1 Inaha, ’a fa’aro’o mai na i te reo nōna ’o tei mau i te tā’āto’ara’a o te mana, ’o tē vai nei mai te mātāmua mai ā ē a muri noa atu, ’oia ’o Alepha ’e ’o Omega, te ha’amatara’a ’e te fa’ahope’a.

2 Inaha, ’oia mau te nā ’ō mai ra te Fatu ia ’outou na, ’e te mau peresibutero nō tā’u nei ’ēkālesia, ’o tei ha’aputuputu mai i ni’a i teie vāhi nei, ’o tei fa’a’orehia atu ho’i tā ’outou mau hara i teie nei, nō te mea, e fa’a’ore ho’i Au, ’o te Fatu, i te mau hara, ’e e aroha ho’i ia rātou ’o tē fa’i mai i tā rātou ra mau hara ma te ’ā’au ha’eha’a ra ;

3 ’E ’oia mau tē parau atu nei au ia ’outou na, e ’ere ïa i te mea tītauhia ’ia tere ’oi’oi teie pupu pā’āto’a o tā’u mau peresibutero nā ni’a i te mau pape, ’a pohe noa ai te mau ta’ata ’o tei pārahi i nā pae e piti o te pape ra i roto i te ti’aturi ’ore.

4 Noa atu rā, ’ua fa’ati’a vau i te reira ’ia nehenehe ia ’outou ’ia fa’a’ite atu i te parau mau ; inaha, e rave rahi te mau ’ati e vai ra i ni’a i te mau pape, ’e e rahi atu ā i te mau taime i mua nei.

5 Nō te mea ’ua fa’ata’a vau, ’o te Fatu, i roto i tō’u nei riri ’ia rahi te mau ’ati i ni’a i te mau pape ; ’oia ïa, i ni’a i teie iho nei mau pape.

6 Noa atu rā, tei roto i tō’u nei rima te mau ta’ata ato’a ra, ’e ’o ’oia ’o tē ha’apa’o maita’i i rotopū ia ’outou na, e ’ore ’oia e pohe i te mau pape ra.

7 Nō reira, e mea ti’a ïa ia tere ha’avitiviti atu tō’u tāvini ra ’o Sidney Gilbert ’e tō’u tāvini ra ’o William W. Phelps nō tā rāua ’ohipa ’e misiōni ho’i.

8 Noa atu rā, e ’ore au e fa’ati’a ia ’ōrua ’ia haere atu ē tae noa atu i te taime ’ōrua e a’ohia ai nō tā ’ōrua mau hara ato’a, ’ia riro ’ōrua ’ei hō’ē mau, ’ia ’ore ’ōrua ’ia pohe i roto i te parauti’a ’ore.

9 ’E i teienei, ’oia mau tē parau atu nei au, e mea ti’a ïa iā’u nei ’ia haere fa’ata’a ’ē atu ’outou. Nō reira, ’ia rave tō’u nā tāvini ra ’o Sidney Gilbert ’e William W. Phelps i tā rāua pupu tahito ’e ’ia haere rū noa rāua i tō rāua tere ’ia ti’a ia rāua ’ia fa’aoti i tā rāua ’ohipa, ’e nā roto i te fa’aro’o rāua e upo’oti’a ai ;

10 ’E mai te mea e ha’apa’o maita’i rāua e pāruruhia rāua, ’ei pīha’i iho ïa vau, ’o te Fatu, ia rāua ra.

11 ’E ’a tu’u atu i te toe’a ’ia rave i tei hina’arohia e rātou ’ei ’ā’ahu.

12 ’A tu’u atu i tō’u tāvini ra ia Sidney Gilbert ’ia rave i tei ’ore i hina’arohia, mai te au i tā ’outou e fa’aoti.

13 ’E i teienei, inaha, ’ua hōro’a atu vau i te hō’ē fa’auera’a nō ni’a i teie nei mau mea ia ’outou ’ei maita’i nō ’outou ; ’e e fa’a’āfaro vau, ’o te Fatu, ’ia ’outou mai te au i tei ravehia i te ta’ata i te mau mahana tahito ra.

14 Inaha, ’ua ha’amaita’i au, ’o te Fatu, i te mau pape i te mātāmua ra ; terā rā i te mau mahana hope’a nei, nā roto i te vaha nō tō’u tāvini ra ’o Ioane, i ’anatema atu ai au i te mau pape ra.

15 Nō reira, e tae mai te mau mahana e ’ore roa te ta’ata nei e maita’i i ni’a i te mau pape.

16 ’E e parauhia ïa i te mau mahana a muri atu ē e ’ore roa e ti’a i te ta’ata ’ia haere i ni’a i te fenua nō Ziona nā ni’a i te mau pape, maori rā ’oia tei vai parauti’a i roto i te ’ā’au ra.

17 ’Ē, mai te au i ta’u, tā te Fatu, i ’anatema i te fenua i te mātāmua roa, ’ua nā reira ato’a vau i te mau mahana hope’a nei i te ha’amaita’i mai i te reira, i roto i tōna ra tau, ’ei faufa’a nō tō’u ra feiā mo’a, ’ia roa’a ia rātou te maita’i nō te reira.

18 ’E i teienei, tē hōro’a atu nei au ia ’outou i te hō’ē fa’auera’a, ’e ’o tā’u e parau atu i te hō’ē ra, ’o tā’u ato’a ïa e parau atu nei i te tā’āto’ara’a, ’ia fa’aara atu i tō ’outou mau taea’e nō ni’a i teie nei mau pape, ’ia ’ore rātou ’ia tere mai i ni’a i te reira, ’o te mou tō rātou ra fa’aro’o, ’a mau atu ai rātou i roto i te mau mārei ;

19 ’Ua fa’aue mana vau, ’o te Fatu, ’e tē haere nei te ha’amou nā ni’a i te reira, ’e ’aore roa vau e fa’a’ore i te fa’auera’a mana.

20 ’Ua riri au, ’o te Fatu, ’ia ’outou inanahi ra, ’ua fa’afāriu-’ē-hia atu rā tō’u riri i teie nei mahana.

21 Nō reira, ’ia ha’avitiviti atu rātou ’o tā’u i parau atu, i tō rātou ra tere—tē parau fa’ahou atu nei au ia ’outou, ’ia ha’avitiviti atu i tō rātou tere.

22 ’E ’aita e huru ’ē iā’u nei, ’ia oti te hō’ē tau poto, mai te mea e fa’aoti rātou i tā rātou ’ohipa misiōnare, ’ia haere rātou nā ni’a i te pape ’e ’aore rā nā te fenua ; ’ia ravehia te reira mai te au i tei fa’a’itehia atu ia rātou ra ’ia au ho’i i tō rātou ferurira’a i muri a’e.

23 ’E i teienei, nō ni’a i tō’u mau tāvini ra, ’ia Sidney Rigdon, Iosepha Semita, tamaiti, ’e Oliver Cowdery, ’eiaha rātou ’ia haere fa’ahou mai nā ni’a i te mau pape ra, maori rā nā ni’a i te ’ē’a pape i ’ōhia ra, ’a tere atu ai i tō rātou ra mau ’utuāfare ; ’oia ho’i ’eiaha roa rātou e haere mai nā ni’a i te mau pape ’ia tere, maori rā nā ni’a i te ’ē’a pape i ’ōhia ra.

24 Inaha, ’ua fa’ata’a vau, ’o te Fatu, i te hō’ē ’ē’a nō te terera’a o tō’u feiā mo’a ; ’e inaha, ’o teie te ’ē’a—’ia fa’aru’e atu rātou i te ’ē’a pape i ’ōhia ra, ’e ’ia haere rātou nā ni’a noa i te fenua, nō te mea, tē fa’auehia nei ho’i rātou ’ia haere atu i te fenua nō Ziona ;

25 ’E e rave ho’i rātou mai tā te mau tamari’i o ’Īserā’ela, i te fa’ati’a-haere-ra’a i tō rātou ra mau ti’ahapa i te pae ’ē’a ra.

26 ’E, inaha, e fa’a’ite atu ’outou i teie fa’auera’a i tō ’outou mau taea’e ato’a ra.

27 Noa atu ā ho’i, ’o ’oia ’o tei hōro’ahia atu te mana ’ia fa’aue i te mau pape ra, ’ua hōro’a-ato’a-hia ïa iāna, nā roto i te Vārua, ’ia ’ite i tāna mau rāve’a ato’a ra ;

28 Nō reira, ’ia rave ’oia mai te au i tā te Vārua o te Atua ora e fa’aue atu iāna ra, i ni’a i te fenua ’e ’aore rā i ni’a i te mau pape, mai te au i tei vai iā’u nei ’ia rave i muri a’e ra.

29 ’E ’ua hōro’ahia atu ia ’oe te ’ē’a nō te feiā mo’a, ’oia ho’i te purūmu nō te terera’a o te feiā mo’a nō te pūhapara’a o te Fatu.

30 ’E teie fa’ahou ā, ’oia mau tē parau atu nei au ia ’outou na, ’eiaha roa tō’u mau tāvini nei, ’o Sidney Rigdon, ’o Iosepha Semita, tamaiti, ’e ’o Oliver Cowdery, e hāmama atu i tō rātou vaha i rotopū i te mau ’āmuira’a o te feiā parauti’a ’ore ē tae noa atu i te taime rātou e tae atu ai i Cincinnati ra ;

31 ’E i te reira vāhi e fa’ateitei ai rātou i tō rātou reo i te Atua i te fa’ahapara’a i taua feiā ra, ’oia ïa, ’ei iāna ’o tei tupu tōna ra riri nō tā rātou ra mau ’ohipa parauti’a ’ore, e feiā ho’i ’o tei fātata roa i te ha’amouhia.

32 ’E mai reira atu ho’i rātou i te tere i te ’āmuira’a a tō rātou ra mau taea’e, nō te mea ’ua hina’aro-rahi-hia a’e tā rātou ra mau ’ohipa i rotopū ia rātou i tei rotopū i te mau ’āmuira’a o te feiā parauti’a ’ore.

33 ’E i teienei, nō te feiā i toe, ’ia tere atu rātou ’e ’ia poro haere i te parau i rotopū i te mau ’āmuira’a o te feiā parauti’a ’ore, mai te au i tei hōro’ahia atu ra ;

34 ’E mai te mea e nā reira rātou, e mā tō rātou ’ahu, ’e e riro ho’i rātou ’ei feiā pōra’o ’ore i mua iā’u nei.

35 ’E ’ia tere ’āmui rātou, ’e ’aore rā tāta’ipiti, mai te au i tō rātou ra mana’o e maita’i ai rātou ra, maori rā ’o tō’u tāvini ra ’o Reynolds Cahoon ’e tō’u tāvini ra ’o Samuel H. Smith, ’o tā’u i māuruuru roa, ’eiaha rāua ’ia fata’a-’ē-hia ē tae noa atu i te taime rāua e ho’i atu ai i tō rāua ’utuāfare, ’e e tumu pa’ari tō te reira i roto iā’u nei.

36 ’E i teienei, ’oia mau tē parau atu nei au ia ’outou na, ’e ’o tā’u e parau atu nei i te hō’ē ra, ’o tā’u ato’a ïa e parau atu nei i te tā’āto’ara’a, ’a ’oa’oa na e te mau tamari’i ri’i ; nō te mea tei rotopū vau ia ’outou na, ’e ’aita vau i fa’aru’e atu ia ’outou.

37 ’E nō te mea ’ua fa’aha’eha’a ’outou ia ’outou iho i mua iā’u nei, nō ’outou ïa te mau ha’amaita’ira’a o te bāsileia.

38 ’A tātua na i tō ’outou tau’upu, ’e ’a tīa’i māite, ’e ’a ha’apa’o maita’i, ma te tīa’i ti’aturi i te taera’a mai o te Tamaiti a te Ta’ata, nō te mea e tae mai ’oia i te hora mana’o-’ore-hia e ’outou na.

39 ’A pure tāmau noa ’ia ’ore ’outou ’ia topa atu i roto i te fa’ahemara’a, ’ia ineine ’outou nō te mahana o tōna taera’a mai, i te orara’a nei ’e ’aore rā i roto i te pohe. ’Oia ïa. ’Āmene.