“Min Jilqa’ lil Dawn, Jilqa’ Lili”
Illum it-tfal isibu rwieħhom f’ bosta arranġamenti tal-familja differenti u kumplessi. Jeħtieġ li aħna nilħqu lil dawk li jħossuhom weħidhom, abbandunati jew fuq in-naħa l-oħra tal-ħajt.
Alla jħobb lit-tfal. Huwa jħobb lit-tfal kollha. Is-Salvatur qal: ”Ħalluhom lit-tfal iż-żgħar jiġu għandi … għax ta’ min hu bħalhom hija s-saltna tas-sema.”1
Illum it-tfal isibu rwieħhom f’ bosta arranġamenti tal-familja differenti u kumplessi.
Per eżempju, illum, in-numru ta’ tfal fl-Istati Uniti li jinsabu jgħixu b’ ġenitur wieħed biss huwa d-doppju li kien 50 sena ilu.2 U hemm ħafna familji li huma ferm anqas magħqudin fl-imħabba tagħhom lejn Alla u fir-rieda tagħhom li jżommu l-kmandamenti Tiegħu.
F’ din il-konfużjoni spiritwali li aktar ma tmur aktar qed tikber, l-evanġelju rrestawrat se jkompli jġorr l-istandard, l-ideal, il-mudell tal-Mulej.
“It-tfal huma intitolati li jitwieldu mir-rabta taż-żwieġ, u jittrabbew minn missier u omm li jonoraw il-wegħdi taż-żwieġ tagħhom b’ lealtà sħiħa. …
“Raġel u mara miżżewġin għandhom ir-responsabbiltà solenni li jħobbu u jieħdu ħsieb ta’ xulxin u ta’ wliedhom. … Il-ġenituri għandhom dmir sagru li jrabbu lil uliedhom fl-imħabba u s-sewwa, li jipprovdu għall-bżonnijiet fiżiċi u spiritwali tagħhom u li jgħallmuhom biex iħobbu u jservu lil xulxin u josservaw il-kmandamenti ta’ Alla.”3
Aħna nagħrfu li huma ħafna l-ġenituri tajbin ta’ kull twemmin li jieħdu ħsieb uliedhom b’ imħabba. Bi gratitudni nagħrfu li hawn ħafna familji fil-Knisja ta’ Ġesù Kristu tal-Qaddisin tal-Aħħar Jiem li huma magħmulin minn missier u omm ikkonvertiti għas-Salvatur, li huma ssiġillati bl-awtorità tas-saċerdozju u fil-familja tagħhom qed jitgħallmu biex iħobbu u jafdaw lil Missierhom tas-Smewwiet u lil Ibnu, Ġesù Kristu.
Appell għaż-Żgħażagħ
Illum nagħmel appell lil mijiet ta’ eluf ta’ tfal, żgħażagħ, u adulti żgħażagħ li mhux ġejjin minn dawn, ippermettuli t-terminoloġija, il-”familji perfetti”. Se nkellem mhux biss lil dawk iż-żgħażagħ li esperjenzaw il-mewt, id-divorzju jew in-nuqqas ta’ fidi tal-ġenituri tagħhom, iżda wkoll lil għexieren ta’ eluf ta’ ġuvintur u tfajliet minn madwar id-dinja li jgħożżu l-evanġelju mingħajr dik l-omm jew dak il-missier li jistgħu jakkumpanjawhom fil-Knisja.4
Dawn il-Qaddisin tal-Aħħar Jiem żgħażagħ jidħlu fil-Knisja b’ fidi kbira. Huwa jittamaw li fil-futur huma joħolqu f’ ħajjithom l-ideal tal-familja.5 Maż-żmien, huma jsiru parti importanti mill-forza missjunarja tagħna, mill-adulti żgħażagħ twajba tagħna u minn dawk li jinżlu għarkupptejhom quddiem l-artal biex jibdew il-familji tagħhom.
Sensittività
Aħna nkomplu ngħallmu dwar il-mudell li l-Mulej fassal għall-familji, iżda illum b’ miljuni ta’ membri, u bid-diversità li teżisti fit-tfal tal-Knisja, neħtieġu li nkunu aktar konsiderevoli u sensittivi. Il-kultura u l-lingwaġġ tal-Knisja tagħna jafu xi kultant ikunu verament partikolari. It-tfal tal-Primarja mhux se jieqfu jkantaw “Il-Familji Jistgħu Jkunu Flimkien għal Dejjem,”6 iżda meta huma jkantaw, “verament inħossni kuntent meta missieri jasal id-dar”7 jew “b’ missier u omm juruni t-triq,”8 mhux it-tfal kollha jkunu qed ikantaw dwar il-familja tagħhom.
Il-ħabiba tagħna Bette qasmet magħna esperjenza li kellha fil-knisja meta kellha 10 snin. Hija qalet: “L-għalliema tagħna kienet qed taqsam magħna lezzjoni dwar iż-żwieġ tat-tempju. Hija speċifikament staqsietni, ‘Bette, il-ġenituri tiegħek ma żżewġux fit-tempju, hux veru?’ Kemm l-għalliema kif ukoll il-kumplament tat-tfal ir-risposta kienu jafuha.” L-għalliema kompliet bil-lezzjoni tagħha u Bette ħassitha verament qalbha maqtugħa. Bette qalet, “Għaddejt iljieli sħaħ nibki. Meta sentejn wara kelli problemi f’ qalbi u ħsibt li kont sejra mmut, bdejt nippanikja għax ħsibt li kont se nibqa’ waħdi għal dejjem.
Il-ħabib tiegħi Leif kien jattendi l-knisja waħdu. Darba waħda, waqt li kien fil-Primarja, huwa ġie mistoqsi biex jagħmel diskors qasir. Huwa la kellu omm u lanqas missier fil-knisja biex jieqfu miegħu u jgħinuh jekk jinsa x’ kellu jgħid. Leif kien beżgħan għall-aħħar. Minflok ma’ imbarazza ruħu, huwa sempliċiment iddeċieda li jagħmel ftit xhur ‘il bogħod mill-knisja.
“Ġesù sejjaħ lejh tfajjel ċkejken, qiegħdu f’nofshom …
“U qal kull min jilqa’ tfajjel bħal dan minħabba f’ismi, ikun jilqa’ lili.”9
Qlub li Jemmnu u Doni Spiritwali
Dawn it-tfal u ż-żgħażagħ huma mberkin b’ qalb li temmen u b’ doni spiritwali. Leif qalli, “Kont nifhem li Alla kien Missieri u li Huwa kien jafni u jħobbni.”
Il-ħabiba tagħna Veronique qalet, “Hekk kif jiena tgħallimt il-prinċipji tal-evanġelju u studjajt il-Ktieb ta’ Mormon, kien bħallikieku jiena kont qed niftakar ħwejjeġ li diġà kont naf iżda kont insejthom.”
Il-ħabiba tagħna Zuleika hija minn Alegrete, il-Brażil. Għalkemm mhux ġejja minn familja reliġjuża, meta kellha 12-il sena hija bdiet taqra l-Bibbja u żżur il-knejjes lokali, tfittex biex issir taf dwar Alla. Wara li l-ġenituri tagħha, b’ nofs qalb, tawha l-permess, hija studjat mal-missjunarji, kisbet testimonjanza u tgħammdet. Zuleika qaltli: “Matul id-diskussjonijiet, ġejt murija stampa tat-Tempju ta’ Salt Lake u ġejt mgħallma dwar l-ordinanzi tas-siġill. Minn dak il-mument, jiena kelli x-xewqa li xi darba nidħol fid-dar tal-Mulej u jkolli familji eterna.”
Għalkemm is-sitwazzjoni fid-dinja tat-tfal taf ma tkunx waħda ideali, id-DNA spiritwali ta’ dawk it-tfal hija waħda perfetta, għaliex l-identità vera tagħhom hi li huma wlied Alla.
Il-President Thomas S. Monson qal: “Għinu lil ulied Alla jifhmu dak kollu li hu ġenwin u importanti f’ din il-ħajja. Għinuhom jiżviluppaw il-qawwa li jagħżlu dawk it-toroq li jżommuhom ‘il bogħod mill-periklu fi triqthom lejn il-ħajja eterna.”10 Ejjew niftħu daqsxejn aktar dirgħajna u qlubna. Dawn iż-żgħażagħ jeħtieġu l-ħin u t-testimonjanzi tagħna.
Brandon, li ngħaqad mal-Knisja ġewwa Kolorado meta kien qed jattendi l-iskola sekondarja, kellimni dwar dawk li għenuh kemm qabel kif ukoll wara l-magħmudija. Huwa qal: “Jien bdejt inkun fid-djar ta’ familji li għexu l-evanġelju. Dan wassalni biex nara standard li jien stess seta’ jkolli fil-familja tiegħi.”
Veronique, li twieldet fl-Olanda, kienet tattendi l-iskola flimkien mat-tifla tagħna Kristen meta aħna konna ngħixu fil-Ġermanja. Veronique nnutat: “L-istudenti li kienu membri tal-Knisja kellhom bħal speċi ta’ dawl madwarhom. Sirt naf li dak id-dawl kien minħabba l-fidi tagħhom f’ Ġesù Kristu u għaliex huma jgħixu t-tagħlim Tiegħu.”
Il-ħabib tiegħi Max tgħammed meta kellu tmien snin. Missieru ma kienx membru tal-knisja, u Max kien f’ idejh imurx il-knisja jew le.
Bħala żagħżugħ, wara li għamel ftit xhur ma jattendix, Max ħass li kellu jerġa’ lura l-knisja u kien determinat li xi darba l-Ħadd filgħodu kien se jattendi. Iżda l-kuraġġ beda jonqsu hekk kif beda riesaq lejn il-bieb ewlieni tal-knisja; beda jħossu verament nervuż.
Hemmhekk, wieqaf fil-bieb, kien hemm l-isqof il-ġdid. Max ma kienx jafu, u huwa ħassu ċert li l-isqof lanqas ma kien jaf lil Max. Hekk kif Max beda riesaq lejn il-bieb, wiċċ l-isqof xegħel u ħareġ idu u qallu, “Max, qed nieħu gost narak!”
“Hekk kif huwa tenna dak il-kliem”, Max qal, “ħassejt fija sentiment mill-isbaħ u kont naf li kont għamilt deċiżjoni tajba.”11
Li tkun taf isem dak li jkun tagħmel differenza kbira.
“U Ġesù talab sabiex it-tfal ċkejknin jittieħdu għandu. …
“U … ħadhom, wieħed wieħed, u berikhom u talab lill-Missier għalihom.
“U meta għamel dan huwa beka.”12
Żgħażagħ li Għadhom Ma Tgħammdux
Minħabba deċiżjoni tal-ġenituri, bosta żgħażagħ li jħobbu l-evanġelju jkollhom jistennew snin biex jitgħammdu.
Il-ġenituri ta’ Emily iddivorzjaw meta hija kienet għadha tifla, u hija ma kenitx ġiet mogħtija permess biex titgħammed qabel ma kellha 15-il sena. Il-ħabiba tagħna Emily titkellem b’ mod mill-aktar pożittiv dwar waħda mexxejja tat-Tfajliet li “dejjem għamlet dak li tista’ biex tgħinha ssaħħaħ it-testimonjanza tagħha.”13
Colten u Preston huma żewġ żgħażagħ li jgħixu ġo Utah. Il-ġenituri tagħhom iddivorzjaw, u huma ma ġewx mogħtijin permess biex jitgħammdu. Avolja ma kinux jistgħu jgħaddu s-sagrament, kienu huma li kull ġimgħa kienu jġibu l-ħobż. U avolja ma setgħux jidħlu t-tempju biex jitgħammdu flimkien maż-żgħażagħ meta bħala qasam kienu jmorru fit-tempju, iż-żewġ aħwa kienu jmorru jfittxu l-ismijiet tal-familja ħdejn it-tempju ġewwa ċ-ċentru tal-istorja tal-familja. L-aktar influwenza li tista’ tgħin liż-żgħażagħ iħossuhom inklużi hija l-influwenza ta’ żgħażagħ twajba oħra.
Il-Presbiteru Joseph Ssengooba
Se nagħlaq bl-eżempju ta’ ħabib ġdid, xi ħadd li ltqajna miegħu ftit ġimgħat ilu meta konna qed inżuru l-Missjoni ta’ Lusaka fiż-Żambja.
Il-Presbiteru Joseph Sengooba huma mill-Uganda. Missieru miet meta kellu seba’ snin. Meta kellu disa’ snin, b’ omm u qraba li ma setgħux jieħdu ħsiebu, huwa spiċċa waħdu. Meta kellu 12-il sena, huwa ltaqa’ mal-missjunarji u tgħammed.
Joseph kellimni dwar l-ewwel jum tiegħu fil-knisja: “Wara l-laqgħa tas-sagrament, ħsibt li kien sar il-ħin biex immorru d-dar, iżda l-missjunarji introduċewni ma’ Joshua Walusimbi. Joshua qalli li kien se jkun il-ħabib tiegħi, u hu tagħni kopja ta’ Children’s Songbook biex ma nidħolx fil-Primarja idi f’idi. Fil-Primarja, Joshua poġġa siġġu ieħor eżatt ħdejh. Il-president tal-Primarja stedinni biex immur quddiem u talab lill-klassi kollha tal-Primarja biex ikantawli flimkien ‘Jien Iben Alla.’ Ħassejtni verament speċjali.”
Il-president tal-fergħa ħa miegħu lil Joseph għand il-familja ta’ Pierre Mungoza u dik saret id-dar tiegħu għall-erba’ snin ta’ wara.
Tmien snin wara meta l-Presbiteru Joseph Sengooba beda l-missjoni tiegħu, b’ sorpriża kbira dak li ġie msejjaħ biex iħarrġu kien il-Presbiteru Joshua Walusimbi, it-tifel li għenu tant biex iħossu komdu fl-ewwel jum tiegħu fil-Primarja. U l-president tal-missjoni tiegħu? Huwa l-President Leif Erickson, it-tfajjel ċkejken li għamel żmien ma jattendix il-Primarja daqs kemm beda jibża’ li jitkellem fil-knisja. Alla jħobb lil uliedu.
It-Tfal Ġew Jiġru
Meta ftit ġimgħat ilu, Kathy u jiena konna l-Afrika, morna nżuru Mubji-Mayi, fir-Repubblika Demokratika tal-Kongo. Peress li l-kappella ma kenitx kbira biżżejjed għall-2,000 membru, aħna ltqajna barra l-bieb taħt tinda kbira tal-plastik li kienet tistrieħ fuq zkuk tal-qasab. Hekk kif bdiet il-laqgħa, stajna naraw għadd kbir ta’ tfal iħarsu lejna, iżommu mal-bsaten fuq in-naħa ta’ barra tal-ħajt tal-metall li kien jinsab idawwar il-propjetà. Kathy qaltli b’ leħen baxx, “Neil, trid tistieden lit-tfal biex jidħlu ġewwa?” Jiena mort inkellem lill-President Kalonji tad-Distrett li kien bilqiegħda fuq quddiem u tlabtu jekk setax jistieden lit-tfal li kien hemm barra l-ħajt biex jiġu jingħaqdu magħna.
B’ sorpriża kbira għalija, wara l-istedina tal-President Kalonji, it-tfal mhux biss ġew iżda ġew jiġru—kienu aktar minn 50, forsi xi 100—xi wħud minnhom b’ ħwejjeġ imqattgħin u ħafjin iżda lkoll kemm huma bi tbissima ħelwa u wiċċhom jixgħel.
Jiena verament ħassejtni kommoss b’ din l-esperjenza u rajtha bħala simbolika tal-bżonn tagħna li nilħqu liż-żgħażagħ li jħossuhom weħidhom, abbandunati jew fuq in-naħa l-oħra tal-ħajt. Ejjew naħsbu ftit dwarhom, nilqgħuhom, ngħannquhom magħna, u nagħmlu dak kollu li nistgħu biex insaħħu l-imħabba tagħhom lejn is-Salvatur. Ġesù qal, “Kull min jilqa’ tfajjel bħal dan … f’ismi, ikun qed jilqa’ lili.”14 F’ isem Ġesù Kristu, amen