Tufa’a 51
E heheura’a tei hōro’ahia mai nā roto ia Iosepha Semita te peropheta, i Thompson, i Ohio, i te 20 nō Mē 1831. I teienei taime ’ua ha’amata te feiā mo’a, ’o tē tere mai ra mai te mau tufa’a fenua o te hiti’a o te rā, i te tae mai i Ohio ; ’e ’ua ti’a roa ’ia fa’aineine-pāpū-hia te mau mea nō tō rātou ra fa’aeara’a. ’E nō te mea nā te ’episekōpo teie nei tufa’a ’ohipa, ’ua tītau ihora te ’episekōpo Edward Partridge i te ha’amāramaramara’a nō ni’a i teie ’ohipa, ’e ’ua ani atu ra te peropheta i te Fatu nō te reira.
1–8, ’Ua fa’ata’ahia Edward Partridge ’ia ha’apa’o i te mau ti’a’aura’a ’e te mau faufa’a ; 9–12, ’Ua tītauhia i te feiā mo’a ’ia riro ’ei feiā parauti’a i roto i te ’ohipa ’e ’ia tauturuhia mai ma te ’aifāito ; 13–15, ’Ua ti’a roa ia rātou ’ia fa’ati’a i te hō’ē vaira’a tao’a nā te ’episekōpo ’e ’ia fa’anahonaho i te mau tao’a mai te au i te ture a te Fatu ; 16–20, ’ia riro Ohio ’ei vāhi putuputura’a nō te hō’ē tau poto noa.
1 ’A fa’aro’o mai na iā’u, tē nā reira mai ra te Fatu ra ’o tō ’oe Atua, ’e e parau atu vau i tō’u nei tāvini ra ia Edward Partridge, ’e e hōro’a atu ho’i au iāna i te mau arata’ira’a ; nō te mea e mea ti’a roa ïa ’ia fāri’i ’oia i te mau arata’ira’a nāhea ’ia fa’anahonaho i teie nei feiā.
2 E mea ti’a ho’i ’ia fa’anahonahohia rātou mai te au i tā’u mau ture ; ’ia ’ore rā e tāpū-’ē-hia atu rātou.
3 Nō reira, ’a tu’u atu i tō’u tāvini ra ia Edward Partridge, ’e ’o rāua tāna i mā’iti ra, ’o tā’u i māuruuru roa, ’ia fa’ata’a nā teie nei mau ta’ata i tā rātou iho mau tufa’a, ’ia ’aifāito tā te ta’ata tāta’itahi ato’a i tei au i tōna ra ’utuāfare, ’e i tei au i tāna faufa’a ’e i tōna mau hina’aro ’e i tei tītauhia ho’i.
4 ’E ’ia fa’ata’a ana’e tō’u tāvini ra ’o Edward Partridge, i te ta’ata i tāna ra tufa’a, e hōro’a atu ’oia i te hō’ē pāpa’ira’a iāna nō te ha’apāpū atu iāna i tāna ra tufa’a, ’ia tāpe’a noa ’oia i te reira, ’oia ho’i i tōna fatura’a ’e tāna faufa’a i roto i te ’ēkālesia, ē tae noa atu i te taime ’oia e ’ōfati ai i te ture, e ’ere atu ra ’oia i te mea ti’amā i te fa’aotira’a a te ’ēkālesia, mai te au i te mau ture ’e te mau fafaura’a nō te ’ēkālesia, nō te vai-noa-ra’a ’ei melo nō te ’ēkālesia.
5 ’E mai te mea e ’ōfati ’oia i te ture, ’e e ’ere ’oia i te mea ti’amā nō te riro-noa-ra’a ’ei melo nō te ’ēkālesia, ’aita ïa tōna e mana i reira ’ia tītau i te reira tufa’a tāna i ha’amo’a atu i te ’episekōpo nā te feiā veve ’e te feiā nava’i ’ore i roto i tā’u nei ’ēkālesia ; nō reira, e’ita roa ïa ’oia e tāpe’a noa i tei hōro’ahia nāna, e tāpe’a noa rā ’oia i taua tufa’a ra ’o tei hōro’ahia nāna nā roto i te parau pāpa’i.
6 ’E nā roto i te reira e ha’apāpūhia ai te mau mea ato’a, mai te au i te mau ture nō te fenua ra.
7 ’E te faufa’a nā teie nei mau ta’ata, ’ia fa’ata’ahia ïa nā teie nei mau ta’ata.
8 ’E te moni i toe mai nā teie nei mau ta’ata—’ia fa’ata’ahia te hō’ē mono ’ei ha’apa’o nō teie nei mau ta’ata, ’ia rave i te moni nō te ho’o mai i te mā’a ’e te ’ahu, ’ia au i te mau mea i hina’arohia e teie nei mau ta’ata.
9 ’E ’ia rave noa te ta’ata ato’a i te ’ohipa parauti’a, ’e ’ia hō’ē a’e ā tō rātou huru i rotopū i teie nei mau ta’ata, ’e ’ia hō’ē ā huru tufa’a, ’ia riro ho’i ’outou ’ei hō’ē, mai te au i tā’u i fa’aue atu ia ’outou na.
10 ’E ’eiaha roa ’ia ravehia tā teie nei mau ta’ata ’e ’ia hōro’ahia atu nā tō te tahi atu ’ēkālesia.
11 Nō reira, mai te mea e fāri’i tō te tahi ’ēkālesia i te moni a teie nei ’ēkālesia, ’ia ’aufau fa’ahou mai rātou i tā teie nei ’ēkālesia mai te au i tā rātou e fa’aau ;
12 ’E e ravehia teie nei ’ohipa nā roto i te ’episekōpo ’e ’aore rā i te ta’ata ha’apa’o, ’o tē fa’ata’ahia e te reo o tō te ’ēkālesia nei.
13 ’E teie fa’ahou ā, ’ia fa’ata’a te ’episekōpo i te hō’ē fare vaira’a tao’a nā teie nei ’ēkālesia ; ’e ’ia tu’uhia atu te mau mea ato’a, te moni ’e te mā’a, ’o tei hau a’e i tei tītauhia e teie nei feiā, i roto i te rima o te ’episekōpo.
14 ’E ’ia tāpe’a ato’a mai ’oia nāna iho i tei au nōna iho, ’e i tei au ho’i nō tōna ’utuāfare, ’a rave noa ai ’oia i teie nei ’ohipa.
15 ’E e nā reira vau i te hōro’a atu i te ti’ara’a i teie nei feiā ’ia fa’anahonaho rātou ia rātou iho mai te au i tā’u mau ture.
16 ’E e ha’amo’a vau i teie nei fenua nō rātou nō te hō’ē tau poto, ē tae noa atu i te taime au, ’o te Fatu, e fa’ata’a ai i te tahi ’ē nō rātou, ’a fa’aue atu ai au ia rātou ’ia haere atu i reira ;
17 ’E ’aita te hora ’e te mahana i fa’a’itehia atu ia rātou ra, nō reira ’ia rave noa rātou i ni’a i teie nei fenua nō te tahi mau matahiti, ’e e fa’arirohia teie ’ei maita’i nō rātou ra.
18 Inaha, e riro teie ’ei hi’ora’a i tō’u tāvini ra ia Edward Partridge, i te tahi atu ā mau vāhi, ’e i roto i te mau ’ēkālesia ato’a.
19 ’E ’o tei ’itehia ’ei ti’a’au ha’apa’o maita’i, ’e te parauti’a, ’e te pa’ari ho’i, e tomo mai ïa i roto i te ’oa’oa o tōna ra Fatu, ’e e noa’a ho’i iāna te ora mure ’ore.
20 ’Oia mau, tē parau atu nei au ia ’outou na, ’o Iesu Mesia vau, ’o tē haere ’oi’oi mai i roto i te hora mana’o-’ore-hia e ’outou. ’Oia ïa. ’Āmene.