Tufa’a 14
E heheura’a tei hōro’ahia mai nā roto ia Iosepha Semita te peropheta, ’ia David Whitmer, i Fayette, i New York, i te ’āva’e nō Tiunu 1829. ’Ua ’ana’anatae roa te ’utuāfare Whitmer i te ’īritira’a nō te Buka a Moromona. ’Ua fa’aea te peropheta i te fare o Peter Whitmer, metua, i reira ho’i ’oia i te fa’aeara’a ē tae noa atu i te taime i fa’aotihia ai te ’ohipa nō te ’īritira’a parau ’e i noa’a mai ai te parau fatura’a i ha’amanahia e te hau nō te reira buka. ’Ua fāri’i te mau tamari’i tamāroa tāta’itahi e to’otoru a Whitmer i te ’itera’a pāpū ē e parau mau te reira ’ohipa, ’e ’ua feruri hōhonu noa ihora rātou nō ni’a i tā rātou iho ’ohipa ’o tē ti’a ia rātou tāta’itahi ’ia rave. ’Ua hōro’ahia mai teie nei heheura’a ’e nā heheura’a e piti i muri nei (te tufa’a 15 ’e te 16) ’ei pāhonora’a i te reira anira’a, nā roto i te Urima ’e te Tumima. ’Ua riro David Whitmer i muri iho ’ei hō’ē o nā ’ite to’otoru nō te Buka a Moromona.
1–6, E fāri’i te feiā rave ’ohipa i roto i te ’ō vine i te fa’aorara’a ; 7–8, ’Ua riro te ora mure ’ore ’ei hōro’a rahi roa a’e nō te mau hōro’a a te Atua ; 9–11, Nā te Mesia i hāmani i te mau ra’i ’e te fenua nei.
1 Tē fātata mai nei te hō’ē ’ohipa rahi ’e te mea māere ho’i i te tupu mai i rotopū i te tamari’i a te ta’ata nei.
2 Inaha, ’o vau te Atua ; ’a ha’apa’o na i tā’u nei parau, e mea ora ’e te pūai ho’i, e mea ’oi a’e i te ’o’e mata piti, i te fa’ata’a-’ē-ra’a i te mau pona ivi ’e te puo ho’i ; nō reira, ’a ha’apa’o na i tā’u nei parau.
3 Inaha, ’ua teatea te ’āua ’e ’ua ineine roa nō te tau ’auhune ; nō reira, ’o tē hina’aro i te ’ō’oti ra, e māo’a ïa ’oia i tāna mauha’a ’ō’oti ma tōna pūai, ’e ’a ’ō’oti ai ’oi vai a’e te ao, ’ia ti’a iāna ’ia fāri’i mai i te fa’aorara’a mure ’ore nō tōna vārua i roto i te bāsileia o te Atua.
4 ’Oia ïa, ’o tē māo’a i tāna mauha’a ’ō’oti ’e ’a ’ō’oti ai, ’ua mā’itihia mai ïa ’oia e te Atua.
5 Nō reira, mai te mea e ani mai ’oe iā’u nei, e fāri’i ïa ’oe ; mai te mea e pātōtō mai ’oe, e ’īritihia atu ïa ia ’oe.
6 ’A ’imi i te mau rāve’a nō te fa’atupu ’e nō te ha’amau i tō’u Ziona. ’A ha’apa’o i tā’u mau fa’auera’a nō ni’a i te mau mea ato’a ra.
7 ’E mai te mea e ha’apa’o ’oe i tā’u mau fa’auera’a ’e e tāmau noa ē tae noa atu i te hope’a, e noa’a ïa ia ’oe te ora mure ’ore, ’o te hōro’a hau a’e ïa i te mau hōro’a ato’a a te Atua.
8 ’E mai te mea ē, e ani ’oe i te Metua nā roto i tō’u nei i’oa, nā roto i te fa’aro’o ’e te ti’aturi, e fāri’i ïa ’oe i te Vārua Maita’i, ’o tē hōro’a mai i te parau e ti’a ’ia parau atu, ’ia ti’a ia ’oe ’ia ti’a mai ’ei ’ite nō te mau mea tā ’oe e fa’aro’o ’e e ’ite ho’i, ’e ’ia ti’a ato’a ia ’oe ’ia fa’a’ite i te parau tātarahapa i teie nei u’i.
9 Inaha, ’o Iesu Mesia vau, te Tamaiti a te Atua Ora, ’o tei hāmani i te mau ra’i ’e te fenua nei ho’i, e māramarama ’o tē ’ore roa e ti’a ’ia hunahia i roto i te pōiri ;
10 Nō reira, ’ia fa’aho’i mai au i te īra’a o tā’u ’evanelia mai roto mai i te mau ’Ētene i te ’utuāfare o ’Īserā’ela e ti’a ai.
11 ’E inaha, ’o David ’oe, ’e ’ua mā’itihia ’oe nō te tauturu ; ’e mai te mea e nā reira ’oe ma te itoito, e ha’amaita’ihia ’oe i te pae vārua ’e i te pae tino ho’i, ’e e rahi roa tā ’oe utu’a maita’i. ’Āmene.