Tufa’a 119
E heheura’a tei hōro’ahia mai nā roto ia Iosepha Semita te peropheta, i Far West, i Missouri, i te 8 nō Tiurai 1838, ’ei pāhonora’a i teie anira’a : « E te Fatu, ’a fa’a’ite mai na i tō ’oe nei mau tāvini i te rahira’a ’o tā ’oe e tītau i te faufa’a a tō ’oe mau ta’ata ’ei tufa’a ’ahuru ». Te ture nō te tufa’a ’ahuru, mai te au i tei māramaramahia i teie mahana, ’ua hōro’ahia mai ïa i te ’Ēkālesia nā mua roa i teie heheura’a. Te parau nō te tufa’a ’ahuru i roto i te pure i fa’ahitihia iho nei ’e i roto i te mau heheura’a nā mua atu (64:23 ; 85:3 ; 97:11) e ’ere ïa i te hō’ē ana’e ’ahurura’a, i te tā’āto’ara’a rā o te mau ō ’e te mau faufa’a i hōro’ahia i roto i te ’āfata moni a te ’Ēkālesia nā roto i te hina’aro mau. ’Ua hōro’a te Fatu nā mua roa i te ’Ēkālesia i te ture nō te ha’amo’ara’a ’e te ti’a’aura’a nō te faufa’a, ’o tā te mau melo (te mau peresibutero fa’atere) i fafau nō te ha’apa’o ’e tei riro ’ei mea mure ’ore. Nō te manuia ’ore o te mau ta’ata e rave rahi ’ia ha’apa’o i teie fafaura’a, ’ua fa’a’ore te Fatu i te reira nō te hō’ē taime ’e ’ua hōro’a mai ’oia i te ture nō te tufa’a ’ahuru i tō te ’Ēkālesia pā’āto’a. ’Ua ani atu te peropheta i te Fatu e aha te rahira’a nō tā rātou faufa’a ’o tāna e hina’aro nō teie mau ’ōpuara’a mo’a. Te pāhonora’a ’o teie ïa heheura’a.
1–5, ’Ua tītauhia te feiā mo’a ’ia ’aufau i tā rātou mau faufa’a hau atu i tei hina’arohia ’e i muri iho ’ia hōro’a atu ’ei tufa’a ’ahuru te ’ahurura’a nō tā rātou faufa’a nō te matahiti ; 6–7, Nā te reira ravera’a e ha’amo’a i te fenua nō Ziona.
1 ’Oia mau, tē nā ’ō mai nei te Fatu, tē tītau nei au i tā rātou mau faufa’a hau, ’ia tu’uhia atu i roto i te rima o te ’episekōpo nō tā’u ’ēkālesia i Ziona ra,
2 Nō te hāmanira’a i tō’u fare, ’e nō te patura’a i te niu o Ziona, ’e nō te autahu’ara’a, ’e nō te mau tārahu a te Peresidenira’a o tā’u ’Ēkālesia.
3 ’E e riro teie ’ei ha’amatara’a nō te tufa’a ’ahuru a tō’u mau ta’ata.
4 ’E ’ia oti te reira, ’o rātou ’o tei ’aufau i te ’ahurura’a mai te reira, e ’aufau ïa rātou i te tufa’a ’ahuru nō te ’āpī o tā rātou faufa’a e noa’a mai i te mau matahiti ato’a ; ’e e riro teie ’ei ture tumu ia rātou ē a muri noa atu, nō tō’u autahu’ara’a mo’a, tē nā reira mai ra te Fatu.
5 ’Oia mau tē parau atu nei au ia ’outou na, ē muri a’era, ’o rātou ato’a ’o tē ha’aputuputu mai i te fenua nō Ziona ’ia ’aufau ïa rātou i te ’ahurura’a i te mau faufa’a ato’a ’o tē ’ore e pau ia rātou ra, ’e ’ia ha’apa’o ho’i rātou i teie nei ture, ’e ’ia ’ore rā, e ’ore ïa rātou e riro ’ei mea ti’amā nō te pārahi i rotopū ia ’outou na.
6 ’E tē parau atu nei au ia ’outou na, mai te mea ē ’aita tō’u mau ta’ata e ha’apa’o i taua nei ture, nō te ha’amo’a noa i te reira, ’e nā roto i teie nei ture e ha’amo’a mai i te fenua nō Ziona iā’u nei, ’ia ti’a i tā’u mau ture ’e tō’u mau hina’aro ’ia ha’apa’ohia i reira, ’ia riro ho’i te reira ’ei mea mo’a roa, inaha, ’oia mau tē parau atu nei au ia ’outou na, e ’ore roa te reira e riro ’ei fenua nō Ziona ia ’outou na.
7 ’E e riro ho’i teie ’ei hōho’a nō te mau titi ato’a nō Ziona. ’Oia ïa. ’Āmene.