Pe Santa Cena—peteĩ Ángape ĝuarã Ñembopyahu
Cheryl A. Esplin rupive
Segunda Consejera Presidencia General Primaria gua
Pe Espíritu omonguera ha ombopyahu ñane ánga. Jehovasa oñeprometéva Santa Cénape ha’e pe “tapiaite [ikatuha] jaguereko Ijespíritu [ñanendive].”
Peteĩ árape, umi mitãkuñapyahu aty oporanduva’ekue chéve, “Mba’épa eikuaaséne ra’e erekóramo guare ore eda?” Ambohováiramo upe porandu ko’áĝa, ha’étakuri chupekuéra: “Che arekóramo guare pende eda aguerohorýne ra’e aikuaaporãverire pe Santa Cena imba’eguasuha; hi’ãnte chéve aikuaámo ra’e pe Santa Cena Elder Jeffrey R. Holland omyesakã haguéicha. Ha’e he’íkuri, ‘Peteĩ invitasiõ ojoajúva pe ordenanza sacramental rehe, ha’e péva ha’eva’erãha peteĩ añetegua tembiasa espiritual, peteĩ santa comunión, peteĩ ánga ñembopyahu.’1”
¿Mba’éichapa pe Santa Cena ikatu ha’e “peteĩ añetegua tembiasa espiritual, peteĩ santa comunión, peteĩ ánga ñembopyahu” opaite semana?
Pe Santa Cena-gui oiko peteĩ tembiasakue ñanemombaretéva ñahendúramo umi oración sacramental ha ñañe komprometejeýramo ñakumpli haĝua ñane konveniokuéra. Péva jajapo haĝua, ñaime porãva’erã ñamoĩ haĝua ñande jehe Jesucristo réra. 2 Oñe’ẽvo upe promésare, Presidente Henry B. Eyring ombo’eva’ekue: “Péva he’ise jajehechava’erã ñande jupe Imba’erõ guáicha; ñamoĩ chupe raẽvete ñande rekovépe; jaipota pe Ha’e oipotáva ha ndaha’éi pe ñande jaipotáva térã pe yvóra ñanehekombo’éva jaipotava’erãha.”3
Ja’úvo pe Santa Cena, jajapo avei konvénio “akóinte ñanemandu’ataha hese”4 . Pe pyhare ojehupi mbove chupe kurusúre, Cristo ombyaty Ijapóstolkuéra ha omoĩ pe Santa Cena. Omboja’o pan, ohovasa ha he’i: “Pey’u, pe’u; kóva ha’e che retére mandu’arã, ame’ẽva peẽ pejesalva haĝua.” 5 Upéi ojagarra peteĩ vino vaso, ome’ẽ aguije, ome’ẽ umi Ijapóstolpe omboy’u haĝua ha he’i, “…kóva ha’e che ruguýre mandu’arã…, oñeñohẽva opa umi che réra ogueroviávare” 6.
Nefita-kuéra apytépe, ha orrestaurarõ guare avei Itupao ko’ã ára pahápe, he’ijey ja’uva’erãha pe Santa Cena Hese ñanemandu’ávo7.
Japarticipávo pe Santa Cena-pe, jatestifika Tupãme ñanemandu’ataha akóinte Ita’ýrare ha ndaha’éi pe Santa Cena ordenansa ajánte. Péva he’ise opa ára ñama’ẽtaha Salvador techaukarã ha tekombo’ekuérare orahaporã haĝua umi ñane pensamiento, umi jaiporavóva, ha umi jajapóva8.
Pe oración sacramental ñanemomandu’a avei “ñane ñe’ẽrenduva’erãha umi hembiapoukapýre” 9.
Jesús he’iva’ekue: “Cherayhúramo, neñe’ẽrendu umi che rembiapoukapýre”10. Pe Santa Cena ome’ẽ ñandéve araporã ñama’ẽ haĝua ñande pype ha ñamoĩmbaite haĝua ñane korasõ Tupã rembipotápe. Tembiapoukapýre ñe’ẽrendu ogueru pe evanhélio pu’aka ñande rekovépe, ha péicha avei tuichave py’aguapy ha espiritualidad.
Pe Santa Cena ome’ẽ peteĩ ára jaguereko haĝua peteĩ añetegua tembiasakue espiritual jajepy’amongetávo pe pu’aka opororredimi ha oporomonguera hağua pe Salvador orekóva Hi’expiasiõ rupive. Peteĩ Mujeres Jóvenes líder, nda’aréi oikuaa hague pe mbarete ome’ẽvagui ñandéve ñañeha’ãramo ja’u pe Santa Cena jepy’amongetápe. Okumpli haĝua peteĩ mba’e ojeruréva pe Progreso Personal, omoĩkuri pe meta ojepy’amongeta haĝua umi himno ha umi oración sacramental ñe’ẽre.
Opaite semana ha’e ojapókuri peteĩ ñema’ẽ ipype Santa Cena aja. Imandu’ákuri umi jejavy ojapova’ekuére ha oñekompromete ojapo porãvetaha pe semana oúvape. Ome’ẽkuri aguije ikatu haguére ojapo mba’e porã ha ikatuha ipotĩ. Oma’ẽvo pe hembiasakue rapykuére, he’i, “Amomba’apokuri hína pe expiasiõ parte ha’éva arrepentimiento rehegua.”
Peteĩ domingo, oma’ẽ rire ipype, oñepyrũ oñandu vy’a’ỹ ha mba’evai. Ohechákuri ojapo jey jey hague peteĩchagua jejavy, semana ha semanáre. Ha katu upéi oñanduporã ohejareihague hína peteĩ parte imba’eguasúva pe Expiasiõpe: pe Cristo pu’aka oporomongueráva. Hesaráikuri hína opa umi ára pe Salvador oipytyvõramo guare chupe ha’e haĝua pe máva tekotevẽva ha’e, ha ome’ẽ haĝua servicio tuichaveva’ekue pe katupyry ha’e orekóvagui.
Péva iñakáme, ojepy’amongeta jey pe semana ohasava’ekue rehe. Ha’e he’i: “Peteĩ temiandu vy’a rehegua oike pe che mba’embyasýpe ahechávo Ha’e ome’ẽhague chéve heta araporã ha katupyry. Ahechakuaa aguijépe katupyry arekova’ekue ahecha haĝua pe che memby rekotevẽ hasýramo jepe ahecha haĝua kuri. Ahechákuri peteĩ ára añandúramo guare ndaiporiveimaha tiempo mba’eve ajapo haĝua, ha katu ikatúkuri aikuave’ẽ che amígape ñe’ẽ ome’ẽva mbarete. Ahechaukákuri avei paciencia peteĩ ára jepive chembojahéivape”.
Ombopaha he’ívo: “Ame’ẽpe aguije Tupãme aguereko haguére pe Salvador pu’aka omongueráva che rekovépe, añeñandu porãitereive pe arrepentimiento rehe, añeha’ãvakuri hína ajapo, ha péicha ahecha pe semana oútava esperanza oñembopyahúva reheve”.
Elder Melvin J. Ballard ombo’eva’ekue mba’éichapa pe Santa Cena ikatu ha’e peteĩ tembiasakue opomonguera ha opomopotĩva. Ha’e he’íkuri:
“Máva piko ñande apytépe nombohasa’asyiva’ekue ijespíritu pe ñe’ẽ, py’amongeta, térã mba’e ojejapóva rupi, domingo ha domingokue aja? Añete niko jajapoha mba’e upéi ñambyasýva ha jaipotávagui ñañe perdona…Mba’e tekotevẽva ikatu haĝua jahupyty perdón…[ha’e] ñañe arrepenti ñande pekadokuéragui ha jaha umi tapicha ñambopochyva’ekue rendápe ha jahupyty iperdón; upéi, jahava’erã pe mesá sacramentalpe ha upépe, jasegui añetéramokuri pe arrepentimiento rapekuéra, ñañe perdonáta ha pe ñemonguera espiritual oĝuahẽta ñane ángape…”
“Che ha’e testígo”, he’íkuri élder Ballard, “oĩha peteĩ espíritu pe Santa Cénape oñeme’ẽ aja, ombyakuvy’asýva pe ánga, pýgui akã meve; oñeñandu umi espíritu jekutukuéra okueraha ha pe mba’epohýi oñembovevyiha. Mayma tekove hekopotĩva ha ho’use añetévape ko tembi’u espiritual oñeme’ẽ angapyhy ha vy’a” 11
Ñane ánga ojekutupyre ikatu oñemonguera ha oñembopyahu ndaha’éi pe pan ha pe y ñanemomandu’águinte pe Salvador jehasa’asy, Hete ha Huguýre, ha katu umi mba’etechaukaha ñanemomandu’águi avei Ha’e ha’etaha akóinte ñane “pan de vida”12 ha “agua viva”13.
Ome’ẽ rire pe Santa Cena Nefita-kuérape, Jesús he’íkuri:
“Pe ho’úva ko mbujapégui, ho’u che retégui hi’ángape ĝuarã; ha omboy’úva ko víno, omboy’u che ruguýgui hi’ángape ĝuarã; ha hi’ánga araka’eve naiñembyahýi ni ndaijuheimo’ãi, ha katu henyhẽta.
“Ha opavave pe atyguasugua ho’u ha hoy’u rire, péina ápe, henyhẽ hikuái pe Espíritu-gui” 14.
Ko’ã ñe’ẽme, Cristo ñanembo’e pe Espíritu omonguera ha ombopyahuha ñane ánga. Jehovasa oñeprometéva Santa Cénape ha’e pe “akóinte [ikatuha] jaguereko Ijespíritu [ñanendive].” 15.
Ha’u jave pe Santa Cena, oĩ ára ouha jepi che apytu’ũme peteĩ cuadro omoha’ãngáva pe Salvador oikovejeyva’ekue oipysohápe hína ijyva, oĩramo guáicha ñande recibi haĝua Ijyva opohayhupávape. Che ahayhuete upe cuadro. Ajepy’amongetávo upévare oñeñembo’e ha oñeme’ẽ aja pe Santa Sena, che ánga oñemboyvate haimetégui ahendu pe Salvador ñe’ẽnguéra: “Ha péina ápe, che jyva poriahuvereko ojeipyso peẽme, ha opavave oúvape, che amoĝuahẽta; ha ojehovasapyre umi oúva che rendápe”16.
Umi orekóva Sacerdocio Aarónico orrepresenta pe Salvadorpe ombosako’i, ohovasa, ha ombohasa jave pe Santa Cena. Peteĩ sacerdocio orekóva oipyso jave ijyva oikuãve’ẽ haĝua ñandéve umi sagrado emblema, ha’e pe Salvador oipysóramo guáicha Ijyva poriahuvereko, ojerurévo opaite ñandekuérape japarticipa haĝua umi don iporãitéva mborayhu reheguáre oñemoĩva ñandéve ĝuarã pe I’sacrificio expiatório rupive: umi don arrepentimiento, perdón, angapyhy, ha ñeha’arõkuaa rehegua17.
Jajepy’amongeta vévo pe Santa Cena he’isévare, imarangatuve ha imba’eguasuvéta ñandéve ĝuarã. Upéva ha’e peteĩ túva 96 año orekóva he’iva’ekue ta’ýrape péva oporandúramo guare chupe, “Papá, ¿mba’ére piko eho pe tupaópe? Ndaikatúi ehecha ni ehendu, ha hasýma ndéve reku’e haĝua peteĩ tendágui ambuévape. Mba’ére piko eho pe tupaópe?”. Pe túva ombohovái, “Santa Cena-re. Aha ha’u haĝua pe Santa Cena.”
Ajerure opaite ñandekuéra jaha haĝua pe reunión sacramental-pe ñembosako’ípe jaguereko haĝua “peteĩ añetegua tembiasa espiritual, peteĩ santa comunión, peteĩ [ñane] ánga ñembopyahu” 18.
Aikuaa pe ñande Ru Yvagagua ha ñande Salvador oikoveha. Che’aguije araporã pe Santa Cena ome’ẽvare ñañandu haĝua pe Imborayhu ha japarticipa pe Espíritu-gui. Jesucristo rérape, Amén.