Tufa’a 33
E heheura’a tei hōro’ahia mai nā roto ia Iosepha Semita te peropheta, ia Ezra Thayre ’e Northrop Sweet, i Fayette, i New York, i te ’āva’e ’Ātopa 1830. Nō te ’ōmua i teie heheura’a, tē ha’apāpū nei te ’ā’amu nō Iosepha Semita ē, « ’ua ineine noa te Fatu nō te ha’api’i mai ia rātou ato’a ’o tē ’imi māite iāna nā roto i te fa’aro’o ».
1–4, ’Ua pi’ihia te feiā rave ’ohipa nō te poro haere i te ’evanelia i te ’ahuru ma hō’ē nō te hora ; 5–6, ’Ua fa’ati’ahia te ’Ēkālesia, ’e ’ua tītauhia i te feiā mā’itihia ’ia ha’aputuputu ; 7–10, ’A tātarahapa, ’ua fātata roa mai te bāsileia o te ao ra ; 11–15, ’Ua fa’ati’ahia te ’Ēkālesia i ni’a i te papa nō te ’evanelia ; 16–18, ’A fa’aineine nō te haerera’a mai o te Tāne fa’aipoipo ’āpī.
1 Inaha, tē parau atu nei au ia ’ōrua na, e tō’u nā tāvini e Ezra ’e e Northrop, ’a fa’aro’o mai na tō ’ōrua tari’a ’e ’a ha’apa’o mai i te reo o te Fatu ra tō ’ōrua Atua. E mea ora tāna parau ’e te pūai ho’i, e mea ’oi a’e i te ’o’e mata piti, i te fa’ata’a-’ē-ra’a i te mau pona ivi ’e te puo ho’i, te ’ā’au ’e te vārua ; ’ua ’ite ho’i ’oia i te mau mana’o ’e te mau ’ōpuara’a o te ’ā’au.
2 Nō te mea ’oia mau, ’oia mau, tē parau atu nei au ia ’ōrua na ē, ’ua pi’ihia ’ōrua ’ia fa’ateitei mai i tō ’ōrua reo mai te ’otora’a o te pū ra, nō te poro haere i tā’u nei ’evanelia i te hō’ē u’i pi’o ’e te ha’apa’o ’ore ho’i.
3 Inaha ho’i, ’ua teatea te ’āua ’e ’ua ineine roa nō te tau ’auhune ; ’e ’o te ’ahuru ma hō’ē teie o te hora, ’e ’o te taime hope’a tā’u e parau atu i te feiā rave ’ohipa ’ia haere i roto i tā’u nei ’ō vine.
4 ’E ’ua ha’avi’ivi’ihia tā’u nei ’ō vine tā’āto’a ; ’e ’aore roa te hō’ē ta’ata i rave i te maita’i maori rā te tahi pae ri’i ; tē hapahapa nei rātou i te mau vāhi e rave rahi nō te mau ’ohipa ’ino a te mau tahu’a ha’avare, ’e e mea vi’ivi’i tō rātou ato’a ra mau ferurira’a.
5 ’E ’oia mau, ’oia mau, tē parau atu nei au ia ’ōrua na, ’ua fa’ati’ahia teie nei ’ēkālesia e au nei ’e ’ua pi’ihia mai ho’i e au mai roto mai i te mēdēbara ra.
6 ’E e nā reira ho’i au i te ha’aputuputu i tō’u feiā i mā’itihia, mai roto mai i nā tufa’a e maha o te fenua nei, ’oia ’o rātou ato’a ’o tē ti’aturi iā’u nei, ’e ’o tē ha’apa’o mai i tō’u nei reo.
7 ’E ’oia mau, ’oia mau, tē parau atu nei au ia ’ōrua na, ’ua teatea te ’āua ’e ’ua ineine roa nō te tau ’auhune ; nō reira, ’a māo’a atu na ’ōrua i tā ’ōrua mauha’a ’ō’oti ra, ’e ’a ’ō’oti ma tō ’ōrua pūai ato’a, ’e tō ’ōrua mana’o ato’a, ’e tō ’ōrua itoito ato’a.
8 ’A hāmama i tō ’ōrua vaha ’e e fa’a’īhia mai te reira, ’e e riro ïa ’ōrua mai ia Nephi i te tau tahito ra, ’o tei haere mai mai Ierusalema mai ra i roto i te mēdēbara.
9 ’Oia ïa, ’a hāmama i tō ’ōrua vaha ’e ’eiaha e tāpe’a atu, ’e e fa’ateiahahia ho’i ’ōrua i te mau ruru i ni’a i tō ’ōrua tua, ’e tei pīha’i iho vau ia ’ōrua na.
10 ’Oia ïa, ’a hāmama i tō ’ōrua vaha ’e e fa’a’īhia mai te reira, i te nā-’ō-ra’a atu ē : ’A tātarahapa, ’a tātarahapa, ’e ’a fa’aineine i te ’ē’a o te Fatu, ’e ’a fa’atītī’aifaro i tōna ra mau ’ē’a ; tē fātata mai nei ho’i te bāsileia o te ao ra ;
11 ’Oia ïa, ’a tātarahapa ’e ’ia bāpetizohia, ’o ’outou pā’āto’a, ’ia matara tā ’outou mau hara ; ’oia ïa, ’ia bāpetizohia i te pape, ’e i reira e tae mai ai te bāpetizora’a i te auahi ’e i te Vārua Maita’i.
12 Inaha, ’oia mau, ’oia mau, tē parau atu nei au ia ’ōrua na, ’e ’o teie ho’i tā’u nei ’evanelia ; ’e ’a ha’amana’o na ’ei fa’aro’o tō rātou iā’u nei, ’e ’ia ’ore rā, e ’ore roa ïa rātou e fa’aorahia ;
13 ’E i ni’a iho i teie nei papa vau e patu ai i tā’u nei ’ēkālesia ; ’oia ïa, i ni’a iho i teie nei papa ’ōrua i patuhia ai, ’e mai te mea e tāmau noa ’ōrua ra, e ’ore roa ’ōrua e noa’a i te mau ’ūputa o hade ra.
14 ’E ’ia ha’amana’o ho’i ’ōrua i te mau arata’ira’a a te ’ēkālesia ’e te mau fafaura’a ho’i ’ia ha’apa’o i te reira.
15 ’E ’o tei roa’a ia rātou te fa’aro’o e ha’amau ïa ’ōrua ia rātou i roto i tā’u nei ’ēkālesia, nā roto i te tu’ura’a rima ; ’e nā’u e hōro’a atu i te hōro’a a te Vārua Maita’i i ni’a iho ia rātou ra.
16 ’E nā’u nei i hōro’a atu i te Buka a Moromona ’e te mau pāpa’ira’a mo’a ’ei parau ha’api’ira’a nā ’ōrua ; ’e nā te mana o tō’u nei Vārua e hōro’a i te ora i te mau mea ato’a ra.
17 Nō reira, ’a ha’apa’o maita’i, ma te pure tāmau noa, ma te fa’aineine i tā ’ōrua na lamepa ’ia ’ama noa, ’e ’ia ’āfa’i mai i te hinu nā muri ia ’ōrua, ’ia vai ineine noa ’ōrua nō te haerera’a mai o te Tāne fa’aipoipo ’āpī ra—
18 Inaha ho’i, ’oia mau, ’oia mau, tē parau atu nei au ia ’ōrua, e haere ’oi’oi mai au. ’Oia mau ïa. ’Āmene.