1 ’O vau nei te Alepha ’e te Omega, ’o te Mesia te Fatu ; ’oia ïa, ’o vau nei ho’i ’oia, te ha’amatara’a ’e te hope’a, te Tāra’ehara nō te ao nei.

2 ’O vau ïa ’o tei ha’apa’o ’e ’o tei fa’aoti ho’i i te hina’aro nō ni’a iā’u, o ’oia nō roto mai ho’i au, ’oia te Metua—’e ’ua nā reira vau nō te ha’avī i te mau mea ato’a i raro a’e iā’u iho—

3 I te tāpe’a-noa-ra’a i te mau mana ato’a, ē tae noa atu i te ha’amoura’a ia Sātane ’e tāna mau ’ohipa i te hope’a o te ao nei ’e i te mahana ha’avāra’a hope’a, ’o tā’u e fa’atupu i ni’a iho ia rātou ’o tei pārahi i te ao nei, i te ha’avāra’a i te ta’ata tāta’itahi mai te au i tāna iho mau ’ohipa ’e i te mau mea tāna i rave.

4 ’Oia ïa, ’ia tātarahapa te mau ta’ata ato’a e ti’a ai, ’e ’ia ’ore rātou ’ia nā reira, e noa’a mai ia rātou te mamae, nō te mea e mea hope’a ’ore au ’o te Atua.

5 Nō reira, e ’ore roa vau e fa’a’ore i te mau ha’avāra’a tā’u e fa’aoti, e tae atu rā te mau ’ati, te ’oto, te ’āuera’a, ’e te ’au’aura’a niho, ’oia ïa, i ni’a ia rātou ’o tē ’itea i tō’u pae ’aui ra.

6 ’Āre’a rā, ’aita ho’i i pāpa’ihia ē ’aita e hope’a tō te reira mamae rahi, ’ua pāpa’ihia rā te reira ’ei mamae hope’a ’ore.

7 ’E teie fa’ahou ā, ’ua pāpa’ihia ’ei fa’ahapara’a mure ’ore ; nō reira, e parau māramarama a’e te reira i te tahi mau pāpa’ira’a mo’a, nō te fa’atupura’a i te mana’o i roto i te ’ā’au o te mau tamari’i a te ta’ata nei, nō te fa’ahanahanara’a i tō’u nei i’oa.

8 Nō reira, e ha’amāramarama vau ia ’outou nō ni’a i teie nei parau ’aro nō te mea e mea ti’a ïa ia ’outou ’ia ’ite i te reira mai tā’u mau ’āpōsetolo ato’a ra.

9 Tē parau atu nei au ia ’outou ato’a ’o tei mā’itihia nō teie nei mea, mai te mea ra ē, ’ua hō’ē noa ’outou, ’ia ti’a ia ’outou ’ia tomo mai i roto i tō’u nei fa’aeara’a.

10 Inaha ho’i te parau ’aro nō te huru Atua ra, ’auē ho’i tōna rahi ! Inaha ho’i, e mea mure ’ore au, ’e te fa’autu’ara’a tei hōro’ahia e tō’u nei rima, e mea mure ’ore ïa, nō te mea ’o Hope’a ’Ore ho’i tō’u i’oa. Nō reira—

11 ’O te fa’autu’ara’a mure ’ore ra, ’o te fa’autu’ara’a ïa a te Atua.

12 ’O te fa’autu’ara’a hope’a ’ore ra, ’o te fa’autu’ara’a ïa a te Atua.

13 Nō reira, tē fa’aue atu nei au ia ’oe ’ia tātarahapa, ’e ’ia ha’apa’o ho’i i te mau fa’auera’a tā ’oe i fāri’i i te rima o tō’u nei tāvini ra ’o Iosepha Semita, tamaiti, nā roto i tō’u nei i’oa ;

14 ’E nā roto i tō’u mana pūai hope ’oe i fāri’i ai i te reira ;

15 Nō reira, tē fa’aue atu nei au ia ’oe ’ia tātarahapa—’a tātarahapa, ’oi tā’iri atu vau ia ’oe i te rā’au o tō’u nei vaha, ’e i tō’u riri ’ū’ana, ’e i tō’u ’iriā ho’i, ’ia rahi roa tō ’oe mau mamae rahi ra—te rahira’a o te reira mamae ’aore roa i ’itea ia ’oe, te huru mau o te reira mamae ’aore ho’i i ’itea ia ’oe, ’oia ïa, ’auē ho’i te fifi rahi nō te fa’a’oroma’i i te reira ’aore roa ho’i i ’itea ia ’oe na.

16 Inaha ho’i, ’ua mamae au, ’o te Atua, i teie nei mau mea nō te ta’ata ato’a, ’ia ’ore rātou ’ia ro’ohia i te mamae mai te mea ē e tātarahapa rātou.

17 Terā rā, mai te mea ē ’aita rātou e tātarahapa, ’ia ro’ohia rātou i te mamae rahi e ti’a ai, mai iā’u ato’a.

18 Nā te reira mamae rahi i fa’atupu i roto iā’u, ’oia ’o te Atua, ’o tei hau a’e i te mau mea ato’a ra, i te rurutaina nō te māuiui, ’e ’ua tahe mai ra te toto nā te mau poa ato’a, ’e ’ua māuiui i te tino ’e i te vārua ato’a ho’i—’E ’ua hina’aro ho’i ’ia ’ore au ’ia inu i te ’āu’a maramara ’e ’ōriorio atu—

19 ’Āre’a rā, ’ei te Metua te hanahana, ’e ’ua inu vau ’e ’ua fa’aoti ho’i i tā’u mau fa’aineinera’a nō te mau tamari’i a te ta’ata nei.

20 Nō reira, tē fa’aue fa’ahou atu nei au ia ’oe ’ia tātarahapa, ’oi fa’aha’eha’a vau ia ’oe nā roto i tō’u mana pūai hope ; ’e ’ia fā’i mai ho’i ’oe i tā ’oe ra mau hara, ’oi ro’ohia atu ’oe i teie nei mau utu’a ’o tei parauhia e au nei, ’ua ’ite ho’i ’oe i te hō’ē tufa’a iti nō te reira, ’oia ïa, i te hō’ē tufa’a iti na’ina’i roa tei ’itea ia ’oe i te taime au i ’īriti ’ē atu ai i tō’u nei Vārua.

21 ’E tē fa’aue atu nei au ia ’oe ē ’eiaha ’oe e a’o atu i te hō’ē mea maori rā te tātarahapa, ’e ’eiaha ho’i e fa’a’ite atu i teie nei mau mea i tō te ao nei ē tae noa atu i te taime e au iā’u i roto i tō’u nei pa’ari ’ia nā reira.

22 Nō te mea ’aita e ti’a ia rātou te ’īna’i i teienei, ’o te ū rā tā rātou ïa e fāri’i e ti’a ai ; nō reira, ’eiaha rātou ’ia ’ite i teie nei mau mea e ti’a ai, ’oi pohe rātou.

23 ’A ha’api’i i te mau mea nō’u nei, ’e ’a fa’aro’o mai na i tā’u mau parau ; ’a hāhaere ho’i i roto i te marū o tō’u nei Vārua, ’e e noa’a ïa ia ’oe te hau i roto iā’u nei.

24 ’O Iesu Mesia vau ; i haere mai nei au nō te hina’aro o te Metua, ’e tē rave nei au i tōna hina’aro.

25 ’E teie fa’ahou ā, tē fa’aue atu nei au ia ’oe ē ’eiaha ’oe e nounou i te vahine fa’aipoipo a tō ta’ata tupu ; ’eiaha ho’i e tītau i te taparahi i tō ta’ata tupu.

26 ’E teie fa’ahou ā ho’i, tē fa’aue atu nei au ia ’oe ē ’eiaha ’oe e nounou i tā ’oe iho faufa’a, ’a hōro’a fa’arahi atu ho’i i te reira nō te nene’ira’a i te Buka a Moromona, tei roto ho’i i te reira te parau mau ’e te parau ho’i a te Atua—

27 ’O tā’u parau te reira i te ’Ētene ra, ’ia tae vave atu te reira i te ’āti Iuda, ’o te ’āti Lamana ho’i te hō’ē toe’a nō rātou ra, ’ia ti’a ia rātou ’ia fāri’i i te ’evanelia, ’ia ’ore ho’i ’ia tīa’i ā i te Mesia ’o tei tae ’ē mai na.

28 ’E teie fa’ahou ā, tē fa’aue atu nei au ia ’oe ’ia pure vaha mai ’e i roto i tō ’oe ’ā’au ato’a ; ’oia ïa, i mua i tō te ao nei ’e i te vāhi mo’emo’e ato’a, i te vāhi ta’ata ’e i te vāhi ta’ata ’ore ho’i.

29 ’E e fa’a’ite haere ’oe i te mau parau ’āpī ’oa’oa, ’oia ïa, e ha’aparare ’oe i te reira i ni’a i te mau mou’a, ’e i ni’a i te mau vāhi teitei ato’a, ’e i rotopū i te mau nūna’a ta’ata ato’a ’o tā ’oe e fa’ati’ahia ’ia haere.

30 ’E e rave ’oe i te reira ma te ha’eha’a ato’a, ma te ti’aturi mai iā’u, ’e ma te fa’a’ino ’ore ia rātou ’o tē fa’a’ino mai ra.

31 ’E ’eiaha roa ’oe e parau i te parau ha’api’ira’a noa, e parau rā ’oe i te parau tātarahapa ’e te fa’aro’o i te Fa’aora, ’e te ha’amatarara’a i te hara nā roto i te bāpetizora’a, ’e nā roto i te auahi, ’oia ïa, te Vārua Maita’i.

32 Inaha, ’o teie te hō’ē fa’auera’a rahi ’e te mea hope’a tā’u e hōro’a atu ia ’oe nō ni’a i teie nei mea ; nō te mea e nava’i te reira nō tā ’oe hāhaerera’a i roto i tō ’oe ra mau mahana ato’a, ē tae noa atu i te hope’a o tō ’oe ra orara’a.

33 ’E e mamae rahi tā ’oe e fāri’i, mai te mea e ha’apa’o ’ore ’oe i teie nei mau a’ora’a, ’oia ïa, ē tae noa atu i te ha’amoura’a ia ’oe iho ’e tā ’oe mau faufa’a ho’i.

34 ’A tu’u atu i te tahi tufa’a o tā ’oe ra mau faufa’a, ’oia ïa, te tahi tufa’a o tō ’oe ra mau fenua, ’e te mau mea ato’a maori rā i tei au nō te ha’apa’ora’a i tō ’oe iho ’utuāfare.

35 ’A ’aufau na ’oe i te tārahu tā ’oe i fa’aau i te ta’ata nene’i parau ra. ’A ’īriti ’ē atu na ’oe ia ’oe iho i te tītīra’a ra.

36 ’A vaiiho ’oe i tō ’oe ra fare ’e tō ’oe fa’aeara’a ho’i, maori rā i te taime ’oe e hina’aro ai i te fārerei i tō ’oe ra ’utuāfare ;

37 ’E ’a parau atu i te mau ta’ata ato’a ma te tāpe’a ’ore ; ’oia ïa, ’a a’o haere, ’a poro, ’a fa’a’ite pāpū roa i te parau mau, ma te reo pūai ato’a, ma te parau ’oa’oa, i te pi’ira’a atu ē—Hosana, hosana, ’ia ra’a te i’oa o te Fatu ra ’o te Atua !

38 ’A pure noa, ’e e nīni’i atu vau i tō’u Vārua i ni’a iho ia ’oe, ’e e noa’a ia ’oe te ha’amaita’ira’a rahi—’oia ïa, e hau a’e te reira i te mau faufa’a o te ao nei ’o tē roa’a noa atu ia ’oe, ’e te vi’ivi’i e ’āpiti i te reira.

39 Inaha, e ti’a ānei ia ’oe ’ia tai’o i teie nei mau mea ma te ’ore e ’oa’oa ’e ma te ’ore ho’i e ’āfa’i i tō ’ā’au i ni’a nō te ’oa’oa rahi ?

40 ’E ’aore rā e ti’a ānei ia ’oe ’ia hōhoro maoro atu ā mai te hō’ē ta’ata arata’i matapō ?

41 ’E ’aore rā e ti’a ānei ia ’oe ’ia vai ha’eha’a ’e ’ia vai marū, ’e ’ia rave ma te pa’ari i mua iā’u nei ? ’Oia ïa, ’a haere mai iā’u nei, i tō ’oe na Fa’aora. ’Āmene.