Lesson 6: Ang Pamilya ang Sentro sa Plano ng Ama sa Langit
6
Ang Pamilya ang Sentro sa Plano ng Ama sa Langit
Pambungad
Ipinahayag ng mga propeta at apostol sa panahong ito na “ang mag-anak ang sentro ng plano ng Tagapaglikha para sa walang hanggang tadhana ng Kanyang mga anak” (“Ang Mag-anak: Isang Pagpapahayag sa Mundo,” Ensign o Liahona, Nob. 2010, 129). Ang lesson na ito ay makatutulong sa mga estudyante na maunawaan na sa pagiging “higit na masigasig at mapagmalasakit sa tahanan” (D at T 93:50) ay magagawa nilang mas maging sentro ng kanilang buhay ang kanilang pamilya.
Mga Babasahin Tungkol sa Paksang Ito
Robert D. Hales, “The Eternal Family,” Ensign, Nob. 1996, 64–67.
David A. Bednar, “Mas Masigasig at Mapagmalasakit sa Tahanan,” Ensign o Liahona, Nob. 2009, 17–20.
Handbook 2: Administering the Church [2010], 1.1.1, 1.1.4, at 1.4.1 (kung mayroon).
Mga Mungkahi sa Pagtuturo
Ang pamilya ang sentro sa plano ng Ama sa Langit
Banggitin sa iyong klase na sa lahat ng mga paksang ibinigay sa mga huling pangkalahatang kumperensya, ang pamilya ang isa sa mga paksang madalas talakayin.
Sa palagay ninyo, bakit madalas magsalita ang mga lider ng Simbahan tungkol sa pamilya?
Isulat sa pisara ang sumusunod na katotohanan mula sa pagpapahayag tungkol sa pamilya, at sabihin sa mga estudyante na ibahagi kung ano ang ibig sabihin nito sa kanila:
“Ang mag-anak ang sentro ng plano ng Tagapaglikha para sa walang hanggang tadhana ng Kanyang mga anak.”
Upang matulungan ang mga estudyante na mas maunawaan kung paano naging sentro ang mag-anak o pamilya sa ating walang-hanggang tadhana, magbigay ng mga kopya ng handout na nasa hulihan ng lesson na ito. Hatiin ang klase sa maliliit na grupo. Mag-assign sa bawat grupo ng isa sa tatlong bahagi ng handout at ipatalakay ang mga kasamang tanong. Tiyaking na-assign ang lahat ng bahagi.
Matapos ang sapat na oras, anyayahan ang isa o mahigit pang tao na naka-assign sa bawat bahagi ng handout na magbahagi sa klase ng buod ng tinalakay nila sa kanilang grupo. Patotohanan ang sumusunod na katotohanan: Ang pamilya ang sentro sa plano ng Diyos para sa buhay bago ang buhay sa mundo, sa buhay na ito, at sa kawalang-hanggan.
Anong mga karanasaan ang nakatulong sa inyo na madama ang kahalagahan ng pamilya sa plano ng Ama sa Langit?
Ihanda ang mga estudyante na matuto mula sa Doktrina at mga Tipan 93 sa pamamagitan ng pagpapaliwanag na itinala ng bahaging ito, kabilang ang iba pang mga bagay, ang tagubilin ng Panginoon tungkol sa kahalagahan ng pagpapalaki ng mga anak sa “liwanag at katotohanan” at pag-una sa ating pamilya. Isulat sa pisara ang sumusunod na mga reference:
Sabihin sa mga estudyante na magbasa ng isa o mahigit pang scripture reference (tiyaking nabasa ng isa o mahigit pang estudyante ang bawat scripture reference). Sabihin sa mga estudyante na alamin kung sino ang kinakausap ng Panginoon at ano ang iniutos Niya. Matapos ang sapat na oras, sabihin sa mga estudyante na ibahagi kung ano ang nalaman nila. Tiyaking natukoy ng mga estudyante na ang apat na lalaking pinatutungkulan dito ay ang Unang Panguluhan at ang bishop ng Simbahan sa Ohio; kung gayon, ipinapaalala ng mga banal na kasulatang ito sa lahat ng miyembro ng Simbahan, maging sa mga nasa pamunuan, na gawing priyoridad ang kanilang pamilya. Maaari mong imungkahi sa mga estudyante na markahan nila ang pag-uulit o pattern na matatagpuan sa mga talatang ito—dapat “isaayos” ng mga miyembro ng Simbahan ang kanilang mga pamilya (tingnan sa mga talata 43, 44, at 50).
Ayon sa talata 42, 48, at 50, ano ang magagawa natin upang makatulong sa pagsasaayos ng ating pamilya? (Dapat matukoy ng mga estudyante ang sumusunod: turuan ang mga anak sa liwanag at katotohanan, magsisi, talikuran ang masasamang bagay, maging higit na masigasig at mapagmalasakit sa tahanan, at manalangin tuwina.)
Isulat sa pisara ang sumusunod na alituntunin: Nakatutulong tayo na masunod ang utos ng Panginoon na isaayos ang ating pamilya kapag tayo ay higit na masigasig at mapagmalasakit sa tahanan.
Ano ang magagawa ng isang young adult para maging higit na masigasig at mapagmalasakit sa tahanan?
Ipakita ang sumusunod na pahayag mula sa liham na isinulat ng Unang Panguluhan noong 1999, at ipabasa ito nang malakas sa isang estudyante:
“Ang tahanan ang pundasyon ng matwid na pamumuhay, at wala nang iba pang makapapalit sa lugar nito o makagaganap sa mahahalagang tungkulin nito sa pagtupad ng responsibilidad na ibinigay ng Diyos.
“Pinapayuhan namin ang mga magulang at mga anak na bigyan ng pinakamataas na priyoridad ang panalangin ng pamilya, family home evening, pag-aaral [at patuturo] ng ebanghelyo, at makabuluhang mga aktibidad ng pamilya. Kahit gaano pa karapat at kaangkop ang iba pang mga gawain o aktibidad, hindi dapat hayaang halinhan ng mga ito ang banal na mga tungkulin na tanging ang mga magulang at pamilya lamang ang makagagawa” (First Presidency letter, Peb. 11, 1999, binanggit sa Handbook 2: Administering the Church [2010], 1.4.1).
Sa inyong karanasan, ano ang ilang “mahahalagang tungkulin” at “responsibilidad na ibinigay ng Diyos” na pinakamagandang ginagawa sa pamilya?
Ipakita ang sumusunod na pahayag, at hikayatin ang mga estudyante na isipin ang mga pagpapalang dumarating kapag sinisikap ng bawat miyembro ng pamilya na gampanan ang mga responsibilidad na ibinigay ng Diyos sa pamilya:
“Saanman nakatira ang mga miyembro ng Simbahan, dapat silang magtatag ng isang tahanan kung saan makapananahan ang Espiritu. …
“Ang isang tahanang may mapagmahal at tapat na mga magulang ang pinakaepektibo para matugunan ang mga espirituwal at pisikal na pangangailangan ng mga anak. Ang isang tahanang nakasentro kay Cristo ay nagbibigay sa matatanda at sa mga bata ng proteksyon laban sa kasalanan, kanlungan mula sa mundo, pagpapagaling mula sa emosyal at iba pang mga pasakit, at tapat at tunay na pagmamahal” (Handbook 2: Administering the Church,1.4.1).
Paano kayo makatutulong na makagawa ng isang tahanang nakasentro kay Cristo para sa inyong pamilya?
Anong kaibhan ang magagawa nito sa inyong pamilya?
Ipakita ang sumusunod na pahayag ni Elder M. Russell Ballard ng Korum ng Labindalawang Apostol at ipabasa ito nang malakas sa isang estudyante:
Larawan
Elder M. Russell Ballard
“Ang lahat ng ginagawa ninyo sa labas ng tahanan ay iayon at isalig ninyo sa nangyayari sa loob ng inyong tahanan. Tandaan ang payo ni Pangulong Harold B. Lee na ‘ang pinakamahalagang gawain … na gagawin ninyo ay ang nasa loob mismo ng inyong mga tahanan’ … at ang walang-kupas na payo ni Pangulong David O. McKay na ‘Walang ibang tagumpay na makahahalili sa kabiguan sa tahanan’” (“Upang Mahanap ang Naliligaw,” Ensign o Liahona, Mayo 2012, 99).
Bigyan ang mga estudyante ng ilang sandali na maisulat ang ilang bagay na magagawa nila upang maging higit na masigasig at mapagmalasakit sa tahanan at mas maging sentro ng kanilang buhay ang kanilang pamilya. Hikayatin ang mga estudyante na magtakda ng mithiin na gawin ang isang ideya na isinulat nila. Magpatotoo na kapag ginawa ng mga estudyante ang kanilang mithiin, palalakasin sila Panginoon sa espirituwal at tutulungan silang makita kung paano nakapagpalakas din sa kanilang pamilya ang ginawa nila.
Robert D. Hales, “The Eternal Family,” Ensign, Nob. 1996, 64–67.
David A. Bednar, “Mas Masigasig at Mapagmalasakit sa Tahanan,” Ensign o Liahona, Nob. 2009, 17–20.
Ang Ating Pamilya Bago ang Buhay sa Mundo, sa Buhay na Ito, at sa Kawalang-hanggan
Ang Walang Hanggang Pamilya—Lesson 6
Ang Ating Pamilya Bago ang Buhay sa Mundo
“Ang pamilya ay inorden ng Diyos. Ito ang pinakamahalagang yunit sa panahon at sa kawalang-hanggan. Bago pa man tayo isilang sa mundong ito ay bahagi na tayo ng isang pamilya. Bawat isa sa atin ‘ay minamahal na espiritung anak na lalaki o anak na babae ng mga magulang na nasa langit,’ na may ‘katangian at tadhana na tulad ng sa Diyos’ [‘Ang Mag-anak: Isang Pagpapahayag sa Mundo,’ Ensign o Liahona, Nob. 2010, 129]. Ang Diyos ang ating Ama sa Langit, at namuhay tayo sa piling Niya bilang bahagi ng Kanyang pamilya sa buhay bago tayo isinilang sa mundo. Doon ay natutuhan natin ang ating mga unang aral at naihanda para sa mortalidad (tingnan sa D at T 138:56)” (Handbook 2: Administering the Church [2010], 1.1.1).
“Sinasamba natin ang dakilang Diyos na lumikha sa sansinukob. Siya ang ating Ama sa langit. Tayo ay nabuhay dahil sa kanya; tayo ay kanyang mga espiritung anak. Nanahan tayo kasama siya sa isang pamilya sa buhay bago tayo isinilang. Siya ay lubos na kilala natin noon tulad ng kilala natin ang ating mga mortal na ama sa buhay na ito” (Bruce R. McConkie, How to Worship, Brigham Young University Speeches of the Year [Hulyo 20, 1971], 2).
Mga tanong na tatalakayin:
Paano naging mahalagang bahagi ang pamilya sa ating buhay bago ang buhay sa mundo?
Paano nakatulong sa inyo na malaman na ang Diyos ay inyong Ama, at kayo ay minamahal na miyembro ng Kanyang pamilya sa premortal na daigdig?
Sa palagay ninyo, paano kayo nakisalamuha sa inyong mga Magulang sa Langit?
Ang Ating Pamilya sa Buhay na Ito
“Bilang bahagi ng plano ng ating Ama sa Langit, tayo ay isinilang sa mga pamilya. Siya ay nagtatag ng mga pamilya upang paligayahin tayo, tulungan tayong malaman ang mga tamang alituntunin sa isang mapagmahal na kapaligiran, at ihanda tayo para sa buhay na walang hanggan.
“Ang mga magulang ay may mahalagang responsibilidad na tulungan ang kanilang mga anak na maghandang bumalik sa Ama sa Langit. Nagagampanan ng mga magulang ang responsibilidad na ito sa pamamagitan ng pagtuturo sa kanilang mga anak na sundin si Jesucristo at ipamuhay ang Kanyang ebanghelyo” (Handbook 2: Administering the Church,1.1.4).
“Ang Diyos ang nagplano ng pamilya. Sinadya Niya na magmula ang lubos na kaligayahan, ang pinakamagagandang aspeto ng buhay, ang lubos na kagalakan sa pamamagitan ng pagsasama-sama natin at pagmamalasakit sa isa’t isa bilang mga ama at ina at mga anak” (Gordon B. Hinckley, “What God Hath Joined Together,” Ensign, Mayo 1991, 74).
Mga tanong na tatalakayin:
Sa paanong mga paraan naging mahalagang bahagi ng mortal na buhay natin ang pamilya?
Paano kaya maiiba ang buhay sa mundo kung ipinadala tayo rito nang mag-isa lang at walang pamilya—walang ama, ina, mga kapatid, ninuno, o inapo?
Anong mga karanasan ang nakatulong sa inyo na maunawaan ang ginagampanan at kahalagahan ng pamilya sa buhay na ito?
Ang Ating Walang Hanggang Pamilya
“Ang plano ng kaligayahan ng Diyos ang nagpapahintulot sa mga ugnayan ng mag-anak na magpatuloy sa kabilang buhay” (“Ang Mag-anak: Isang Pagpapahayag sa Mundo,” Ensign o Liahona, Nob. 2010, 129).
“Bagama’t ang ating sariling kaligtasan ay nakabatay sa ating indibidwal na pagsunod, mahalaga ring maunawaan natin na bawat isa sa atin ay mahalaga at kinakailangang bahagi ng isang pamilya at ang pinakamalalaking pagpapala ay matatanggap lamang sa pamilya sa kawalang-hanggan. Kapag ang mga pamilya ay kumikilos ayon sa ipinlano ng Diyos, ang ugnayang matatagpuan dito ang pinakapahahalagahan sa mortalidad. Ang plano ng Ama ay magpapatuloy ang pagmamahalan at pagsasamahan ng pamilya sa kawalang-hanggan. Ang pagiging bahagi ng isang pamilya ay may kaakibat na responsibilidad na pagmalasakitan, mahalin, tulungan, at palakasin ang bawat miyembro ng pamilya upang makapagtiis nang mabuti ang lahat hanggang sa wakas ng mortalidad at magsama-sama sa buong kawalang-hanggan. Hindi sapat na iligtas lang natin ang ating sarili. Mahalaga rin na mailigtas ang mga magulang at mga kapatid sa ating pamilya. Kung uuwi tayo nang mag-isa sa ating Ama sa Langit, ganito ang itatanong sa atin, ‘Nasaan ang iyong pamilya?’ Ito ang dahilan kung bakit itinuturo natin na ang mga pamilya ay walang hanggan. Ang walang hanggang katangian ng isang tao ay nagiging walang hanggang katangian ng pamilya” (Robert D. Hales, “The Eternal Family,” Ensign, Nob. 1996, 65).
Mga tanong na tatalakayin:
Sa paanong mga paraan naging mahalagang bahagi ang pamilya sa ating walang hanggang tadhana?
Ano ang ilang mabubuting ginagawa ng mga miyembro ng pamilya na makatutulong sa kaligtasan ng bawat isa?
Kailan kayo tinulungan o pinalakas ng isang kapamilya na naghikayat sa inyo na magtiis hanggang wakas?