Vakila na Loloma ni Turaga
Kevaka e rawa vei au me’u vakayacora e dua na ka vei ira vakayadua na marama e na Lotu, sa ikoya me ra vakila na loloma ni Turaga e na nodra bula.
Kemuni na taciqu kei na ganequ, e vakaoqo e dua na ivosavosa: “Kevaka ko ni via tubu ciqoma na veigauna talei mo ni vakayacora na veika ko ni sega ni rawa ni dau vakayacora.” Au kila deivaki tu ni’u na tubu. Me’u na vakavinavinakataki Sis Smoot, Sister Dew, kei Sister Jensen mada e na itavi cecere eratou sa vakayacora vei keda, na lewe ni Lotu. Au cavuta na noqu vakavinavinaka vei rau na noqu daunivakasala, Kathy kei Anne, e na nodrau lomasoli me rau veiqaravi. Erau marama dina ni vakabauta.
Au vakavinavinaka vakalevu nikua vei tinaqu kei tamaqu, e na nodrau vakavulici au kei na nodrau loloma, e na nodrau vakavulici au me’u cakacaka. Au kila na cakacaka. Au vakavinavinakataka na watiqu. E itokani totoka dina o Jim. Au lomani koya ka’u taleitaka na nona veitokoni. E turaga vinaka vakaidina. Au vakavinavinakataki iratou na luve ikeirau tagane kei iratou na dui watidratou, ka ra sa dau vukei iratou me ratou turaga vinaka cake. Au vakavinavinakataki ira na makubui keirau. E na bogi yani o ya keirau a gole yani ki na nona vale e dua vei iratou na luvei keirau tagane me la’ki tukuni vua na veikacivi oqo. Era sa moce na luvedrau. Au kaya yani vei Brett kei Angie, “au sa kacivi me’u peresitedi raraba ni iSoqosoqo ni Veivukei.” E a kaya o Brett, “O iko? Na Peresitedi ni iSoqosoqo ni Veivukei e na Lotu taucoko?” Eratou sega beka ni kalougata dina na luvemu? E a tukuna o koya na ka sara ga e tarai au tiko e vica na macawa sa oti.
E na noa ni keirau yaco yani ki vale, au a ciqoma e dua na itukutuku mai vua na luvequ o David kei na watina o Jennifer, mai Belgium. E kaya mai kina o David, “Nau, au kila ni ko na rawata. O sa guilecava beka, ia e dau tiko na nomu tiki ni volatabu ka dau kabi tu e na kato ni waililiwa ka kaya vakaoqo, ‘ia ko iau kei ira na noqu lewe ni vale, keitou na qaravi Jiova.’ (Josua 24:5). E kaya, “Au dau dolava ka sogota vakavuqa na kato ni waililiwa, ka’u kila ni drau dau muria kei Ta na tikina ko ya.” Au vakavinavinaka vakalevu e na vukudratou na luvequ.
Au vakavinavinakataki ira na marama e na Lotu ka ra a vakarautaki au, ka ra dau lomani au, ka ra dau vakatavulici au, ka ra dau vakabauti au. Au vakavinavinakataki ira na daukaulotu e na Tabana ni Daukaulotu na England London South, e na nodra ivakarau vinaka, e na nodra dau maroroya na nodra veiyalayalati. Au vakavinavinakataki ira na Yalododonu e Peritania ka ra dau lomani au ka wiliki au me’u lewe ni vanua cecere ko ya.
Ia oqo, kemuni na taciqu kei na ganequ au sega ni kila se cava au kacivi kina, ia au kila ga ni’u a sa kacivi. Au yalataka vei kemuni na noqu loloma, noqu veitokoni, ka’u kerea mo ni ciqoma na noqu vulica tale tikoga na noqu itavi.
Au sureti kemuni na goneyalewa itabaqase e na Lotu, se vanua cava ko ni tiko kina mo ni rai ki na iSoqosoqo ni Veivukei ka kila ni ko ni gadrevi kina, ka vakakina ni keimami lomani kemuni, ka ni rawa me noda vata e dua na gauna talei. Ni yalovinaka ni gole mai vei keimami. Me vaka e vola ko Wallace Stegner me baleti ira na Momani, “Era vakasakiti na nodra marama.” Era vakakina nikua! Au kila ni lomani ira na marama e na Lotu na Turaga, kevaka e rawa vei au me’u vakayacora e dua na ka vei ira yadua na marama e na Lotu oqo, sa ikoya me ra vakila na loloma ni Turaga e na nodra bula e veisiga. Au a sa vakila na loloma ni Turaga; ka’u vakavinavinakataka vakalevu. Au vakavinavinakataka na vakacegu au vakila.
Au vakadinadinataki Jisu Karisito na noqu iVakabula. Au kila ni bula tiko. Au a sa vakila na nona loloma; au a sa vakila na nona veivosoti. Au nanuma e dua na goneyalewa kaulotu ni sa mai vakacegu e na kaulotu. E na iotioti ni nona ivakadinadina e a kaya kina, “Au a lako mai e na dua na ilesilesi me kila kina na Tamada Vakalomalagi ni’u lomani Koya, au vakaraitaka na noqu vakavinavinaka vua, ka vakakina me’u sauma lesu vua,” qai kaya tale, “Au mai binia vakalevu vua na dinau mai na veigauna sa sivi ni se bera ni’u gole mai.”
Au vakadinadinataka na kaukauwa ni dua na parofita ni Kalou, o Peresitedi Gordon B. Hinckley, ka’u vakadinadinataki koya, kei na nona loloma kei ira kece sara na parofita era nuidei tu me baleti au. Au vakadinadinataka na veika oqo e na yaca i Jisu Karisito, emeni.