1 ’Oia mau tē parau atu nei au ia ’outou na, e tō’u mau hoa, ’eiaha e mata’u, ’ia tāmāhanahanahia tō ’outou ’ā’au ; ’oia ïa, ’a ’oa’oa tāmau noa, ’e ’a fa’a’ite mai i te māuruuru i roto i te mau mea ato’a ra ;

2 Ma te tīa’i māite i te Fatu, nō te mea ’ua tae mai tā ’outou mau pure i roto i te tari’a o te Fatu Sabaota, ’e ’ua pāpa’ihia ho’i i teie tāpa’o ’e teie fa’a’itera’a—’ua tapu ’e ’ua fa’ata’a mai te Fatu ē, e fa’ati’ahia te reira.

3 Nō reira, tē hōro’a mai ra ’oia i teie fafaura’a ia ’outou, ma te fafaura’a ’o tē ’ore roa e fa’ahuru-’ē-hia ’e e fa’atupu-mau-hia te reira ; ’e te mau mea ato’a i ha’amamaehia ai ’outou ra e fa’ariro-’āmui-hia ïa ’ei maita’i nō ’outou, ’e ’ei hanahana ho’i i tō’u nei i’oa, tē nā reira mai nei te Fatu.

4 ’E i teienei, ’oia mau tē parau atu nei au ia ’outou na nō ni’a i te mau ture o te fenua nei, ’o tō’u ïa hina’aro ’ia ha’apa’o tō’u feiā i te rave i te mau mea ato’a tā’u e fa’aue atu ia rātou ra.

5 E taua ture ho’i nō te fenua nei ’o tei au i te papa ture nō te hau fenua ’e ’o tē turu i te parau tumu nō te ti’amāra’a nō te pāruru noa i te ti’ara’a ’e te fāna’o e au i te ta’ata ’ia rave, nā te mau ta’ata ato’a te reira, ’e ’ua ti’a ho’i ïa i mua iā’u nei.

6 Nō reira, e fa’ati’a ho’i au, ’o te Fatu, ia ’outou e tō ’outou mau taea’e nō tā’u ’ēkālesia nei, i te fāri’i-maita’i-ra’a i taua ture ra ’o tei au i te mau ture tumu o te fenua ;

7 ’E nō ni’a i te ture a te ta’ata nei, ’o tei hau a’e ’e ’aore rā ’o tei iti a’e i taua mau mea nei, nō roto mai ïa i te ’ino.

8 ’Ua fa’ati’amā vau, ’o te Fatu ra te Atua, ia ’outou, nō reira ’ua ti’amā iho ā ’outou ; ’e nā te ture ato’a i fa’ati’amā ia ’outou.

9 Noa atu ā ïa, ’ia fa’atere ana’e te feiā parauti’a ’ore ra, e ’oto te ta’ata nei.

10 Nō reira, e mea ti’a roa ’ia mā’imi-maita’i-hia te feiā parauti’a ’e te feiā pa’ari ho’i, ’e e mea ti’a ho’i ia ’outou ’ia mata na i te pāturu atu i te mau ta’ata maitata’i ’e te mau ta’ata pa’ari ho’i ; ’o tei iti a’e i teie mau mea nei, nō roto mai ïa i te ’ino.

11 ’E tē hōro’a atu nei au i te hō’ē fa’auera’a ia ’outou na, ’ia fa’aru’e ’ē atu ’outou i te mau ’ino ato’a, ’e ’ia ’ati atu i te mau maita’i ato’a, ’e ’ia ha’apa’o ’outou i te mau parau ato’a nō roto mai i te vaha o te Atua ra.

12 Nō te mea e hōro’a mai ’oia i te feiā ha’apa’o maita’i te fa’aue nā ni’a iho i te fa’aue, te a’o nā ni’a iho i te a’o ; ’e e tāmata vau ia ’outou ē e hi’opo’a ho’i ia ’outou nā roto i te reira.

13 ’E ’o ’oia ’o tē hōro’a i tōna ora nō tā’u nei ’ohipa, nō tō’u nei i’oa, e ’ite fa’ahou mai ā ïa ’oia i te reira, ’oia te ora mure ’ore.

14 Nō reira, ’eiaha e mata’u i tō ’outou mau ’enemi, nō te mea ’ua tapu vau i roto i tō’u ’ā’au, tē nā reira mai nei te Fatu, e tāmata vau ia ’outou i roto i te mau mea ato’a, e ha’apa’o ānei ’outou i tā’u fafaura’a, ē tae noa atu i te pohe, ’ia ’itehia ē ’ua ti’amā ’outou.

15 Nō te mea ’ia ’ore ’outou ’ia ha’apa’o maita’i i tā’u fafaura’a, ’aore ïa ’outou i ti’amā iā’u nei.

16 Nō reira, ’a fa’a’ore atu i te tama’i, ’e ’a poro i te parau nō te hau, ’e ’a tītau itoito ’ia fa’afāriu i te ’ā’au o te mau tamari’i i tō rātou ra mau metua, ’e te ’ā’au ho’i o te mau metua i te mau tamari’i ;

17 ’E teie fa’ahou ā, te ’ā’au o te mau ’āti Iuda i te mau peropheta, ’e te mau peropheta i te mau ’āti Iuda ra ; ’o te haere mai ho’i au ’e ’o te tā’iri au i te fenua ato’a i te ’anatema, ’e ’ia ha’amou-roa-hia te mau ta’ata ato’a i mua iā’u nei.

18 ’Eiaha e horuhoru tō ’outou ’ā’au ; nō te mea e rave rahi te mau aora’i i te fare o tō’u Metua, ’e ’ua fa’aineine ho’i au i te hō’ē vāhi nō ’outou ; ’e i te vāhi tei reira tō’u Metua ’e ’o vau ato’a ho’i, ’ei reira ato’a ïa ’outou.

19 Inaha, ’aore au, ’o te Fatu, i māuruuru roa i te mau ta’ata e rave rahi i roto i te ’ēkālesia i Kirtland ;

20 Nō te mea ’aore rātou i fa’aru’e i tā rātou mau hara, ’e tō rātou mau haere’a parauti’a ’ore, te to’eto’e o tō rātou ’ā’au, ’e tā rātou nounou tao’a, ’e tā rātou mau ’ohipa vi’ivi’i ato’a, ’e ’aore ho’i i ha’apa’o i te mau parau nō te pa’ari ’e te ora mure ’ore tā’u i hōro’a atu ia rātou ra.

21 ’Oia mau tē parau atu nei au ia ’outou na, e tā’iri au, ’o te Fatu, ’ia rātou, ’e e rave ho’i i tā’u i hina’aro ra, mai te mea ’aore rātou e tātarahapa ’e e ha’apa’o i te mau mea ato’a tā’u i parau atu ia rātou ra.

22 ’E teie fa’ahou tē parau atu nei au ia ’outou na, mai te mea e ha’apa’o ’outou i te rave i te mau mea ato’a tā’u e fa’aue atu ia ’outou na, e fa’afāriu ’ē atu vau, ’o te Fatu, i te riri ’ū’ana ’e te au ’ore rahi ho’i ia ’outou na, ’e e ’ore roa ’outou e noa’a i te ’ūputa o hade ra.

23 I teienei tē parau atu nei au ia ’outou nō ni’a i tō ’outou mau ’utuāfare—mai te mea e hāmani ’ino mai te ta’ata ia ’outou ’e ’aore rā i tō ’outou ’utuāfare, i te hō’ē taime, ’e e fa’a’oroma’i ’outou i te reira ma te marū ’e ma te fa’a’ino ’ore atu ia rātou ra, ’e ma te ’imi ’ore i te tāho’ora’a, e noa’a ia ’outou te utu’a maita’i ;

24 Terā rā ’ia ’ore ’outou ’ia fa’a’oroma’i i te reira ma te marū, e tae mai ïa te tāho’ora’a i ni’a ia ’outou ’o tē riro ’ei fāito ti’a nō tā ’outou tāho’ora’a atu.

25 ’E teie fa’ahou ā, mai te mea e hāmani ’ino mai tō ’outou ’enemi ia ’outou i te piti o te taime, ’e ’aita ’outou e fa’a’ino atu i tō ’outou ’enemi, ’e e fa’a’oroma’i ’outou i te reira ma te marū, e fāri’i ïa ’outou i te utu’a maita’i ’e ’ia hānere a’e te rahira’a tā ’outou e fāri’i.

26 ’E teie fa’ahou ā, mai te mea e hāmani ’ino mai ’oia ia ’outou i te toru o te taime, ’e e fa’a’oroma’i maita’i ’outou i te reira, e tāpitihia tā ’outou utu’a maita’i ia ’outou na ’e ’ia ta’imaha a’e te rahira’a ;

27 ’E e vai noa teie mau fa’a’itera’a pāpū e toru ’ei fa’ahapara’a i tō ’outou ’enemi mai te mea ē ’aita ’oia e tātarahapa, ’e e ’ore roa ho’i e fa’a’orehia ;

28 ’E i teienei, ’oia mau tē parau atu nei au ia ’outou na, mai te mea e ora atu taua ’enemi ra i tā’u nei tāho’ora’a iāna, ’e ’ia ’ore ho’i ’oia ’ia fa’ataehia mai i te ha’avāra’a i mua iā’u nei, ’ei reira ra ’a ha’apa’o atu i te fa’aara atu iāna i roto i tō’u nei i’oa, ’ia ’ore ho’i ’oia ’ia haere fa’ahou mai i ni’a ia ’outou, ’ia ’ore ato’a ho’i i ni’a i tō ’outou ra ’utuāfare, ē tae noa atu i te mau tamari’i a tā ’outou mau tamari’i ’e ’ia tae roa a’e i te torura’a ’e te mahara’a ho’i o te u’i.

29 ’Ei reira, mai te mea e tae mai ’oia i ni’a ia ’outou ’e ’aore rā i tā ’outou mau tamari’i ; ’e ’aore rā i te mau tamari’i a tā ’outou mau tamari’i ē tae noa atu ho’i i te torura’a ’e te mahara’a o te u’i, ’ua tu’u atu ïa vau i tō ’outou ’enemi i roto i tō ’outou rima i reira ;

30 ’Ei reira mai te mea e fa’aora atu ’outou iāna ra, e fāri’i ïa ’outou i te utu’a maita’i nō tō ’outou parauti’a ; ’e tā ’outou ho’i mau tamari’i ’e te mau tamari’i ho’i a tā ’outou mau tamari’i ē tae noa atu i te torura’a ’e te mahara’a o te u’i.

31 ’Āre’a rā, tei roto ho’i tō ’outou ’enemi i tō ’outou nā pu’e rima ; ’e mai te mea e fa’autu’a ’outou iāna mai te au i tāna mau ’ohipa, ’ua ti’ahia ïa ’outou ; mai te mea ho’i ’ua tītau ’oia ’ia taparahi ia ’outou, ’e ’ua fa’atapitapihia tō ’outou orara’a e ana, tei roto ïa tō ’outou ’enemi i tō ’outou nā pu’e rima ’e ’ua ti’ahia ho’i ’outou.

32 Inaha, ’o teie te ture tā’u i hōro’a atu i tō’u tāvini ra ia Nephi, ’e i tō ’outou mau metua, ’ia Iosepha, ’e ia Iakoba, ’e ’ia Isaaka, ’e ’ia Aberahama, ’e i tā’u mau peropheta ’e mau ’āpōsetolo pā’āto’a nō te tau tahito ra.

33 ’E teie fa’ahou ā, ’o teie ho’i te ture tā’u i hōro’a atu i tō’u mau ta’ata i tahito ra, ’eiaha rātou ’ia haere atu e ’aro atu i te hō’ē nūna’a, i te hō’ē ’ōpū, i te hō’ē reo, ’e ’aore rā i te mau ta’ata, maori rā nā’u, nā te Fatu, i fa’aue atu ia rātou ra.

34 ’E mai te mea e fa’atupu mai te hō’ē nūna’a, te hō’ē reo, ’e ’aore rā te mau ta’ata, i te tama’i ia rātou ra, ’ia nā mua rātou i te fa’ateitei mai i te reva nō te hau i ni’a i taua feiā ra, ’e taua nūna’a ra, ’e ’aore rā taua reo ra ;

35 ’E mai te mea ē ’aore roa taua feiā ra i fāri’i i te anira’a nō te parau hau, ’aore ato’a ho’i i te pitira’a ’e ’aore ato’a ho’i i te torura’a o te taime, e mea ti’a ïa ia rātou ’ia ’āfa’i mai i teie mau parau fa’a’ite pāpū i mua i te Fatu ;

36 ’Ei reira vau, ’o te Fatu, e hōro’a atu ai i te hō’ē fa’auera’a ia rātou, ’e ’ua ti’a ho’i rātou i mua iā’u nei ’ia haere atu e ’aro atu i te reira nūna’a, reo, ’e mau ta’ata.

37 ’E nā’u, nā te Fatu, e ’aro atu i tā rātou ra mau ’arora’a, ’e te ’arora’a a tā rātou ra mau tamari’i, ’e te ’arora’a ho’i a te mau tamari’i a tā rātou ra mau tamari’i, ē tae noa atu i te taime rātou e tāho’o atu ai i tō rātou mau ’enemi ato’a, ē tae noa atu i te torura’a ’e te mahara’a o te u’i.

38 Inaha, e hi’ora’a ho’i teie nā te mau ta’ata ato’a ra, tē nā reira mai nei te Fatu tō ’outou ra Atua, ’ei fa’a’itera’a ē ’ua ti’a te reira i mua iā’u nei.

39 ’E teie fa’ahou ā, ’oia mau tē parau atu nei au ia ’outou na, mai te mea ē i muri a’e i tō tō ’outou ’enemi haerera’a mai e ’aro ia ’outou i te taime mātāmua, e tātarahapa mai ’oia ’e e haere mai ’oia ia ’outou ma te tāparu ’ia fa’a’ore atu ’outou i tāna hara, e fa’a’ore atu ïa ’outou i tāna hara, ’e ’eiaha ’outou e tāpe’a fa’ahou i te reira ’ei parau fa’a’ite pāpū nō te fa’ahapara’a i tō ’outou ’enemi—

40 ’E nā reira noa ē tae noa atu i te pitira’a ’e te torura’a o te taime ; ’e i te mau taime ato’a ’ia tātarahapa tō ’outou ’enemi i te hapa tāna i rave i ni’a ia ’outou na, e fa’a’ore atu ’outou i tāna hapa ē tae noa atu i te hitu ’ahuru o te hitura’a.

41 ’E mai te mea e hapa ’oia i ni’a ia ’outou ’e ’aita ho’i ’oia e tātarahapa i te taime mātāmua ra, noa atu ā ïa, e fa’a’ore ’outou i tāna hapa.

42 ’E mai te mea e hapa ’oia i ni’a ia ’outou i te pitira’a o te taime, ’e ’aita ho’i ’oia e tātarahapa, noa atu ā ïa, e fa’a’ore ’outou i tāna hapa.

43 ’E mai te mea e hapa ’oia i ni’a ia ’outou i te torura’a o te taime, ’e ’aita ho’i ’oia e tātarahapa, noa atu ā ïa, e fa’a’ore ’outou i tāna hapa.

44 Terā rā mai te mea e hapa ’oia i ni’a ia ’outou i te mahara’a o te taime, ’eiaha ’outou e fa’a’ore i tāna hapa, e ’āfa’i rā ’outou i teie mau parau fa’a’ite pāpū i mua i te Fatu ; ’e e ’ore roa ho’i taua mau mea ra e fa’a’orehia ē tae noa atu i te taime ’oia e tātarahapa ai ’e e fa’aho’i mai ai ia ’outou ’e ’ia ta’imaha a’e i te mau mea ato’a tāna i hapa ia ’outou na.

45 ’E mai te mea e nā reira ’oia, e fa’a’ore ’outou i tāna hapa ma tō ’outou ’ā’au ato’a ; ’e mai te mea ē ’aita ’oia e nā reira, e tāho’o atu vau, ’o te Fatu, i tō ’outou ’enemi, ’e ’ia hānere a’e te rahira’a ;

46 ’E i ni’a ho’i i tāna mau tamari’i, ’e i ni’a i te mau tamari’i a tāna mau tamari’i nō rātou ato’a ’o tē ’ino’ino mai iā’u nei, ē tae noa atu i te torura’a ’e te mahara’a o te u’i.

47 Terā rā mai te mea e tātarahapa te mau tamari’i, ’e ’aore rā te mau tamari’i a te mau tamari’i, ’e e fāriu mai i te Fatu ra tō rātou Atua, ma tō rātou ’ā’au ato’a ’e tō rātou pūai ato’a, ’e te ferurira’a, ’e te itoito ato’a, ’e e fa’aho’i mai ’ia ta’imaha a’e te rahira’a nō tā rātou mau hapa tā rātou i rave, ’e ’aore rā i tā tō rātou mau metua i rave, ’e ’aore rā i tā te mau metua o tō rātou mau metua i rave, ’ei reira tō ’outou au ’ore rahi e fa’afāriu-’ē-hia atu ai ;

48 ’E e ’ore roa ho’i te tāho’o e tae fa’ahou i ni’a ia rātou ra, tē nā reira mai nei te Fatu ra tō ’outou Atua, e ’ore roa ho’i tā rātou mau hapa e ’āfa’i-fa’ahou-hia mai ’ei parau fa’a’ite pāpū i mua i te Fatu nō te fa’ahapa ia rātou ra. ’Āmene.