, ena vakaukauwataki kina na nodra kila ka dina o ira kece era vakaitavi.
Me ra veivakayaloqaqataki o ira na iliuliu kei ira na qasenivuli vei ira na lewenilotu me ra wilika mai na wase ni ivola me ra na vakarau mai kina ena soqoni ni Sigatabu ka me ra dau kauta mai nodra ivola ki valenilotu. Me ra rokova na nodra vakavakarau vakaoqori ena nodra veivakavulici mai na vosa nei Peresitedi Grant. Ni ra sa dau wilika toka mai e liu na lewenilotu na wase ni ivola, era sa na vakarau toka mai me ra veivakavulici ka veivakatataki cake vakaiira.
E sega ni gadrevi se vakaturi me ra volia na lewenilotu e so tale na ikuri ni itukutuku e so me tokona na lewe ni lesoni ena ivola oqo. Era sa vakauqeti na lewenilotu me ra na goleva ga na ivolanikalou me vakuri kina na vulici ni vunau.
Me vaka ni inaki ni ivola oqo me ka ni vuli yadua kei na idusidusi ni kosipeli, e vuqa na wase ni ivola e tu kina e levu sara na tikina ka na sega ni rawa me tarai kece sara ena soqoni ni Sigatabu. O koya gona, e dodonu kina me ra vulica yadudua mai vale me rawa ni na yaga vakalevu sara kina na ivakavuvuli nei Peresitedi Grant.
iVurevure E so e Cavuti Tiko ena iVola oqo
Na ivakavuvuli nei Peresitedi Grant ena ivola oqo e tauri mai ena vica na ivurevure. E sa vakatakilakilataki tiko na veivosa cavuti e so, na kena ivolavolai, ka vakamata ni vola levu na vosa ka cavuti mai na ivurevure e so, vakavo ke veisautaki na kena ivolavolai me salavata na kena tabaki me matata cake kina ni wiliki. Oqo na vuna, ena laurai kina e so na duidui lalai ena ivola oqo.