Tufa’a 56
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 15 nō Tiunu 1831. Tē fa’autu’a nei teie heheura’a ia Ezra Thayre nō tōna ha’apa’o-ore-ra’a i te tahi heheura’a nō nā mua atu (« te fa’auera’a » e parauhia ra i roto i te ’īrava 8), ’o tā Iosepha Semita i fāri’i nōna, ’ei arata’ira’a nō ni’a i tāna mau hōpoi’a i te fenua fa’a’apu o Frederick G. Williams, i reira ’oia i te orara’a. Tē fa’a’ore ato’a nei teie heheura’a i te pi’ira’a a te taea’e Thayre ’ia tere atu i Missouri nā muri ia Thomas B. Marsh (hi’o i te tufa’a 52:22).
1–2, E mea ti’a roa i te feiā mo’a ’ia rave i tō rātou sātauro ’e ’ia pe’e atu i te Fatu nō te fāri’i i tō rātou fa’aorara’a ; 3–13, Nā te Fatu e hōro’a mai ē e tāpe’a atu i te mau fa’auera’a, ’e e ti’avaruhia te feiā ha’apa’o ’ore ; 14–17, ’Auē ho’i te ’ati o te feiā tao’a rahi ’o tē ’ore e tauturu atu i te feiā veve, ’e ’auē ho’i te ’ati o te feiā veve ’o tei ’ore tō rātou ’ā’au i ’oto ra ; 18–20, E ao tō te feiā veve ’o tei mā te ’ā’au, e fāri’i ho’i rātou i te fenua.
1 ’A fa’aro’o mai na ’o ’outou e te mau ta’ata ’o tei parauhia i tō’u nei i’oa, tē nā reira mai ra te Fatu ’o tō ’outou Atua ; ’e inaha, ’ua tupu tō’u riri i te feiā ’ōrurehau ra, ’e e ’ite ho’i rātou i tō’u rima ’e tō’u au ’ore rahi i te mahana nō te tāho’ora’a ’e nō te riri ’ū’ana i ni’a i te mau nūna’a ra.
2 ’E ’o ’oia ’o tē ’ore e rave i tōna sātauro ’a pe’e mai ai iā’u nei, ’e ’o tē ’ore e ha’apa’o i tā’u mau fa’auera’a, e ’ore ïa ’oia e fa’aorahia.
3 Inaha, e fa’aue atu vau, ’o te Fatu ; ’e ’o ’oia ’o tē ’ore e ha’apa’o ra, e tāpū-’ē-hia atu ïa i te tau i ha’apa’ohia e au ra, i muri a’e i te taime au i fa’aue ai ’e i ’ōfatihia ai te fa’auera’a ra.
4 Nō reira, tē fa’aue atu nei au, ’o te Fatu, ’e tē fa’a’ore atu nei ho’i au i te reira, mai tei au iā’u nei ; ’e nō teie ato’a e fa’autu’ahia te feiā ’ōrurehau ra, tē nā reira mai ra te Fatu.
5 Nō reira, tē fa’a’ore atu nei au i te fa’auera’a tei hōro’ahia atu i tō’u nā tāvini ra ia Thomas B. Marsh ’e ia Ezra Thayre, ’e tē hōro’a atu nei ho’i au i te hō’ē fa’auera’a ’āpī i tō’u tāvini ra ia Thomas, ’ia haere ’oi’oi ’oia i te fenua i Missouri, ’e ’ia haere ato’a tō’u tāvini ra ’o Selah J. Griffin nā muri iho iāna.
6 Inaha ho’i, tē fa’a’ore atu nei au i te fa’auera’a tei hōro’ahia atu i tō’u nā tāvini ra ia Selah J. Griffin ’e ia Newel Knight, nō te ’ā’au ’eta’eta o tō’u nei mau ta’ata ’o tei pārahi i Thompson ’e nō tō rātou ra mau ’ōrurehau ho’i.
7 Nō reira, ’a tu’u atu i tō’u tāvini ra ia Newel Knight ’ia fa’aea i pīha’i iho ia rātou ra ; ’e ’o rātou ato’a ’o tē hina’aro i te haere atu ra, e ti’a ïa ia rātou ’ia haere atu, ’o tei ha’eha’a i mua iā’u nei, ’ia arata’ihia atu rātou e ana i te fenua tā’u i fa’ata’a ra.
8 ’E teie fa’ahou ā, ’oia mau tē parau atu nei au ia ’outou na, ’ia tātarahapa tō’u tāvini ra ’o Ezra Thayre i tōna te’ote’o, ’e i tōna ra nounou tao’a e ti’a ai, ’e ’ia ha’apa’o ho’i i te fa’auera’a mātāmua tā’u i hōro’a iāna ra nō ni’a i te vāhi tāna e pārahi nei.
9 ’E mai te mea e ha’apa’o ’oia i te reira, i te mea ē e ’ore te fenua e tātufa’ahia, e vai ā ïa te fa’ata’ara’a i ni’a iāna ’ia haere atu i te fenua ra nō Missouri ;
10 ’Ia ’ore rā, e fāri’i ïa ’oia i te moni tāna i ’aufau ra, ’e e fa’aru’e atu ïa ’oia i te vāhi, ’e e tāpū-’ē-hia atu ho’i ’oia mai roto atu i tā’u nei ’ēkālesia, tē nā reira mai ra te Fatu ’o te Atua Sabaota ra ;
11 ’E ’a mou noa atu ai te ra’i ’e te fenua ho’i, e ’ore teie nei mau parau e mou, e hope roa rā i te tupu.
12 ’E mai te mea e mea tītauhia i tō’u tāvini ra ia Iosepha Semita, tamaiti, ’ia ’aufau i te moni, inaha, nā’u, nā te Fatu, e fa’aho’i i te reira iāna i te fenua ra nō Missouri, ’ia ha’amaita’i-fa’ahou-hia rātou ’o tei hōro’a atu i tāna, ’ia au i tā rātou e rave ra ;
13 E fāri’i ho’i rātou mai te au i tā rātou e rave ra, ’oia ho’i, i te mau fenua ’ei ’āi’a nō rātou.
14 Inaha, tē nā ’ō mai ra te Fatu i tō’u mau ta’ata—e rave rahi te mau mea tā ’outou e rave ’e tā ’outou ho’i e tātarahapa ; ’e inaha, ’ua tae mai tā ’outou mau hara i ni’a nei iā’u, ’e ’aita ho’i i fa’a’orehia atu, nō te mea tē tītau nei ’outou i te a’o atu mai te au i tō ’outou iho ferurira’a.
15 ’E ’aore tō ’outou ’ā’au i māuruuru. ’E ’aore ho’i ’outou i ha’apa’o i te parau mau, ’ua ’oa’oa rā i roto i te parauti’a ’ore.
16 ’Auē ho’i te ’ati nō ’outou e te mau ta’ata tao’a rahi, ’o tē ’ore e hōro’a i tā ’outou tao’a i te feiā veve, nō te mea nā tā ’outou mau faufa’a e ha’apē i tō ’outou ’ā’au ; ’e e riro teie tō ’outou mihira’a ’ia tae i te mahana nō te tāho’ora’a, nō te ha’avāra’a, ’e nō te au ’ore rahi : ’Ua ma’iri te tau ’auhune, ’ua hope te tau māhanahana, ’e ’aore tō’u vārua i fa’aorahia !
17 ’Auē ho’i te ’ati nō ’outou e te mau ta’ata veve ; ’o tei ’ore tō ’outou ’ā’au i ’oto ra, ’o tei ’ore tō ’outou vārua i ha’eha’a ra, ’o tei ’ore ho’i tō ’outou ’ōpū i pa’ia, ’e ’o tei ’ore tō ’outou rima i tāpe’ahia i te harura’a i te tao’a a vetahi ’ē mau ta’ata ra, ’o tei ’ī roa tō ’outou mata i te nounou, ’e ’o tei ’ore ho’i ’outou e rave i te ’ohipa i tō ’outou iho rima !
18 ’Āre’a rā e ao tō te feiā veve ’o tei mā te ’ā’au, ’o tei ’oto te ’ā’au, ’e ’o tei ha’eha’a i te vārua ra, e ’ite ho’i rātou i te bāsileia o te Atua i te taera’a mai ma te mana ’e te hanahana rahi nō te fa’aora ia rātou ; ’e e riro te maita’i o te ao nei ia rātou ra.
19 Inaha ho’i, e tae mai ïa te Fatu, ’e ’ei iāna tāna tāho’ora’a, ’e e fa’autu’a ’oia i te ta’ata ato’a, ’e e ’oa’oa ho’i te feiā veve ;
20 ’E e riro ho’i te fenua i tō rātou ra mau u’i, mai terā u’i i terā u’i, ē a muri, ē a muri noa atu ā ho’i. ’E i teienei tē fa’aoti atu nei au i te paraura’a atu ia ’outou. ’Oia ïa. ’Āmene.