Tufa’a 113
Te mau pāhonora’a nō te tahi mau uira’a nō ni’a i te mau pāpa’ira’a a Isaia, tei hōro’ahia mai e Iosepha Semita te peropheta, i Far West, i Missouri ’e ’aore rā te mau vāhi tāpiri mai, i te ’āva’e Māti 1838.
1–6, ’Ua fa’a’ite-pāpū-hia mai te tumu o Iese, te tupura’a mai te ohi nō roto mai i te reira, ’e te a’a nō Iese ; 7–10, E ti’ara’a tō te mau toe’a o Ziona i ha’apurarahia ’ia fāri’i i te autahu’ara’a ’e ’ia pi’ihia nō te ho’i atu i te Fatu.
1 ’O vai te tumu o Iese ’o tei parauhia i roto i te mau ’īrava 1, te 2, te 3, te 4, ’e te 5 nō te pene 11 nō Isaia ?
2 ’Oia mau tē nā ’ō mai nei te Fatu ē : ’O te Mesia ïa.
3 E aha te ohi i parauhia i roto i te ’īrava mātāmua nō te pene 11 nō Isaia, ’o tē tupu mai nō roto i te tumu ra o Iese ?
4 Inaha, tē nā ’ō mai nei te Fatu : ’O te hō’ē ïa tāvini i roto i nā rima o te Mesia, e hua’ai vaeha’a nō Iese ’e nō Epheraima ato’a ho’i, ’oia ho’i nō te ’utuāfare o Iosepha, ’e ’ua tu’uhia i ni’a iho iāna te mana rahi.
5 E aha te a’a nō Iese i parauhia i roto i te ’īrava 10 nō te pene 11 ?
6 Inaha, tē nā ’ō mai nei te Fatu, e hua’ai te reira nō Iese, ’e nō Iosepha ato’a, tei iāna te ti’ara’a nō te autahu’ara’a, ’e te mau tāviri nō te bāsileia, nō te hō’ē reva, ’e nō te ha’aputuputura’a mai i tō’u mau ta’ata i te mau mahana hope’a.
7 Te mau uira’a a Elias Higbee : E aha te aura’a nō te fa’auera’a i roto i te Isaia, pene 52, ’e te ’īrava mātāmua, ’o tei nā ’ō mai ē : ’A ’ahu na i tō pūai e Ziona—’e ’o vai ïa te feiā tā Isaia e parau ra ?
8 Tē parau ra ’oia nō ni’a ia rātou ’o tā te Atua e mā’iti i te mau mahana hope’a nei, ’o tē mau i te mana nō te autahu’ara’a nō te fa’aho’i mai ia Ziona, ’e nō te fa’aora ia ’Īserā’ela ; ’e te ’ahura’a i tōna pūai ra, ’o tē ravera’a ïa i te ha’amanara’a nō te autahu’ara’a, ’o tāna, ’oia tā Ziona e fāri’i nā roto i te hua’ai ; ’e ’oia ato’a nō te fa’aho’i mai i te reira mana ’o tei mo’e iāna.
9 E aha tā tātou e māramarama nei nō ni’a i tō Ziona tātarara’a iāna iho i te mau tā’amu i ni’a i tōna ’a’ī ; i roto i te ’īrava piti ?
10 ’O teie tā tātou e māramarama nei, ’oia ho’i, tē tītauhia nei te mau toe’a i ha’apurara-’ē-hia ’ia ho’i mai i te Fatu nō reira atu rātou i te hi’ara’a atu ; ’e mai te mea e nā reira rātou, ’o teie tā te Fatu fafaura’a ia rātou, ’oia ho’i, e paraparau atu ’oia ia rātou, ’e ’aore rā e hōro’a atu ’oia i te heheura’a ia rātou. Hi’o i te ’īrava 6, te 7, ’e te 8. Te mau tā’amu i ni’a i tōna ra ’a’ī, ’o te mau ’anatemara’a ïa a te Atua i ni’a iāna, ’oia ho’i i te mau toe’a nō ’Īserā’ela i roto i tō rātou huru ha’apurarara’ahia i rotopū i te mau ’Ētene.