ຄວາມປາດຖະໜາອັນແທ້ຈິງຂອງຈິດວິນຍານ

ໂດຍ ແຄໂຣ ແອັຟ ມັກຄອງກີ

ທີ່ປຶກສາທີໜຶ່ງໃນຝ່າຍປະທາງອົງການຍິງໜຸ່ມສາມັນ

ທຸກໆເວລາຂອງການອະທິຖານທີ່ລ້ຳຄ່າ ສາມາດເປັນເວລາທີ່ສັກສິດ ທີ່ຈະໄດ້ຢູ່ນຳພຣະບິດາຂອງເຮົາ, ໃນພຣະນາມຂອງພຣະບຸດ, ໂດຍອຳນາດຂອງພຣະວິນຍານບໍລິສຸດ.

ໃນລະຫວ່າງການດີ້ນລົນຂອງຊີວິດມະຕະ, ເຮົາບໍ່ໄດ້ຖືກປະຖິ້ມໃຫ້ຢູ່ຕາມລຳພັງ ເພື່ອຈະສຳເລັດວຽກງານຂອງເຮົາ, ທີ່ຈະຕໍ່ສູ້ຄົນດຽວໃນການສູ້ຮົບຂອງເຮົາ, ທີ່ຕ້ອງປະເຊີນໜ້າກັບຄວາມຍາກລຳບາກ ຫລື ຊອກຫາຄຳຕອບຢູ່ຄົນດຽວ. ພຣະເຢຊູຄຣິດໄດ້ສິດສອນດ້ວຍຄຳອຸປະມາວ່າ “ຕ້ອງໝັ່ນອະທິຖານຢູ່ສະເໝີ, ແລະ ບໍ່ໃຫ້ທໍ້ຖອຍໃຈ.” ພຣະອົງໄດ້ບອກຂ້າພະເຈົ້າເຖິງຕຸລາການຄົນໜຶ່ງ ຜູ້ທີ່ບໍ່ໄດ້ໃຫ້ກຽດພຣະເຈົ້າ ແລະ ບໍ່ມີຄວາມຫ່ວງໃຍຫຍັງສຳລັບຄົນອື່ນ. ແມ່ໝ້າຍຄົນໜຶ່ງໄດ້ມາຫາເພິ່ນເລື້ອຍໆ, ທູນຂໍຄວາມຍຸດຕິທຳຕໍ່ຕ້ານຜູ້ປໍລະປັກ. ເປັນເວລາດົນນານຕຸລາການບໍ່ໄດ້ໃຫ້ຄວາມບັນເທົາແນວໃດເລີຍ. ແຕ່ ເປັນເພາະຜົນທີ່ຕາມມາຂອງການທູນຂໍຢ່າງມີສັດທາ ແລະ ຢ່າງສະໝ່ຳສະເໝີ, ທີ່ໃນທີ່ສຸດ ຕຸລາການກໍໄດ້ຄິດວ່າ, “ເພາະແມ່ໝ້າຍຜູ້ນີ້ກວນໃຈເຮົາຕະຫລອດມາ, ເຮົາຈະໃຫ້ຄວາມຍຸດຕິທຳແກ່ນາງ, ຖ້າບໍ່ດັ່ງນັ້ນ ນາງກໍຈະໝັ່ນມາຫາເລື້ອຍໆ.”

ແລ້ວພຣະເຢຊູໄດ້ອະທິບາຍວ່າ:

“… ພຣະເຈົ້າຈະບໍ່ໂຜດຄວາມຍຸດຕິທຳແກ່ຜູ້ທີ່ໄດ້ຖືກເລືອກໄວ້ຂອງພຣະອົງບໍ, ຊຶ່ງຮ້ອງຫາພຣະອົງທັງກາງເວັນ ແລະ ກາງຄືນນັ້ນ … ?

“ເຮົາບອກເຈົ້າທັງຫລາຍວ່າ ພຣະອົງຈະໂຜດຄວາມຍຸດຕິທຳໃຫ້ແກ່ພວກເຂົາໂດຍໄວ.”

ແລະ ແລ້ວພຣະຜູ້ເປັນເຈົ້າກໍຖາມຄຳຖາມນີ້ວ່າ: “ແຕ່ເຖິງປານນັ້ນ ເມື່ອບຸດມະນຸດສະເດັດມາ ພຣະອົງຈະພົບຄົນທີ່ມີສັດທາຢ່າງນີ້ຢູ່ໃນໂລກຢູ່ບໍ?”¹

ການອະທິຖານແມ່ນສຳຄັນຕໍ່ການພັດທະນາສັດທາ. ເມື່ອພຣະຜູ້ເປັນເຈົ້າສະເດັດມາອີກ, ພຣະອົງຈະພົບເຫັນຜູ້ຄົນ ທີ່ຮູ້ວິທີອະທິຖານດ້ວຍສັດທາ ແລະ ຜູ້ທີ່ຕຽມພ້ອມແລ້ວທີ່ຈະໄດ້ຮັບຄວາມລອດບໍ? “ເພາະວ່າທຸກຄົນທີ່ຮ້ອງອອກພຣະນາມຂອງພຣະຜູ້ເປັນເຈົ້າ ກໍໄດ້ລອດ.”² ພວກເຮົາເປັນລູກໆທີ່ຮັກຂອງພຣະບິດາເທິງສະຫວັນ, ແລະ ເຮົາອາດຊື່ນຊົມກັບການຕິດຕໍ່ສ່ວນຕົວກັບພຣະອົງເມື່ອເຮົາອະທິຖານ “ດ້ວຍໃຈຈິງ, ດ້ວຍເຈດຕະນາອັນແທ້ຈິງ, ໂດຍມີສັດທາໃນພຣະຄຣິດ”³ ແລະ ແລ້ວລົງມືປະຕິບັດ ໃຫ້ສອດຄ່ອງກັບຄຳຕອບທີ່ເຮົາໄດ້ຮັບໂດຍການກະຕຸ້ນຂອງພຣະວິນຍານບໍລິສຸດ. ດ້ວຍສັດທາ ເຮົາອະທິຖານ, ເຮົາຮັບຟັງ, ແລະ ເຮົາເຊື່ອຟັງ ເພື່ອວ່າເຮົາອາດຈະໄດ້ຮຽນຮູ້ ທີ່ຈະກາຍເປັນໜຶ່ງດຽວກັນກັບພຣະບິດາ ແລະ ພຣະບຸດ.⁴

ການອະທິຖານດ້ວຍສັດທາເຮັດໃຫ້ເປັນໄປໄດ້ ທີ່ຈະໄດ້ຮັບພອນອັນຮຸ່ງເຫລື້ອມ ທີ່ຖືກສົ່ງມາຈາກສະຫວັນ. ພຣະຜູ້ຊ່ວຍໃຫ້ລອດໄດ້ສອນວ່າ:

“ຈົ່ງໝັ່ນຂໍແລ້ວເຈົ້າຈະໄດ້ຮັບ, ຈົ່ງໝັ່ນຊອກຫາແລ້ວເຈົ້າກໍຈະໄດ້ພົບ; ຈົ່ງໝັ່ນເຄາະແລ້ວຈະມີຜູ້ໄຂໃຫ້ເຈົ້າ:

“ດ້ວຍວ່າ ທຸກຄົນທີ່ຂໍກໍຈະໄດ້ຮັບ, ທຸກຄົນທີ່ຊອກຫາກໍຈະໄດ້ພົບ, ແລະ ທຸກຄົນທີ່ເຄາະກໍຈະມີຜູ້ໄຂໃຫ້.”⁵

ຖ້າຫາກເຮົາຫວັງທີ່ຈະໄດ້ຮັບ, ເຮົາຕ້ອງໝັ່ນຂໍ, ແລະ ໝັ່ນເຄາະ.ໃນການຄົ້ນຫາຄວາມຈິງ ໂຈເຊັບ ສະມິດ ໄດ້ອ່ານຈາກພຣະຄຳພີວ່າ, “ຖ້າຄົນໃດໃນພວກເຈົ້າຂາດສະຕິປັນຍາ ກໍໃຫ້ຜູ້ນັ້ນທູນຂໍຈາກພຣະເຈົ້າ ຜູ້ໂຜດປະທານໃຫ້ແກ່ຄົນທັງປວງດ້ວຍພຣະກະລຸນາ ແລະ ບໍ່ກ່າວຕິ.”⁶ ໃນການອະທິຖານດ້ວຍສັດທາຂອງເພິ່ນ, ທ້ອງຟ້າໄດ້ເປີດອອກ. ພຣະບິດາເຈົ້າ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ສະເດັດລົງມາໃນລັດສະໝີພາບ ແລະ ໄດ້ກ່າວຕໍ່ ໂຈເຊັບ ສະມິດ, ໄດ້ເລີ່ມຕົ້ນຂອງຍຸກສະໄໝຂອງຄວາມສົມບູນແຫ່ງເວລາ. ສຳລັບເຮົາ, ການປິ່ນປົວທີ່ມະຫັດສະຈັນ, ການປົກປັກຮັກສາທີ່ມີພະລັງ, ຄວາມຮູ້ແຫ່ງສະຫວັນ, ການໃຫ້ອະໄພທີ່ປົດປ່ອຍ, ແລະ ຄວາມສະຫງົບທີ່ລ້ຳຄ່າຄືບັນດາຄຳຕອບທີ່ມີມາ ເມື່ອເຮົາສະແດງ “ຄວາມປາດຖະໜາອັນແທ້ຈິງຂອງຈິດວິນຍານ”⁷ ດ້ວຍສັດທາ.

ເຮົາອະທິຖານຫາພຣະບິດາຂອງເຮົາໃນພຣະນາມຂອງພຣະເຢຊູຄຣິດ, ໂດຍອຳນາດຂອງພຣະວິນຍານບໍລິສຸດ, ສະນັ້ນຈຶ່ງຮຽກຮ້ອງເຖິງສະມາຊິກທັງສາມອົງຂອງຝ່າຍພຣະເຈົ້າ ໃນການອະທິຖານຂອງເຮົາ.

ເຮົາອະທິຖານຫາພຣະບິດາເທິງສະຫວັນຂອງເຮົາ ແລະ ຫາພຣະອົງພຽງອົງດຽວ ເພາະວ່າພຣະອົງຄື ພຣະເຈົ້າໃນສະຫວັນ, ຜູ້ບໍ່ມີຂອບເຂດ ແລະ ນິລັນດອນ, ຈາກເປັນນິດເຖິງເປັນນິດ … , ຜູ້ສ້າງຟ້າສະຫວັນ ແລະ ແຜ່ນດິນໂລກ ແລະ ທຸກສິ່ງທີ່ຢູ່ໃນນັ້ນ. ໃນຖານະພຣະຜູ້ສ້າງຂອງເຮົາ, ພຣະອົງໄດ້ປະທານພຣະບັນຍັດ ວ່າເຮົາຄວນຈະຮັກ ແລະ ຮັບໃຊ້ພຣະອົງ, ພຣະເຈົ້າທີ່ຊົງພຣະຊົງຢູ່ ແລະ ຈິງແທ້ແຕ່ອົງດຽວ, ແລະ ວ່າເຮົາຄວນນະມັດສະການແຕ່ພຣະອົງເທົ່ານັ້ນ.⁸

ເມື່ອທ່ານອະທິຖານຫາພຣະບິດາເທິງສະຫວັນດ້ວຍສັດທາ, “ພຣະອົງຈະປອບໂຍນທ່ານໃນຄວາມທຸກຂອງທ່ານ, … [ແລະ ທ່ານຈະ] ຊື່ນຊົມຢູ່ດ້ວຍຄວາມຮັກຂອງພຣະອົງ.”⁹ ປະທານເຮັນຣີ ບີ ໄອຣິງ ໄດ້ແບ່ງປັນວ່າ ຄຳອະທິຖານຂອງພໍ່ຂອງເພິ່ນ ຕອນຕໍ່ສູ້ຢ່າງທໍ້ຖອຍ ກັບໂຣກມະເລັງ ໄດ້ສອນເພິ່ນເຖິງຄວາມສຳພັນສ່ວນຕົວທີ່ເລິກຊຶ້ງ ລະຫວ່າງພຣະເຈົ້າ ແລະ ລູກໆຂອງພຣະອົງວ່າ:

“ເມື່ອຄວາມເຈັບປວດຮຸນແຮງຂຶ້ນຫລາຍ, ໃນຕອນເຊົ້າ ພວກຂ້າພະເຈົ້າຈະເຫັນເພິ່ນຄຸເຂົ່າຢູ່ຂ້າງຕຽງ. ເພິ່ນອ່ອນເພຍຫລາຍ ເກີນທີ່ຈະຂຶ້ນເທິງຕຽງຄືນ. ເພິ່ນໄດ້ບອກພວກຂ້າພະເຈົ້າວ່າ ເພິ່ນໄດ້ອະທິຖານ ທູນຖາມພຣະບິດາເທິງສະຫວັນຂອງເພິ່ນວ່າ ເປັນຫຍັງເພິ່ນຕ້ອງທົນທຸກທໍລະມານຫລາຍແທ້ ເມື່ອເພິ່ນໄດ້ພະຍາຍາມທີ່ຈະເປັນຄົນດີ. ເພິ່ນໄດ້ບອກວ່າຄຳຕອບທີ່ມີເມດຕາໄດ້ມີມາວ່າ: ‘ພຣະເຈົ້າຕ້ອງການບຸດທັງຫລາຍທີ່ກ້າຫານ.’

“ແລະ ສະນັ້ນເພິ່ນຈຶ່ງໄດ້ອົດທົນຈົນເຖິງທີ່ສຸດ, ໄວ້ວາງໃຈວ່າ ພຣະເຈົ້າໄດ້ຮັກເພິ່ນ, ໄດ້ຮັບຟັງເພິ່ນ, ແລະ ຈະຄ້ຳຊູເພິ່ນ. ເພິ່ນໄດ້ຮັບພອນທີ່ໄດ້ຮູ້ຕັ້ງແຕ່ຕົ້ນ ແລະ ບໍ່ເຄີຍລືມເລີຍວ່າ ພຣະເຈົ້າທີ່ຊົງຮັກ ຄົງສະຖິດຢູ່ໃກ້ໆດັ່ງການອະທິຖານ.”¹⁰

ເຮົາອະທິຖານໃນພຣະນາມຂອງພຣະເຢຊູຄຣິດ ເພາະຄວາມລອດຂອງເຮົາຢູ່ໃນພຣະຄຣິດ, ແລະ “ໃນຜູ້ອື່ນຄວາມລອດບໍ່ມີ ດ້ວຍວ່າ, ບໍ່ມີນາມອື່ນໃດທົ່ວໃຕ້ຟ້າ ທີ່ຖືກປະທານແກ່ມະນຸດ ເພື່ອໃຫ້ເຮົາທັງຫລາຍໄດ້ຮັບຄວາມລອດ.”¹¹ ເຮົາມາຫາພຣະບິດາໃນພຣະນາມອັນສັກສິດຂອງພຣະເຢຊູຄຣິດ¹² ເພາະວ່າ ພຣະອົງເປັນຜູ້ວິງວອນແທນເຮົານຳພຣະບິດາ, ແລະ ພຣະອົງເປັນຜູ້ອ້ອນວອນແກ້ຕາງເຮົາ.¹³ ພຣະອົງໄດ້ທົນທຸກ, ຫລັ່ງໂລຫິດ, ແລະ ໄດ້ສິ້ນພຣະຊົນ ເພື່ອຈະໃຫ້ລັດສະໝີພາບແດ່ພຣະບິດາຂອງພຣະອົງ, ແລະ ການອ້ອນວອນທີ່ມີເມດຕາຂອງພຣະອົງ ແທນເຮົາ ເປີດທາງໃຫ້ເຮົາແຕ່ລະຄົນໄດ້ຮັບຄວາມສະຫງົບສຸກໃນຊີວິດນີ້ ແລະ ຊີວິດທີ່ເປັນນິດໃນໂລກທີ່ຈະມາເຖິງ. ພຣະອົງບໍ່ຢາກໃຫ້ເຮົາທົນທຸກທໍລະມານດົນໄປກວ່າ ຫລື ອົດທົນກັບບັນຫາຕ່າງໆນາໆ ທີ່ເກີນຄວາມຈຳເປັນ. ພຣະອົງປະສົງໃຫ້ເຮົາຫັນໄປຫາພຣະອົງ ແລະ ປ່ອຍໃຫ້ພຣະອົງຊ່ວຍເຮັດໃຫ້ພາລະໜັກຂອງເຮົາເບົາລົງ, ເພື່ອປິ່ນປົວຈິດໃຈຂອງເຮົາ, ແລະ ຊຳລະໃຫ້ຈິດວິນຍານຂອງເຮົາສະອາດ ຜ່ານອຳນາດແຫ່ງການຊຳລະໃຫ້ສະອາດ. ເຮົາບໍ່ຕ້ອງນຳໃຊ້ພຣະນາມຂອງພຣະອົງແບບທ່ອງຈຳ ແລະ ໃຊ້ຊ້ຳຢ່າງຫຍາບຄາຍ. ການອະທິຖານທີ່ຈິງໃຈທີ່ໄດ້ກ່າວອອກໃນພຣະນາມອັນສັກສິດຂອງພຣະເຢຊູຄຣິດ ເປັນການສະແດງອອກເຖິງຄວາມຮັກທີ່ອຸທິດຕົນ, ຄວາມກະຕັນຍູນິລັນດອນ, ແລະ ຄວາມປາດຖະໜາທີ່ໝັ້ນຄົງຂອງເຮົາ ທີ່ຈະອະທິຖານໃນທຳນອງດຽວກັນດັ່ງທີ່ພຣະອົງໄດ້ອະທິຖານ, ທີ່ຈະເຮັດເໝື່ອນດັ່ງພຣະອົງໄດ້ເຮັດ, ແລະ ກາຍເປັນຄົນດັ່ງທີ່ພຣະອົງຊົງເປັນຢູ່.

ເຮົາອະທິຖານໂດຍອຳນາດຂອງພຣະວິນຍານບໍລິສຸດ ເພາະວ່າພຣະອົງໄດ້ ທູນຂໍໂດຍພຣະວິນຍານ ຕາມພຣະປະສົງຂອງພຣະເຈົ້າ.¹⁴ ເມື່ອເຮົາອະທິຖານດ້ວຍສັດທາ, ພຣະວິນຍານບໍລິສຸດ ສາມາດຊີ້ນຳຄວາມນຶກຄິດຂອງເຮົາ ເພື່ອວ່າຄຳວາຈາຂອງເຮົາຈະສອດຄ່ອງກັບພຣະປະສົງຂອງພຣະເຈົ້າ. “ຢ່າໄດ້ຂໍເພື່ອທ່ານຈະໄດ້ໃຊ້ຈ່າຍເພື່ອຄວາມໄຄ່ຂອງທ່ານ, ແຕ່ໃຫ້ຂໍດ້ວຍຄວາມໝັ້ນຄົງອັນບໍ່ຫວັ່ນໄຫວ, ເພື່ອທ່ານຈະບໍ່ໄດ້ຍອມຕໍ່ການລໍ້ລວງ, ແຕ່ວ່າເພື່ອທ່ານຈະໄດ້ຮັບໃຊ້ພຣະເຈົ້າອົງທີ່ທ່ຽງແທ້ ແລະ ຊົງພຣະຊົນຢູ່.”¹⁵

“ມັນບໍ່ພຽງແຕ່ສຳຄັນ ທີ່ເຮົາມາຮູ້ວິທີທີ່ຈະອະທິຖານ, ແຕ່ ມັນຍັງສຳຄັນເທົ່າກັນ ວ່າເຮົາຈະຮູ້ວິທີທີ່ຈະໄດ້ຮັບຄຳຕອບຕໍ່ຄຳອະທິຖານຂອງເຮົາ, ທີ່ຈະຫລິງເຫັນ, ທີ່ຈະຮູ້ສຶກຕົວ, ທີ່ຈະໄດ້ເຫັນດ້ວຍສາຍຕາທີ່ແຈ່ມແຈ້ງ ແລະ ເຂົ້າໃຈດ້ວຍເຈດຕະນາທີ່ແຈ້ງຊັດ ເຖິງພຣະປະສົງຂອງພຣະເຈົ້າ ແລະ ຈຸດປະສົງທີ່ກ່ຽວກັບເຮົາ.”¹⁶

ປະທານໄອຣິງ ໄດ້ແບ່ງປັນວ່າ: “ຂ້າພະເຈົ້າໄດ້ເຫັນຄຳອະທິຖານຖືກຕອບ. ຄຳຕອບແມ່ນແຈ່ມແຈ້ງດີ ເມື່ອສິ່ງທີ່ຂ້າພະເຈົ້າຢາກໄດ້ກໍຖືກລະເລີຍ ໂດຍຄວາມຕ້ອງການທີ່ມີພະລັງ ເພື່ອຈະຮູ້ສິ່ງທີ່ພຣະເຈົ້າປະສົງ. ແລ້ວ ຄຳຕອບທີ່ມາຈາກພຣະບິດາເທິງສະຫວັນທີ່ຊົງຮັກ ຈະສາມາດຖືກກ່າວອອກໄປສູ່ຈິດໃຈ ໂດຍສຽງເບົາໆ ແລະ ສາມາດຖືກບັນທຶກໄວ້ໃນໃຈ.”¹⁷

ເມື່ອພຣະຜູ້ຊ່ວຍໃຫ້ລອດໄດ້ເຂົ້າໄປໃນສວນເຄັດເຊມາເນ, ຈິດວິນຍານຂອງພຣະອົງໄດ້ໂສກເສົ້າສະຫລົດໃຈຫລາຍ, ແມ່ນແຕ່ຈົນເຖິງຄວາມຕາຍ. ໃນຄວາມທໍລະມານຂອງພຣະອົງ, ພຣະອົງດຽວທີ່ພຣະອົງສາມາດເພິ່ງໄດ້ແມ່ນ ພຣະບິດາຂອງພຣະອົງເທົ່ານັ້ນ. ພຣະອົງໄດ້ອ້ອນວອນວ່າ, “ຖ້າເປັນໄປໄດ້ ຂໍໃຫ້ຈອກແຫ່ງຄວາມທົນທຸກທໍລະມານນີ້ ເລື່ອນພົ້ນໄປຈາກລູກທ້ອນ.” ແຕ່ພຣະອົງໄດ້ກ່າວເພີ່ມອີກວ່າ, “ແຕ່ເຖິງຢ່າງໃດກໍດີ, ຂໍຢ່າໃຫ້ເປັນໄປຕາມໃຈປາດຖະໜາຂອງ ລູກ, ແຕ່ໃຫ້ເປັນໄປຕາມຄວາມປະສົງຂອງພຣະອົງ.”¹⁸ ເຖິງແມ່ນວ່າບໍ່ມີບາບ, ພຣະຜູ້ຊ່ວຍໃຫ້ລອດຖືກເອີ້ນໃຫ້ “ຮັບຄວາມເຈັບປວດ ແລະ ທຸກທໍລະມານຕາມທາງຂອງເນື້ອໜັງ ເພື່ອພຣະອົງຈະໄດ້ຮັບເອົາບາບຂອງຜູ້ຄົນຂອງພຣະອົງ, ເພື່ອພຣະອົງຈະໄດ້ລຶບການລ່ວງລະເມີດຂອງພວກເຂົາ ຕາມອຳນາດແຫ່ງການປົດປ່ອຍ.”¹⁹ ພຣະອົງໄດ້ອະທິຖານສາມເທື່ອ, “ພຣະບິດາເອີຍ, ຂໍໃຫ້ເປັນໄປຕາມຄວາມປະສົງຂອງພຣະອົງ.”²⁰ ຈອກນັ້ນບໍ່ໄດ້ຖືກເລື່ອນພົ້ນໄປ. ໃນການອະທິຖານທີ່ຖ່ອມຕົວ ແລະ ຊື່ສັດ, ພຣະອົງໄດ້ຮັບກຳລັງໃຫ້ກ້າວໄປໜ້າ ແລະ ສຳເລັດພາລະກິດແຫ່ງສະຫວັນຂອງພຣະອົງ ທີ່ຈະຕຽມພ້ອມສຳລັບຄວາມລອດຂອງເຮົາ, ວ່າເຮົາອາດກັບໃຈ, ເຊື່ອ, ເຊື່ອຟັງ, ແລະ ໄດ້ຮັບພອນແຫ່ງນິລັນດອນ.

ຄຳຕອບທີ່ເຮົາໄດ້ຮັບໃນການອະທິຖານ ອາດບໍ່ເປັນສິ່ງທີ່ເຮົາປາດຖະໜາໃຫ້ມັນເປັນ. ແຕ່ໃນຊ່ວງເວລາທີ່ມີບັນຫາ, ຄຳອະທິຖານຂອງເຮົາຈະກາຍເປັນຄວາມຊ່ວຍເຫລືອແຫ່ງຄວາມຮັກ ແລະ ຄວາມເມດຕາອັນລະອຽດອ່ອນ. ໃນການອ້ອນວອນຂອງເຮົາ, ເຮົາອາດຖືກເຮັດໃຫ້ເຂັ້ມແຂງເພື່ອກ້າວໄປໜ້າ ແລະ ບັນລຸທຸກສິ່ງທີ່ເຮົາຖືກແຕ່ງຕັ້ງໃຫ້ເຮັດ. ຕໍ່ໄພ່ພົນຂອງພຣະອົງ ທີ່ດຳລົງຊີວິດໃນວັນເວລາທີ່ອັນຕະລາຍ, ພຣະຜູ້ເປັນເຈົ້າບອກໃຫ້ເຮົາສະບາຍໃຈ … ; ເພາະວ່າເນື້ອໜັງທັງປວງຢູ່ໃນພຣະຫັດຂອງພຣະອົງ; ໃຫ້ເຮົາສະຫງົບ ແລະ ຮູ້ວ່າພຣະອົງຄືພຣະເຈົ້າ.”²¹

ບໍ່ວ່າເຮົາຈະອະທິຖານເປັນສ່ວນຕົວ, ກັບຄອບຄົວຂອງເຮົາ, ຢູ່ທີ່ໂບດ, ໃນພຣະວິຫານ, ຫລື ວ່າເຮົາຈະຢູ່ບ່ອນໃດກໍຕາມ; ບໍ່ວ່າເຮົາຈະອະທິຖານດ້ວຍຫົວໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ ສະແຫວງຫາການໃຫ້ອະໄພ, ສະຕິປັນຍາເທິງສະຫວັນ ຫລື ແມ່ນແຕ່ຄວາມເຂັ້ມແຂງທີ່ຈະອົດທົນຕໍ່, ເຮົາອະທິຖານດ້ວຍຫົວໃຈທີ່ເຕັມປ່ຽມ ສະເໝີ, ອອກມາເປັນການອະທິຖານຫາພຣະອົງຢູ່ສະເໝີ ເພື່ອຄວາມຜາສຸກຂອງພວກທ່ານ, ແລະ ເພື່ອຄວາມຜາສຸກຂອງຄົນທີ່ຢູ່ອ້ອມຮອບພວກທ່ານນຳອີກ. ຄວາມປາດຖະໜາທີ່ຈິງໃຈທີ່ໄດ້ມອບໃຫ້ໃນພຣະວິນຍານແຫ່ງຄວາມກະຕັນຍູ ສຳລັບພອນທີ່ໄດ້ຮັບຢ່າງລົ້ນເຫລືອ ແລະ ຄວາມກະຕັນຍູສຳລັບບົດຮຽນຂອງຊີວິດ ທີ່ໄດ້ປູກຝັງສັດທາທີ່ໝັ້ນຄົງໃນພຣະຄຣິດ ໄວ້ໃນຫົວໃຈຂອງເຮົາ, “ຄວາມສະຫວ່າງຂອງຄວາມຫວັງ,” “ຄວາມຮັກຂອງພຣະເຈົ້າ ແລະ ຂອງມະນຸດທັງປວງ.”²²

ການອະທິຖານເປັນຂອງປະທານຈາກພຣະເຈົ້າ. ເຮົາບໍ່ຕ້ອງຮູ້ສຶກວ່າຫລົງທາງ ຫລື ໂດດດ່ຽວດຽວດາຍ. ຂ້າພະເຈົ້າເປັນພະຍານວ່າ ທຸກໆເວລາຂອງການອະທິຖານທີ່ລ້ຳຄ່າ ສາມາດເປັນເວລາທີ່ສັກສິດ ທີ່ຈະໄດ້ຢູ່ນຳພຣະບິດາຂອງເຮົາ, ໃນພຣະນາມຂອງພຣະບຸດ, ໂດຍອຳນາດຂອງພຣະວິນຍານບໍລິສຸດ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.