1 ’E teie fa’ahou ā, ’ua hina’aro mātou ’ia feruri ’outou i te ti’ara’a o te feiā mo’a ato’a ’ia ha’aputuputu mai i te parau mau nō ni’a i te mau mea tei tupu, ’e te mamae rahi ’e te mau hāmani-’ino-ra’a i tu’uhia mai i ni’a iho ia rātou e te mau ta’ata nō teie nei Tufa’a Fenua ;

2 ’E nō ni’a i te faufa’a tā’āto’a ’e te rahira’a ho’i nō te mau ’ino ato’a tā rātou i fāri’i nō ni’a i te ro’o maita’i ’e te hāmani-’ino-ra’a i te tino iho, ’e i te faufa’a nō te pae fenua ’e te mau fare ;

3 ’E te mau i’oa ato’a ’o tē noa’a ia rātou, ’e ’o te ’itehia e rātou ra, nō te mau ta’ata ato’a ’o tei ’āmui atu i te hāmani-’ino-ra’a ia rātou.

4 ’E penei a’e paha e ti’a ’ia fa’ata’ahia te hō’ē tōmite nō te ’imi māite i te ’ite nō ni’a i teie nei mau mea, ’e nō te rave ho’i i te mau parau fa’a’ite ’e te mau parau pāpa’i i ha’amanahia ra ; ’e nō te ha’aputuputu mai ho’i i te mau pāpa’ira’a ha’avare i nene’ihia ’o tē vai nei ;

5 ’E te mau mea ato’a i roto i te mau ve’a, ’e i roto i te mau buka tātarara’a parau, ’e te mau buka tuatāpapara’a ha’avare i nene’ihia ra, ’e ’o tē pāpa’ihia nei, ’e nā vai ho’i i pāpa’i, ’e ’a fa’a’ite atu ai i te tā’āto’ara’a o te mau mana’o diabolo ’e te mau ’ohipa ’ino rahi ’e te mau hāmani-’ino-ra’a taparahi ta’ata ’o tei ravehia i ni’a i teie nei feiā—

6 ’Ia ti’a ia tātou ’ia ha’aparare atu i te reira i tō te ao pā’āto’a nei, ’e ’ia ti’a ato’a ia tātou ’ia fa’a’ite i te reira i te mau upo’o fa’atere nō te hau i roto i tō rātou huru pōiri diabolo ato’a ra, ’ei tāmatara’a hope’a i tītauhia mai ia tātou nei e tō tātou Metua i te ao ra, hou roa e ti’a ai ia tātou ’ia tītau atu i taua fafaura’a ra ’o tē fa’atae mai iāna mai roto mai i tōna vāhi tāpunira’a ra ; ’e ’ia vai te nūna’a pā’āto’a ma te ’ōtohe ’ore hou ’oia e tono mai ai i te mana o tōna ra rima pūai.

7 E hōpoi’a te reira nā tātou i te Atua, ’e i te mau melahi ; ’e e ’āfa’ihia atu tātou nō te ti’a i mua ia rātou ; e hōpoi’a ato’a tā tātou ia tātou iho, i tā tātou mau vahine fa’aipoipo ’e i te mau tamari’i, ’o tei ha’api’ohia atu i raro i te mihi, te ’oto, ’e te pe’ape’a ; i raro a’e i te rima fa’ahapa o te feiā taparahi ta’ata, te fa’ahepora’a ’e te hāmani-’ino-ra’a, i turuhia, i fa’aitoitohia ’e i fa’ati’ahia ho’i e te mana o taua vārua ra ’o tei ha’amau pūai i te parau tutu’u a te mau metua, ’o tei fāri’i i te mau parau ha’avare, i roto i te ’ā’au o te mau tamari’i, ’e ’ua fa’a’ī ho’i i te ao nei i te ’āhuehue, ’e tē tupu noa nei i te pūai, ’e ’ua riro ho’i te tumu mau nō tei vi’ivi’i ato’a ra, ’e te ’ū’uru nei te ao pā’āto’a nei i raro a’e i te teiahara’a nō te ’ohipa ’ī’ino o te reira.

8 E zugo ’āuri te reira, ’e e tāpe’ara’a pūai roa ; ’ua riro te reira ’ei mau pōnao rima, ’ei mau fifi, ’ei mau ’āuri tāmaura’a, ’e ’ei mau tāpe’ara’a ho’i nō hade.

9 Nō reira e hōpoi’a ïa nā tātou, ’eiaha i tā tātou ana’e iho mau vahine fa’aipoipo ’e mau tamari’i, i te mau vahine ’ivi rā ’e i te mau tamari’i metua ’ore ato’a, ’o tei taparahihia tā rātou mau tāne fa’aipoipo ’e tō rātou ho’i mau metua tāne i raro a’e i te rima ’āuri nō te reira ;

10 ’O taua mau ’ohipa pōiri ’e te ’ere’ere ra, e au ïa i te fa’atupu i te rurutaina o hade iho, ’e ’ia ti’a mehameha noa mai ma te māhe’ahe’a ra, ’e ’ia rurutaina roa ’e ’ia ’āueue te rima o te diabolo.

11 E hōpoi’a faufa’a mau ato’a ïa nā tātou i te u’i pā’āto’a ’o tē tupu mai nei, ’e i te feiā mā i te ’ā’au ato’a ho’i—

12 Nō te mea tē vai nei ā te mau ta’ata e rave rahi i ni’a i te fenua nei i rotopū i te mau ha’apa’ora’a ato’a, te mau pupu, ’e te mau huru ’ēkālesia, ’o tei ha’amatapōhia nā roto i te ’ohipa ha’avare a te ta’ata nei, ’o tē tīa’i nei nō te ha’avare atu, ’e ’o tei fa’a’erehia i te parau mau nō te mea ’aita rātou i ’ite i te vāhi te reira e ’itehia mai ai—

13 Nō reira, ’ia fa’a’ohipa hope roa tātou i tō tātou orara’a nō te ’āfa’i mai i roto i te māramarama te mau mea i hunahia i roto i te pōiri, i roto i te reira tātou e ’ite ai i taua mau mea ra ; ’e ’ua fa’a’ite-mau-hia te reira mai te ra’i mai—

14 E mea ti’a roa ’ia ha’apa’ohia taua mau mea nei ma te mana’o pāpū roa.

15 ’Eiaha te ta’ata ’ia mana’o ē, e mau mea faufa’a iti te reira ; nō te mea e rave rahi te mau mea i mua roa ia tātou, nō ni’a i te feiā mo’a, ’o tē tupu mai mai te mea e ha’apa’ohia teie mau mea.

16 ’Ua ’ite ’outou, e te mau taea’e, e tauturu-mau-hia te hō’ē pahī rahi e te hō’ē hoe iti roa i te taime nō te hō’ē vero, nā roto i te tāpe’ara’a i taua pahī ra i roto i te mata’i ’e te mau ’are miti.

17 Nō reira, e te mau taea’e here ē, ’ia rave ’ana’anatae tātou i te mau mea ato’a i roto i tō tātou mana ; ’ei reira e ti’a ai ia tātou ’ia ti’a mai ma te ti’aturi pāpū roa, nō te ’ite i te fa’aorara’a a te Atua, ’e nō te fa’a’itera’ahia mai tōna ra rima.