![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fbb%2Fec%2Fbbec030562b32d0c8419d802a09161f6c0900355%2Fbbec030562b32d0c8419d802a09161f6c0900355.jpeg/full/!250,/0/default)
Aikuaa ko’ã mba’e che jehegui
Jaikuaa ñande jehegui pe Jesucristo evangelio restaurado añeteguaha ikatu ha’e peteĩva umi tuichave ha ñanembo vy’avéva tembiasakue ko jeikovepegua .
Hermanokuéra ojehayhuetéva, opa ára ñane inspira pe presidente Thomas S. Monson ejemplo personal ha pe iservicio sacerdocio-pe. Nda’aréi oñeporandu heta diácono-pe:”¿Mba’épa omomba’eguasuve hikuái presidente Monson-gui?. Peteĩ diácono imandu’a presidente Monson, imitãrõ guare, ome’ẽ hague ihugetekuéra umi tapicha oikotevẽvape. Ambue imandu’a presidente Monson oñangareko hague heta viuda ibarrioguáre. Ambuéva imandu’a oñehenói hague chupe imitãme ha’e hağua apóstol ha ohovasa hague yvypórape ko yvóra jerére. Upéi peteĩ mitãrusu he’i: “Pe che ahecharamovéva presidente Monson-re ha’e pe itestimónio oku’e’ỹva”.
Añetehápe, maymáva ñañandúkuri pe testimónio especial oguerekóva ñande profeta pe Salvador Jesucristo-gui ha ikompromiso akóinte osegui hağua pe Espíritu guía. Opa tembiasakue ha’e omombe’úvape, presidente Monson ñane invita javivipave hağua pe evangelio, ñañeha’ã hağua jareko peteĩ testimónio ñanemba’éva ha ñamombarete hağua. Penemandu’áke pe he’iva’ekue rehe ko púlpitope umi conferencia ohasámavape: “Ñanembarete hağua ha jeropu’aka hağua opa umi pu’akavai ñanembotyryrýva pe tape vaíre…jarekova’erã testimónio ñanemba’e teéva. Tapereko 12 térã 112 año, térã ha’e ha’éva eda, ikatu peikuaa pende jehegui pe Jesucristo evangelio añeteguaha” 1.
Che mensaje ko pyharegua ha’evéramo jepe umi 12 año orekóvape, umi 112 año orekóvagui, umi principio akompartíva opaitévape ğuarã iporã. Presidente Monson ñe’ẽ mbohováivo, aporandu: ¿Oikuaápa piko opaite ñandekuéra ijehegui pe evangelio añeteguaha? ¿Ikatu piko ja’e jeroviapýpe pe ñande testimónio ha’eha añetehápe ñanemba’e? Ha’e jey presidente Monson ñe’ẽ: “Aime seguro peteĩ testimónio mbarete ñande Salvador ha hi’evangéliogui…penemo’ãta pekádogui ha pe aña penderehe ojerévagui…Ne’ĩramo gueteri peguereko peteĩ testimónio ko’ã mba’égui, pejapo tekotevẽva peguereko hağua. Tekotevẽ peguereko peteĩ testimónio penemba’e teéva, pe ambue tapicha testimónio ndaikatumo’ãigui penepytyvõ puku.2.
Aikuaa ko’ã mba’e che jehegui
Jaikuaa hağua ñande jehegui Jesucristo evangelio restaurado añeteguaha, ikatu ha’e peteĩva umi tembiasakue iporãve ha ogueruvéva vy’a ñande rekovépe. Ikatu ñañepyrũmanteva’erã ambuekuéra testimónio reheve ha ja’e, mitãrusukuéra gerreróicha: “Ndorodudái ore sykuéra oikuaa hague”3. Ha’e peteĩ ñepyrũ porã, ha katu ñamopu’ãva’erã upe pyenda ári. Ñanembarete hağua javivívo pe evangelio, ndaipóri mba’eve imba’eguasuvéva pe jahupyty ha ñamombarete pe testimónio ñanemba’e teéva. Ikatuva’erã ja’e Alma he’i haguéicha, “[Aikuaa] ko’ã mba’e che jehegui” 4.
“Ha ¿mba’éichapa peimo’ã che aikuaa añeteguaha?”, he’ive Alma. “Péina ápe, che ha’e peẽme pe Tupã Espíritu Imarangatúva oikuaaukaha chéve. Péina ápe, che a’ajuna ha añembo’e heta ára ikatu hağua aikuaa ko’ã mba’e che jehegui. Ha ko’áğa aikuaa che jehegui añeteguaha”.5.
Ahechase umi mba’e che ru ohechava’ekue
Almaicha, Nefi oikuaava’ekue avei pe añetegua ijehegui. Ohendu rire itúvape oñe’ẽ hetaite experiencia espiritual ha’e orekóvare, Nefi oikuaasékuri pe itúva oikuaáva. Hetavékuri peteĩ jeikuaaseguinte; orekókuri ñembyahýi ha yuhéi oikuaaségui. Jepe “imitã”, orekókuri “tuicha jeikuaase umi Tupã mba’e ñemimbýgui”. 6. Oipotákuri “[ohecha, ohendu ha oikuaa] haĝua ko’ã mba’égui, pe Espíritu Santo pu’aka rupi” 7.
Nefi “oguapy jave ajepy’amongeta ko’ãvare”. [oje] gueraha pe Espíture…peteĩ yvyty ijyvatetereíva ári”, ha upépe oñeporandu chupe: “ ¿mba’épa nde reipota?”. Mbohovái ha’e ome’ẽva ndahasýikuri: ¿Ahechase umi mba’e che ru ohechava’ekue” 8. Pe ikorasõ jerovia ha iñeha’ã kyre’ỹ rupi, Nefi ohupyty jehovasa oreko hağua peteĩ tembiasakue hechapyrãva. Oñeme’ẽ chupe peteĩ testimónio pe Salvador Jesucristo heñoi’ỹ mboyguégui, hekove ha ijehupi kurusúregui; ohecha pe Mormón Kuatiañe’ẽ ñesẽ tesapépe ha pe Evangelio rrestaurasiõ umi ára pahápe; opa ko’ãva oiko ha’e añetehápe oikuaaségui ijehegui. 9.
Ko’ã experiencia personal Salvador ndive ombosako’iva’ekue Nefipe jehasa’asy ha umi mba’e’asy pya’e ohasátavape ĝuarã. Omombaretékuri chupe jepe ambue tapicha ifamíliape odudákuri hína. Ha’e ikatúkuri ojapo pévaoñehekombo’éguiijehegui haoikuaágui ijehegui. Ha’e ojehovasákuri testimónio imba’évape.
Tupãme ejerure
Neficha, pe profeta José Smith “imitã”va’ekue avei ourõguare “iñapytu’ũme peteĩ jepy’amongeta ipypukúva” umi añetegua espiritualvare. Josépe ğuarã, ha’eva’ekue ára “tuicha jepy’apyha”, ojerégui hese heta mensaje ñorairõra ha noñentendéiva pe religión rehegua. Ha’e oikuaasékuri máva umi tupaópa ha’e pe añeteguáva10. Oñe’inspirávo ko’ã bíblia pegua ñe’ẽre: “Oĩramo pende apytépe iñarandu’ỹva, tojerure Tupãme” 11, ijehegui omba’apo ojuhu hağua pe mbohovái. Peteĩ pyhare porãite primavera 1820-pe, oike peteĩ yvyratýpe ha oñesũ oñembo’e hağua. Ijerovia rupi ha Tupã oguerekógui peteĩ tembiapo guasu chupe ğuarã, José orrecibi peteĩ visiõ imimbipáva Tupã pe Túva ha Ta’ýra Jesucristo-gui, ha oikuaa ijehegui mba’épa ojapova’erã.
¿Ikatu piko pehecha pe José rembiasakue peteĩ modeloicha ikatúva pesegui peguereko térã pemombarete hağua pene testimónio? José ohejákuri umi escritura oike ikorasõme. Ojepy’amongeta pypuku umívare ha oiporu pe isituasiõme ĝuarã. Upéi, omba’apo umi mba’e oikuaava’ekue rupi. Ha pévagui ou pe gloriósa Primera Visión ha opa mba’e oñemẽva’ekue upe rire. Ko Tupao oñemopu’ãva’ekue principio he’ívare opáichagua tapicha, peteĩ mitãsuru kokuegua 14 año orekóva jepe, ikatuha “Tupãme [ojerure]” ha oñeme’ẽ mbohovái iñembo’ekuérape.
Upéicharõ, ¿mba’épa ha’e peteĩ testimónio?
Py’ỹi ñahendu Tupaogua miembrokuéra he’íramo pe itestimónio Evangelio rehegua ha’eha mba’e ha’ekuéra ohayhuvéva. Ha’e peteĩ Tupã don sagrado oñeme’ẽva ñandéve pe Espíritu Santo pu’aka rupive. Ha’e pe jeikuaa jarekóva py’aguapy ha ñemovã’ỹme jastudia, ñañembo’e ha javivíramo pe Evangelio. Ha’e pe Espíritu Santo temiandu otestifikáva ñane ángape pe jaikuaa ha jajapóva oĩporãha.
Oĩ máva oñe’ẽva pe testimóniore ha’erõguáicha peteĩ tesape myendy ha mbogueha: hendy térã nahendýi; ojeguereko peteĩ testimónio térã ndojeguerekói. Añetehápe, pe testimónio niko ha’e peteĩ yvyráicha ohasáva heta etapa rupi okakuaa ha ojedesarrolla hağua. Yvyrakuéra ko Ivy’arigua ijyvatevéva oĩ Redwood Parque Nacional-pe, Estados Unidos oestepe. Ñaime jave umi yvyra tuichaitéva guýpe, ñanemondýi jajepy’amongetávo opa umíva oñepyrũ hague peteĩ yvara’ỹ’imígui; péicha avei pe testimónio ndive. Oñepyrũramo jepe peteĩmi experiencia espiritual reheve, ikatu okakuaa ha ojedesarrolla ára ohasávo, oñemombarete meméramo ha ojereko py’ỹivéramo experiencia espiritual.
Ndaha’éi momba’eguasu, upéicharõ, pe profeta Alma omyesakãrõ guare mba’éichapa ñamongakuaa peteĩ testimónio, oñe’ẽva’ekue peteĩ yvara’ỹi oikóguiva yvyramáta. “Peme’ẽramo tenda”, ha’e heíkuri, “oñeñotỹ hağua peteĩ yvara’ỹi pene korasõme, péina ápe, ha’éramo peteĩ yvara’ỹi añetegua, térã yvara’ỹi iporãva, ha napemombóiramo pende jerovia’ỹ rupi…oñepyrũta okakuaa pene korasõme; ha peñandúvo upe kakuaa, peñepyrũta peje pende pype: Kóva ha’éne peteĩ yvara’ỹi porã, térã pe ñe’ẽ iporã, oñepyrũgui ombotuicha che ánga; heẽ, oñepyrũ omyesakã che apytu’ũ; heẽ, oñepyrũ heterei chéve ğuarã” 12.
Py’ỹi péicha ha’e pe testimónio ñepyrũmby: temiandu marangatu, ohechaukáva ha he’ijeývapeTupã ñe’ẽ ha’eha añetegua. Upevére, hechapyrãitéramo jepe ko’ã temiandu, ha’e iñepyrũmbýnte. Tembiapo emongakuaa hağua ne testimónio ndopái gueteri, peteĩ secuoya ñemonkakuaa ndopái háicha peteĩ hoky osẽvo pe yvýgui. Nañapenái térã ndajajesarekóiramo umi peteĩha ñe’ẽmbeguemi espiritual rehe térã, nañañangarekóiramo hese pe escriturakuéra ñehesa’ỹijo meme, pe ñembo’e, ha pe experiencia Espíritu ndivegua jeheka rupi, umi ñañanduva’ekue ikanguýta ha pe testimónio michĩvéta.
Alma he’i haguéicha: “…ha pehejareíramo pe yvyramáta, ha ndapejesarekóiramo peñangerekóvo hese, péina ápe, ndahapomo’ãi; ha kuarahy aku oğuahẽ vove ha ohapy, ipirúta ndahapóigui, ha pehekýita ha pemombóta okápe”. 13
Hetave kásope, pe testimónio okakakuaáta peteĩ yvyra okakuaa háicha: sa’i sa’i, haimete jahecha’ỹme, ñandejesareko meme ha tembiapo ñame’ẽva rupi. “Ha peñotỹramo pe ñe’ẽ”, Alma opromete, “heẽ, ha peñangarekóramo pe yvyramáta rehe oñepyrũ jave okakuaa, pende jerovia rupi, tuicha jesareko ha ñeha’arõkuaápe, pema’ẽvo tenonde gotyo hi’a rehe, oñembohapóta; ha péina ápe, ha’éta peteĩ yvyramáta hokýva tekove opave’ỹvape ğuarã”14.
Ko’ága aja ha’e ára; ko’ára ha’e pe ára
Testimónio chemba’e teéva oñepyrũva’ekue omoñe’ẽvo Mormón Kuatiañe’ẽmegua tekombo’ekuéra ha ajepy’amongetávo umívare. Añesũrõ guare ajerure hağua Tupãme ñembo’e marangatúpe, pe Espíritu Santo otestifikava’ekue che ángape pe amoñe’ẽva hína añeteguaha. Upe testimónio peteĩha ha’e che testimónio ñemboguataha heta umi ambue añetegua Evangelio reheguápe, presidente Monson ombo’e haguéicha: “Jaikuaa vove pe Mormón Kuatiañe’ẽ añeteguaha, upéva rire jaikuaa José Smith ha’e hague añetehápe peteĩ profeta ha ha’e ohecha hague Tupã pe Túva Ijapyra’ỹva ha Ita’ýra Jescristo-pe. Ha péva rire jaikuaa pe evangelio oñemoĩjey hague ko’ã ára pahápe José Smith rupive, ha pe Sacerdocio Aarónico ha Melquisedec mba’éva jepe”.15. Upe ára guive, arekova’ekue heta experiencia sagrada pe Espíritu Santo ndive omoañetejeýva chéve Jesucristo ha’eha pe Salvador del Mundo ha pe Hi’evangelio restaurado añeteguaha. Álmaicha, ikatu ha’e añépe aikuaaha ko’ã mba’e che jehegui.
Che anguirũ imitãva, ko’áğa aja ha’e ára ha ko’ára ha’e pe ára jaikuaa térã jaikuaajey hağua ñande jehegui pe Evangelio añeteguaha. Opavave ñandekuéra oreko peteĩ tembiapo imba’eguasúva ojapo haĝua. Jahupyty ha ñañemo’ã haĝua ko yvóra añágui ha’ete ku ñande reityséva opa ára, jeguerekova’erã Alma, Nefi ha pe mitãrusu José jeroviaichagua, jahupyty ha ñamongakuaa hağua testimónio ñanemba’e teéva.
Pe diácono añe’e mboyve haguéicha, ahecharamo presidente Monson-pe itestimóniore, ha’éva peteĩ secuoya tuichapajepevaicha; ha katu presidente Monson testimónio tekotevẽva’ekue avei okakuaa ha ojesedarrolla ára ohasávo. Ikatu jaikuaa ñande jehegui, presidente Monson oikuaa haguéicha, Jesucristo ha’eha ñande Salvador ha pe Redentor del mundo, José Smith ha’eha pe Restauración pegua profeta, jepeve Tupã sacerdocio restauración. Ñande jaguereko upe sacerdocio marangatu. Tañañehekombo’e ko’ã mba’égui ha tajaikuaa ñande jehegui, ha’e che humilde ñembo’e; Jesucristo réra marangatúpe. Amén