Wase 18

Na Sere sa Lagati ena Yalodina

Ni da lagata na sere kei Saioni ena kena yalododonu, eda sa vakacabo masu tiko vua na Turaga ka sureta na veivakauqeti ni Yalo Tabu ki na noda bula kei na nodra bula na tani.

Na Bula nei Heber J. Grant

Edau taleitaka o Peresitedi Heber J. Grant na lagata na serenilotu kei Saioni, e dina ni viavia vela tu na domona. Ena Epereli ni 1900, ni lewena voli na Kuoramu ni Apositolo Le Tinikarua, a vagoleya vakatabakidua kina e dua na nona vosa ki na bibi ni kena lagati na serenilotu. Ena nona vosa oqo ena koniferedi raraba ni Deseret Sunday School Union, a wasea kina e so na italanoa me baleta na nona vulica na lagasere:

“Au dau taleitaka tu ga na lagasere ena gauna kece ni noqu bula. Niu se qai yabaki tini voli au a lewena e dua na kalasi ni lagasere, ka tukuna kina na parofesa niu na sega sara ni rawa ni vulica na lagasere. Ena vica na yabaki sa oti a tukuna vei au e dua na turaga ni rawa niu lagasere, ia e qai kaya tale ni na vinakata me na laki tu mai vakayawa me rauta ni vasagavulu na maile ena gauna au lagasere tiko kina. …

“Niu se gonelailai, e sega tale ni dua na marama e bula tiko me uasivi cake mai vei Sisita [Eliza R.] Snow, ka ni taravi tinaqu walega, ena nona dau taleitaki au, lomani au, ka dau soli vakasala vakatina vei au. Au lomani koya mai vu ni yaloqu, ka taleitaka na nona serenilotu, ‘I Tamaqu.’ Au a tukuna ena dua na gauna ena va na vula sa oti vei Baraca Horace S. Ensign niu na vinakata meu vakayagataka e va se lima na vula ni noqu gauna galala meu vulica kina meu lagata na sere o ya. E tukuna vei au ni tamata kece e tu vua na yalo ni sasaga e rawa ni vulica na lagasere. Au qai tukuna vua ni kevaka e dua na ka e tu vei au oya na dausasaga. Au sa mani vakatura kina me keirau dabe ka me sa tekivu sara ga na imatai ni noqu lesoni rua na auwa ena sere o ya. Au sa mani tomana tiko mai na veilesoni oqori me tekivu mai na gauna o ya. …

“Au cavuta na veivosa oqo baleta niu nanuma ni dodonu me da dau vakayaloqaqataki ira na noda itabagone me ra dau vulica na lagasere. Mai na rai vakadau ni sere, au sa vakayalia sara ga e tolusagavulu katolu na yabaki ni noqu bula. E a tukuni vei au niu se qai yabaki tini niu na sega ni rawa ni vulica na lagasere. Au sega ni vuli rawa me yacova niu sa yabaki vasagavulu katolu, kau sa vakayagataka e va se lima na vula ena noqu tovolea tiko meu lagata na serenilotu: ‘God moves in a mysterious way, ” kei na ‘I Tamaqu.’ Au sa vulica rawa e dua me baleta na nona dau veikauwaitaki o koya ka a vola, kei na kena karua me baleta ni dau taleitaka vakalevu duadua vei ira kece na sere ena ivolanisere o Peresitedi Wilford Woodruff.

Ni oti vakalailai na nona cavuta na veivosa oqo, a qai lagata o Elder Grant na serenilotu “I Tamaqu.” Oti e qai kaya: “E dua ga na noqu inaki ena bogi ni kua ena noqu sere kei na noqu vosa, oya meu vakayaloqaqataki ira na cauravou kei na goneyalewa me ra kakua ni vakamaumautaka tu e tolusagavulu se vasagavulu na yabaki ni nodra bula ni bera ni ra qai tovolea me ra dau lagasere. … Ena kena sasagataki tikoga ena rawa kina vua e dua ka sega tu ni kila na lagasere me kila, me vakataki au ga.”¹

iVakavuvuli Nei Heber J. Grant

Na nodra sere na yalododonu sa nodra masu vua na Turaga.

Na lagasere sa dua na tiki ni sokalou uasivi sara vei ira na Yalododonu Edaidai.²

Na kena lagati na noda serenilotu bibi, ka ra vola na italai ni Kalou, e kaukauwa sara na kena mana ena kena vagolei na yalo ni tamata ki na ivakavuvuli ni kosipeli ka vakakina na kena basika na tiko sautu kei na tubu vakayalo. Na lagasere e vakacabo masu vua na Turaga, me vaka na ka e tukuna o Koya: “Raica au sa rekitaka sara na sere sa lagati ena yalodina; io na nodra sere na yalododonu sa nodra masu vei au, kau na vakalougatataki ira kina.” [V&V 25: 12]³

Sa dau vakamarautaka vakalevu na yaloqu na vakarogo sere, me vaka niu a dau taleitaka tu ga ena noqu bula taucoko, kau sa marau tale ga vakalevu ni rawa meu masu vua na Turaga ena “sere sa lagati ena yalodina.” Sa noqu vakatutu kina ni kevaka eda na nanuma na vosa ni Turaga, ni nodra sere na yalododonu sa nodra masu vua, ka na saumi ena kena sobuti keda na veivakalougatataki, me da qai vakacabo masu kina vua na Tamada Vakalomalagi ena veisere kamica kei Saioni, ka da qai vakavoqataka tiko vakawasoma ki lomada na ibalebale ni noda veiserenilotu, eda na rawata vakaidina na veivakalougatataki sa yalataki tu, na kena au sa dau vakauqeti ira kina na yalododonu me ra segata me ra rawata.⁴

Me da dau vakuwai keda mai na veisere ka vakavuvulitaki kina na ivakavuvuli lasu.

Me da nanuma matua tiko na sere e dau taleitaka na Turaga, na sere ka koto kina na kosipeli. Au sa lako oti ki na veikoniferedi eso ka rogoca kina e tolu se va na sere, kau sega ni duavata kei na qaqana. Era lagati vata kei na ivakatagi uasivi ia e sega ni vinaka na kena ivakavuvuli.⁵

Na kena totoka ga na ivakatagi ka lagati kina na sere ka cala tu na kena ivakavuvuli, na kena rerevaki. Au sa kerekere tiko kina vei kemuni kece sara na Yalododonu Edaidai, ka vakabibi vei ira na noda veimatasere, me ra kakua sara ni lagata e dua na qaqa ni sere, ka sega ni salavata kei na dina ni kosipeli na kena ivakavuvuli, veitalia sara na totoka kei na veivakauqeti ni kena ivakatagi. …

… Me kakua sara ni dua na tamata se dua na matasere, ena Lotu, me lagata e dua na sere vakavo kevaka e salavata kei na dina ni kosipeli na qaqana, ka me rawa ni lagata mai yalona o koya e lagata tiko. Se ena dua tale na kena itukutukuni, na noda sere sa dodonu sara me “masu vua na Turaga.” [Raica V&V 25: 12.] Kevaka eda qarauna me da dau lagata na veisere vakaoqori, sa na qai rawa me da vakadeitaka ni na takavi keda dina na veivakalougatataki sa yalataka tu na Turaga, baleta ni “sa dina ka dodonu, ka na vakayacori vakaidina” na nona yalayala. [Raica V&V 1:37.]⁶

Na lagati ni serenilotu ena kauta mai ki na noda bula na vakacegu vakalomalagi.

E vakavinavinaka vakalevu vua na Turaga na yaloqu ena veivakauqeti ni nona Yalo Tabu ki vei ira e lewevuqa na noda me ra vola na noda veiserenilotu totoka. … Me vakalougatataki ira na noda dauvolasere kei na serekali na Kalou ena nodra sa mai rawata vei keda na veimalanivosa kei na ivakatagi kamica ka dau veivakauqeti.⁷

E dei na yaloqu ni na yaco mai ki na noda veivuvale na vakacegu vakalomalagi, ka na vukea talega na vunautaki ni kosipeli i Jisu Karisito, na veiserenilotu kei Saioni, kevaka e lagati ena kena yalo ka dodonu me lagati kina.⁸

E sega tale ni dua na ka me veivakamarautaki ka veivakauqeti cake me vaka na ivakatagi e vale, me tekivu mai na gauna au vulica kina na lagasere, keitou dau lagata e dua na sere e veimataka ni vakarau me keitou masu vakavuvale. Sa dua na yalo taleitaki dina e dau salavata mai na kena lagati na veisere kei Saioni, kau sa vakatura kina me ra okata na Yalododonu me tiki ni nodra sokalou vakavuvale na lagasere.⁹

Me da kakua ni dau guilecava na noda veiserenilotu ni da lako ki na noda veivale ni sokalou. Me ra lagasere na ivavakoso; ka me qarauni sara me ra kila na lewe ni matasere na ibalebale ni qaqa ni noda veiserenilotu.¹⁰

Au nanuma lesu e dua na ka ka yaco ka laurai kina na yaga ni sere ena kena dau vakamaravutaki na yalo cudru ka kauta mai na duavata ki na yalodra na dauveiqati. E a yaco ena vica vata na yabaki sa oti ka rau okati kina e rua na lewenilotu qase yalodina ka rau se lewena na lotu mai Nauvoo. Erau dau doka ka yalodina vakalevu sara na turaga e rua oqo ki na cakacaka ni Turaga. Erau sa lakova mai na veika dredre ka a sotavi mai Nauvoo, ka rau vakila na veika rarawa ena vuku ni nodra vakasevi ka vakararawataki na yalododonu, ka vakakina na veigauna dredre ni nodra tawavanua mai na ra. Erau veibataka na turaga e rua oqo eso na veika vakabisinisi, ka mai tini sara ena nodrau tovolea me mai vakameyautaka na nodrau duidui o Peresitedi John Taylor.

Ena gauna oya e peresitedi voli kina ni matabose ni Apositolo Le Tinikarua o John Taylor. Erau a yalataka na turaga e rua oqo ni rau na duavata ga kei na vakatulewa ena vakayacora o Baraca Taylor. …Erau a sega ni tukuna vua ena gauna vata ga oya na nodrau leqa, ia erau a vakamacalataka ni rau a veiba sara vakaukauwa ka kerea vua ke rawa ni rogoca na nodrau italanoa ka vakatauca na nona lewa. E a vakadonuya kina o Peresitedi Taylor, Ia a mani kaya: “Kemudrau na veitacini ni se bera niu rogoca na nomudrau kisi, au na gadreva vakalevu sara meu lagata taumada vei kemudrau e dua na sere kei Saioni.”

O Peresitedi Taylor e matai sara toka na lagasere, ka vakadewataka kina vakavinaka vata kei na Yalo Tabu, na noda veiserenilotu bibi.

E lagata e dua na noda serenilotu vei rau na turaga oqo.

Ni raica na kena revurevu, e mani kaya kina ni se bera vakadua ni bau rogoca e dua na sere kei Saioni kevaka ena sega ni rogoca e dua tale, e mani kerei rau kina me rau vakarorogo ni lagata e dua tale. Sa vinaka, erau vakadonuya. E vaka me rau taleitaka ruarua; ia ni lagata oti na ikarua ni sere, e qai kaya ni dau rogoca tu ni dau kalougata na naba sega ni veisa ka mani lagata tale kina e dua na sere ena nodrau veivakadonui. Ni oti o ya, ena nona ivakarau ni veiwali, e baci kaya tale kina: “Kemudrau na veitacini au sega ni vinakata meu vakaocai kemudrau, ia kevaka drau na vosoti au, ka rogoca e dua tale na serenilotu, au sa yalataka ni sa na mudu na noqu lagasere tiko, ka rogoca na nomudrau kisi

Na kena italanoa e qai tukuni ni gauna e qai lagata oti kina o Peresitedi Taylor na i kava ni sere, sa tonawanawa tu na matadrau na turaga oqo, erau tucake, lululu, ka kerea vei Peresitedi Taylor me vosoti rau ena nodrau kacivi koya yani, ka vakakina na nodrau sa mai vakalusia wale na nona gauna. Erau vakanadaku tale mai kea ni se bera mada ga ni kila o Peresitedi Taylor na nodrau duidui.

Na nona lagasere o Peresitedi Taylor sa veisautaka na ivakarau ni dui yalodrau. Sa curuma na dui yalodrau, ka vakatautauvatataka na veidelana ka dau tu ena kedrau maliwa ka sa yaco me sega ni dua na ka. Sa kadre e yalodrau na veilomani kei na veikauwaitaki ni veitacini. Sa sega tale ni dua na kena yaga vei rau na ka lailai ka a vakavuna na nodrau veiba. Na sere ka lagati ena yalodina sa vakasinaiti rau ena yalo ni duavata.¹¹

O Elder J. Golden Kimball kei Elder Charles A. Welch, e sega ni dua vei rau oqo e bau tukuna ni dau lagasere, ena nodrau kaulotu voli ena veiyasana ki na ceva, ni sa vakarau sara tu ga me rau papitaisotaki ira eso ka dau vakadikeva tu na Lotu; era sa soqoni vata mai e dua na ilawalawa dauvakacaca, sa tukuni vei rau na veitokani oqo ni kevaka erau vakavotukanataka na nodrau inaki ni veipapitaisotaki, era na viritaki rau ki wai o ira na dauvakacaca. Erau sa mani lewa na veitacini oqo me rau sa vakayacora ga na nodrau inaki veitalia na veika ena qai yaco. Ni se bera ni rau vakayacora, erau a lagata taumada e dua na sere. E lutuki ira na dauvakacaca na revurevu ni sere oqori ka sa voleka sara kina ni ra durumasima tu ga ena vanua era duri tu kina. Erau a vakayacora ga na veiwekani oqo na nodrau veipapitaisotaki, ka ra mani gole yani ki na dua na tikina vakayawa vakalailai me ra veivakadeitaki kina vei ira na papitaisotaki. E a yaco mai e dua na itukutuku mai vei ira na ilawalawa dauvakacaca ka kerei rau mai kina me rau laki lagata tale na sere, erau a mani vakadonuya na kerekere. E a qai lewena na Lotu e muri na iliuliu ni matailawalawa oqo o Joseph Jarvis, e qai tukuna kina vei Elder Kimball ni veisautaki koya ki na kosipeli na ibalebale ni sere, kei na veivakauqeti ni lagasere, me vaka sa vakaraitaki e cake. E nanuma lesu o Elder Kimball ni sere oqori na “Truth Reflects Upon Our Senses.” [Raica na Hymns naba 273.]¹²

E levu sara na ka e yali mai na veivale, ka sega ni dau lagati kina na veisere kei Saioni. E levu na daukaulotu era vakuwai ira mai na igu kei na kaukauwa kei na nodra rawata na veika vinaka, ka vakakina na nodra vakaitokanitaki ira na tamata, ena nodra sega ni kila na lagasere. … Na sere kei Saioni e kauta mai na yalo vinaka ki na noda veivuvale

E sega ni na vakavurea vei ira na tamata na yalodina na nomu matau ena vosa, ia na Yalo ga ni Kalou Kaukauwa ka caudre tiko mai yalomu, kei na nomu gadreva me ra vakabulai na yalo. E kaya kina o Brigham Young ni na vakaitavi vakalevu cake na Yalo ni Turaga ena kena veisautaki na tamata mai na vosa maqosa ni tamata [raica na Deseret News, 9 ni Feperueri 1854, 4]. Kau sa tukuna kina ni kena lagati na sere kei Saioni, e dina beka ni na sega soti ni vinaka sara, ena veivakauqeti ni Kalou, ena tara vakavinaka cake sara na yalodra na tamata dina me vakatauvatani kei na sere e lagati vakavinaka ka sega kina na Yalo ni Kalou. Lagasere vata kei na Yalo ni Kalou. Taleitaka na qaqa ni sere o lagata. Au taleitaka na veisere kei Saioni.¹³

Vakatutu ni Vuli kei na Veivosaki

Na cava e bibi kina me da lagata na serenilotu ni Lotu? Na cava me da lagata kina na serenilotu kevaka sara mada ga e sega ni da kena dau ni lagasere?
Na sala cava e rawa ni vukei keda kina ena sokalou vua na Turaga e vale ena soqoni ni sakaramede ka vakakina ena veisoqoni vakalotu tale eso na lagati ni serenilotu?
Na sala cava e masu kina vua na Turaga na “nodra sere na yalododonu.”
Na cava na “yalododonu” ni kena lagati na serenilotu? Na cava na vuna “ena kauta mai kina ki na noda bula na vakacegu vakalomalagi ni lagati na serenilotu ena kena yalododonu”?
Na veisala cava soti e sa vukei iko kina na serenilotu? Na serenilotu cava soti e dau vakauqeta na nomu bula? Na cava na vuna era vakaibalebale vakalevu cake kina vei iko na veiserenilotu oqo?
Na cava na kena yaga me da vulica kina na serenilotu ka sega soti ni da kila vinaka? Na cava na vuna e dau veivuke kina na noda rawa ni cavuqaqataka na veiqaqa ni serenilotu?
Na cava na vuna e kilikili kina me ra dau lagati ena soqoni ni sakaramede kei na veisoqoni ni Lotu tale eso na serenilotu ni Lotu kei na nodra sere na lalai?
Na cava na vuna era dau rerevaki kina na veivakavuvuli lasu ka lagati ena ivakatagi vinaka? Na cava e sa rui bibi kina me da levea na veisere eso ka sega ni salavata kei na dina ni kosipeli”?
E rawa beka vakacava vei ira na itubutubu me ra vukei ira na luvedra me ra vulica ka taleitaka na veiserenilotu kei Saioni? Na veisala cava soti e rawa ni ra vakayagataka kina na itubutubu na serenilotu kei na nodra sere na lalai ena nodra vakavuvulitaka na kosipeli vei ira na luvedra?