Tufa’a 111
E heheura’a tei hōro’ahia mai nā roto ia Iosepha Semita te peropheta, i Salem, i Massachusetts, i te 6 nō ’Ātete 1836. I teie taime ’ua rahi roa te tārahu a te feiā fa’atere o te ’Ēkālesia nō te rahi o tā rātou ’ohipa tāvinira’a. I tō rātou fa’aro’ora’a e noa’a mai te tahi tino moni rahi ia rātou i Salem, ’ua rātere atu ra te peropheta, ’o Sidney Rigdon, ’o Hyrum Smith, ’e ’o Oliver Cowdery i reira, mai Kirtland (Ohio) mai, nō te titorotoro i te reira, ’e ma te poro haere i te ’evanelia i roto i taua tere ra. ’Ua fa’aoti te mau taea’e e rave rahi ’ohipa nā te ’Ēkālesia ’e ’ua poro ato’a i te ’evanelia. I tō rātou ’itera’a ē ’aita e moni e fāri’ihia, ’ua ho’i atu rātou i Kirtland. E rave rahi mea faufa’a rahi nō ni’a i teie heheura’a tei fa’a’itehia i roto i teie heheura’a.
1–5, ’Ua tauturu te Fatu i te mau hina’aro pae tino o tōna mau tāvini ; 6–11, E tauturu maita’i mai ’oia ia Ziona ’e e fa’anahonaho ’oia i te mau mea ato’a nō te maita’i o tōna mau tāvini.
1 ’Aita vau, ’o te Fatu tō ’outou Atua, i au ’ore i tō ’outou haerera’a mai i teie tere nei, noa atu tā ’outou mau hapehape.
2 E rave rahi tā’u tao’a nā ’outou i roto i teie ’oire, ’ei maita’i nō Ziona, ’e e rave rahi ho’i te ta’ata i roto i teie nei ’oire, ’o tā’u e ha’aputuputu atu i te tau au ra ’ei maita’i nō Ziona, ’e ’o ’outou te mauha’a nō te ravera’a i te reira.
3 Nō reira, e mea ti’a ïa ’ia ha’amātau atu ’outou i te mau ta’ata i roto i teie nei ’oire, mai te au i te arata’ihia atu ia ’outou na, ’e mai te au ho’i i te hōro’ahia atu ia ’outou na.
4 ’E a muri a’era i te tau au ra e hōro’a atu vau i teie nei ’oire i roto i tō ’outou rima, ’ia noa’a ho’i ia ’outou te mana i ni’a iho i te reira, ’ia ’ore roa rātou ’ia ’ite mai i tā ’outou mau tufa’a huna ra ; e riro mai te reira tao’a ia ’outou na, te ’auro ’e te ’ārio ra.
5 ’Eiaha ’outou e ha’ape’ape’a nō ni’a i tā ’outou mau tārahu, nō te mea e hōro’a atu vau i te mana ia ’outou nō te ’aufau i te reira.
6 ’Eiaha ’outou e ha’ape’ape’a nō ni’a ia Ziona, nō te mea e tauturu maita’i atu vau iāna.
7 ’A tīa’i ri’i mai i teie nei vāhi, ’e i roto ho’i i te mau retioni ē ’ati noa a’e ;
8 ’E te vāhi tā’u i hina’aro ia ’outou ’ia tīa’i ri’i, nō te pae rahi o te taime, e fa’a’itehia mai ïa ia ’outou nā roto i te hau ’e te mana o tō’u nei Vārua, ’o tē fa’ataehia atu ia ’outou na.
9 ’O teie vāhi nei e noa’a ïa ia ’outou nā roto i te tārahu. ’E ’a ha’amāramarama māite ia ’outou nō ni’a i te mau ta’ata nō te tau tahito ra ’e te mau ta’ata tumu ho’i nō teie nei ’oire ;
10 Nō te mea ’ua hau a’e te mau tao’a i te tao’a hō’ē noa nā ’outou i roto i teie nei ’oire.
11 Nō reira, ’ia au ho’i tō ’outou pa’ari i tō te ’ōphī ra, ma te hara ’ore rā ; ’e e fa’anahonaho vau i te mau mea ato’a ’ei maita’i nō ’outou, i te taime e ti’a ai ia ’outou ’ia fāri’i i taua mau mea ra. ’Āmene.