Wase 3

Lako ena Sala ka Basika ki na Bula Tawamudu

Ena noda saga vakaidina me da bulataka na kosipeli ka vakavolivolita na noda bula ena veika vakalou, eda na tiko vakacegu ena sala ka basika ki na bula tawamudu.

Na Bula nei Heber J. Grant

Ena nona vosa ena koniferedi raraba, e uqeti ira vakavuqa na Yalododonu ko Peresitedi Heber J. Grant me ra tikoga ena sala dodonu ka rabailailai sa basika ki na bula tawamudu. E a vakaroti ira ena kena rerevaki na biu vakatani ni veika e dodonu me taumada ka da vagolei tani mai na veika ka ra cecere na kedra bibi. “E rawa ni da tarovi keda mai na veivakalougatataki ni Turaga ena noda tatakube vagumatua ki na veika ni vuravura oqo, ” e a kaya. “E rawa vei keda me da biuta na iyau ka tawamudu—ki na veika e sega na betena me vaka na dola kei na sede.”¹

Me ivakaraitaki ni bibi ni noda raica ka qara na veika ka tawamudu, e tukuna wasoma kina ko Peresitedi Grant e dua na marama yalodina ka Yalododonu Edaidai ka dau nanuma ni dau kauta tiko ko koya e dua na kato tuberi “rairai ca.” E dau nuitaka me dua me solia vua e dua na “kato maqosa ka rairai totoka.” Na ka e sega ni kila ni kato tuberi oqo nei Peresitedi Grant e sau levu sara ka soli vua mai vei ira na nona itokani vakabisinisi me ivakaraitaki ni nona dokai. “E sega ni kila na kena talei, ” e vakamacalataka ko Peresitedi Grant. E veibasai, na mataqali kato tuberi e vinakata e tu sara e ra na kena bibi. E vakatautauvatana ko Peresitedi Grant na “nanuma cala ni veika” ki na ivakarau ni nona sega ni raica rawa ko vuravura na dina ni kosipeli vakalesui mai. “Era sega ni kila na dina, ” e a kaya. “Era sega ni kila na talei ni kosipeli i Jisu Karisito.”²

E vakatavulica ko Peresitedi Grant: “Na cava na kosipeli? Sa ikoya na yavu ni bula kei na veivakabulai. Sa ikoya ka bibi na kena talei mai na bula vakaikoya. Sa rauta ni da sa vakarau tu me da solibula ki na kosipeli, ni da vakila na cava na kena ibalebale me da bulataka.”³ Oqo e a nona idusidusi ni vakavuvuli, ena nona bula. Dina ni vuqa na ka e rawata ka taleitaka, e sega ni vakatara na veika e lailai sobu na kena bibi me vakataotaka na nona raica na veika ka bibi cake. Dua na kena ivakaraitaki, na nona buta vinaka ena bisinisi e vakavuna na nona dokai ena vuqa na sasaga kilai levu. E taleitaka na vakaitavi ena veisisivi qito, vakausivi ena tenisi kei na golf. E dau vinakata na theatre kei na opera. E taleitaka na veisoqoni ni lasa. E vakaitavi ena politiki. E veilakoyaki vakayawa ena nona itavi ena Lotu kei na bisinisi, ka ratou taleitaka vakavuvale na veivanua vovou kei na veika eratou sotava. Ena vuku ni nona dina kei na veiqaravi, e a soli kina vua e vuqa na icocovi. Ia na nona ogaoga, dokai, kei na rawa ka e sega ni kauti koya tani mai na sala ka basika ki na bula tawamudu.

Na nona ivakasala baleta na lako ena sala dodonu ka qiqo sa ikoya na dina. E vakavulici ira na Yalododonu me ra kitaka na nodra itavi—me ra muria na ivakaro. E a kaya: “Au tukuna vei ira kece na Yalododonu: muria na ivakaro ni kalou. Oqori na noqu usutu—e vica ga na vosa oqo: muria na ivakaro ni Kalou.”⁴

iVakavuvuli nei Heber J. Grant

Kevaka eda lomana na Turaga, na inaki levu ni noda bula me da qaravi Koya ka muria na Nona veivakaro.

Eda kunea ena wase 22 ni Maciu na veika oqo:

“Ia ni ra sa rogoca na Farisi ni sa vagalui ira na itokani i Setoki ko koya, era sa qai soqoni vata

“A sa dua vei ira, e dua na vu-ni-vunau, sa tarogi koya, ni sa vakatovolea, ka kaya,

“Vakavuvuli, a cava na ivakaro levu e na vunau?

“Sa kaya vua ko Jisu, Mo lomani Jiova na nomu Kalou ena lomanu taucoko, kei na yalomu taucoko, kei na nomu nanuma kecega.

“A imatai ni vunau oqo ka levu

“A sa tautauvata na kena ikarua, Mo lomana na kai nomu me vaka ko lomani iko.

“Sa vu ni vunau taucoko kei ira na parofita na vunau e rua oqo.” [Maciu 22:34–40.]

Na dede ga ni noqu bula, na levu ni noqu vulica na kosipeli, na levu ni noqu veitaratara kei ira na tamata, na levu ni noqu kaukauwa niu taleitaka na dina ni Nona vosa na noda iVakabula ena vosa kau se qai wilika walega oqo vei kemuni. Kevaka eda lomana dina na Turaga na noda Kalou ena yaloda taucoko, kei na noda vakasama taucoko, kei na lomada taucoko, ena sega ni gadrevi me vakauqeti vakawasoma vei ira na tamata na bibi ni kena muri na ivakaro ni Turaga. Ena ka taleitaki vei ira me ra qarava na Kalou ka muria na Nona ivakaro. E tukuni vei keda ni vanua e tiko kina na iyau ni dua na tamata, sa tiko talega kina na yalona [raica Maciu 6:21], ia kevaka eda lomana na Turaga ena yaloda taucoko kei na vakasama kei na lomada, na qaravi Koya ena ka levu duadua ena noda bula, ia na iyau eda na cakacakataka me da taukena sa ikoya na Nona loloma. Kevaka me da muria na ikarua ni vakaro ko ya, mo lomana na kai nomu me vaka ko sa lomani iko, … na noda leqa ena vakavinakataki. …. ena voleka sara me sega na betena na kerea na tamata ena veivuke vakailavo, me ra uqeti me ra galala, me ra dau solisoli, me ra sasagataka na nodra tiko vinaka na wekadra.⁵

Ena noda muria na ivakaro, na Turaga ena qai vakalougatataki keda ka vukei keda ena noda cakacaka.

E tukuni vei keda ni na vakabauta kevaka sa sega ni tu vata kei na cakacaka sa mate ga; me vaka sa mate na yago ni sa takali na yalo, sa mate vakakina na vakabauta ni sa takali na cakacaka [raica Jemesa 2:17, 26], ka sa ka ni rarawa vei au me’u kaya ni vuqa era tukuna ni ra Yalododonu Edaidai era sa mate tu vakayalo.

Vuqa na gauna eda tarogi keda, na cava e toso kina na tamata oqo ena yavu ni bula kei na veivakabulai, ia ko koya na nona itokani, tautauvata na nodrau kila ka kei na kaukauwa, ka tautauvata na nodrau ivakadinadina kei na kaukauwa, ka rairai levu cake na nona kaukauwa, e sega ni toso? Au na tukuna vei kemuni na vuna. E dua e muria na ivakaro, ka dua e sega ni rawata me muria. E tukuna na iVakabula ni ko koya sa muria na Nona ivakaro sa lomani Koya, ia ko koya sa muria na ivakaro ni Kalou ena lomani koya na Tamada, ka tukuna na iVakabula ni na lomani koya, ka vakatakilai Koya vua [raica Joni 14:21].

E tukuna talega vei keda na Turaga ni ko ira era rogoca na Nona vosa ka kitaka era na vakatautauvatani kei na tamata vuku sa tara na nona vale ena dela ni vatu, a sa tau mai na uca, ka coka mai na dobui, ka liwa na cagi, ka tabaka na vale ko ya, a sa sega ni bale, ni sa tauyavutaki ena dela ni vatu. Ia ko koya yadua sa rogoca na noqu vosa oqo, ka sega ni cakava, ena vakatautauvatataki kei na tamata lialia, sa tara na nona vale ena dela ni nuku, a sa tau mai na uca, a sa coka mai na dobui, ka liwa na cagi, ka tabaka na vale ko ya, a sa bale kina, ia sa ka levu na kena bale. [Raica Maciu 7:24–27.] Ena lewe vuqa na Yalododonu Edaidaai era tara tiko na nodra vale e dela ni nuku. Era sega tiko ni vakayacora na ivakaro ni Tamada Vakalomalagi ka lako mai vei keda ena veigauna mai vei ira na Nona italai vakauqeti.

Ia, kevaka e tu vei keda na kosipeli (ka da kila ni tu vei keda), au kaya vei kemuni yadudua kei ira kece na Yalododonu Edaidai, ka ra gadreva me ra tubu ka vakalevutaki ena kosipeli, me ra muria na ivakaro ni Kalou. Ena noda vakamuria na ivakaro ni Kalou ka bulataka na bula vakalou, eda na sinai ena loloma cecere, dau vosota vakadede kei na loloma vei ira na wekada, ka da tubu ka toso cake ena ka kecega eda kitaka me da dokai ka vaka na Kalou. Ena noda talega na loloma kei na veivakabauti nodra o ira ka vakavolivoliti keda tu. Sa ikoya na kena qaravi na veika rawarawa, sega ni dredre, itavi ni veisiga ka da sotava ka na vakavuna na noda tubu ena yalo ni Kalou.⁶

Au marau vakalevu ena Kosipeli i Jisu Karisito ka sa vakaraitaki mai ena gauna oqo, kau sa gadreva vakaidina meu na rawata, vakakina vei ira na vo ni Yalododonu Edaidai, meu tuvana na noqu bula me kua kina ni vakabutobutotaki na noqu vakasama, me kua kina niu lako tani mai na dina, se voroka e dua na veiyalayalati au sa kitaka kei na Turaga. Au gadreva vakaidina meu kila na nanuma kei na lewa nei Tamaqu Vakalomalagi ka me tiko vei au na kila kei na kaukauwa ni roka ni bula meu rawa ni vakayagataka na kena vata ko ya ena noqu bula. E tu vei au na gagadre vata oqo me baleti ira kece na Yalododonu Edaidai. Au vakavinavinakataka vakalevu niu kila ni vakaivotavota vaka noda gugumatua, dina kei na yalomalumalumu ena kena muri na ivakaro ni Kalou, ena vukei keda ko Koya ena noda qaravi itavi, ka sa noda itavi yadudua me da qara vakaidina na Turaga ka vulica na Nona sala.⁷

Ena nona veitaqomaki loloma na Turaga na tamata kece ka bulataka na kosipeli i Jisu Karisito ena dua na gauna ena taura kina na ka talei ko ya ka kilai me ivakadinadina ki na tiki ni tawamudu ni nona bula, na ivakadinadina baleta na ilesilesi vakalou ni itavi eda kitaka tiko.

E sega ni dua na mata tamata me ra solibula me vakataki keda, ia vei keda e sega ni solibula ia e dua na gauna talei ka soli—na gauna talei soli ki na talairawarawa, na gauna talei ni curu ki na dua na cakacaka vata kei na Tamada mai Lomalagi ka rawati kina na veivakalougatataki digitaki ka yalataki vei ira era lomani Koya ka muria na Nona ivakaro.⁸

E sega ni dua na dredre me sega ni rawa ni rawai ni vakaro na Kalou ka da talairawarawa. … E a [tukuna] ko Nifai: “Niu kila ni sa dau vakarautaka na Turaga na sala me ra rawata kina na luve ni tamata na ka kece sa vakarota vei ira ko Koya.” [1 Nifai 3:7.] Me da kila tiko oqo kei na kena muri tiko ni ivakaro ni Kalou ena kauta mai vei keda na rarama kei na veiuqeti ni Yalona. Sa na qai yaco me gagadre ni yaloda sa ikoya me kila na nanuma kei na lewa ni Turaga, ka da na qai masuta na kaukauwa kei na kila me cakacakataki, o koya me ra qai muria na we ni yava ni noda Turaga ka iVakavuvuli ko Jisu Karisito.⁹

Ni da kitaka na noda itavi ka tubu ena vakabauta kei na ivakadinadina, ena sega ni rawa ni kauti keda vakatani na meca.

Sa vakarau tu na tevoro me vakamatabokotaka na matada ena veika ni vuravura oqo, ka na marautaka na nona butakoca vei keda na bula tawamudu, na isolisoli levu duadua vei ira kece na isolisoli. Ia e sega ni soli vua na tevoro, ka na sega vakadua ni soli vua na kaukauwa me vakabalea e dua na Yalododonu Edaidai ka muria tiko na ivakaro ni Kalou. E sega ni dua na kaukauwa e soli vua na meca ni yalo ni tamata me vakacacani keda kevaka eda vakayacora tiko na noda itavi. Kevaka eda sega ni dina vakaoti vua na Kalou, eda sa biuta sobu na bai, ka da sa vakacacana na tiki ni lalaga ka da viribaiti kina, ka na curu mai na tevoro. Ia e se sega mada ni dua na tamata me yali na nona ivakadinadina ni Kosipeli, sega ni dua na tamata ke vuki ki na imatau se ki na imawi, ka tu vua na kila ka baleta na dina, ka vakayacora tiko na nona itavi, ka vakamuria tiko na Vosa ni Vuku, ka sauma tiko na nona ikatini, ka rogoca tiko na kaci kei na itavi ena nona itutu kei na veikacivi ena Lotu.

E tiko e so ka ra dau taroga wasoma na nodra via kila se cava e vinakata vei ira na Turaga, ka vaka me ra lomalomarua ena tikina ko ya. Au vakabauta vakaidina ni ka ga e vinakata na Turaga vei iko kei au se dua tale na turaga se marama ena Lotu sa ikoya me da qarava vakavinaka na noda itavi taucoko ka muria na ivakaro ni Kalou.¹⁰

Tukuna maada mai vei au e dua na tamata ka qarava na nona bose ni kuoramu, ka vakayacora na nona itavi ena nona tabanalevu ka tiko kina, ka sauma vakadodonu na nona ikatini, kau na kunea vei iko e dua na tamata ka sinai ena Yalo Tabu ni Kalou ka tubu tiko ka rabailevu na nona ivakadinadina ni Kosipeli. Ena yasana kadua, qara mai vei au e dua na tamata ka sa raica na agilosi, ka sa yaco vua na veivakatakilakila totoka, ka sa raica na nodra vakasavi tani na tevoro, ka sa lako ki na icavacava ni vuravura ka vunautaka na Kosipeli, ia e sega tiko ni rawata me muria na ivakaro ni kalou, kau na qai kunea vei iko e dua na tamata ka dau vakalewa na ilumuti ni Turaga, ka qara cala ena veika e kitaka na Peresitedi, na vanua e lako kina, na cava e kitaka kei na nona cicivaka na Lotu. …

Ko ni na raica ni ko ira era sega ni dau qarava na nodra itavi, era na dau kudruvaka na ka e kitaka e dua, ka soli iulubale baleti ira vakaiira. Au se sega mada ni raica e dua na tamata ka vakamuria tiko na ivakaro ni Kalou me vakalewa e dua na ka me baleta na kena cicivaki na veika me baleta na Lotu. Na vakaweleweletaki ni itavi, sega ni maroroi na ivakaro ni Kalou, e vakabutobutotaka na vakasama ni tamata ka vakasukai na Yalo ni Turaga. E volai tu ena Vunau kei na Veiyalayalati “Sa rawa ni vakatakilai e vuqa na ka vua e dua na tamata ka soli vua na kaukauwa me vakayacora kina na cakacaka e veivakurabuitaki, ia kevaka sa boletaka ga na nona kaukauwa ka sega ni muria na ivakaro ni Kalou, ka sa muria ga na gagadre ni yalona, sa na bale vakaidina.” [V&V 3:4.]¹¹

Au sa rui yavavala ena noqu vakabauta o koya gona kevaka e dua na Yalododonu Edaidai e tukuna vei au ni kila ni vakaitavitaki koya tiko ena cakacaka ni Kalou, ni kila ni oqo na cakacaka ni Turaga, ni kila ni ko Josefa Simici e Parofita vakauqeti, ni kila ni ko ira ka ra veiliutaki ena Lotu era dauveiqaravi vakauqeti ni Kalou, ia ko koya na mataqali tamata vakaoqo e sega ni galeleta na veika rawarawa, itavi mamada ka vakavulici vua ena veisiga, veivula, veiyabaki—e sega ni levu na noqu vakabauta ki na mataqali tamata vakaoqo.¹²

E sega ni na leqa e dua na turaga se marama ka vakayali na nona vakabauta ena Lotu oqo kevaka e yalomalumalumu ka daumasu ka talairawarawa ki na itavi. Au se sega ni bau kila e dua me vakayali na nona vakabauta. Ena noda qarava na noda itavi ena vakalevutaki na vakabauta me yacova ni sa kila ka uasivi sara.¹³

Au sa raici ira na turaga ka ra vukitani mai na Lotu ka voleka ni ko ira kece au a raica ni lako tiko mai vakamalua vei ira na vukitani.

Ni ko tiko ena iyatu ni nomu itavi e vaka na tu ena mata ni dua na iyatu duru, ka ra yatuni vakadodonu tu na duru. Ia mo lako tani mai ena dua na ikalawa, ka na laurai ni vaka me ra sega ni yatuni vakadodonu na duru. Na yawa ni nomu toso mai na iyatu dodonu ko ya, na levu ni kena veve na iyatu duru. Sa ikoya na gaunisala dodonu ka qiqo ni itavi ka na kauti iko lesu tale kei au ki na iserau ni Kalou.¹⁴

Na ivakaro e vukei keda me da vakarau me da na tiko kei na Tamada Vakalomalagi.

Na Turaga, e kila na veika e vinaka vei kemuni kei au kei keda yadudua, e sa solia vei keda na lawa, kevaka eda muria, ena vukei keda me da ucuya vakalevu na Kalou, ena rawa ka vakaiyaragitaki ka vakarautaki keda me da lesu tale ka tikovata ena iserau ni Tamada vakalomalagi ka taura na veivakadonui lagilagi ko ya: “E vinaka, a tamata vinaka ka dina.” [Maciu 25:21.]

Sa ikoya oqori na ka eda cakacakataka tiko.

Eda tiko ena dua na koronivuli, vuli, vakaiyaragitaki, ka vakarautaki keda me rawa ni da kilikili ka rawa ni da lesu tale ka tiko ena iserau ni Tamada Vakalomalagi, ia na tamata ka tukuna ni kila ni dina na kosipeli ka qai sega ni bulataka, ka sega ni vakamuria na ivakaro ni Kalou. Na tamata oqori ena sega ni yacova na igu ko ya, na kaukauwa ko ya, na dokai ko ya, kei na galala ko ya ena Lotu kei na Matanitu ni Kalou ka na yacova kevaka e muria na lawa ni Kalou.¹⁵

Na sala vinaka duadua me muri sa ikoya na kena vakayacori ena veisiga na itavi e vinakati ena nodra yaco mai. Ena sala oqo e vakaicocovi kina na tamata ena nona lako tiko, ka lako ena sala ka basika ki na veivakabulai.¹⁶

Na rawa ka ena Nona rai na noda Dauveibuli e vuqa vakavuqa na gauna, eda raica e dau voleka ni veibasai sara ga ni ka e nanuma na tamata me baleta na rawa ka. Vuqa na gauna ena dusi yani e dua na tamata rawati koya ka sa levu na nona ilavo, ia e sega tu ni bau kauwaitaki se rawata vakacava na nona iyau se vakayagataka tiko vakacava, E rawa ni sa vakacacana na veika vinaka kece me baleti koya ka sa butakoci koya e na galala ni bulavata kei na noda Dauniveibuli ena bula ka lako mai ena nona vakatotolotaka na nona rawata na ka ni vuravura oqo ka sega ni tawamudu na kedra yaga. …

Me da kitaka kece na lewa ni Tamada mai lomalagi e dai, ka da sa na qai vakarautaki keda ki na itavi ni mataka, ka vakakina na tawamudu ka na lako mai. Kakua ni guilecava ni sa ikoya na mataniciva talei—na bula tawamudu—ka da cakacakataka tiko. O koya ga ka cakacakataka ka rawata ena tamata rawati koya.¹⁷

Kevaka me da vakadikeva na yavu ni bula kei na veivakabulai, ke da vakadikeva na ivakaro ka soli vei keda ni da lewe ni Lotu ni Kalou, eda na kunea ni ko ira yadudua na ivakaro ko ya era a soli me baleta vakatabakidua me rawa ni da vinaka sara, me rawa ni da vuli, me rawa ni da vakaiyaragitaki ka vakarautaki me da lesu tale ka tiko ena iserau ni Tamada Vakalomalagi. Na veitavi oqo kei na yalayala e a navuci me da vakakina na Kalou ena noda inaki. Ena navuci me da yaco me da Kalou, ka vinaka ka vakaiyaragitaki keda me da na yaco, me vaka e a yalataki ni rawa ni da yacova, me da itaukei vata kei na noda Turaga ka iVakabula ko Jisu Karisito ka tiko kei Koya ena iserau ni Kalou na Tamada Tawamudu ena veiyabaki sega ni wiliki rawa ni tawamudu.

Na inaki ni noda mai biu ena vuravura oqo me da mai cakacakataka na noda bula vakalou, me rawa ni da vakarautaki keda me da lesu tale ka tiko kei na Tamada Vakalomalagi ka Tamada, ena nona kila tu na cala kei na malumalumu ni tamata, sa solia vei keda e so na ivakaro me da muria, ia kevaka eda vakadikeva na ka e vinakati kei na veitavi ka soli mai vei keda eda na kunea ni veika kece oqori e baleta ga na noda tiko vinaka kei na toso ki liu. Na koronivuli ni bula ka da biu kina kei na lesoni ka solia vei keda na tamada ena kitaka me da tautauvata sara ga kei na ka e gadreva ko Koya, me rawa kina me da vakavakarau me da tiko kei Koya.¹⁸

Oqo na kena usutu, kemuni na Yalododonu Edaidai. Me da kila ni Kalou e cecere mai na vuravura taucoko. Me da kila ni kevaka eda dina ena muri ni ivakaro ni Kalou na Nona yalayala ena vakayacori me vaka sa tukuna. Ni a tukuna ni na sega ni dua na matanivola lailai se dua na tikina me na lutu ki ra me sega ni yaco kecega [raica Maciu 5:18]. Na leqa e tiko, ni na meca ni yalo ni tamata e vakabutobutotaka na nodra vakasama. E kaburaka na kuvu, me da kaya, ki na matadra, ka ra sa vakamatabokotaki ena veika ni vuravura oqo. Era sega ni kumuna vata na tamata na nodra iyau mai lomalagi, ka na sega ni vakacacana rawa na sarasara kei na veveka, ka na sega ni rawa ni ravabasuka na daubutako me butakoca [raica Maciu 6:19–20], ia era sa rui domona na veika ni vuravura oqo, ka sa lewai ira na meca.

Au tukuna vei kemuni, na Yalododonu Edaidai, ni mataniciva talei sa bula tawamudu. E sa tukuna vei keda na Kalou ni isolisoli uasivi duadua e rawa me solia ko Koya vua na tamata sa ikoya na bula tawamudu [raica V&V 14:7]. Eda cakacakataka tiko na isolisoli uasivi ko ya, ka na noda kevaka eda muria na ivakaro ni Kalou. Ia ena sega ni dua na betena vei keda me da tukuna walega ka vunautaka yani ki vuravura taucoko ni oqo na kosipeli, ia ena dua na betena vei keda kevaka eda kitaka na lewa ni Kalou.¹⁹

Na ka bibi duadua vei kemuni kei au me da kunea se da sa lako tiko li ena gaunisala dodonu ka qiqo ka basika ki na bula tawamudu, ia kevaka e sega, eda sa vakatara na meca me vakamatabokotaka na noda vakasama ka vakavuna meda gole tani mai na sala ka na kauti keda lesu ki na iserau ni Kalou? Me da dui qara yadua vakaikeda na yaloda ka kunea evei eda malumalumu kina, ka oti mo qai qara vagumatua sara na Tamada Vakalomalagi ena veivuke ni Nona Yalo Tabu, me rawa ni ko lesu tale mai ki na gaunisala dodonu.²⁰

E sa tukuni … ni da sega ni kitaka tiko na ka kece e dodonu me da kitaka. Au sega ni vakabauta ni dua na tamata e bulataka na ka e vinakata, ia kevaka eda sasagataka tiko, ke da cakacakataka tiko, ke da tovolea tiko, ena kena vinaka duadua eda rawata, me da vakavinakataka e veisiga, eda sa na qai kitaka tiko na ka e vinakati. Kevaka eda qara tiko me da vakavinakataka ni noda malumalumu, ka da bulataka na bula ka rawa kina vei keda me da kerea vua na Kalou na rarama, na kila ka, na vuku, ka cecere duadua na Nona Yalo Tabu, me da vorata kina na noda veimalumalumu, sa na qai rawa, meu tukuna vei kemuni, ni da sa tiko ena sala dodonu ka qiqo ka basika ki na bula tawamudu; ka sa sega kina ni yaga me da rere.²¹

E dua tiko na sala ni veitaqomaki vei ira na Yalododonu Edaidai, sa ikoya na sala ni itavi. E sega ni ivakadinadina walega; e sega ni ivakatakila uasivi; e sega ni kilai ni kosipeli i Jisu Karisito e dina, sa ikoya na yavu ni veivakabulai—e sega ni kena kilai dina ni iVakabula na dauveivueti, ka nona parofita ko Josefa Simici, ni na vakabulai iko kei au ko ya; sa ikoya ga na vakamuri ni ivakaro ni Kalou, ka bulataka na bula ni dua na Yalododonu Edaidai.²²

Vakatutu ni Vuli kei na Veivosaki

Na sala cava e “sega kina ni solibula ia e gauna vinaka ka soli” na talairawarawa? E rawa vakacava me sinai na yaloda ena lomana na Kalou ka vakavuna me ka taleitaki na muria na Nona ivunau?
Na cava e sa bau yaco vei iko ka vakadeitaka na dina ni kalou e vauci me vakayacora na Nona yalayala ni da muria na Nona ivakaro? (Raica talega V&V 82:10.)
E rawa vakacava ki na nanuma cala ni rawa ka me kauti keda tani mai na sala ki na bula tawamudu?
Na tiki ni noda bula cava e rawa ni kauti keda tani mai na noda dei tiko ena veika ni Kalou? E rawa vakacava ni da tarova na veika oqo me ra yaco me ra dau ni veivakataotaki?
Na cava e dau vakamadua kina na kena yacovi keda na vakaweleweletaki ni itavi? Na cava e rawa ni da kitaka me na vukei keda me da gugumatua tikoga ka qaqa ena vakayacori ni noda itavi?
Na itavi ni veisiga cava e noda na lewe ni Lotu kece? Na itavi cava tale e bibi ena nomu bula?
Na cava e “sala duadua kina ni tataqomaki vei ira na yalododonu edaidai na itavi?

Savior — E a tukuna na iVakabula, “Ko koya sa nanuma na noqu vunau, ka talairawarawa kina, sa ikoya oqo sa lomani au: ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua” (Joni 14:21.)