2002
Loloma: Cecere ka Tawamudu
Julai 2002

Loloma: Cecere ka Tawamudu

Eder Gene R. Cook

Mai na Le Vitusagavulu

Ni da vakalevutaka na noda vakasama ka ivakarau vakataki Koya, na ivakarau ni tamata vakayago e na lako tani ka na sosomitaka na loma kei na nanuma i Karisito.

O ikemuni na taciqu kei na ganequ lomani, au gadreva vakalevu me dua ga na ka e na aua oqo me’u vakadinadinataka, na noqu ivakadinadina sara ga vakaiau, e na loloma ni Kalou me baleti au, baleti kemuni, ka baleta na tamata kecega. Ko cei me veirauti vinaka na veika e rawata me na qai rawa ni vakamacalataka na titobu ni nona vakavinavinaka ni sa kila na loloma ni Kalou? Au sa vakalougatataki dina e na vuqa sara na yabaki noqu tiko vata kei kemuni ka’u sa kunea rawa kina na loloma dina i Karisito me vakatekivu tiko mai vei kemuni. Au rui dinau tu vakalevu vei kemuni ka vakakina vua na Kalou.

IVAKAMACALA NI LOLOMA CECERE

Na Turaga e kaya ni loloma cecere sa ikoya “na loloma dina i Karisito,”1 sa ikoya na ka “marautaki duadua vei ira na tamata,”2 “sa isolisoli levu duadua ni Kalou” “uasivi”3 ka “sega ni mudu.”4

Me vaka ni rui dredre na vakamacalataka na loloma cecere, ia e rawarawa ni vakilai e na nodra bula ko ira era taukena tu.

  • E dua na bui ni gone lokiloki, ka sa qase sara e dau tauri niusipepa tiko ni yakavi, e kila vinaka tu o koya ni na dau vakauti koya mai na makubuna tagane ka dauveisoliyaka na niusipepa ki na nona vale e veisiga, ekeri, erau daudabe vata se tekiduru ka dauvakavulici koya e na masu… .

  • E dua na tina, ka sotava na dredre ni bula vakailavo kei na kunekune dredre ni lewe ni manumanu, era kurabuitaka e lewe levu sara ni sa rawa tikoga vua me dau maroroi taba ni toa.

  • E dua na tagane e a sota kaya e dua na veivakanakuitaki e matana levu, ia e a ciqoma e na yalomalua.

E sega beka ni iulutaga ni veivakaraitaki oqori na loloma cecere, na sega ni nanumi koya vakaikoya, ka sega ni vakaqara e dua na ka me saumi lesu mai kina? Na noda itovo kece sara vakalou e vaka me drodro vata mai ka vakavolivolita na ka e dua oqo.5 Era na taukena beka na tamata kecega na isolisoli ni loloma, ia na loloma uasivi e soli walega vei ira era muri Karisito e na yalodina.6

Na kaukauwa sara ga ni Kalou e na kune e na Nona ivakarau vakalou.7 Na kaukauwa ni matabete e tauvuloni tu e na veivakarau oqori.8 Eda vakasaqara na veivakarau oqori, vakabibi na loloma cecere, na loloma dina iKarisito.9

DAUVEIVAKARUSAI NI LOLOMA KEI NA VAKACEGU

Ia sa tiko na tevoro, na dauveivakarusai ni loloma oqo, ka vakaisosomitaka e na cudru kei na veimecaki.10 Ko Viliame na noqu itokani e a vaka o ya na ka e vakila: veimecaki. E kena irairai ni dua na ka e yaco, sa vaka me nona cala tiko na Turaga—a tauvimate, na mate, na gone dautalaidredre ki na ivakavuvuli, na malumalumu vakatamata, na masu “sega ni saumi”—na veika kece oqo sa vaka me vakayalo kaukauwataki koya. Na nona cudru e loma, ka vaka me dautotolo wale sara e na dua ga na tiki ni gauna lailai na nona dau vakaraitaka, sa vaka me vakatabakiduataki vua na Kalou, ko ira na wekana, kei koya vakaikoya. Mai lomana e kauta mai na sega ni veivakadinati, yalodredre, qaciqacia, veivala, sega na inuinui, loloma kei na veidusimaki. E daurarawa sara!

Ko ira na dauveivakarusai ni vakacegu e a vakamatabokotaki Viliame ki na nona kauwaitaki koya na Kalou. E sega ni rawa me kunea se vakila na loloma ni Kalou. E sega ni raica rawa, vakauasivi e na veigauna butobuto vaka o ya, ni Kalou e vakavutuniyautaka mai na nona vakalougatataki koya, ka sa yaco tikoga. Me kena isosomi, e a vakalesuya na cudru me loloma. E sega beka ni vaka o ya na ivakarau ni noda rai e na so na gauna? Kevaka sara mada ga eda vakaicovi vakalailai ga e na loloma, e na tiko sara e cake na levu ni nona lomani keda ko Koya. E lomani keda taumada o Koya.12

SOTAVA NA RARAMA E VAKAINAKI: SA KOvUtA KECE TIKO NA LOLOMA UASIVI

Ia oqo, ko Beti na noqu itokani vaKarisito e kena veibasai sara ga. A sota kaya e vuqa sara na ka me vaka a sotava ko Viliame, ia baleta ni a vakila na loloma ni Kalou,13 a sotava kina na veivakararawataki e na yaca ni iVakabula, ka vakaivotavota e na nona ituvaki vakalou,14 io, e a rawata kina na vakabauta e titobu sara e na loloma ni Kalou, salavata kei na kaukauwa me walia kina na cava ga e na lako mai.

E a tubu na nona lomani ira na tani. E vaka me dau liu na nona vosoti ira na tani. A vulica rawa na sala me vukei ira kina me ra vakila na nona loloma. A vulica ko koya ni loloma veiwaseitaki sai koya na loloma e na vakalevutaki.

Me iotioti ga, e a vulica ko koya me lomani koya vakalevu, ka dauloloma, yalomalua ka dauvosota vakadede. Sa mai oti na nona daugu me vakavinakataki koya ga ka sa tekivu me lomani koya sara e na sala me vaka e lomani koya kina na Kalou. Na vakavotukanataki ni kena irairai sa yaco me Nona irairai baleti koya.

KILA, CIQOMA KA VEISOLIYAKA NA LOLOMA NI KALOU

E rawa vakacava , e na gauna ko ya me da “vakaisulutaki [keda] e na loloma … ni vinaka sara kei na vakacegu”?15 Me’u na wasea vei kemuni e tolu na vakatutu.

  1. Kila na Nona Loloma. “Masuta … e na yalomudou taucoko”16 me baleta na isolisoli oqo. Me vakayacori e na yalomalumalumu kei na yalo e raramusumusu mo na vakasinaiti kina e na inuinui kei na loloma mai vua na Yalo Tabu, vakaikoya sara ga. E na vakatakilai Karisito vei iko.17

    Sa tiki tiko ni isolisoli ni loloma uasivi na kena rawa ni kilai na liga ni Turaga ka vakila na Nona loloma e na veika kece e vakavolivoliti keda. E na so na gauna, e na sega ni rawarawa me kune na nona lomani keda na Turaga e na veika taucoko eda sotava, baleta ni o Koya e vinaka sara, ka dua na Dausolisoli e tawakilai. Ko ni na vakasaqaqara tiko e na nomuni bula taucoko mo ni na kunea kina na ligana kei na veisolisoli e sa solia tu vei kemuni baleta na Nona veikilai, na sala ni yalomalua ni kedra soli na isolisoli veivakurabuitaki oqori.

    Me da vakasamataka vata mada e na gauna bibi oqo na veisolisoli vakaturaga ka tarava: na lagilagi ni veibulibuli kece, na vuravura,18 na lomalagi; na nomuni vakila na loloma kei na reki, Nona dausausaumi loloma, veivosovosoti, kei na isau ni masu e sega ni wili rawa; nodra soli mai ko ira noda daulomani; kei, e muri sara, na iloloma levu duadua vei ira kece—a iloloma nei Tamada ni Nona sorovaka na Luvena, o koya ka vinaka duadua e na loloma cecere, sa ikoya sara ga na Kalou ni loloma.19

  2. Ciqomi ni Nona Loloma e na Yalomalua. Ni vakavinavinakataka na isolisoli, ka vakauasivi, me baleti Koya e solia na isolisoli.20 Na vakavinavinaka dina sa ikoya na rawa ni raica e na yalomalua, vakila, kei na kena ciqomi sara mada ga.21 Vakavinavinaka sa dua na sala ni vakalesui na loloma vua na Kalou. Kila na Ligana, tukuna Vua,vakayatuyatutaka Vua na nomuni lomani Koya.22 Ni sa yaco mo ni kilai Koya dina na Turaga, ko ni na kunea e dua na veikilai, veiwekani tabu e yavutaki e na veivakabauti. Ko ni na kila ni kila vinaka tu o Koya na nomuni vakacudrucudru ia,23 e na yalololoma e na sauma tu ga vei kemuni e na loloma.

    Ciqoma. Vakila. E sega ni veirauti mo ni kila ga ni Kalou e lomani kemuni. Me kilai tikoga na isolisoli e na veisiga. E na qai yaco me dau veivakatataki cake vakalou e na nomuni bula taucoko. Veivutuni. Biuta tani na veika vakavuravura mai na nomuni bula, oka kina na cudrucudru. Dauciqoma tikoga na ivakabokoci ni nomuni ivalavala ca, ka mo ni na lewa vakadodonu na nomuni gagadre me vakasinaiti e na loloma.

  3. Veisoliyaka na Nona Loloma. Na Nona dausaumi keda mai na Turaga e dausinai e na loloma. E sega beka ni rawa me da sauma vua e na yalololoma, kei na yalo dina ni loloma? E solia vei keda na loloma vakaikuri (se yalovinaka) me loloma. Ni tubu na noda talairawarawa, eda na ciqoma na loloma vakaikuritaki (se yalovinaka)e na loloma eda vakalesuya Vua.28 Solia Vua na nomuni ivakarau sa vakavinakataki, e na gauna e na rairai mai kina mo ni sa na vakataki Koya.

    Me vaka na tamata e imatai ni nona vakayalia nona vakasama e na loloma, ka veisoliyaka na nona kila na Kalou, na tamata, se ko iau, e dua na iwiliwili levu ni ivakarau e lako vakaidina mai vua na Yalo Tabu. Oqori na ka dina me baleta na ivakarau kecega vakalou. Na dodonu ni kila e yavutaki mai na dua na tamata ka rairai liu duadua na nona vakalevutaka na veikila oqori mai vua na Yalo Tabu. Vakavo ga ni ko ni vakila na loloma, e na sega ni rawa mo ni na veisoliyaka na loloma dina vei ira na tani. Na Turaga e a tukuna vei keda me da veilomani me vaka ka’u sa lomani kemudou,30 ia nanuma: me lomani, mo ni lomani dina.31

NA VUA NI ISOLISOLI NI LOLOMA CECERE

Kemuni na taciqu kei na ganequ, me vaka e dua na ivakadinadina uasivi i Karisito, au tukuna tale na noqu ivakadinadina vei kemuni, ni loloma veivakauqeti ni Kalou sa baleti keda yadudua sara ga. Vakatorocaketaka na isolisoli oqori mai vua na Kalou e na kauta mai na loma vou, na loma savasava, kei na tubu tikoga ni loloma kei na vakacegu. Ni da vakalevutaka na noda vakasama ka ivakarau vakataki Koya, na ivakarau ni tamata vakayago e na lako tani ka na sosomitaka na loma kei na nanuma i Karisito.32 Eda na yaco me da vakataki Koya, ni oti eda sa na qai ciqomi Koya vakaidina.33

E lomani kemuni na parofita ni Turaga, e vakakina na veika kece oqo, kemuni na taciqu. Me vakalougatataki kemuni tikoga na loloma ni lomada … ka vakacolati tawamudu [Vua].”34 “E na vakamamadataka na Kalou na [noda] icolacola e na vuku ni reki ni Luvena”35 sa noqu masu e na yaca iJisu Karisito, emeni.

Idusidusi

  1. Moronai 7:47.

  2. Raica 1 Nifai 11:22–23; 8:10–12.

  3. 1 Nifai 15:36.

  4. Moronai 8:17.

  5. “Sa tiko e dua na itovo savasava, ivakarau, se ivakavuvuli, o koya, kevaka e vakamareqeti ka bulataki mai vei ira na Yalododonu, e na vakadinadinataka na veivakabulai vei ira e udolu vakaudolu. Au vosa me baleta na loloma uasivi, se loloma, ka dauyaco kina na veivosovosoti, na vosota vakadede, na loloma, kei na vosota” (Brighan Young, Deseret News, Jan. 1860, 353).

  6. Raica Moronai 7:48.

    E tiko beka e dua na duidui ni loloma uasivi kei na loloma? Na Turaga e dau vakaduiduitaki rau e na levu sara na gauna, me vaka na V&V 4:5. E so era tukuna ni loloma uasivi e oka kina na lomasoli—na loloma vagauna. E rarai beka na loloma uasivi sa ikoya me da loloma me vaka na vakabauta me da veivakabauti. Ko irau ruarua na vakabauta kei na loloma uasivi e cakacakataki, na cakacaka kei na lomasoli. Na loloma uasivi e ologi kina na Nona lomani keda , noda lomani Koya, na loloma Vakarisito me baleti ira na tani.

  7. Raica V&V 84:19–24.

  8. Raica V&V 121:41–46.

  9. “Na tamata e vakasinaiti e na loloma ni Kalou, e na sega ni vakataratutu nona vakalougatataka nona matavuvale duadua ga, ia e na tete yani ki vuravura taucoko, sa tu vakarau me vakalougatataka na mata tamata kecega.” (Joseph Smith, History of the Church 4:227).

  10. E na gauna e yaco kina na rarawa e na noda bula, sa dau tu sara ga na tevoro me vakacudruya na loma ni tamata, ia na Turaga e na dauloloma tikoga. E na veivakararawataki vata ga o ya “vuqa vei ira era sa yalo kaukauwa … e vuqa tale era sa yalomalumalumu e na vuku ni veika rarawa era a sota kaya” (Alama 62:41). Sa dua na ivakaraitaki uasivi dina ni sala eda sauma kina na rarawa.

  11. E so na dauveivakarusai ni loloma ni tamata kei na vakacegu, okati kina ia e sega ni vakaiyalayala ki na: rere, veivakavinakataki, kocokoco, sega ni vakarorogo, vakatitiqa, vakacudrucudru, vuvu, sega ni lewa dodonu, sega ni vakabauta, sega ni vosota, daulelewa, mosi ni dauveisusu, dokadoka, veivala, vosa kudrukudru, vaqara rogolevu, veisisivi, lasulasu. Na veika kece oqo e itovo ni tamata vakayago, ka sega ni tamata va-Karisito.

  12. Raica Joni 4:19.

  13. Raica V&V 138:13. Na noqu itokani a kila ni rarawa e na vukei koya me:

    vakadinadinataki koya (raica Eparama 3:24–25; V&V 98:13–14); vulica me digidigi kina mai na vinaka kei na ca (raica 2 Nifai 2:18); vulica ni veivakalougatataki e dauyaco ni sa oti na veivakatovolei (raica V&V 58:2–4); vulica na talairawarawa, vosota, kei na vakabauta (V&V 105:6; Mosaia 23:21; Roma 5:3–5); rawata na veivosoti ni ivalavala ca (raicaIlamani 15:3; V&V 132:50, 60; 95:1).

  14. Raica 2 Pita 1:1–8.

  15. V&V 88:125.

  16. Moronai 7:48.

  17. Raica Moronai 8:25–26; Roma 5:5; 2 Nifai 26:13.

  18. RaicaMosese 6:63; Alama 30:44.

  19. Raica 1 Joni 4:8.

  20. Raica V&V 88:33.

  21. Raica Alama 5:26.

  22. Raica Alama 26:16; Moronai 10:3.

  23. Raica V&V 133:52–53.

  24. Raica Alama 34:38.

  25. Raica 1 Joni 2:15–17.

  26. Raica Mosaia 4:11–12.

  27. Raica Alama 38:12.

  28. Raica V&V 93:12–13, 20.

  29. Raica 1 Joni 3:1–3.

  30. Raica Joni 13:34; V&V 112:11.

  31. “Qarauna na dokadoka ka kakua ni vaqara na rogolevu, mo tiko e cake mai vei ira na kena vo, ia cakacakataka na nomuni dui vinaka” (Joseph Smith, iVakavuvuli ni Parofita o Josefa Simici, sel. Joseph Fielding Smith [1976], 155).

  32. Raica 1 Korinica 2:16; 2 Korinica 10:5.

  33. Na tamata o ya e sa vinaka vakaidina ka sa vakataki Karisito. Na ka ko ni vakasamataka vinaka e lomamuni me baleti Karisito e na vakadeitaka na cava o kemuni, ka na vakadeitaka vakalevu na nomuni itovo e na yaco mai … Mai na nomuni digitaki koya me noda sa veirauti vinaka sara ga, ka da na tauyavutaka vei keda na gagadre me da vakataki koya, ka veitokani kei koya” (David O. McKay, in Conference Report, Apr. 1951, 93, 98). Kevaka ko ni nanumi Koya vakabalavu, ko ni sa na vakatekivu mo ni na vakataki Koya Kevaka sa balavu na nomuni vakataki Koya tiko, ko ni na yaco vakaidina mo ni sa na vakataki Koya.

  34. Alama 37:36.

  35. Alama 33:23.