Ñañembosako’ívo Araka’eve Ndojeikuaái haguéicha
Linda K. Burton rupive
Presidenta General Sociedad de Socorro-gua
Ikatu ñañembosako’i jahupyty haĝua tekopotĩme umi ordenanza salvadora gota a gota ha ikatu ñañongatu umi konvénio hendive oĩva opa ñane korasõme.
Ore rajy imitãvéva ou rire ógape peteĩha ára mbo’ehaógui, aporandu chupe, “Mba’éichapa oho ndéve?”
Ha’e ombohovái, “Oho porã”.
Ha pe pyhareve ko’ẽme, amombáyvo chupe oho hağua mbo’ehaópe, ha’e ojejyvakrusa ha he’i’atã chéve, “Aháma ningo kuri kuehe pe mbo’ehaópe!” Ha’etévaicha chévenambosako’i porãi hague chupe, térã nda’eporãi hague pe mbo’ehaópe jeho ndaha’eiha mba’e peteĩ árante jajapóva ha katu oñeha’arõha chugui toho pe mbo’ehaópe cinco vece cada semana, áño, ha áñore.
Ñama’ẽvo pe principio he’ívare ñaimeva’erãha preparado, peñeha’ãmi pehecha chendive ko ta’angarechauka. Peẽ pe guapy hína pe templo cuarto Celestial-pe ha pehecha novia ha novio-kuéra oike ha osẽva kirirĩhaitépe oha’arõvo omenda pe tiempo ha eternidad-re. Peteĩ novia oike pe cuarto celestial-pe, ojopóre pe imborayhujára ndive. Ha’e omonde peteĩ ao sencillo ha katu iporãva témplope ĝuarã ha oguereko peteĩ pukavy kangy’asy hovápe. Ha’e oñakakarãi porã ha hendapeténte. Ha’e oguapy, omaña ijerére, ha upéi oĝuahẽ chupe tasẽse. Ha’etévaicha pe hesay oúva pe techaramo ha reverencia ha’e orekóva upe tenda oĩhame rehe ha avei pe ordenanza sagrada oha’arõvare chupe ha pe hekove mborayhujárare. Pe hova he’ívaicha, “Che aguyjete piko aĩhaguére Ñandejára rógape ko árape, aimévo añepyrũ haĝua peteĩ je’ói pe kompañero eterno ahayhuetéva ndive.” Ha’etévaicha oĩha ñembosako’ípe hetave ha ndaha’éi peteĩ evéntope ĝuarãnte.
Ore nieta rohayhuetéva nda’aréi oheja peteĩ nota chéve ĝuarã che akãngyta ári he’íva en parte: “Peteĩ mba’e che gustavéva aikévo témplope ha’e pe espíritu py’aguapy ha mborayhu rehegua oĩva upépe…Tapicha ikatu oho témplope oreko hağua inspirasiõ”.1 Ha’e he’i porã. Ñande ikatu jaguereko inspirasiõ ha rrevelasiõ témplope—ha avei pu’aka jaguerohasa haĝua umi jehasa’asy jeikovépe guáva. Umi o’aprendéva témplogui oparticipa memévo ogueraha haĝua ifamiliarkuéra réra ojapo haĝua bautismo ha confirmación, ombosako’íta chupe orrecibi haĝua ambue oredenanza, konvénio ha jehovasakuéra ijupe ĝuarã ha avei umi oĩva pe velo mboypýripe ĝuarã.
Elder Russell M. Nelson ombo’e, “Umi templo ojepreparaháicha yvyporakuérape ğuarã, umi yvyporakuéra ojepreparava’erã avei témplope ğuarã.”2.
Amoñe’ẽ jeývo Mormón Kuatiañe’ẽ Capitán Moroni rehe, che momandu’a peteĩ tuichavéva Moroni jehupytýre ha’eva’ekue ñembosako’iporã ome’ẽva Nefitakuérape, ogueropu’aka haĝua ñorairõguasu Lamanita-kuéra ehérsito ndive. Ha’e ombosako’i porãiteva’ekue itavayguakuérape ha péicha ñamoñe’ẽ: “Ha katu péina ápe, [Lamanita-kuéra] omomba’eguasuve haĝua, [Nefitakuéra]oñembosako’íkuri ojotopa haĝua hendivekuéra, araka’eve ndojeikuaái haguéicha.”3
Pe frase, “oñembosako’íkuri…araka’eve ndojeikuaái haguéicha”, añetehápe ohenói che atención..
Mba’éichapa ikatu ñañembosako’i porãve umi templogua jehovasa marangatúpe ĝuarã? Ñandejára ñanembo’e, “Ha jey, ame’ẽta peẽme peteĩ techaukarã opa mba’épe.”4 Jahechami techaukarã escritura-kuérape ñane pytyvõkuaáva ñañembosako’i porãve haĝua. Pe Moroni ñembosako’i oñemoĩ hağua ihayhu’ỹhakuéra rehe, oikotevẽkuri mba’apomeme ha jeroviareko kyre’ỹ; ha ko techaukarã oikotevẽta avei upéva.
Araka’eve nachekane’õmo’ãi pe parábola hechapyrãva Salvador ombo’eva’ekuégui umi cinco vírgen iñakãguapy ha cinco vírgen iñakãguapy’ỹvare. Ko parábola oñe’ẽramo jepe ñañembosako’i haĝua segunda venidape ĝuarã, ikatu avei ñambojoja péva ñañembosako’i haĝua templogua jehovasarã, ikatúva ha’e peteĩ banquete espiritual umi ojeprepara porãvape ĝuarã.
Mateo 25-pe ñamoñe’ẽ:
“Upéicha pe rréino yvagagua ha’éta umi diez virgencha, ojagarrávo imba’erendykuéra, osẽva’ekue ohuĝuaitĩ haĝua menarãme.
“Ha cinco umívagui iñakãguapy, ha cinco iñakãguapy’ỹva…
“[Umi] iñakãguapýva ojagarra ñandy iñandyrýpe imba’erendy reheve.
“Pe menarã hi’arémagui, opa umíva hopehyipa ha oke.
“Ha pyhare pytérupi oñehendu sapy’a peteĩ sapukái he’íva: Péina ápe, oúma pe menarã; peju pehuĝuaitĩ chupe.
“Upévo opa umi vírgen opu’ã, ha omyendy imba’erendykuéra.
“Ha pe iñakãguapy’ỹva he’i umi inañakãguapývape, Peme’ẽna oréve pene ñandy; ore mba’erendy niko oguétama.
“Ha katu umi iñakãguapýva ombohovái, he’ívo, Nahániri; ndohypytymo’ãi niko oréve ha peẽme ĝuarã: ha katu tapeho umi ovendévape, ha pejogua pende jehegui”.
“Ha oho aja hikuái ojogua haĝua, pe menarã oĝuahẽ; ha umi oĩmava upépe oike hendive pe mendahápe: ha pe okẽ oñemboty.
“Upéi ou avei umi ambue vírgen, he’ívo: “Señor, Señor, eipe’ána oréve.
“Ha katu ha’e ombohovái ha he’i: “Añetehápe che ha’e peẽme, peẽ ndacheikuaái”.5
Naimo’ãi oĩneha avave, umi ikorasõ porãva apytépe, oñandu’ỹva ñembyasy ko’ã kuña pyahu iñakãguapy’ỹvare. Ha ikatu oĩ ñandekuéra he’isénteva ambuekuérape, ¿Ndaikatúi piko peme’ẽnte chupekuéra, maymáva ovy’a haĝua?” Ha katu pejepy’amongeta pévare, Kóva ha’e peteĩ ñemombe’u pe Salvador omombe’uva’ekue, ha Ha’e niko pe ohenóiva umi cinco-pe “iñakãguapýva” ha umi cinco-pe “iñakãguapy’ỹva”.
Ñama’ẽramo pe parábola-re ha’eramoguáicha peteĩ techaukarã témplope ĝuarã ñembosako’i, pema’ẽ pe profeta ára-pahagua ombo’évare “pe ñandy preparasiõ espiritual rehegua ndaikatúi oñekomparti”6. Presidente Spencer W. Kimball oipytyvõ omyesakã haĝua mba’érepa umi cinco kuña pyahu “iñakãguapýva” ndaikatúikuri okomparti pe ñandy imba’erendy pegua umi iñakãguapy’ỹva ndive he’írõ guare: “Reunión sacramental-pe jeho omoĩve ñandy ñane mba’erendýpe, gota ha gota umi año pukukue aja. Ajúno, oración familiar, orientación familiar, umi ñande rete oipotávare pu’aka, pe evangélio ñembo’e, umi escritura ñemoñe’ẽ—opa tembiapo jajapóva kyre’ỹ ha ñe’ẽrendúpe ha’e peteĩ gota oñemoĩ véva ñande mba’eryrúpe. Tembiapo ojejapóva py’aporãme, ofrenda ha diezmo ñehepyme’ẽ, py’amongeta potĩ ha tembiapo …—ko’ãva avei, tuicha omoĩve pe ñandy ikatúva reheve pyhare pyte ñamyenyhẽ ñane mba’erendy oguepotáva.”7
¿Ikatu piko pehecha pe techaukaha ñembosako’i rehegua—gota a gota—ikatúva ñanepytyvõ ñapensávo mba’éichapa ikatu jajapoporãve ñane ñembosako’i jarrecibi haĝua umi ordenanza sagrada ñandéve ĝuarã ha ambuévape ĝuarã? Mba’e ambue michĩ ha hasy’ỹva piko ikatúne jajapo ñamoĩve haĝua ñandy espiritual iporãitéva ñane mba’erendy ñembosako’irãme?
Elder Richard G. Scott-gui ñañemoarandu pe “dignidad personal ha’eha peteĩ mba’e tekotevẽtava jahupyty haĝua templogua jehovasakuéra…Pe teko potĩ ojehupyty porãve peteĩ jeikove teko katúvape, ojeiporavo porã memévape, oñecentráva pe Maestro rekombo’ekuérape”8. Che ahayhu pe ñe’ẽ teko katu; Ja’e haĝua hekokatúva he’ise nañañemovãiva, ñaĩ meme, ha ñandejeroviapýva. Tuichaite ñe’ẽ piko ojehechauka haĝua pe principio tekopotĩ rehegua!
Pe Biblia Diccionariópe oñeme’ẽ momandu’a, “Pe ñande róga añónte ikatu oñembojoja témplore isagradokuépe.”9 Ikatu piko péicha ja’e ñande róga térã ñane apartamento-kuérare? Nda’aréi peteĩ mitãkuña porãite ou ore rógape. Aikuaágui ijoyke’y ou ramoite hague imisióngui, aporandu chupe mba’éichapa oñeñandu oguereko jeývo chupe hógape. Ha’e he’i oñeñandu porãha, ha katu, sapy’a py’a ha’e ojerureha toñembogue’imi pe música. Ha’e he’i, “Ha ndahe’éi ningo kuri música vaiete!” Ovaléne la pena ñandéve ĝuarã sapy’a py’a ñama’ẽ ñandejehe ha upéi jaikuaaporã ñande rogakuérapa ha’e hína tenda ñambosako’iva’ekue oñeñandu haĝua pe Espíritu. Ñambosako’íramo ñande rogakuéra ha’e haĝua tenda pe Espíritu oñemomaiteita hápe, ñaiméta preparada ñaime haĝua “ñande rogapeguáicha” jaike vove Ñandejára rógape.
Ñañembosako’ívo ñande jupe jaike haĝua tekopotĩme témplope ha jajeroviávo ñane konvenio temploguáre, Ñandejára oñohẽta “hetaiterei umi jehovasa”10 ñande’ári. Che buena amiga Bonnie Oscarson nda’aréi ombojere peteĩ escritura he’ívo, “ Heta ojejerure hápe, hetave oñeme’ẽta.”11 Amoporãite ningo péva! Jajúgui umi témplope jareko haĝua opave’ỹva jehovasa, nañanemondyiriva’erã tuichave mba’e ojejereruréramo jahupyty haĝua umi jehovasa. Elder Nelson ombo’e: “Templo ha’égui Ñandejára Róga, Ha’ete voi omoĩ umi mba’e tekotevẽva jaique haĝua. Jaike upépe Imbohupáicha. Jaguerekóramo peteĩ templo recomendación ha’e peteĩ privilegio ijojaha’ỹva ha peteĩ signo ohechaukáva ñane ñe’ẽrenduha Tupã ha Iprofetakuérare.”12
Umi atleta mundial ha umi estudiante universitario doctoradope oĩvagui oñeha’arõ ohasa hora, día, semana, mese ha jepe año pukukue oñembosako’i haĝua. Oñeikotevẽ opa dia-gua gota ñembosako’i rehegua ikatu haĝua ogana hikuái. Upéicha avei, oñeha’arõ umi ohupytysévagui pe exaltasiõ rréino celestial-pe, tovivi umi norma ijyvatevéva ñe’ẽrendu rehegua oúva jajapo meméramo pe virtud obediencia rehegua ára ha ára ha gota a gota.
Ñamoĩ meméramo jesarekópe ñandy, gota a gota, ñane mba’erendy espiritual-pe, jajapóvo ko’ã mba’e michĩ ha hasy’ỹva, ikatu jaguereko ñane mba’erendy “oĩporã ha hendýva”13 ñembosako’i hechapyrãva reheve. Che ména, ha’éva peteĩ presidente de estaca, nda’aréi he’íkuri ha’e akóinte oikuaaha peteĩ tapicha oĩramo preparado ha hekopotĩramo oike haĝua témplope, “ha’ekuéra ombohesapégui pe koty” oúramo hikuái ojerure pe irrecomendacion témplope ĝuarã.
Pe Kirtland templo oración dedicatoria-pe, Profeta José Smith ojerure Ñandejárape “opa umi yvypóra oikéva Ñandejára róga rokẽme toñandu nde pu’aka,….ikatu haĝua okakuaa hikuái nde pype, ha ohupyty pe Espíritu Santo plenitud,…ha toĩ preparado ohupyty haĝua opa mba’e tekotevẽva.”14
Che ñembo’e ñanderehe ha’e, pe témplope jeho taha’e hetave peteĩ jave evento-guinte.. Tañañembosako’i jajapo haĝua tekopotĩme umi ordenanza salvasiõ rehegua ha ñañongatu hağua ñanekorasõme umi konvénio hendive oúva. Upéicha jajapóramo, che aikuaa jakalifikataha jahupyty haĝua umi jehovasa oñeprometéva jaguerekopa hağua pe Espíritu Santo ha pe Ñandejára pu’aka ñande rógape ha ñande rekovépe. Jesucristo rérape, amén.