Tufa’a 47
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 8 nō Māti 1831. ’Ua ’ōtohe ri’i John Whitmer, tei tāvini a’ena ’ei pāpa’i parau nā te peropheta, i te anira’ahia ’oia ’ia tāvini ’ei papa’i ’ā’amu ’e ’ei pāpa’i parau o te ’Ēkālesia, nō te mono ia Oliver Cowdery. ’Ua papa’i ’oia ē : « ’Āhani ē e ’ere nā’u e rave i te reira, e ha’apa’o rā vau ’ia ravehia te hina’aro o te Fatu, ’e mai te mea ’ua hina’aro ’oia i te reira, tē hina’aro ato’a nei ïa vau ’ia fa’a’ite mai ’oia i te reira nā roto ia Iosepha, te ’ite ». I muri iho tō Iosepha Semita fāri’ira’a i teie heheura’a, ’ua fāri’i John Whitmer e tāvini atu ra i ni’a i teie tōro’a tāna.
1–4, ’Ua fa’ata’ahia ’o Ioane Whitmer ’ia pāpa’i i te ’ā’amu o te ’Ēkālesia ’e ’ia riro ato’a ’ei pāpa’i parau nō te peropheta.
1 Inaha, e mea ti’a iā’u ’ia pāpa’i tō’u tāvini ra ’o John, ’e ’ia ha’apa’o ho’i i te hō’ē parau tuatāpapa, ’e ’ia tauturu ’oia ia ’oe, e tō’u tāvini e Iosepha, i te pāpa’ira’a i te mau mea ato’a ’o tē hōro’ahia mai ia ’oe na, ē tae noa atu i te taime ’oia e mā’itihia ai nō te tahi atu ā mau ’ohipa.
2 Teie fa’ahou ā, ’oia mau tē parau atu nei au ia ’oe na, e ti’a ato’a iāna ’ia fa’ateitei mai i tōna reo i roto i te mau purera’a, i te mau taime e au ra.
3 ’E teie fa’ahou ā, tē parau atu nei au ia ’oe na ē, e fa’ata’ahia atu ïa ’oia nō te ha’apa’o i te pāpa’a parau nō te ’ēkālesia ’e te parau tuatāpapa ho’i i te mau taime ato’a ; nō te mea ’ua fa’ata’a vau ia Oliver Cowdery nō te tahi tōro’a ’ē.
4 Nō reira, e hōro’ahia ïa iāna e te Fa’aa’o, mai te mea e ha’apa’o ’oia, ’ia pāpa’i i teie nei mau mea. ’Oia ïa. ’Āmene.