1 I teie nei, inaha, nō te mea tā ’oe, e tō’u tāvini e Oliver Cowdery, i hina’aro ’ia ’ite nō roto atu iā’u nei, nō reira tē hōro’a atu nei au i teie nei mau parau :

2 Inaha, ’ua fa’a’ite pinepine au ia ’oe nā roto i tō’u Vārua ē e parau mau iho ā te mau mea tā ’oe i pāpa’i ra ; nō reira ’ua ’ite ’oe ē e parau mau taua mau mea ra.

3 ’E mai te mea ē ’ua ’ite ’oe ē e parau mau taua mau mea nei, inaha, tē hōro’a atu nei au i te hō’ē fa’auera’a ia ’oe, ’ia ti’aturi i te mau mea i pāpa’ihia ra ;

4 Nō te mea ē tei roto i te reira te pāpa’ira’a nō te mau mea ato’a nō ni’a i te niu o tā’u ’ēkālesia, tā’u ’evanelia, ’e tā’u nei papa.

5 Nō reira, mai te mea e fa’ati’a mai ’oe i tā’u nei ’ēkālesia, i ni’a i te niu o tā’u ’evanelia ’e tā’u papa ho’i, e ’ore roa ’oe e noa’a i te mau ’ūputa o hade ra.

6 Inaha, tē tupu nei te ’ohipa ’ī’ino i te rahi i ni’a i te ao nei ; ’e ’ia fa’aitoitohia te mau tamari’i a te ta’ata nei ’ia tātarahapa e ti’a ai, tō te mau ’Ētene ’e tō te ’utuāfare o ’Īserā’ela ato’a ra.

7 Nō reira, nō te mea ’ua bāpetizohia ’oe e te rima o tō’u tāvini ra ’o Iosepha Semita, tamaiti, mai te au i tā’u i fa’aue atu iāna ra, nō reira ’ua fa’aoti ’oia i te mea tā’u i fa’aue iāna ra.

8 ’E i teienei, ’eiaha ’oe e māere i te mea ē ’ua mā’iti au iāna nō tā’u iho ’ōpuara’a, ’ua ’ite ho’i au i te reira ’ōpuara’a ; nō reira, mai te mea e itoito roa ’oia i te ha’apa’ora’a i tā’u mau fa’auera’a, e ha’amaita’ihia ’oia i te ora mure ’ore ; ’e ’o Iosepha ho’i tōna ra i’oa.

9 ’E i teienei, e Oliver Cowdery, tē parau atu nei au ia ’oe, ’e ia David Whitmer ato’a ho’i, nā roto i te fa’auera’a ; ’e inaha, tē fa’aue nei au i te mau ta’ata ato’a i te mau vāhi ato’a ’ia tātarahapa, ’e tē parau atu nei au ia ’ōrua, mai tā’u i nā reira atu i tā’u ’āpōsetolo ia Paulo. ’Ua mā’itihia ho’i ’ōrua i taua ato’a ra tōro’a i mā’itihia ai ’oia.

10 ’A ha’amana’o na ē e faufa’a rahi tō te mau vārua ta’ata i mua i te aro o te Atua.

11 Inaha ho’i, ’ua pohe te Fatu tō ’ōrua Tāra’ehara i te pohe tino ; nō reira, ’ua fāri’i ’oia i te mamae rahi nō te mau ta’ata ato’a, ’ia ti’a i te mau ta’ata ato’a ’ia tātarahapa ’e ’ia haere mai iāna ra.

12 ’E ’ua ti’afa’ahou mai ’oia mai te pohe mai, ’ia ti’a iāna ’ia arata’i mai i te mau ta’ata ato’a iāna ra, nā roto i te tātarahapa.

13 ’E ’auē ho’i te rahi o tōna ’oa’oa i te vārua ta’ata ’ia tātarahapa ra !

14 Nō reira, ’ua mā’itihia ’ōrua ’ia ti’aoro atu i te parau tātarahapa i teie nei feiā.

15 ’E mai te mea e hope tō ’ōrua pu’e mahana i te porora’a i te parau tātarahapa i teie nei mau ta’ata, ’e ’ia arata’i mai ’ōrua i te hō’ē noa a’e vārua ta’ata iā’u nei, ’auē ho’i tō ’ōrua ’oa’oa rahi i pīha’i iho iāna i roto i te bāsileia o tō’u Metua !

16 ’E i teienei, mai te mea e rahi tō ’ōrua ’oa’oa i te vārua ta’ata hō’ē a’e ’o tē arata’ihia mai e ’ōrua iā’u nei i roto i te bāsileia o tō’u Metua, e aha atu ā ïa te rahi o tō ’ōrua ’oa’oa mai te mea e arata’i mai ’ōrua e rave rahi atu ā mau vārua ta’ata iā’u nei !

17 Inaha, tei mua ia ’ōrua tā’u nei ’evanelia, ’e tā’u papa, ’e tā’u fa’aorara’a.

18 ’A ani atu i te Metua nā roto i tō’u nei i’oa nā roto i te fa’aro’o, ma te ti’aturi ē e hōro’ahia mai, ’e e fāri’i ïa ’ōrua i te Vārua Maita’i, ’o tē fa’a’ite mai i te mau mea ato’a ’o te au ’ia fa’a’itehia i te mau tamari’i a te ta’ata nei.

19 ’E mai te mea tē ’ere ra ’ōrua i te fa’aro’o, te ti’aturi, ’e te aroha mau, e ’ore roa ïa e ti’a ia ’ōrua ’ia rave i te hō’ē mea.

20 ’Eiaha e mārō i te hō’ē ’ēkālesia, maori rā i te ’ēkālesia a te diabolo.

21 ’A rave na i ni’a ia ’ōrua te i’oa nō te Mesia, ’e ’a parau i te parau mau ma te ha’apa’o maita’i.

22 ’E ’o rātou ato’a ’o tē tātarahapa ’e ’o te bāpetizohia i tō’u ra i’oa, ’oia ho’i ’o Iesu Mesia, ’e e ha’apa’o maita’i ē tae noa atu i te hope’a ra, ’o rātou ho’i ïa ’o tē fa’aorahia.

23 Inaha, ’o Iesu Mesia te i’oa tei hōro’ahia mai e te Metua, ’e ’aita atu e i’oa tei hōro’ahia mai e ora ai te ta’ata nei ;

24 Nō reira, ’ia rave te mau ta’ata ato’a i te i’oa ’o tei hōro’ahia mai e te Metua e ti’a ai, nō te mea e nā roto i taua i’oa ihora rātou e parauhia ai i te mahana hope’a ra ;

25 Nō reira, ’ia ’ore rātou ’ia ’ite i te i’oa e parauhia ai rātou ra, e ’ore roa ho’i ïa e noa’a ia rātou te hō’ē vāhi i roto i te bāsileia o tō’u Metua.

26 ’E i teienei, inaha, tē vai atu ra vetahi ’ē ’o tei mā’itihia nō te poro haere i tā’u ’evanelia, i te ’Ētene ’e i te ’āti Iuda ato’a ho’i ;

27 ’Oia ïa, e ’ahuru ma piti ; ’e e riro te Tino ’Ahuru Ma Piti ’ei mau pipi nā’u, ’e e rave ho’i rātou i tō’u nei i’oa i ni’a ia rātou ; ’e ’o te Tino ’Ahuru Ma Piti, ’o rātou ïa ’o tē hina’aro ’ia rave i tō’u nei i’oa i ni’a iho ia rātou ma te ’ā’au tae.

28 ’E mai te mea tē hina’aro ra rātou ’ia rave i tō’u nei i’oa i ni’a ia rātou ma te ’ā’au tae, e parauhia ïa rātou ’ia haere i roto i te ao pā’āto’a nei nō te poro haere i tā’u nei ’evanelia i te mau ta’ata ato’a.

29 ’O rātou ïa ’o tei fa’atōro’ahia e au nō te bāpetizo nā roto i tō’u nei i’oa, mai te au i tei pāpa’ihia ra ;

30 ’E tei mua ia ’ōrua te mau mea i pāpa’ihia ra ; nō reira, ’ia ha’apa’o ’ōrua i te reira mai te au i te mau parau i pāpa’ihia ra.

31 ’E i teienei, tē parau atu nei au ia ’outou, e te Tino ’Ahuru Ma Piti—Inaha, ’ua nava’i roa tō’u nei maita’i ia ’outou ; ’ia ’āfaro noa tō ’outou haere’a i mua iā’u e ti’a ai, ’e ’eiaha ho’i ’ia hara.

32 ’E inaha, ’o ’outou ïa ’o tei fa’atōro’ahia e au nō te fa’atōro’a i te mau tahu’a ’e te mau ha’api’i ; nō te poro haere i tā’u nei ’evanelia, mai te au i te mana o te Vārua Maita’i ’o tei vai i roto ia ’outou na, ’e mai te au ho’i i te mau pi’ira’a ’e te mau hōro’a a te Atua i te ta’ata nei ;

33 ’E ’o vau ho’i, ’o Iesu Mesia, tō ’outou Fatu ’e tō ’outou ho’i Atua, ’o tei parau atu i te reira.

34 E ’ere ho’i teie nei mau parau nā te mau ta’ata, e ’ere ato’a nā te hō’ē noa atu ta’ata ; nō ’ō mai rā iā’u ; nō reira, e fa’a’ite atu ’outou ē nō ’ō nei te reira iā’u nei, e ’ere nā te ta’ata ;

35 ’O tō’u ho’i reo teie e parau atu nei i te reira ia ’outou na ; ’e tē hōro’ahia atu nei te reira e tō’u Vārua ia ’outou, ’e nā roto i tō’u nei mana ’outou e tai’o ai i te reira te tahi i te tahi ; ’e ’āhiri e ’ere te reira nā roto i tō’u nei mana, e ’ore ïa e noa’a ia ’outou ;

36 Nō reira, e ti’a ia ’outou ’ia fa’a’ite atu ē, ’ua fa’aro’o ’outou i tō’u nei reo, ’e ’ua ’ite ho’i i tā’u mau parau.

37 ’E i teienei, inaha, tē ha’amana atu nei au ia ’oe, e Oliver Cowdery, ’e ia ’oe ho’i e David Whitmer, ’ia ’imi ’ōrua i te Tino ’Ahuru Ma Piti, ’e ’ia vai i roto ia rātou te mau hina’aro mai tā’u i fa’a’ite atu ra.

38 ’E nā roto i tō rātou ra mau hina’aro ’e tā rātou ra mau ’ohipa ho’i ’ōrua e ’ite ai ia rātou.

39 ’E ’ia ’itea rātou ia ’ōrua, e fa’a’ite ïa ’ōrua i taua mau mea nei ia rātou.

40 ’E e tīpapa atu ’ōrua i raro ’e e ha’amori i te Metua i roto i tō’u nei i’oa.

41 ’E ’ia a’o haere ’ōrua i tō te ao nei e ti’a ai, i te nā-’ō-ra’a atu ē : ’Ia tātarahapa ’e ’ia bāpetizohia ’outou e ti’a ai, i roto i te i’oa o Iesu Mesia ;

42 ’Ia tātarahapa ho’i te mau ta’ata ato’a ’e ’ia bāpetizohia e ti’a ai, ’e ’eiaha te mau tāne ana’e, te mau vahine ato’a rā, ’e te mau tamari’i ho’i, ’ia tae i te matahiti e ta’a ai ia rātou tō rātou iho mana’o.

43 ’E i teienei, i muri a’e i tō ’ōrua fāri’ira’a i te reira, ’ia ha’apa’o ’ōrua i tā’u mau fa’auera’a ato’a e ti’a ai ;

44 ’E nā roto i tō ’ōrua rima na e rave ai au i te ’ohipa māere rahi i rotopū i te mau tamari’i a te ta’ata nei, ē tae noa atu i te ha’apāpūra’a atu i te mana’o nō rātou e rave rahi i tā rātou mau hara, ’ia ti’a ia rātou ’ia tātarahapa, ’ia ō mai ho’i rātou i roto i te bāsileia o tō’u ra Metua.

45 Nō reira, te mau ha’amaita’ira’a tā’u e hōro’a atu nei ia ’ōrua na, tei ni’a a’e ïa i te mau mea ato’a.

46 ’E ’ia fāri’i ’ōrua i teie, ’e ’ia ’ore ’ōrua e ha’apa’o i tā’u mau fa’auera’a, e ’ore roa ’ōrua e fa’aorahia i roto i te bāsileia o tō’u Metua.

47 Inaha, ’o vau, ’o Iesu Mesia, tō ’ōrua Fatu ’e tō ’ōrua Atua, ’e tō ’ōrua Tāra’ehara ’o tei parau atu nā roto i te mana o tō’u nei Vārua. ’Āmene.