1 Nō te mea ’ua heheu mai te Fatu iā’u nei ’e tē tāpapa fa’ahou mai ra tō’u mau ’enemi iā’u, i Missouri ’e i teie Tufa’a fenua ato’a ; ’e nō te mea tē tāpapa mai nei rātou iā’u nei ma te tumu ’ore, ’e ’aita ho’i tā rātou e vāhi iti a’e nō te parauti’a ’e te ti’a i tō rātou ra pae’au i te fa’atupura’a i tā rātou mau horora’a iā’u nei ; ’e nō te mea ’ua fa’atumu-pau-roa-hia tā rātou mau parira’a i ni’a i te ha’avare pōiri ra, ’ua mana’o ïa vau e mea ti’a ’e e mea pa’ari i roto iā’u nei ’ia fa’aru’e atu i teie vāhi nō te hō’ē tau poto, nō te pāruru iā’u iho ’e i teie nei feiā ato’a. Tē hina’aro nei au i te parau atu ia rātou ato’a e ’ohipa tā’u ia rātou ra, ’e ’ua vaiiho atu vau i tā’u mau ’ohipa i te mau ta’ata ha’apa’o ’e i te mau pāpa’i parau ’o tē rave i te mau ’ohipa ato’a ma te ’oi’oi ’e te ti’a ato’a, ’e e hi’o atu rātou ’ia fa’a’orehia atu tā’u mau tārahu ato’a i te taime au ra, nā roto i te hurira’a atu i te faufa’a, ’e ’aore rā nā roto i te tahi atu ā rāve’a, mai te au i tē tītauhia e te ’ohipa ra, ’e ’aore rā mai te au i tē fa’ati’ahia e te ’ohipa ra. ’Ia ’ite au ē ’ua pe’e ’ē roa atu te vero, ’ei reira vau e ho’i fa’ahou atu ai ia ’outou na.

2 ’E nō te mau ’ati tei tītauhia iā’u nei ’ia fa’a’oroma’i, e mea iti roa taua mau mea ra iā’u nei, nō te mea ’ua riro te fe’i’i ’e te riri o te ta’ata nei ’ei mau peu mātauhia iā’u nei i te mau mahana ato’a nō tō’u nei orara’a ; ’e e mea māere mau ’ia feruri e aha te tumu, maori rā ’ua fa’atōro’ahia na vau hou te fa’atumura’ahia o te ao nei nō te hō’ē ’ōpuara’a maita’i, ’e ’aore rā te mea ’ino, mai te au i tā ’outou e hina’aro i te parau i te reira. Nā ’outou iho e ha’avā. ’Ua ’ite te Atua i teie mau mea ato’a, e mea maita’i ānei te reira ’e ’aore rā e mea ’ino ānei. Terā rā noa atu te reira, ’ua mataro vau i te ’au i roto i te pape hōhonu. ’Ua riro taua mau mea ato’a ra ’ei mea mātauhia e au nei ; ’e tē mana’o nei au mai ia Paulo, ’ia ’oa’oa i roto i te ’ati rahi ; nō te mea ē tae roa mai i teie nei ā mahana, ’ua fa’aora noa te Atua nō tō’u ra mau metua iā’u nei mai roto mai i taua mau mea ato’a ra, ’e e fa’aora noa ā ho’i ’oia iā’u nei mai teie taime atu ā ; ’e inaha, ’e ’a hi’o na, e upo’oti’a ïa vau i ni’a a’e i tō’u mau ’enemi ato’a, nō te mea nā te Fatu ra te Atua i parau mai i te reira.

3 Nō reira, ’a tu’u atu i te feiā mo’a ato’a ’ia ’oa’oa, ’e ’ia rahi roa te ’oa’oa ; nō te mea ’o te Atua nō ’Īserā’ela tō rātou Atua, ’e e tāho’o atu ’oia i te utu’a tano i ni’a i te upo’o o te feiā ato’a ’o tē hāmani ’ino ia rātou ra.

4 ’E teie fa’ahou ā, ’oia mau tē nā ’ō mai nei te Fatu : ’Ia rave-noa-hia te ’ohipa nō ni’a i tō’u nei hiero, ’e te mau ’ohipa ato’a tā’u i fa’ata’a nā ’outou, ’e ’eiaha ho’i ’ia fa’aea ; ’e ’ia fa’arahihia atu tō ’outou itoito, ’e tō ’outou fa’aitoito-noa-ra’a, ’e tō ’outou fa’a’oroma’i, ’e tā ’outou mau ’ohipa ho’i, ’e e ’ore roa e mo’e atu ia ’outou tā ’outou utu’a maita’i tē nā reira mai nei te Fatu Sabaota ra. ’E mai te mea e hāmani ’ino rātou ia ’outou na, ’ua nā reira ato’a ïa rātou i te hāmani ’ino i te mau peropheta ’e te mau ta’ata parauti’a tei ora na nā mua atu ia ’outou na. Nō teie mau mea ato’a nei tē vai nei ïa te utu’a maita’i i te ra’i ra.

5 ’E teie fa’ahou ā, tē hōro’a atu nei au ia ’outou na i te hō’ē parau nō ni’a i te bāpetizora’a nō tō ’outou feiā i pohe.

6 ’Oia mau, tē nā ’ō mai nei te Fatu ia ’outou na nō ni’a i tō ’outou feiā i pohe ra : ’Ia bāpetizohia te hō’ē o ’outou nō tō ’outou feiā i pohe ra, ’ia fa’ata’ahia te hō’ē pāpa’i parau, ’e ’ia riro ’oia ’ei ’ite mata nō tā ’outou mau bāpetizora’a ; ’e ’ia fa’aro’o mai tōna tari’a, ’ia ti’a iāna ’ia fa’a’ite ma te parau mau, tē nā reira mai nei te Fatu ;

7 ’Ia ti’a i tā ’outou mau pāpa’ira’a ato’a ’ia pāpa’ihia i te ra’i ra ; ’o tā ’outou e ha’amau i ni’a i te fenua nei ’ia ha’amau-ato’a-hia ïa i te ra’i ra ; ’o tā ’outou e ha’amatara i ni’a i te fenua nei, ’ia ha’amatara-ato’a-hia ïa i te ra’i ra ;

8 Nō te mea ’ua fātata roa vau i te fa’aho’i atu i te mau mea e rave rahi i te fenua nei, nō ni’a i te autahu’ara’a, tē nā reira mai nei te Fatu Sabaota.

9 ’E teie fa’ahou ā, ’ia ha’apa’ohia te mau pāpa’a parau ato’a, ’ia ti’a i te reira ’ia tu’uhia atu i roto i te vaira’a pāpa’a parau nō tō’u hiero mo’a, ’e ’ia tāpe’a-noa-hia ’ei ha’amana’ora’a mai terā u’i ē tae noa atu i terā u’i, tē nā reira mai nei te Fatu Sabaota.

10 E parau atu vau i te feiā mo’a ato’a ē, ’ua hina’aro vau, ma te hina’aro rahi roa, ’ia a’o atu ia rātou mai mua atu i te purupiti nō ni’a i te parau tumu nō te bāpetizora’a nō te feiā i pohe, i te Sābati i mua nei. Terā rā, nō te mea ’aita tō’u e mana ’ia nā reira, e pāpa’i ïa vau i te parau a te Fatu i terā taime ’e i terā taime nō ni’a i taua parau tumu ra, ’e ’a ha’apono atu ho’i i te reira ia ’outou nā roto i te fare rata, ’e e nā reira ato’a vau i te tahi atu ā mau mea e rave rahi.

11 Tē fa’aoti nei au i tā’u rata i teienei, nō te mea ’aita atu e taime i teienei ; ’e tē vai ara noa nei te ’enemi, ’e mai te au ho’i i tā te Fa’aora i parau mai, tē haere mai nei te tamaiti ari’i nō teie nei ao, ’aita rā tāna e ’ohipa iā’u nei.

12 Inaha, tā’u pure i te Atua ’o teie ïa, ’ia fa’aorahia ’outou ato’a. ’E tē pāpa’i nei au i tō’u i’oa i raro nei, tō ’outou tāvini i roto i te Fatu, te peropheta ’e te hi’o nō Te ’Ēkālesia a Iesu Mesia i te Feiā Mo’a i te Mau Mahana Hope’a nei.