1 Nō te ha’amau i te ’itera’a pāpū o teie nei buka ’e te Buka a Moromona, tē fa’a’ite atu nei mātou i te taparahira’ahia ’o Iosepha Semita te peropheta, ’e Hyrum Smith te patereareha. ’Ua pupuhihia rāua i roto i te fare tāpe’ara’a i Carthage, i te 27 nō Tiunu 1844, fātata i te hora pae i te ahiahi, e te hō’ē pupu ta’ata ’ino—i pēnihia i te pēni ’ere’ere—hō’ē hānere ’e pae ’ahuru ta’ata e tae atu paha i te piti hānere, ’e e pupuhi tā rātou i roto i te rima. Nā mua ’o Hyrum i te pupuhihia, ’e ’ua topa atu ra ’oia i raro ma te hau, ’e ’ua pi’i ihora i te nā-’ō-ra’a ē : E ta’ata pohe au ! ’Ua ’ōu’a atu ra Iosepha nā roto atu i te ha’amāramarama, ’e ’ua pupuhi-pohe-roa-hia ’oia i tōna ’ōu’ara’a, ’e ’ua pi’i ihora ’oia i te nā-’ō-ra’a ē : E te Fatu tō’u Atua ! ’Ua pupuhi-fa’ahou-hia tō rāua tino i muri a’e i tō rāua pohera’a, ma te huru ri’ari’a rahi. ’Ua puta rāua tāta’itahi i nā ’ōfa’i pupuhi e maha.

2 ’O John Taylor ’e ’o Willard Richards, nā melo to’opiti nō te Tino ’Ahuru Ma Piti i roto i te piha i taua taime ra ; ’ua puta ’ino roa John Taylor i nā ’ōfa’i pupuhi e maha, ’ua ora mai rā ’oia i muri mai ; ’e ’o Willard Richards ra, nā roto i te tauturura’a a te Atua, ’ua ora mai ïa ’oia ’e ’aore hō’ē a’e ’āpo’o i roto i tōna ’ahu roa.

3 ’Ua rahi a’e tā Iosepha Semita, te Peropheta ’e te Hi’o a te Fatu i rave, maori rā ia Iesu ana’e, nō te fa’aorara’a i te ta’ata i roto i teie nei ao, i tā te hō’ē ta’ata ’ē atu ’o tei ora na i ni’a iho i teie nei ao. I roto i te ārea poto roa nō te piti ’ahuru matahiti ’ua fa’atae mai ’oia i te Buka a Moromona, ’o tāna i ’īriti nā roto i te hōro’a ’e te mana o te Atua, ’e nā roto iāna i nene’ihia ai te reira i ni’a i nā fenua ta’a ’ē e piti ; ’ua fa’atae atu ho’i ’oia i te īra’a o te ’evanelia mure ’ore, e vai ra i roto i taua buka ra, i nā tufa’a e maha nō te ao nei ; ’ua hōro’a mai ho’i ’oia i te mau heheura’a ’e te mau fa’auera’a i tu’uhia i roto i teie nei buka nō Te Ha’api’ira’a Tumu ’e te mau Fafaura’a, ’e e rave rahi atu ā mau parau mana pa’ari ’e mau ha’api’ira’a ’ei maita’i nō te mau tamari’i a te ta’ata nei ; ’ua ha’aputuputu mai ho’i ’oia e rave rahi tauatini feiā mo’a i te mau mahana hope’a nei, ’ua fa’atupu ’oia i te hō’ē ’oire rahi, ’e ’ua vaiiho mai ’oia i te hō’ē ro’o ’e te i’oa ho’i ’o tē ’ore roa e mou. E mea hanahana tōna orara’a, ’e e mea hanahana ho’i tōna pohera’a, i mua i te aro o te Atua ’e tōna ato’a ra mau ta’ata ; ’e mai te pae rahi o tō te Fatu feiā i fa’atāhinuhia i tahito ra, ’ua ha’amau ’oia i tōna tōro’a ’e tāna ’ohipa ho’i i tōna iho toto ; ’e ’ua nā reira ato’a tōna taea’e ’o Hyrum. I roto i te orara’a nei ’aita rāua i ’amaha atu te tahi i te tahi, ’e i roto i te pohera’a ’aita ho’i rāua i fa’ata’a-’ē-hia atu !

4 I tō Iosepha haerera’a i Carthage nō te tu’u atu iāna iho i te mau fa’ahuara’a tītaura’a nō te ture, e piti ’e ’aore rā e toru mahana hou tōna taparahira’ahia, ’ua parau ’oia : « Tē haere nei au mai te pinia māmoe ra i te vāhi taparahira’a ; terā rā tē vai hau noa nei ā vau mai te po’ipo’i i te tau māhanahana ra ; tē vai hau nei tō’u mana’o ma te fa’a’ino ’ore atu i te Atua, ’e i te mau ta’ata ato’a nei. E pohe au ma te hara ’ore, ’e e parauhia ïa no’u nei ē—’ua taparahi-’ōpua-’ino-mau-hia ’oia ».—I te reira iho po’ipo’i, i muri iho i tō Hyrum fa’aineinera’a ’ia haere—e parau ānei tātou i te vāhi taparahira’a ? ’oia mau roa, nō te mea ’o te reira iho ā tei ravehia—’ua tai’o ’oia i nā ’īrava parau i te pae hope’a nō te pene ’ahuru ma piti nō Etera, i roto i te Buka a Moromona, ’e ’ua ’ō’opi ihora i te ’api i te reira vāhi :

5 ’E i muri a’era ’ua pure atu ra vau i te Fatu ’ia hōro’a mai i te maita’i i te mau ’Ētene ’ia ti’a ia rātou ’ia fāri’i i te here. ’E i muri a’era ’ua nā ’ō mai ra te Fatu iā’u : Mai te mea ē ’aita te aroha mau i roto ia rātou ’aita ïa tō te reira e faufa’a ia ’oe na, ’ua ha’apa’o maita’i ho’i ’oe ; nō reira e tāmāhia tō ’oe na mau ’ahu. ’E nō te mea ho’i ’ua ’ite ’oe i tō ’oe paruparu, e fa’arirohia ïa ’oe ’ei mea pūai, ē tae noa atu i te pārahira’a i te vāhi ’o tā’u i fa’aineine i roto i te mau aora’i o tō’u ra Metua. ’E i teienei, tē parau nei au… i te mau ’Ētene, ’a pārahi, ’oia ïa, ’e tae noa atu ho’i i tō’u mau taea’e ’o tā’u i here, ē tae noa atu ’ua fārerei fa’ahou tātou i mua i te vāhi ha’avāra’a a te Mesia, ’e i reira te mau ta’ata ato’a e ’ite ai ē, ’aita tō’u mau ’ahu i pōra’o i tō ’outou ra toto. I teienei, ’ua pohe nā fa’a’ite parau, ’e ’ua ha’amanahia tā rāua fa’a’itera’a.

6 E maha ’ahuru ma maha matahiti tō Hyrum Smith i te ’āva’e Fepuare 1844, ’e e toru ’ahuru ma va’u matahiti tō Iosepha Semita i te ’āva’e Tītema 1843 ; e mai teie nei atu ā e ’āmuihia atu tō rāua i’oa i tō te feiā i taparahihia nō te pae fa’aro’o ; ’e e fa’aha’amana’ohia tō te mau nūna’a ato’a ’o tē tai’o i te Buka a Moromona e i teie ho’i buka nō Te Ha’api’ira’a Tumu ’e te mau Fafaura’a a te ’ēkālesia ’e ’ua ha’amani’ihia te toto maita’i roa a’e nō te tenetere hō’ē ’ahuru ma iva nō te ’āfa’i mai i taua nā buka ra nō te fa’aorara’a i te ao ’o tei ma’iri roa i raro ; ’e mai te mea e ti’a i te auahi ia ha’apaapaa i te tumu rā’au ota nō te hanahana o te Atua, e aha ïa te ’ōhie o te ’amara’a o te mau tumu rā’au marō nō te tāmā roa i te ’ō vine i te mea vi’ivi’i ra. ’Ua ora rāua nō te hanahana, ’ua pohe ho’i rāua nō te hanahana ; ’e ’o te hanahana ho’i tā rāua utu’a mure ’ore. Mai terā matahiti e i terā matahiti e pāpa’i-noa-hia tō rāua i’oa i mua i te hua’ai ’ei nā ’ōfa’i tao’a rahi nō tei ha’amo’ahia ra.

7 ’Aita rāua i ’ōfati i te ture mai te au i tei ha’apāpū-pinepine-hia nā mua a’e, ’ua tāpe’ahia rā rāua i roto i te fare tāpe’ara’a nā roto i te ’ōpuara’a huna a te feiā ’ōrurehau ’e te mau ta’ata parauti’a ’ore ; ’e tō rāua toto hara ’ore i ni’a iho i te tahua nō te fare tāpe’ara’a nō Carthage ra, e tītiro ’ā’ano roa te reira ’o tei tā’atihia atu i ni’a i te « Ha’apa’ora’a Momoni » ’o tē ’ore roa e ti’a ’ia pāto’ihia e te hō’ē noa atu tiripuna i ni’a i te fenua nei, ’e tō rāua toto hara ’ore i ni’a i te pāruru tāpa’o mana nō te Tufa’a Fenua nō Illinois, ’e te fafaura’a i ’ōfatihia e te hau nō te Tufa’a Fenua ’o tei parau-tapu-hia e te tāvana ra, e fa’a’itera’a ïa te reira ē e parau mau te ’evanelia mure ’ore ’o tē ’ore roa e ti’a i te ao pā’āto’a nei ’ia fa’ahapa mai ; ’e tō rāua toto hara ’ore i ni’a i te reva nō te ti’amāra’a, ’e i ni’a i te ture rahi nō te Hau Amui [nō Marite], e ve’a te reira nō te ha’apa’ora’a fa’aro’o a Iesu Mesia, ’o tē ha’aputapū i te ’ā’au o te mau ta’ata parauti’a nō te mau nūna’a ato’a ; ’e tō rāua toto hara ’ore i ’āpitihia atu i te toto hara ’ore o te mau ta’ata ato’a i pohe nō tō rātou fa’aro’o i raro a’e i te fata tā Ioane i ’ite ra, e pi’i atu te reira i te Fatu Sabaota ē tae noa atu i te taime ’oia e tāho’o ai i taua toto ra i ni’a i te fenua nei. ’Āmene.