1 ’Oia mau tē nā ’ō mai nei te Fatu ia ’oe, e tō’u tāvini e Thomas : ’Ua fa’aro’o vau i tā ’oe mau pure ; ’e ’ua tae mai tā ’oe mau tao’a aroha iā’u nei ’ei ha’amana’ora’a i mua iā’u nei, nō rātou, ’o tō ’oe mau taea’e, ’o tei mā’itihia nō te hōpoi i te ’itera’a pāpū nō tō’u nei i’oa, ’e nō te ha’aparare i te reira i rotopū i te mau nūna’a ato’a, te mau ’ōpū, te mau reo, ’e te mau ta’ata ato’a, ’e tei fa’atōro’ahia nā roto i te ’ohipa a tō’u mau tāvini.

2 ’Oia mau tē parau atu nei au ia ’oe na, i vai na ho’i te tahi mau mea ri’i i roto i tō ’oe ’ā’au ’e ia ’oe na ho’i ’o ta’u, tā te Fatu, i ’ore i māuruuru roa.

3 Noa atu rā, nō te mea ’ua fa’aha’eha’a ’oe ia ’oe iho, e fa’ateiteihia ïa ’oe ; nō reira, ’ua fa’a’orehia tā ’oe mau hara ato’a.

4 ’A fa’aitoito i tō ’oe ’ā’au i mua i tō’u nei mata ; ’e ’ia fa’a’ite pāpū atu ’oe i te parau nō tō’u nei i’oa, ’eiaha i te mau ’Ētene ana’e, i te mau ’āti Iuda ato’a ra ; ’e ’ia fa’atae atu ’oe i tā’u parau i te mau hope’a o te ao nei.

5 Nō reira, e ’aro noa ’oe i terā po’ipo’i ’e i terā po’ipo’i ; ’e i terā mahana ’e i terā mahana ’a fa’atae atu i tō ’oe reo fa’aara ; ’e ’ia tae i te pō, ’eiaha tō te ao nei ’ia ta’oto, nā roto i tā ’oe parau.

6 ’Ia ’itehia tō ’oe vāhi pārahira’a i Ziona, ’e ’eiaha e fa’anu’u atu i tō ’oe fare ; nō te mea e ’ohipa rahi tā’u, tā te Fatu, nā ’oe nō te rave, nō te ha’apararera’a atu i tō’u i’oa i rotopū i te mau tamari’i a te ta’ata nei.

7 Nō reira, ’a tātua na i tō tau’upu nō te ’ohipa. ’E ’a tāmau ato’a i te tāma’a i tō ’oe ’āvae, nō te mea ’ua mā’itihia ’oe, ’e tei rotopū i te mau mou’a tō ’oe ’ē’a e i rotopū i te mau nūna’a e rave rahi.

8 ’E nā roto i tā ’oe parau e fa’aha’eha’ahia te mau ta’ata ti’ara’a teitei e rave rahi ; ’e nā roto i tā ’oe parau e rave rahi ta’ata ti’ara’a ha’eha’a ’o tē fa’ateiteihia.

9 E riro tō ’oe reo ’ei ’avaura’a i te ta’ata ’ōfati ture ; ’e i tā ’oe ’avaura’a e tāpe’ahia atu te arero o te ta’ata tihotiho parau i tāna ’ohipa au ’ore.

10 ’Ia vai ha’eha’a noa ’oe ; ’e nā te Fatu tō ’oe Atua e arata’i ia ’oe nā te rima, ’e e hōro’a atu ia ’oe te pāhonora’a i tā ’oe mau pure.

11 ’Ua ’ite au i te huru o tō ’oe ’ā’au, ’e ’ua fa’aro’o vau i tā ’oe mau pure nō ni’a i tō ’oe mau taea’e. ’Eiaha ’ia hau atu tō ’oe here ia rātou i tō ’oe here ia vetahi ’ē atu, ’ia au rā tō ’oe here ia rātou mai tō ’oe here ia ’oe iho na ; ’e ’ia here ho’i ’oe i te mau ta’ata ato’a, ’e ’ia rātou ato’a ’o tei here i tō’u nei i’oa.

12 ’E ’a pure nō tō ’oe mau taea’e nō te Tino ’Ahuru Ma Piti. ’A a’o pūai atu ia rātou nō tō’u nei i’oa, ’e ’ia a’ohia rātou nō tā rātou mau hara ato’a, ’e ’ia vai itoito noa ’oe i mua iā’u nei, ’e i tō’u nei i’oa.

13 ’E i muri a’e i tō rātou mau fa’ahemara’a, ’e te mau ’ati rahi e rave rahi ra, inaha, nā’u, nā te Fatu, e tauturu atu ia rātou, ’E mai te mea ’aita rātou e fa’a’eta’eta i tō rātou ’ā’au, ’e tō rātou ’a’ī ho’i iā’u nei, e fa’afāriuhia mai rātou, ’e e fa’aora vau ia rātou.

14 I teienei, tē parau atu nei au ia ’oe, ’e ’o tā’u e parau atu nei ia ’oe ra, ’o tā’u ato’a ïa e parau atu nei i te Tino ’Ahuru Ma Piti : ’A ti’a mai i ni’a ’e ’a tātua na i tō ’outou tau’upu, ’a rave i tō ’outou sātauro, ’a pe’e mai iā’u nei, ’e ’a fa’a’amu i tā’u mau māmoe.

15 ’Eiaha e fa’ateitei ia ’outou iho ; ’eiaha e ’ōrurehau i tō’u tāvini ia Iosepha ; nō te mea ’oia mau tē parau atu nei au ia ’outou na, tei pīha’i iho vau iāna, ’e e vai noa tō’u rima i ni’a a’e iāna ; ’e te mau tāviri tā’u i hōro’a atu iāna ’e ia ’outou ato’a, e ’ore roa ïa e rave-’ē-hia atu mai iāna ē tae noa atu i te taime au e tae mai ai.

16 ’Oia mau tē parau atu nei au ia ’oe na, e tō’u tāvini e Thomas, ’o ’oe te ta’ata tā’u i mā’iti nō te Tino ’Ahuru Ma Piti, ’ia mau i te mau tāviri nō tō’u bāsileia i te ātea, i rotopū i te mau nūna’a ato’a—

17 ’Ia riro ’oe ’ei tāvini nō’u nō te ’īriti i te ’ūputa nō te bāsileia i te mau vāhi ato’a ’o tē ’ore e ti’a i tō’u tāvini ia Iosepha, e tō’u tāvini ia Sidney, ’e i tō’u tāvini ia Hyrum, ’ia haere mai ;

18 Nō te mea ’ua tu’u vau i te hōpoi’a nō te mau ’ēkālesia ato’a i ni’a ia rātou nō te hō’ē tau poto noa.

19 Nō reira, i te mau vāhi ato’a tā rātou e tono atu ia ’oe na, ’a haere atu ïa ’oe, ’e tei pīha’i iho vau ia ’oe na, ’e i te mau vāhi ato’a tā ’oe e poro i tō’u nei i’oa e ’īritihia mai ïa te ’ūputa manuia ia ’oe na, ’ia ti’a ia rātou ’ia fāri’i i tā’u parau.

20 ’O tē fāri’i mai i tā’u parau ra e fāri’i mai ïa iā’u nei, ’e ’o tē fāri’i mai iā’u nei ra, ’ua fāri’i mai ïa ia rātou, ’oia ho’i i te Peresidenira’a Mātāmua, ’o tā’u i tono atu, ’e ’o tā’u ho’i i fa’ariro ’ei mau fa’aa’o nō tō’u nei i’oa ia ’oe na.

21 ’E teie fa’ahou ā, tē parau atu nei au ia ’oe, ’e ’o rātou ’o tā ’oe e tono atu i tō’u nei i’oa, nā roto i te reo o tō ’oe mau taea’e, te Tino ’Ahuru Ma Piti, ’o tei fa’aau-maita’i-hia ’e ’o tei ha’amanahia ho’i e ’oe na, e noa’a ia rātou te mana nō te ’īriti i te ’ūputa nō tō’u bāsileia i te mau nūna’a ato’a ’o tā ’oe e tono atu ia rātou ra—

22 Mai te mea e fa’aha’eha’a rātou ia rātou iho i mua iā’u nei, ma te ha’apa’o i tā’u parau, ’e ma te fa’aro’o i te reo nō tō’u nei Vārua.

23 ’Oia mau, ’oia mau, tē parau atu nei au ia ’oe, ’ua tāpo’ihia te ao nei i te pōiri, ’e te ferurira’a o te ta’ata i te pōiri ta’ota’o, ’e ’ua riro te mau mea ora ato’a ’ei mea vi’ivi’i i mua i tō’u nei aro.

24 Inaha, e tae ’oi’oi mai te tāho’o i ni’a i te mau ta’ata o te ao nei, ’ei mahana nō te riri ’ū’ana, ’ei mahana nō te ’amara’a i te auahi, ’ei mahana fa’aanora’a, nō te mihi, te ’oto, ’e nō te auēra’a ; ’e e tae mai te reira i ni’a i te ao tā’āto’a nei mai te pūāhiohio te huru, tē nā reira mai nei te Fatu.

25 ’E ’ei ni’a iho i tō’u fare te reira e ha’amata ai, ’e mai tō’u nei fare te reira e haere atu ai, tē nā reira mai nei te Fatu ;

26 I te pae mātāmua i rotopū ia rātou ’o tei rotopū ia ’outou na, ’o tei parau noa mai ē, ’ua ’ite rātou i tō’u nei i’oa, tē nā reira mai nei te Fatu, ’e ’aore ho’i i ’ite mai iā’u nei, ’e ’ua fa’a’ino ho’i iā’u nei i roto i tō’u nei fare, tē nā reira mai nei te Fatu.

27 Nō reira, ’eiaha roa ’outou e ha’ape’ape’a ia ’outou iho nō ni’a i te mau ’ohipa o tā’u ’ēkālesia i teie nei vāhi, tē nā reira mai nei te Fatu.

28 Terā rā, ’a tāmā roa i tō ’outou ’ā’au i mua iā’u nei ; ’ei reira, ’a haere ’outou nā roto i te ao ato’a nei, ’e ’a poro haere i tā’u ’evanelia i te mau ta’ata ato’a ’o tei ’ore ā i fāri’i i te reira ;

29 ’E ’o ’oia ’o tē ti’aturi ’e ’ua bāpetizohia, e fa’aorahia ïa ; ’e ’o ’oia ’o tē ’ore e ti’aturi, ’e ’o tē ’ore ho’i e bāpetizohia ra, e fa’ahapahia ïa.

30 Nō te mea ia ’outou na, te Tino ’Ahuru Ma Piti, ’e ia rātou, te Peresidenira’a Mātāmua, ’o tei fa’ata’ahia ’ia riro ’ei mau fa’aa’o ’e ’ei mau arata’i nō ’outou, ’ua hōro’ahia atu te mana nō teie nei autahu’ara’a nō te mau mahana hope’a nei ’e nō te taime hope’a, tei roto i te reira te tau tu’ura’a ’evanelia nō te ’īra’a o te mau tau,

31 ’O te reira mana ïa tā ’outou e mau nei, ’e o tā rātou ato’a ’o tei fāri’i i te tau tu’ura’a ’evanelia i te hō’ē noa atu taime mai te ha’amatara’a mai o te hāmanira’ahia te mau mea ato’a ra ;

32 Nō te mea ’oia mau tē parau atu nei au ia ’outou na, te mau tāviri nō te tau tu’ura’a ’evanelia tā ’outou i fāri’i, ’ua tae mai ïa nā roto mai i te mau metua, ’e i te hope’a ra, ’ua ’āfa’ihia mai mai te ra’i mai ia ’outou na.

33 ’Oia mau tē parau atu nei au ia ’outou na, inaha e pi’ira’a rahi teie nō ’outou. ’A tāmā nā ’outou i tō ’outou ’ā’au ’e tō ’outou mau ’ahu, ’ia ’ore te toto o teie nei u’i ’ia tītauhia mai i ni’a i tō ’outou mau rima.

34 ’A ha’apa’o maita’i ē tae noa atu i te taime au e tae mai ai, nō te mea e tae ’oi’oi mai au ; ’e tei iā’u nei tā’u utu’a nō te ha’amāuruuru i te ta’ata ato’a mai te au i tāna iho ’ohipa. ’O Alepha ’e Omega vau. ’Āmene.