Tufa’a 60
E heheura’a tei hōro’ahia mai nā roto ia Iosepha Semita te peropheta, i Independence, i te mata’eina’a nō Jackson, i Missouri, i te 8 nō ’Ātete 1831. I taua taime ra, ’ua hina’aro te mau peresibutero tei rātere mai i te mata’eina’a nō Jackson nō te ’āmui mai i te ha’amo’ara’a o te fenua ’e te vāhi nō te hiero, ’ia ’ite i te mea e ti’a ia rātou ’ia rave.
1–9, ’Ua tītauhia te mau peresibutero ’ia poro atu i te ’evanelia i te mau ’āmuira’a nō te feiā parauti’a ’ore ; 10–14, ’Eiaha rātou ’ia ha’amāu’a faufa’a ’ore noa i tō rātou taime, ’eiaha ato’a ’ia huna i tā rātou mau tārēni ; 15–17, E ti’a ia rātou ’ia horoi i tō rātou mau ’āvae ’ei fa’ahapara’a atu i te feiā ’o tē pāto’i mai i te ’evanelia.
1 Inaha, tē nā ’ō mai nei te Fatu i te mau peresibutero nō tāna ’ēkālesia, ’o tē ho’i ’oi’oi atu i te fenua nō reira mai rātou : Inaha, ’ua māuruuru vau i tō ’outou haerera’a mai i’ō nei ;
2 ’Āre’a rā i te tahi pae ’aore au i māuruuru roa, nō te mea ’aita rātou e hāmama i tō rātou ra mau vaha, tē huna ra rā rātou i te tārēni tā’u i hōro’a atu ia rātou, nō te mata’u i te ta’ata nei. E ’ati tō te reira huru, nō te mea ’ua tupu tō’u riri ia rātou ra.
3 ’E a muri a’era, mai te mea ē ’aita tō rātou ha’apa’o maita’i iā’u nei e rahi atu, e rave-’ē-hia atu te reira, ’oia ho’i ’o te reira tā rātou i fāri’i.
4 Tē fa’atere nei ho’i au, ’o te Fatu, i roto i te mau ra’i i ni’a, ’e i rotopū ho’i i te mau nu’u nō te fenua nei ; ’e i te mahana vau e ha’aputuputu mai ai i tā’u ra mau tao’a faufa’a rahi, e ’ite ai te mau ta’ata ato’a i te mea ’o tē fa’a’ite mai i te mana o te Atua.
5 ’Āre’a rā, ’oia mau ïa, e parau atu vau ia ’outou nō ni’a i tō ’outou haerera’a i te fenua nō reira mai ’outou. ’Ia hāmanihia te hō’ē faura’o, ’e ’aore rā ’ia ho’ohia mai mai tei au ia ’outou na, ’aita ho’i e huru ’ē iā’u nei, ’e ’ia tere vitiviti atu ’outou i te vāhi ’o tei parauhia ’o St. Louis.
6 ’E mai reira atu, ’ia haere atu tō’u ra mau tāvini ’o Sidney Rigdon, Iosepha Semita, tamaiti, ’e ’o Oliver Cowdery, i tō rātou tere i Cincinnati ra ;
7 ’E i te reira vāhi, ’ia fa’ateitei mai rātou i tō rātou reo, ’e ’ia fa’a’ite atu i tā’u parau ma te reo pūai, ma te riri ’ore ’e te fē’a’a ’ore ho’i, ma te ’āfa’i i te rima mo’a i ni’a ia rātou ra. E ti’a ho’i iā’u nei ’ia ha’amo’a ia ’outou, ’e ’ua fa’a’orehia atu tā ’outou mau hara.
8 ’E ’a tu’u atu i te toe’a ra ’ia haere i tō rātou ra tere mai St. Louis atu, tāta’ipiti atu, ’e ’ia poro haere i te parau, ’eiaha nā roto i te rū noa, i rotopū i te mau ’āmuira’a o te feiā parauti’a ’ore, ē tae noa atu ai rātou i te mau ’ēkālesia nō reira mai rātou ra.
9 ’E ’ia ravehia taua mau mea ato’a ra ’ei maita’i nō te mau ’ēkālesia ; nō reira vau i tono atu ai ia rātou ra.
10 ’E ’ia hōro’a atu tō’u tāvini ra ’o Edward Partridge i te hō’ē tufa’a o te moni tā’u i hōro’a atu iāna nā tō’u mau peresibutero ’o tei fa’auehia ’ia ho’i atu ;
11 ’E ’o ’oia ’o tē ti’a iāna ra, ’ia fa’aho’i mai ïa ’oia i te reira nā roto i te ta’ata ha’apa’o ; ’e ’o ’oia ’o tē ’ore e ti’a iāna ra, ’aita e tītauhia iāna.
12 ’E i teienei tē parau atu nei au nō ni’a i te toe’a ’o tē tae mai i teie nei fenua.
13 Inaha, ’ua tonohia atu rātou ’ia poro haere i tā’u ’evanelia i rotopū i te mau ’āmuira’a o te feiā parauti’a ’ore ; nō reira, tē hōro’a atu nei au i teie fa’auera’a ia rātou : ’Eiaha e ha’amāu’a i tō ’oe taime ; ’eiaha ato’a e huna atu i tā ’oe tārēni ’ia ’ore ’ia ’itehia.
14 ’E i muri a’e i tō ’oe haerera’a mai i te fenua nō Ziona, ’e ’ua poro haere ho’i i tā’u parau, e ho’i ’oi’oi atu ’oe ma te poro haere i tā’u parau i rotopū i te mau ’āmuira’a o te feiā parauti’a ’ore, ’eiaha nā roto i te rū noa, ’eiaha ato’a nā roto i te riri ’e te mārō.
15 E ueue atu ’oe i te repo puehu i tō ’oe ’āvae ’ei fa’ahapara’a ia rātou ’o tē ’ore e fāri’i ia ’oe, ’eiaha i mua ia rātou, ’o te fa’atupu ho’i ’oe i tō rātou riri, i te vāhi mo’emo’e rā ; ’e ’a horoi i tō ’oe ’āvae, ’ei fa’ahapara’a ia rātou i te mahana ha’avāra’a ra.
16 Inaha, ’ua nava’i ho’i teie nā ’outou, ’e ’o tē hina’aro ho’i ïa nōna ’o tei tono atu ia ’outou na.
17 ’E nā roto i te vaha o tō’u nei tāvini ’o Iosepha Semita, tamaiti, e fa’a’itehia mai ai te parau nō ni’a ia Sidney Rigdon e’ Oliver Cowdery. ’E tei toe ra, a muri atu ïa. ’Oia ïa. ’Āmene.