Tufa’a 24
E heheura’a tei hōro’ahia mai ia Iosepha Semita te peropheta, ’e ia Oliver Cowdery, i Harmony, i Pennsylvania, i te ’āva’e Tiurai 1830. Noa atu e maha noa iho ’āva’e mai te fa’ati’ara’ahia mai te ’Ēkālesia, ’ua tupu te hāmani-’ino-ra’a i te ’Ēkālesia i te rahi, ’e ’ua tāpuni te mau upo’o fa’atere nō te pāruru ia rātou iho. ’Ua hōro’ahia mai teie mau heheura’a e toru i muri nei i teie taime nō te ha’apūai, nō te fa’aitoito, ’e nō te ha’api’i ia rātou.
1–9, ’Ua pi’ihia Iosepha Semita ’ia ’īriti, ’ia a’o, ’e ’ia ha’amāramarama i te mau pāpa’ira’a mo’a ; 10–12, ’Ua pi’ihia Oliver Cowdery nō te poro i te ’evanelia ; 13–19, ’Ua heheuhia mai te ture nō ni’a i te mau semeio, te mau ’anatemara’a, te ueuera’a repo nō ni’a mai i te ’āvae, ’e te haerera’a ’aita e fāri’i moni ’e ’aita e pūtē.
1 Inaha, ’ua pi’ihia ’oe ’e ’ua mā’itihia ho’i ’ia pāpa’i i te Buka a Moromona, ’e nō te ravera’a i te ’ohipa mo’a ; ’e ’ua fa’ateitei mai au ia ’oe i ni’a mai roto mai i tō ’oe ra mau ’ati, ’e ’ua a’o atu vau ia ’oe, ’ia fa’aorahia ’oe i tō ’oe mau ’enemi ato’a ra, ’e ’ua fa’aorahia ’oe mai roto mai i te mau mana o Sātane ’e mai roto mai i te pōiri !
2 Noa atu rā ïa, ’aita ’oe i tano i roto i tā ’oe ra mau ’ōfatira’a ture ; ’ātīrā noa atu, ’a haere i tō ’oe haere’a, ’e ’eiaha e rave fa’ahou i te hara.
3 ’A fa’a’ohipa māite i tō ’oe tōro’a ; ’e ’ia oti ia ’oe te ueuera’a i te mau huero mā’a i roto i tā ’oe ra mau ’āua fa’a’apu ’e te pārurura’a ho’i i te reira, ’a haere ’oi’oi atu i tō te ’ēkālesia i Colesville, i Fayette, ’e i Manchester ; ’e nā rātou e ha’apa’o ia ’oe ; ’e e ha’amaita’i au ia rātou i te pae vārua ’e i te pae tino ato’a nei ;
4 ’Ia ’ore rā rātou ’ia fāri’i ia ’oe, e fa’atae atu vau i te ’anatemara’a i ni’a iho ia rātou, ’eiaha te ha’amaita’ira’a.
5 ’E ’ia tāmau noa ’oe i te ti’aoro mai i te Atua nā roto i tō’u nei i’oa, ’e i te pāpa’ira’a i te mau mea ’o tē hōro’ahia mai ia ’oe e te Fa’aa’o, ’e i te ha’amāramarama atu i te mau pāpa’ira’a mo’a ato’a i tō te ’ēkālesia ra.
6 ’E e hōro’ahia atu ia ’oe, i te taime ti’a mau, te mea tā ’oe e parau ’e e pāpa’i ho’i ; ’e e fa’aro’o ho’i rātou i te reira, ’ia ’ore rā, e fa’atae atu vau i te ’anatemara’a i ni’a iho ia rātou, ’eiaha te ha’amaita’ira’a.
7 E rave ho’i ’oe i tā ’oe mau ’ohipa ato’a i Ziona ; ’e nā roto i te ravera’a i te reira e noa’a ia ’oe te pūai.
8 ’A fa’a’oroma’i i roto i te mau ’ati, nō te mea e rave rahi te mau ’ati e tae i ni’a iho ia ’oe na ; ’a fa’a’oroma’i i te reira, nō te mea, inaha, tei pīha’i iho vau ia ’oe, ē tae noa atu i te hope’a o tō ’oe pu’e mahana.
9 ’E i roto i te mau ’ohipa pae tino nei e ’ore roa e noa’a ia ’oe te pūai, nō te mea e ’ere te reira tō ’oe pi’ira’a. ’A ha’apa’o i tō ’oe pi’ira’a ’e e noa’a ïa ia ’oe te rāve’a nō te fa’a’ohipa māite i tō ’oe tōro’a, ’e nō te ha’amāramaramara’a atu i te mau pāpa’ira’a mo’a ato’a, ’e ’a tāmau noa i te tu’ura’a rima ’e te ha’amaura’a ho’i i tō te mau ’ēkālesia ra.
10 ’E ’ia tāmau noa tō ’oe taea’e ra ’o Oliver i te fa’a’ite atu i tō’u nei i’oa i mua i tō te ao nei, ’e i mua ato’a i tō te ’ēkālesia. ’E ’eiaha roa ’oia e mana’o ē, e nava’i tāna parau nō ni’a i tā’u nei ’ohipa ; ’e inaha, tei pīha’i iho vau iāna ē tae noa atu i te hope’a ra.
11 ’E nā roto iā’u nei e noa’a ai iāna te hanahana, ’eiaha rā nā roto iāna iho, i roto i te paruparu ’e ’aore rā i roto i te pūai, i roto i te tītīra’a ’e ’aore rā i te vai-ti’amā-noa-ra’a ;
12 ’E i te mau taime ato’a, ’e i te mau vāhi ato’a ho’i, e hāmama atu ’oia i tōna vaha ’e e poro atu ho’i i tā’u nei ’evanelia mai te reo o te pū ra, i te ao ’e i te pō ato’a ho’i. ’E e hōro’a atu vau iāna i te pūai ’o tei ’ore ā i ’itea i rotopū i te ta’ata nei.
13 ’Eiaha e tītau i te mau semeio, maori rā ’ia fa’aue au ia ’oe ra, ’e maori rā i te ti’avarura’a i te mau diabolo, i te fa’aorara’a i te feiā ma’i, i te ’arora’a i te mau ’ōphī ta’ero, ’e i te ’arora’a ho’i i te mau huru ta’ero pohe ra ;
14 ’E ’eiaha roa ’ōrua e rave i teie nei mau mea, maori rā ’ia tītauhia mai ’ōrua e rātou ’o tei hina’aro i te reira, ’ia fa’atupuhia ho’i te mau pāpa’ira’a mo’a ; ’e e rave ’ōrua mai te au i tei pāpa’ihia ra.
15 ’E i te mau vāhi ato’a tā ’ōrua e tomo atu ra, e ’aore rātou e fāri’i mai ia ’ōrua i tō’u nei i’oa, e vaiiho atu ïa ’ōrua i te fa’ahapara’a, ’eiaha rā te ha’amaita’ira’a, nā roto i te ueuera’a atu i te repo puehu o tō ’ōrua ra ’āvae, ’ia riro te reira ’ei fa’a’itera’a, ’e ma te horoi ho’i i tō ’ōrua ’āvae i te arati’a ra.
16 ’E ’o rātou ato’a ’o tē tu’u mai i tō rātou ra rima i ni’a iho ia ’ōrua nō te hāmani ’ino ia ’ōrua ra, e fa’aue ïa ’ōrua ’ia tā’irihia rātou ma tō’u nei i’oa ; ’e inaha, nā’u ïa e tā’iri ia rātou mai te au i tā ’ōrua ra mau parau, i te taime i ha’apa’ohia e au ra.
17 ’E ’o tē horo ia ’ōrua i te ture ra, e fa’ahapahia ho’i ’oia e te ture.
18 ’E ’eiaha e hōpoi i te fāri’i moni ’e te pūtē ; ’eiaha te turuto’oto’o ; ’eiaha nā perēue e piti, nō te mea nā te ’ēkālesia e hōro’a mai ia ’oe, i te hora ti’a, te mā’a, te ’ahu, te tia’a, te moni, ’e te pūtē ato’a ho’i.
19 ’Ua mā’itihia ho’i ’oe nō te tope i tā’u nei ’ō vine i te topera’a rahi, ’oia ïa, nō te taime hope’a ra ; ’oia ïa, ’e ’o rātou ato’a ’o tā ’oe i fa’atōro’a ra, e nā reira rātou mai te au i teie nei hōho’a. ’Āmene.