1 Ināianei ā, i pahawa ake, nā, ka nui rawa ngā taunutanga i taunuhia ai te hāhi e te hunga whakapono kore nā konā tīmata ai te hāhi ki te komekome me te amuamu ki ō rātou kaiārahi e pā ana ki tēnei take; ā, i amuamu rātou ki a Arami. Ā, ka whakatakotoria e Arami te take i te aroaro o tō rātou kīngi, a Mōhia. Ā, ka kōrerorero tahi a Mōhia ki ana pirihi.

2 Ā, i pahawa ake, nā, ka tukuna e kīngi Mōhia tētahi whakapuakitanga puta noa i te whenua taiāwhio noa kia kaua tētahi o te hunga whakapono kore e taunu ai i te hunga nō te hāhi o te Atua.

3 Ā, kua puta tētahi whakahau mārō puta noa i te whenua ki ngā hāhi katoa kia kaua tētahi taunutanga i waenganui i a rātou, kia tau ai tētahi mana ōritetanga i waenganui i a rātou;

4 Kia kaua rātou e tuku i tētahi whakapehapeha, i tētahi wairua whakakake rānei ki te whakararu i tō rātou rangimārie; kia whaiwhakaaro nui ia tangata, ia tangata ki tōna kiritata anō nei ko ia anō, e mahi ana ki ō rātou ringaringa ake mō ō rātou oranga.

5 Āe rā, me mahi ō rātou pirihi me ō rātou kaiako katoa ki ō rātou ake ringaringa mō ō rātou oranga, i ngā āhuatanga katoa hāunga te wā e māuiui ana rātou, i te pōharatanga rānei; ā, i runga i te mahinga i ēnei mea, ka toko tonu ake te aroha noa o te Atua i a rātou.

6 Ā, ka tīmata te rangimārie nui i te whenua; ā, ka tokomaha haere te iwi, ā, ka tīmata te marara haere i runga i te mata o te whenua, āe rā, i te raki me te tonga, ā, i te rāwhiti me te uru, e hanga ana i ngā pā nunui me ngā papakāinga i ngā wāhi katoa o te whenua.

7 Ā, i torona atu rātou, ā, i manaakitia rātou e te Atua, ā, ka meinga rātou hei iwi nunui, ā, hei iwi whairawa.

8 Nā, i tatauria iho ngā tama a Mōhia i waenganui i te hunga whakapono kore; ā, i tatauria anōtia tētahi a ngā tama a Arami i waenganui i a rātou, kua huaina nei ko Arami, mō tōna matua; hei aha koa, i meinga ia hei tangata whakarihariha, ā, hei tangata karakia ki ngā whakapakoko. Ā, he tangata kaha ia ki te kōrero, ā, i nui tana kōrero whakapatipati ki te iwi; nō reira, i ārahina e ia ngā tāngata tokomaha ki te whaiwhai i ōna tūmomo hara.

9 Ā, ka meinga ia hei mea whakararuraru nui ki te tupuranga o te hāhi o te Atua; e whānako ana i ngā ngākau o te iwi; nāna nei ngā tītorehanga nui i roto i te iwi; e tukua ana tētahi huarahi mō te hoariri o te Atua kia whakamahia tōna mana ki runga i a rātou.

10 Ināianei ā, i pahawa ake, nā, i a ia e haere ana ki te whakangaro i te hāhi o te Atua, nā te mea i haere huna atu ia me ngā tama a Mōhia e whaiwhai ana ki te whakangaro i te hāhi, me te ārahi kōtiti kē atu i te iwi o te Ariki, kia rerekē ai i ngā whakahaunga a te Atua, a te kīngi pū anō rānei—

11 Ā, e pērā ana i tāku i kī atu ai ki a koutou, i a rātou e haere ana, e tutū ana ki te Atua, nana, ka puta te anahera a te Ariki ki a rātou; ā, ka heke iho ia me te mea nei i roto i tētahi kapua; ā, ka kōrero ia anō nei he reo whatitiri, ka whakangāueuetia te whenua i tū ai rātou;

12 Ā, anō te nui o tō rātou mīharo, nā, ka hinga rātou ki te whenua, ā, kīhai i mārama ki ngā kupu i kōrerotia ai e ia ki a rātou.

13 Hei aha koa ka karanga anō ia, e mea ana: E Arami, e ara, e tū ki runga, he aha koe e taunu ai i te hāhi o te Atua? Nā te mea kua kī mai te Ariki: Nāku tēnei hāhi, ā, māku ia e whakapūmau; ā, kāore tētahi mea e turaki i a ia, hāunga ko te hē o tōku iwi.

14 Hei āpiti anō, ka kī te anahera: Nana, kua rongo te Ariki i ngā inoi o tōna iwi me ngā inoi hoki o tana pononga, a Arami, ko ia nei tō matua; nā te mea kua inoi nui ia i runga i te whakapono nui e pā ana ki a koe kia kūmea mai ai koe ki te mātauranga o te pono; nō reira, mō tēnei take au i haere mai ai ki te whakapakepake i a koe mō te kaha me te mana o te Atua, kia whakautua ngā inoi o ana pononga e ai ki tō rātou whakapono.

15 Ināianei ā nana, ka taea e koe te whakakāhore i te mana o te Atua? Nana rā, kāore ianei rānei te whenua e ngāueue nei i tōku reo? Ā, kāore rānei e taea ana e koe te kite mai i ahau i mua i a koe? Ā, kua tonoa au e te Atua.

16 Nā, ko taku kupu tēnei ki a koe: Haere, maharatia te hereheretanga o ō tūpuna i te whenua o Herama, i te whenua o Nīwhai hoki; ā maharatia ngā mea nunui kua mahia e ia mō rātou; nā te mea i te hereheretanga rātou, ā, kua whakaputaina mai rātou e ia. Ināianei ā, ko taku kupu tēnei ki a koe, e Arami, e haere i tō huarahi, ā, kauaka koe e whai tonu ki te whakangaro i te hāhi, kia whakautua ā rātou inoi, ā, kia pēneitia ahakoa e pai ana ki a koe kia ākiritia atu koe.

17 Ināianei ā, i pahawa ake, nā, koinei ngā kupu whakamutunga i kōrerotia ai e te anahera ki a Arami, ā, ka wehe atu ia.

18 Ināianei ā, ka hinga anō a Arami rātou ko te hunga i reira ki te whenua, nā te mea he nui tō rātou mīharo; nā te mea kua kitea e ō rātou ake karu tētahi anahera o te Ariki; ā, ko tōna reo anō nei ko te whatitiri, i whakangāueuetia nei te whenua; ā, i te mōhio rātou kāore tētahi mea hāunga ko te kaha o te Atua e taea ana te whakangāueue i te whenua me te tūoioi anō nei ka wāwāhi rua.

19 Ināianei ā, ka reokore a Arami i te nui o tōna mīharo, nā, kīhai i taea e ia tōna māngai te tūwhera; āe rā, ka ngoikore ia, tē taea e ia ōna ringaringa te korikori; nō reira ka kawea atu ia e te hunga i reira, ā, i kawea kahakoretia atu, tae atu ki tana whakatakotoranga i te aroaro o tōna matua.

20 Ā, ka takina e rātou ngā mea katoa i pā ai ki a rātou ki tōna matua; ā, ka hari tōna matua, nā te mea i mōhio ia ko te kaha tērā o te Atua.

21 Ā, ka meatia e ia kia huihui ngātahitia tētahi whakaminenga e kite ai rātou he aha tā te Ariki mō tana tama, mō te hunga i reira anō hoki.

22 Ā, ka meatia e ia kia huihui ngātahi anō hoki ngā pirihi i a rātou anō; ā, ka tīmata tā rātou nohopuku, me tā rātou inoi ki te Ariki tō rātou Atua kia whakatūwheratia ai te māngai o Arami, kia kōrero ai ia, ā, kia whiwhi kaha anō ōna pepeke—kia whakatūwheratia ai ngā karu o te iwi e kite ai, ā, e mōhio ai i te painga me te korōria o te Atua.

23 Ā, i pahawa ake i muri iho i tā rātou nohopukutanga me tā rātou inoitanga mō te takiwā o ngā rā e rua me ngā pō e rua, ka whiwhi kaha ngā pepeke o Arami, ā, ka tū ake ia, ā, ka tīmata ia ki te kōrero atu ki a rātou, e tonoa ana rātou kia tau ai te mauri:

24 Nā, ka kī ia, kua rīpenetā au i ōku hara, ā, kua hokona e te Ariki; nana kua whānau mai au i te Wairua.

25 Ā, ka kī mai te Ariki ki ahau: Kaua e mīharo ki tēnei mea, āe rā, me whānau mai anō ngā tāngata katoa, arā, ko ngā tāne me ngā wāhine, ngā iwi, ngā hapū, ngā reo me ngā tāngata; āe rā, kia whānau mai i te Atua, kua tīnia i tō rātou āhuatanga kikokiko, i tō rātou āhuatanga taka, ki tētahi āhuatanga o te tika, kua hokona e te Atua, e meinga ana hei tama, hei tamāhine māna;

26 Ā, ka meinga pēnei hei mea hou; ā, ki te kore rātou e pēnei, kua kore rawa rātou e āhei te whiwhi ki te kīngitanga o te Atua.

27 Ko taku kupu tēnei ki a koe, ki te kore e pēneitia, me ākiri atu rātou; ā, e mōhio ana ahau i tēnei, nā te mea whano ka ākiritia atu ahau.

28 Hei aha koa, i muri iho i te kautūtanga i roto i ngā pāweratanga maha, e rīpenetā tata pū ana ki te mate, ka pai te Ariki ki te tākiri i ahau i runga i te aroha i tētahi weranga mutunga kore, ā, kua whānau mai au i te Atua.

29 Kua hokona tōku wairua mai i te au o te kawa me ngā herenga o te hara. I te poka pōuriuri rawa atu au; engari ināianei kei te kite au i te māramatanga mīharo o te Atua. I whakamamaetia tōku wairua ki te whakamamaetanga tonutanga; engari kua tākiritia au, ā, kāore tōku wairua i te mamae.

30 Nāku tōku Kaihoko i whakaparahako, ā, i whakaparahakotia ērā kua kōrerotia e ō tātou tūpuna; engari ināianei e taea ana e rātou te matakite, nā, ka haere mai ia, ā, e mahara ana ia i ngā mea katoa nāna nei i hanga, ka whakakite ia i a ia anō ki te katoa.

31 Āe rā, ka piko ngā turi katoa, ā, ka whāki ngā arero katoa i mua i tōna aroaro. Āe rā, hei te rā whakamutunga pū anō, ina tū ngā tāngata katoa kia whakawākia ai e ia, kātahi rātou ka whāki atu ko ia te Atua; kātahi rātou ka whāki atu, e noho Atua kore ana i te ao, nā, kua tau iho tētahi whakawhiunga mutunga kore tika ki runga i a rātou; ā, ka tūoioi rātou, ā, ka tūwiriwiri, ā, ka memenge iho i te rarapa o tōna karu hāhau-katoa.

32 Ināianei ā, i pahawa ake, nā, ka tīmata a Arami i tēnei wā haere ake ki te whakaako i te iwi, me te hunga i reira i te taha i a Arami i te wā i puta mai ai te anahera ki a rātou, e haere huri noa ana i te whenua, e whakapuakina ana ki ngā tāngata katoa ngā mea i rongo ai rātou me ngā mea i kite ai rātou, me te kauhau i te kupu a te Atua i roto i ngā whakapāweratanga maha, i te taunutia nuitia e te hunga whakapono kore, e pākia ana e te tokomaha o rātou.

33 Engari ahakoa tēnei katoa, ka whakamārietia nuitia te hāhi e rātou, e whakaū ana i tō rātou whakapono, ā, e akiaki ana i a rātou i runga i te manawa-roa me te mamae nui ki te pupuri i ngā whakahaunga a te Atua.

34 Ā, he tama nā Mōhia ngā mea tokowhā o rātou; ā, ko ō rātou ingoa ko Amona, me Arona, me Omona, me Himini; koinei ngā ingoa o ngā tama a Mōhia.

35 Ā, ka haere huri noa atu rātou i te whenua katoa o Harahemara, ā, i waenganui i te iwi katoa e noho ana i raro i te whakahaeretanga a kīngi Mōhia, e kaha ngana ana ki te whakatikatika i ngā tūnga i mahia e rātou ki te hāhi, e whāki ana i ō rātou hara katoa, ā, e whakapuaki ana i ngā mea katoa i kite ai rātou, ā, e whakamāramahia ana ngā poropititanga me ngā karaipiture ki ngā mea katoa i hiahia ai ki te whakarongo ki a rātou.

36 Ā, i riro pēnei rātou hei taputapu i ngā ringaringa o te Atua i te mauranga mai i te tini ki tētahi mātauranga mō te pono, āe rā, ki te mātauranga mō tō rātou Kaihoko.

37 Ā, anō tō rātou manaakitanga nui! Nā te mea i whakapuaki rātou i te rangimārie; i whakapuakina e rātou te rongo whakahari o te pai; ā, i whakapuakina e rātou ki te iwi, nā, e whakahaere ana te Ariki.